ดารา 3
3
ลอง ดูอี อีซาเรลัะ แฮะ แป คูนดีคัม อาออคัะ
1วาย อัน ตี เอ บอ วี กาบัด โฮะ ดี มืง ตาง อี จืร บาซัน. ดอ อัน ตี คูนดีคัม อาออคัะ เฆ ดา ซึก อัน บอกาเฆลียด แฮะ เลห ตัห, ต็อห ดี กาโฆห ดี เอ ดี โคบ มืง เอตารี. 2เฌาพรา วี กาลาง ดี โอว ต็อห, “แม แกวะ โยว อัน. โอว ดี ดึห อัน บอ ดูอี อัน บอกาเฆลียด บอ มืง ปี อึบ อัน, วี อาบ ดัว ดี แม. แตห แม โบง ดี อัน, แตห อึณ ปี ปี โบง แม ดี คูนดีคัม อาซีโฮน อี มูห ดูอี อาโมวรีด, อี อึบ มืง เฮซาโพน ตึอน.”
3ปาย ตี เฌาพรา บอ อาบ คูนดีคัม อาออคัะ บอ ดูอี ปี อึบ อัน บอกาเฆลียด ดี เอ. เอ มืร ง็อห แวน เฆ บอกาเฆลียด, แกวะ แตห อึณ ซี มึห. 4ดอ อัน ตี เอ แฮะ ปึอน โตต แคะ กอย มืง ปี อึบ อัน. โดง ตู ปึอน เอ อาว มึห คอ อู มืง. มืง แปะ แฮะ กาโฆห ปึอน เอ ตี, อึณ กอย เดา ฆึร มืง อี กอย แคง กาดาย อากอพัะ บอ แคง มืง ตาง ปี อึบ คูนดีคัม อาออคัะ อี มูห กาดาย มืง บาซัน. 5มืง เฆ ตี บอ มูห มืง อี มึห แรง อี จา กาเซา, มึห บอ มาโลห มืง อี มึห แซ อัน. แดง ตี เอ แฮะ ปึอน บอ มืง อี ตู มึห แรง, อี แฮะ กืน กาเซา. 6เอ บอ ปยาต แวน มืง ตี บอกาเฆลียด บอ ง็อห ยัม บอ อีบึณ บอ อีมาย บอ ฆอน ดีรอย. อึณ แฮะ ปี ปี โบง เอ ดี คูนดีคัม อาซีโฮน อี อึบ มืง เฮซาโพน ตึอน. 7เอ บอ ดึห มี โดว ซัดดาวา บอ โกรวกราม แคง มืง ตี.
8ดอ อัน ตี เอ มืร แฮะ กาโฆห, แฮะ แป คูนดีคัม ดูอี อาโมวรีด อา กาดัง อี กอย นา เลห ซีแง แบลง ยอดาน, จูห ดี อึม แบลง อารานูน กอ ฌัม ดี นอน เฮราโมน. 9นอน เฮราโมน ตี, เฆ ดูอี ซีโดน บอ ต็อห นอน ฌีโรน. ดูอี อาโมวรีด เฆ บอ ต็อห นอน เซนีรา. 10เอ แฮะ แป ดอน มืง อี กอย ดี นอน แคง กาดาย มืง ฆีเลอาด บอ มืง บาซัน, กอ วี ฌัม นา เลห ซีแง มืง ซาลากา บอ มืง เอตารี. อึณ บอ มูห มืง อี กอย แคง กาดาย มืง บาซัน ปี อึบ คูนดีคัม อาออคัะ ตึอน. 11อี มูห ดูอี อาโมยว ราพาด, อึณ แฮะ ฆีด มี คูนดีคัม อาออคัะ ตี อู วี. กาโช็ง อีด อัน, เฆ บอ โบง ตา ฮีน. เซ เอ เฆา, ตา กานีห เอ ดูอี, อึณ บอ โต็ง ดีม กานีห. นา กาว็อห อัน พวน กานีห. เฆ บอ อูน แคง กาดาย ดูอี อัมโมน ดี มืง ราบา.
