ดารา 2
2
ลอง เฆ ดูอี อีซาเรลัะ ฮาว วีว ฮาว เวณ แคง แปร กาฮ็อห
1เอ วี ฮาว แคง แปร กาฮ็อห, ฮาว โดบ อึณเตณ อี ฮาว ดี โหนง เรณ. เฌาพรา แฮะ กาลาง ดี โอว ปาย ตี. เอ บอ ฮาว วีว ฮาว เวณ ดี ดัง นอน เซอี,#2:1 เซอี ฆาย เอโดม มูห อู โปละ อึณ กอ เหลณ กาเซา.
2-3เฌาพรา บอ วี กาลาง ดี โอว ต็อห, “เบ แฮะ ฮาว วีว ฮาว เวณ ดี ดัง นอน นี, แฮะ เหลณ กาเซา. เบ วี โลง วี กาบัด โฮะ นา กัว. 4-5แตห แม กาลาง บอ ดี เฆ ดูอี กืน ต็อห, ‘เบ โลว กาโลห ฮาว แคง กาดาย บีนอง เบ อี มูห ดูอี อาโมยว อาโซว อี กอย แคง มืง เซอี ตึอน. ดูอี เฆ ตี, เฆ ดี บอ โยว เบ. โคว, แตห เบ ซาดีก, แกวะ แตห เบ กาโฆห ดี เฆ ดอ เหมา. กาดาย แคง มืง เฆ ตี, อู กาซาน มืร โอว ตู ดัว ดี เบ. โคว, กาดาย แคง มาน มืง เซอี ตี, โอว แฮะ ดัว ดี เฆ ดูอี อาโมยว อาโซว. 6เบ โลว ดึห รึอน เบ, จึห ปี ดี โฮม บอ ปี ดี เดียง ดี เฆ.’”
7แตห เบ บอ โหลห เฌาพรา อี มูห เฌาพรา ปี กรึบ เบ. อัน เฌา แฮะ ม็องการา ดัว ฆาน ปี โบง เบ ดอน โมยว. อัน เฌา มืร แฮะ ยอด แมน เบ ดอ ฮาว เบ แคง แปร ตาง ตึอน กอ โนะ พวน ฆึร ซีนัม. ดอ อัน ตี เบ มืร ตู ฌูด ลูด มาเซ.
8ปาย ตี เอ บอ วี ว็อะ ฮาว โคบ โดง กอย บีนอง เอ อี มูห ดูอี อาโมยว อาโซว แดง นอน เซอี ตึอน. เอ บอ วี วัห อึณเตณ อี ฮาว แคง ฆลัง อาราพัะ, วี ตัห แคง มืง เอลาด บอ มืง เอจาโยนกาบา. เอ ปี วี ฮาว โดบ อึณเตณ อี ฮาว แคง แปร กาฮ็อห แคง มืง โมวอาบ ตึอน.
9เฌาพรา ปี วี กาลาง ดี โอว ต็อห, “เบ แกวะ ปยาต ดูอี โมวอาบ อี มูห หลูกหลาน อาโลด ตึอน. เบ แกวะ กาโฆห ดี เฆ. โอว แฮะ อาบ แตห ดูอี อาโลด กอย แคง มืง ตาง อี มูห มืง อารา ตี. โอว ยี ตู อาบ ดี เบ.”
10ดูอี อาโมยว เอมีด อี มูห ดูอี โดว โต็ง โดว ตาง บอ มึห โปลม กืน, เฆ แฮะ ดึอม กอย แคง มืง อารา ตี. ดูอี เฆ ตี แฮะ ตาง จา ปี ดูอี อาโมยว อานาคีม ตึอน. 11อี เฮา บอ ต็อห, เฆ มูห ดูอี ราพาด ปี ดูอี อาโมยว อานาคีม ตึอน. เฆ ดูอี โมวอาบ ยี ต็อห, เฆ มูห ดูอี เอมีด. 12ดอ มึอน ดูอี อาโมยว โฮวรีด แฮะ ดึอม กอย แคง มืง เซอี. มาแล, เฆ ดูอี อาโมยว อาโซว แฮะ ปยาต เฆ, แฮะ โฮว เตา เฆ, ตู แตห เฆ ปึอน ดี กอย แคง มืง ตี. อึณ แฮะ ปี ดอ แฮะ โฮว เลห เฆ ดูอี อีซาเรลัะ รันซู เฆ แคง มืง ปี อาบ เฌาพรา ดี เฆ.
