ดารา 4

ลอง อาโมวแซ กาซูห ดูอี โทม โฆรห เฌาพรา

1อาโมวแซ วี ต็อห, “อึย เบ ดูอี อีซาเรลัะ, ดอ ตี นี แตห เบ โทม ปี ดี ดัม เฌาพรา ดี เบ บอ โทม ดารา เฌาพรา ปี ดี มาโนว โอว ดี เบ. แตห เบ บอ โบง โดบ, แกวะ แตห เบ ยัม บอ แตห เบ ปึอน ดี บึง มืง ปี ดี ดัว เฌาพรา ดี เบ. อัน มูห เฌาพรา ปี กรึบ ฆูณ ดัง เบ. 2โฆรห ปี ดี กาลาง โอว ดี เบ ตี, เบ แกวะ ปัว, แกวะ แตห อึณ หลึอม. เบ บอ แกวะ ดึห เลห, แกวะ แตห อึณ โยม. แตห เบ โทม ซีคยา ดารา เฌาพรา ปี กาลาง โอว ดี เบ นี. อัน มูห เฌาพรา ปี กรึบ เบ.

3เบ มืร แฮะ ฮอต ยึร แปะ แฮะ โบง เฌาพรา ดี โดง จืร บาลัะเบอูรา ตึอน. อัน เฌา แฮะ ปยาต แวน เฆ ดูอี ดอน อี อี กรึบ เฌา บาลัะ ดี โดง จืร เบดเบอูรา. 4เบ อี กอย กาดึก กาด็อะ ดี เฌาพรา ปี กรึบ เบ บอ ตู แวน อัน, เบ มืร ตู ยัม, แฮะ มึห อาซาก กอ ฌัม ดอ ตี นี.

5ดารา ปี กาลาง เฌาพรา ดี โอว, โอว มืร แฮะ วี มาโนว เบ ดอน โมยว, แตห เบ โบง โดบ ดารา ตี ดอ ฮาว กอย เบ แคง มืง ปี ดี อาบ เฌาพรา ดี เบ. 6แตห เบ โดบ ซีคยา ดารา ตี. เซ เบ โบง ปาย ตี เฆ ดูอี อาโมยว เฮา, เฆ ดี ยึร ลอง มึห เบ อางยาน บอ ลอง แบน โมยว แบน โมยว อี กาหลูห ซีคยา ดี น็อห เบ. ดอ ยึร เฆ ลอง ปี ดัม เฌาพรา ตี, เฆ ดี บอ ต็อห, ดูอี อาโมยว ตาง นี, เฆ มูห ดูอี อี มึห อางยาน, อี นับ แบน โมยว แบน โมยว. 7เฆ ดูอี อาโมยว เฮา, เฆ ปี บอ ตาง แคะ เหมา มืร, เฆ ยี ตู มึห เฌาพรา อี กอย เครียะ เฆ, แตห อึณ ปี เฌาพรา ปี กรึบ เอ อี กอย เครียะ เอ ดอ ซาคึร เอ ดี อัน. 8เฆ ดูอี อาโมยว เฮา ตี, เฆ ปี บอ ตาง แคะ เหมา มืร, เฆ ยี ตู มึห ดารา อี ปี ดารา ปี มาโนว โอว ดี เบ อาตึร นี.