ลอง ดูอี อี กอย นา เลห ซีแง แบลง ยอดาน
12วาย แฮะ ปึอน เอ มืง เฆ ตี, โอว วี ดึห ดัว ดี ครึร อารูเบน บอ ครึร อาฆัด. อึณ มูห กาดาย อี กอย นา กัว มืง อารอ อี กอย โคบ ดีลัยะ แบลง อารานูน. อึณ บอ มูห มาน มืง ฆีเลอาด อาดา อู กาแต. 13กาดาย มืง ฆีเลอาด อี ซี ฆีด ตึอน, โอว แฮะ วี อาบ ดัว ดี ดูอี ครึร อามานาเซ อู กาแต. อึณ มูห บอ มืง บาซัน อี มูห มืง ปี อึบ คูนดีคัม อาออคัะ อี กอย แคง กาดาย อี จืร อากอพัะ. มืง บาซัน ตี บอ มืง แฮะ ดึอม มูห โดง กอย ดูอี โดว ดี โต็ง ดี ตาง อี จืร ดูอี ราพาด ตึอน. 14เฆ ดูอี อายาอีรา อี มูห หลูกหลาน อามานาเซ ตึอน, เฆ แฮะ อึบ มืง อากอพัะ กอ ฌัม ดี กาอูน เฆ ดูอี เฆซูรา บอ กาอูน เฆ ดูอี มาคา บอ มืง บาซัน. เฆ บอ แดะ จืร มืง เฆ ตี โดบ ปี จืร เฆ ต็อห, โดง กอย ฮาโวดยาอีรา กอ ฌัม ดอ ตี นี.#3:14 ซีเพา อัน เลห, กอ ฌัม ดอ แดม ลอง อัน ตี 15กาดาย มืง ฆีเลอาด โอว แฮะ ดัว ดี ดูอี อามาคีรา อี มูห ดูอี ครึร อามานาเซ ตึอน. 16ยี มูห ครึร อารูเบน บอ ครึร อาฆัด, โอว แฮะ อาบ ดัว ดี เฆ กาดาย อี จูห ดี มืง ฆีเลอาด กอ ฌัม ดี ดีลัยะ แบลง อึม อารานูน. ดี กาแต ดีลัยะ ตี, อึณ แบน กาอูน โดง กอย เฆ. บลาก นา กัว มืง เฆ บอ ฌัม แบลง อึม ยาโบก อี มูห กาอูน กาดาย ดูอี อัมโมน. 17บลาก นา เฆต ซีแง อึณ กอ ฌัม ดี แบลง อึม ยอดาน อี มูห โดง กาว็อห อี จืร อาราพัะ. นา กัว อึณ จูห ดี อึม ดึง ฆาลีเล, วี โลง ฌัม ดี อึม ดึง ซัยะ ซ็อง ดี ดัง นอน ปีซากา.
18ดอ อัน ตี โอว แฮะ วี กาลาง ดี เบ ต็อห, “เฌาพรา อี มูห เฌาพรา ปี กรึบ เบ, อัน แฮะ อาบ ดัว มืง ตี ดี เบ. ดูอี เบ อี แฮะ ปึอน กาโฆห, เฆ โลว โฆ็ง ครึง กาโฆห เฆ, กาโลห แบลง ยอดาน, ฮาว แยต นา อาต บีนอง เบ อี มูห ดูอี อีซาเรลัะ. เบ โลว จอย เฆ, แตห บอ เฆ ปึอน มืง เฆ ตี. 19อีบึณ เบ เฆ ฆอน เบ บอ โดว ซัดดาวา เบ, โอว แฮะ นับ, เบ แฮะ มึห กืน กาเซา โดว ซัดดาวา. เบ ยี โลว อูน แตห เฆ กอย แคง มืง แปะ แฮะ อาบ ดัว โอว ดี เบ. 20เบ โลว จอย เฆ บีนอง เบ, แตห บอ เฆ ปึอน มืง ปี ดี ดัว เฌาพรา ดี เฆ บลาก นา ตัะ อึม แบลง ยอดาน ตึอน. แตห เบ จอย, แตห อึณ กอ ฌัม ปัน ดี ดัว เฌาพรา บอ ปัน ดี กอย ดาคึย, กอย ฆยามซา เฆ. แตห อึณ กอ ปี แปะ แฮะ ดัว เฌาพรา ดี เบ. เซ เบ แฮะ ฮอต โบง ปาย ตี เบ ดอน อี ปึอน วี ตัห แคง มืง แปะ แฮะ ฮอต ดัว โอว ดี เบ.”