13เฌาพรา บอ กาลาง ฮาว ปอ อึณปัว ต็อห, “วาย อัน ตี แตห เบ บอ วี กาโลห ดีลัยะ จารีด.” แฮะ ฮอต, เอ บอ โบง แคะ ปี กาลาง เฌาพรา ดี เอ.
14วาย แฮะ เลห เอ โดง จืร กาเดบานา, กอ ฌัม ซีแง ดี กาโลห เอ ดีลัยะ อี จืร จารีด, แฮะ โนะ โอย ฆึร ดี ดา ซีนัม. ดอ อัน ตี, เฆ ดูอี อี แฮะ กาบัห ดี เฌาพรา, เฆ แฮะ ฮอต ยัม โตต. อึณ แฮะ โบว แบน ปี ปี ดึอม ดืง, ดึอม กาแซณ เฌาพรา ดี เฆ. 15อึณ ยี มูห เฌาพรา อี โบง แตห เฆ ลึร ชึม โตต ปาย ตี แกวะ แตห อึณ ซี มึห ดูอี อี กาบัห ดี เฌาพรา กาแต เฆ ดูอี อีซาเรลัะ.
16วาย แฮะ ฮอต ยัม โตต ดูอี เฆ ตี, 17เฌาพรา วี ต็อห ดี โอว, 18“อาตึร แตห เบ ลึบ ฮาว แคง มืง โมวอาบ, แตห เบ กาโลห ฮาว แคง มืง อารา. 19เซ เบ ฮี ตัห โคบ กาอูน กาดาย ดูอี อัมโมน อี มูห ดูอี อาโลด ตึอน, เบ ตู ปึอน โบง นา จาว ดี เฆ, อาว ปึอน ปีรู ดี เฆ ดอ เหมา. มืง โดง กอย เฆ ตี, โอว ตู อาบ ดี เบ.”
20ดอ มึอน แฮะ เหลณ กาเซา, แคง มืง ตี เฆ ดูอี อาโมยว ราพาด แฮะ ดึอม กอย. เฆ ดูอี อัมโมน บอ แดะ เฆ ต็อห ดูอี จันจูแมม. 21ดูอี อาโมยว ตี, เฆ กืน กาเซา. เฆ มูห ดูอี อาโมยว โดว โต็ง โดว ตาง จา ปี ดูอี อาโมยว อานาคีม ตึอน. มาแล, เฌาพรา แฮะ ปยาต แวน เฆ, แฮะ วี อาบ แตห ดูอี อัมโมน กอย แคง มืง ตี. 22เฌาพรา แฮะ ดึอม โบง ปาย ตี ดี เฆ หลูกหลาน อาโซว ตึอน, แตห เฆ ปึอน ดี กอย แคง มืง เซอี. ดอ อัน ตี อัน เฌา แฮะ ปยาต แวน ดูอี โฮวรีด, วี แตห เฆ หลูกหลาน อาโซว ปึอน ดี กอย กอ ฌัม ดอ ตี นี. #2:22 ดอ อัน ตี มูห อาคราว ดอ แดม ดา ซารา อาโมวแซ บับ นี. 23บอ เฆ ดูอี อาเวม แฮะ คัม ปาย ตี. เฆ แฮะ ดึอม กอย แบน โปละ แบน โปละ กอ ฌัม มืง ฆาซา. มาแล, ดูอี อาโมยว กับตอรีน อี แฮะ กอย แคง มืง กับตอ แฮะ วี ตัห ปยาต เฆ, วี กอย แคง มืง เฆ ตี.
ลอง เฆ ดูอี อีซาเรลัะ แป คูนดีคัม อาซีโฮน
24วาย แฮะ ฮอต กาโลห เอ มืง โมวอาบ ตี, เฌาพรา ปี วี ต็อห, “คา นี แตห เบ กาโลห อึม แบลง อารานูน. โอว ดี ดึห คูนดีคัม อาซีโฮน อี มูห ดูอี อาโมยว อาโมวรีด อี อึบ มืง เฮซาโพน ตึอน, อาบ ดี เบ. แตห เบ กาโฆห ดี อัน, ดึห กาดาย โดง กอย อัน ตี. 25จูห ซีณ อาตึร นี โอว ดี แตห ดูอี อาโมยว เฮา โยว เบ ดอน โปละ ดอน นา. เฆ ฮี ยึร มี แคะ จืร เบ, เฆ ดี โยว กาเซา บอ ดียูห ดีเยณ. เฆ ดี บอ ปี อีบึณ อี เซา ดี มึห ฆอน.”