9แตห เบ ซาดีก, แกวะ แตห เบ ปีว ลอง แปะ แฮะ ยึร เบ. แตห อึณ กอย แคง น็อห เบ บอ โจว เบ, แตห เบ วี มาโนว ลอง อัน ตี ดี หลูกหลาน เบ. 10แตห เบ โหลห ดอ แฮะ กอย เบ ดี อาต เฌาพรา ปี กรึบ เบ ดี นอน ซีนาย ตึอน. ดอ อัน ตี เฌาพรา แฮะ ต็อห ดี โอว, ‘แดะ ตัห กาฌูะ กาดึม ดูอี เฆ ตี, แตห เฆ โทม โฆรห โอว, แตห เฆ เฮน ดี โรวเซ โอว เซเซ บอ โจว เฆ ดอ กอย เฆ แคง มืง นี, แตห เฆ บอ นับ ดี วี มาโนว บอ หลูกหลาน เฆ.’ 11แตห เบ โหลห ดอ แฮะ ตัห กอย เบ ดี ดัง นอน อี มึห เงา อี กูห จา กอ ฌัม ฆางหราว, มึห บอ อึณอูะ ว็อง อี ปลึก นอน ตี. 12ปัน ตี เฌาพรา แฮะ กาลาง โฆรห ดี เบ, แตห อึณ เลห แคง เงา ตี. เบ มืร แฮะ ยึร โฆรห ตี, ยี ตู ยึร อารึบ เฌาพรา. อึณ มึห มี โฆรห. 13เฌาพรา แฮะ กาลาง ดี เบ ลอง ปี กาแซณ อัน ดี เบ อี มูห ดารา ฆึร ณ็อง. อัน เฌา มืร แฮะ จัร เบ, แตห เบ โบง โดบ ซีคยา ดารา ตี. แฮะ ฮอต, อัน แฮะ แดม ดึก ดี มาว อา ดีพลาง ตึอน. 14ดอ อัน ตี เฌาพรา แฮะ จัร โอว มาโนว เบ ดารา แบน โมยว แบน โมยว ปี โลว โบง โดบ เบ แคง มืง โดง ดี ฮาว กอย เบ ตี.

ลอง อารึบ ราง

15ดอ กอย เบ ดี ดัง นอน ซีนาย ตึอน, เบ แฮะ ยึร โฆรห เฌาพรา อี แฮะ เลห แคง ฆางหราว. เบ ยี ตู ยึร อารึบ อัน เฌา. โคว อัน ตี, แตห เบ ซาดีก. 16แกวะ แตห เบ โบง หมาบ โกบ โบง เบ อารึบ ราง. อึณ บอ มูห อารึบ อีบึณ, อารึบ อีมาย 17บอ อารึบ โดว ซัดดาวา อี ฮาว แดง กาดาย, อารึบ มาซีม อี บึณ แคง เบลณ, 18อารึบ โดว อี นับ ดี มึอน บอ โดว อี หลัน หลีน, ฮาว ดี กาดาย บอ อารึบ มาฆา อี กอย แคง อึม, แกวะ แตห เบ โบง อารึบ ฌึร ตี ดอ เหมา. 19เซ เบ ยอด แคง เบลณ บอ ยึร ซีแง, มาเฆียน, ซีมัณ บอ โตต ดอน โมยว อี กอย แคง ฆางหราว, แกวะ แตห เบ กรึบ, แกวะ แตห เบ โดบ ปี กาซูห อี เฮา ดี เบ. โคว, ฌึร ตี ดอน โมยว เฌาพรา ปี กรึบ เบ แฮะ โบง แตห อึณ แบน อาฆยึร ดี ดูอี บอกาเฆลียด แดง กาดาย นี. 20อี มูห เบ, เฌาพรา แฮะ ทูด เลห เบ แคง มืง แอฆึบ อี ปี เงา อี ดาด กาเซา ปี โดง จึม อี ดี ฮีน. อัน เฌา แฮะ ทูด เลห เบ, แตห เบ วี แบน ดูอี ปี อึบ อัน ปี ปี แบน เบ ดอ ตี นี นี.