ลอง อาโมวแซ ตู ปึอน ดี ลึบ แคง มืง กานัณ
21ดอ อัน ตี โอว ปี วี กาลาง ดี อาโยวซูอา ต็อห, “แม แฮะ ยึร, เฌาพรา อี มูห เฌาพรา ปี กรึบ แม, อัน แฮะ โบง โมยว เหมา ดี คูนดีคัม อาซีโฮน ฆาย คูนดีคัม อาออคัะ. อัน เฌา ปี ดี วี โบง ปาย ตี แคง มืง ดอน มืง ปี ดี โลว ลึบ ฮาว แม. 22แกวะ แตห เบ โยว เฆ. เฌาพรา ปี กรึบ แม ดี กาโฆห ดัว ดี แม.”
23ดอ อัน ตี โอว บอ วี ซาคึร ดี เฌาพรา ต็อห, 24“อึย แม เฌาพรา อี อึบ โตต ดอน โมยว, แม แฮะ จูห ดี บยัะ อาพูง ดังโคว แม ดี โอว อี มูห แดเจณ แม. แม แฮะ บยัะ บอ แคะ ตาง โปลม แม. บอ แคง ฆางหราว บอ แดง กาดาย อาว มึห อี หมึอม, อาว มึห ปอ อู วี อี มึห อาพูง ดังโคว ปี แม. 25แม เฌาพรา, โอว หมาณ, แตห โอว ปึอน ดี กาโลห อึม แบลง ยอดาน, แตห โอว ปึอน ดี ฮาว ยอด มืง บอด, มืง หมึอม อี กอย บลาก นา ตัะ ดอย, แตห โอว ยึร บอ มืง อี กอย ดี นอน อี ชีด, อี มูห นอน เลบานูน.”
26โอว ปี บอ แฮะ ต็อห ปาย ตี มืร, โกบ แปะ แฮะ ดึอม โบง เบ, เฌาพรา ยี แฮะ รู กาเซา ดี โอว, ตู โทม โฆรห ปี ซาคึร โอว ตี. เฌาพรา วี ต็อห ดี โอว, “จู แคะ ตี, แม แกวะ ฮู กาลาง ปอ อึณปัว ลอง อัน ตี. 27แตห แม โฮะ กอย แดง นอน ปีซากา, แตห แม ยอด นา เฆต ซีแง บอ นา เลห ซีแง, นา เตต, นา กัว, แตห แม ยอด แคะ ปี ปึอน ยึร แม. โคว, แม ตู ปึอน ดี กาโลห อึม แบลง ยอดาน. 28แม ยี โลว กาลาง ดี อาโยวซูอา, แตห โปลม แตห แฮณ ดี น็อห อัน. อัน อี ดี แยต ฮาว ดูอี เฆ นี, แตห เฆ ฮาว ดึห กาดาย ปี ยอด แม ตี, แตห อึณ แบน คาฆูน เฆ.” 29โกบ อึณ ปาย ตี เอ บอ วี ฆืด กอย แคง ฆลัง อี ลาย กาซืร โดง จืร เบดเบอูรา.
Currently Selected:
ดารา 3: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