26ดอ อัน ตี โอว แฮะ จัร เฆ ดาลาม โอว เลห แคง แปร กาฮ็อห โดง จืร เกดามูด, วี ฮาว โดง กอย คูนดีคัม อาซีโฮน อี อึบ มืง เฮซาโพน ตึอน, แตห เฆ ฮาว กามวน ดี อัน, แตห เอ ลาย แบน อู ฆึก. โอว จัร เฆ กาลาง ดี อัน ต็อห, 27“เย หมาณ ดี กาโลห ฮาว กาแต มืง แม คูนดีคัม ตาง. เย ดี ฮาว มี โดบ อึณเตณ, เย ตู วัห นา เหมา, ตู วัห นา ฆัะ นา อัห. 28ปี ดี โฮม เย, เย ดี จึห ดี แม ตา รึอน. ปี ดี เดียง เย, เย หมาณ, แตห เย ปึอน ดี จึห ดี แม. แตห แม คูนดีคัม ตาง ควาง มี เย กาโลห มืง แม, 29แตห เย ฮาว กาโลห แบลง อึม ยอดาน. ปัน ตี เย ดี บอ ฌัม แคง มืง ปี ดี ดัว เฌาพรา ปี กรึบ เย ดี เย. ดูอี อาโซว อี กอย แคง มืง เซอี, บอ ดูอี โมวอาบ อี กอย แคง มืง อารา, เฆ แฮะ ควาง เย กาโลห ฮาว แคง มืง เฆ ปาย ตี.” 30มาแล, คูนดีคัม อาซีโฮน ตู ควาง เอ กาโลห ฮาว กาแต มืง อัน. โคว, อึณ มูห เฌาพรา ปี กรึบ เบ, อัน แฮะ โบง แตห คูนดีคัม ปีดืร ปีโปลม ดีฆัต น็อห อัน. อัน เฌา ดี ดัว ดี เอ มืง อัน ตี. อึณ บอ มูห มืง ปี กอย เอ ดอ ตี นี.
31เฌาพรา วี ต็อห ดี โอว, “บัร แม ยอด, โอว ดี ดึห คูนดีคัม อาซีโฮน บอ มืง ปี อึบ อัน, อาบ ดัว ดี แม, แตห เบ ลึบ กอย แคง มืง ตี.”
32ปาย ตี คูนดีคัม อาซีโฮน บอ เฆ ดา ซึก อัน บอ เลห ตัห กาโฆห ดี เอ โคบ มืง ยาฮาด. 33เฌาพรา บอ อาบ อัน ดี เอ. เอ บอ กาโฆห ดี อัน บอ ปึอน ดี ง็อห ยัม อัน บอ ฆอน อัน บอ เฆ ดา ซึก อัน บอกาเฆลียด. 34ดอ อัน ตี เอ บอ ปยาต แวน มืง ปี อึบ อัน ดอน มืง. เอ บอ ง็อห ยัม ดูอี ปี อึบ อัน, บอ อีบึณ, อีมาย บอ ฆอน ดีรอย บอกาเฆลียด, อึณ กอ ฮู ฆืด คอ อู วี. 35เอ ดึห มี โดว ซัดดาวา บอ โกรวกราม แคง มืง แปะ แฮะ แป เอ ตี. 36เฌาพรา แฮะ แตห เอ กาโฆห, แฮะ แตห เอ ออง มืง แบน มืง แบน มืง. อึณ บอ จูห ดี มืง อารอ อี กอย นา เตต ดีลัยะ อารานูน บอ มืง อี กอย ดี กาแต ฆลัง ตึอน, วี โลง ฌัม มืง ฆีเลอาด. มืง ปี ตู แป เอ อาว มึห คอ อู มืง, บอ มืง อี มึห แรง, อี แฮะ มัน ซีคยา แฮะ แป โตต. เฌาพรา แฮะ แตห เอ แป เฆ บอกาเฆลียด. 37มาแล, เบ ตู ดึห โดง กอย เฆ ดูอี อัมโมน บอ ดอน มืง อี กอย โคบ บาง อึม ยาโบก. มืง เฆ ตี เฌาพรา แฮะ แคร, แกวะ แตห เอ ฮาว.
Currently Selected:
ดารา 2: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