21โกบ แปะ แฮะ โบง เบ, เฌาพรา แฮะ วี รู ดี โอว บอ กาลาง โฆรห ดืง ต็อห, โอว ตู ปึอน ดี กาโลห อึม แบลง ยอดาน. อัน มืร ตู แตห โอว ลึบ แคง มืง ปี ดี ดัว อัน ดี เบ. 22โคว อัน ตี, โอว ดี กาดูห ดี ยัม แคง มืง นี. โอว อาว ฮู กาโลห อึม แบลง ยอดาน. อี มูห เบ, อาว เหลณ เบ ดี ปึอน ดี กาโลห ฌัม แคง มืง บอด, มืง หมึอม ปี ดี ดัว เฌาพรา ดี เบ, แตห อึณ แบน มืง เบ. 23แตห เบ ซาดีก ซีคยา, โยว เบ ปีว แปะ แฮะ กาแซณ เฌาพรา ดี เบ อี มูห เฌาพรา ปี กรึบ เบ. แกวะ แตห เบ โบง อารึบ ราง แปะ แฮะ แคร เฌาพรา เบ โบง. อัน มูห เฌาพรา ปี กรึบ เบ. 24โคว, เฌาพรา ปี กรึบ เบ ตี, อัน บอ ปี เงา อี นับ ดี แตห อึณ กาซึม ดอน โมยว. อัน บอ มูห เฌาพรา อี ตู คัม อี กรึบ ปอ อู โมยว แดง อัน.

25เซ เบ แฮะ กอย เหลณ แคง มืง ตี, เซ เบ มืร แฮะ มึห หลูกหลาน ดอ อัน ตี, เซ เบ วี แวน โฆรห เฌาพรา บอ โบง อารึบ ราง แปะ แฮะ ต็อห เฌาพรา เบ ตู ปึอน โบง ดอ เหมา, อึณ ดี แบน หมาบ ตาง ดี เบ. อึณ ดี บอ แตห เฌาพรา รู กาเซา ดี เบ. 26ลอง อัน ตี โอว กาลาง ดี เบ อาตึร นี, แตห บอ ฆางหราว บอ กาดาย โทม. เซ เบ ดี โบง ปาย ตี เบ ดี ชึม โตต แคง มืง ตี. เบ ตู ปึอน ดี กอย เหลณ แคง มืง โดง ดี ฮาว กอย เบ นา ตัะ แบลง อึม ยอดาน ตี. อาว เหลณ เบ ดี ฮาว ลึร ชึม โตต บอกาเฆลียด. 27เฌาพรา ดี โบง แตห เบ กอย กาย็อห กาเรห กาแต เฆ ดูอี อาโมยว เฮา. เบ ดี ฆีด มี อี แจก บอ โลว กอย กาแต เฆ ดูอี อาโมยว เฮา แคง มืง อี เฮา แปะ แฮะ โฮว เตา เฌาพรา ดี เบ. 28แคง มืง เฆ ตี, เบ ดี วี กรึบ เฌา แบน โมยว แบน โมยว ปี โบง เฆ ดูอี ตา แด เฆ. อึณ มูห อารึบ เฮ เฆ มาว อี ตู ปึอน ยึร มาเซ, ตู นับ ดี โทม โฆรห, ตู นับ ดี โฮม มาเซ, ตู ปึอน ยึร อูห มาเซ. 29ดอ กอย เบ ดี ตี, เซ เบ กอ วี เหรต เฌาพรา, เบ ดี ยึร อัน. เบ ยี โลว แตห บอ น็อห บอ พึอม เบ บอ โตต เหรต อัน เฌา, แตห เบ ปึอน ดี กาตูณ อัน. 30เซ เบ ฮี ฮอต คัม ดูก ฌึร ตี ดอน โมยว, เบ ดี วี บึง เฌาพรา อี มูห เฌาพรา ปี กรึบ เบ. เบ ดี บอ โทม โฆรห อัน. 31โคว, อัน เฌา บอ มูห เฌาพรา อี นับ ดี กาเว อี เซเซ. อัน เฌา ตู เบลห ตู แวน เบ ดอ เหมา. อัน มืร ตู ปยาต เบ, ตู ปีว ปี ดึอม ลาย กาแซณ อัน ดี เฆ ฆูณ ดัง เบ. อัน แฮะ ดืง ลอง อัน ตี ดี เฆ, แตห เฆ นับ ซีคยา แปะ แฮะ กาแซณ อัน แฮะ หมาน อาคาคัร.

ลอง ปวน เฌาพรา

32แตห เบ เหรต ดีหมอด ลอง ซีณ ดอ มึอน, ซีณ อาต ฆึอด เบ. ซีณ ดอ โฆว ดอ พาน เบลห เฌาพรา ดูอี แดง กาดาย นี, แตห เบ เหรต ดีหมอด, โยว อึณ มึห เฌา ปี กรึบ อี เฮา อี กอย แคง ฆางหราว, แตห อึณ กอ กาลัต. แตห เบ เหรต, โยว อึณ แฮะ ดึอม มึห อี คึกคัม กาเซา ปี อัน เฌา, โยว เบ ดึอม ยึร เฌา อี กาลาง ปาย ตี. 33ดูอี โมยว เหมา แฮะ ดึอม ยึร โฆรห เฌา ปี กรึบ เฆ เลห แคง เงา อี ปี ปี ดึอม ยึร เบ โฆรห เฌาพรา, ยี ตู โลว ยัม. 34เบ มืร ตู ดึอม ยึร เฌา ปอ อู กาดัง อี แฮะ ดึอม ทูด เลห ดูอี อู โมยว แคง ดูอี อาโมยว เฮา ปี เฌาพรา ปี กรึบ เบ แฮะ ทูด เลห เบ แคง มืง แอฆึบ ตึอน. อัน เฌา ตี แฮะ บยัะ อาพูง ดังโคว อัน, โบง แตห อึณ แบน ดูก ตาง ดี อี เฮา บอ ลาย กาโฆห ดี รันซู, บยัะ บอ อี หมึอม อาม กาเซา แบน โมยว แบน โมยว, บอ แรน ซึก บอ โบง อี หมึอม โยว กาเซา แปะ แฮะ บยัะ อัน เฌา แคง มืง แอฆึบ ตึอน, แตห เบ ยึร ดี งาย เบ. อึณ ตู ดึอม มึห เฌา ปอ กาดัง อี แฮะ ดึอม โบง ฌึร ตี.

35เฌาพรา แฮะ โบง แตห เบ ยึร ปาย ตี แตห เบ นับ อึณ มึห มี อัน เฌา อู กาดัง อี มูห เฌาพรา. อาว มึห เฌาพรา ปอ อู กาดัง. 36เฌาพรา แตห เบ ยึร โฆรห อัน แคง ฆางหราว, แตห อัน มาโนว เบ. แดง กาดาย นี มืร, เฌาพรา แฮะ แตห เบ ยึร เงา ตาง, แฮะ แตห โฆรห อัน เลห แคง เงา, แตห เบ ยึร. 37โกบ ร็อก เฌาพรา ฆูณ ดัง เบ บอ ร็อก หลูกหลาน เบ, อัน แฮะ ตา ปวน ตาง อัน, แยต เลห เบ แคง มืง แอฆึบ. 38ปัน ดี ลึบ เบ แคง มืง อี เฮา, อี เฮา ปี บอ แฮะ กืน หลึอม เบ บอ มึห โปลม หลึอม เบ มืร, อัน เฌา ยี โฮว เตา ดูอี แคง มืง เฆ ตี, วี แตห เบ กอย, แตห อึณ แบน คาฆูน เบ. อาคราว ตี แฮะ ฌัม ดอ ตี นี.

39โคว อัน ตี, อาตึร นี แตห เบ โหลห, แกวะ แตห เบ ปีว ดอ เหมา ลอง เฌาพรา มูห เฌาพรา อี อึบ บอ ฆางหราว บอ กาดาย. อึณ มืร ตู มึห เฌาพรา ปอ อู กาดัง. 40แตห เบ โบง โดบ ดารา เฌาพรา แคะ ปี กาลาง โอว ดี เบ อาตึร นี. แตห อึณ บอ แบน นา หมึอม ดี เบ บอ ดี เฆ หลูกหลาน เบ. ปาย ตี อาซาก เบ ดี บอ โต็ง, แตห เบ บอ กอย เหลณ แคง มืง ปี ดี ดัว เฌาพรา ดี เบ, แตห เบ บอ บึง มืง ตี เซเซ.”

ลอง มืง อี ปึอน เครียง

41-42แฮะ ฮอต ปาย ตี อาโมวแซ บอ วี ร็อห มืง อาดา โอย มืง. มืง เฆ ตี, อึณ บอ กอย นา เลห ซีแง แบลง ยอดาน. อัน แตห อึณ แบน มืง โดง ดี เตา ฮาว เครียง เฆ อี แฮะ กาลูต ดี ง็อห ยัม อี เฮา, อี ตู มูห รันซู เฆ, อี ตู อูน น็อห ดี โบง. ดูอี เฆ ตี ปึอน ดี เตา ฮาว เครียง แคง มืง ตี, ตู แตห เฆ ยัม. 43อาดา เฆ ดูอี ครึร อารูเบน, อึณ บอ มูห มืง บีจา อี กอย แคง ฆลัง ตาง อี มูห แคง แปร กาฮ็อห. อาดา เฆ ดูอี ครึร อาฆัด, อึณ บอ มูห มืง ราโมด อี กอย แคง กาดาย มืง ฆีเลอาด. อาดา ดูอี ครึร อามานาเซ, อึณ บอ มูห มืง กอลัน อี กอย แคง กาดาย มืง บาซัน ตึอน.

อาโมวแซ โฮว ดารา จึบ ฮาอา

ลอง ดารา เฌาพรา

44อานี มูห ดารา เฌาพรา ปี กาลาง อาโมวแซ ดี เฆ ดูอี อีซาเรลัะ. 45อึณ บอ มูห ปี ดัม อูน เฌาพรา บอ ปี มาโนว อาโมวแซ ดี เฆ ดูอี อีซาเรลัะ วาย เลห เฆ แคง มืง แอฆึบ. 46ดอ อัน ตี, โดง กอย เฆ อึณ บอ มูห นา เลห ซีแง แบลง อึม ยอดาน อี ลาย กาซืร ดี มืง เบดเบอูรา. อึณ มูห มืง ปี อึบ คูนดีคัม อาซีโฮน อี มูห ดูอี อาโมวรีด อี กอย แคง มืง เฮซาโพน ตึอน. มืง เฆ ตี, อาโมวแซ เฆ ดูอี อีซาเรลัะ แฮะ กาโฆห บอ ปึอน วาย เลห เฆ แคง มืง แอฆึบ ตึอน. 47เฆ แฮะ กาโฆห แฮะ ปึอน บอ มืง ปี อึบ คูนดีคัม อาออคัะ อี มูห มืง บาซัน ตึอน. คูนดีคัม อาออคัะ บอ มูห คูนดีคัม ดูอี อาโมวรีด ปอ อู กาดัง. อัน อี อึบ นา เลห ซีแง อึม แบลง ยอดาน ตึอน. 48มืง ตี, อึณ บอ จูห ดี มืง อารอ อี กอย ดี โคบ ดีลัยะ แบลง อารานูน, วี โฮะ บลาก นา กัว, กอ วี ฌัม ดี นอน จีรูน อี มูห นอน เฮราโมน ตึอน. 49อึณ ปี วี ฮาว ฌัม บอ แคง ฆลัง อาราพัะ อี กอย โตต นา เลห ซีแง แบลง อึม ยอดาน. บลาก นา เตต, อึณ บอ โลง กอ ฌัม ดี อึม นัมมูกซารา อี กอย ดี ดัง นอน ปีซากา.

Currently Selected:

ดารา 4: pce

Highlight

Copy

Compare