ดารา 1
1
อาโมวแซ โฮว ดารา จึบ ดอ โฆว
1บับ พืน นี แฮะ แดม โฆรห ปี กาลาง อาโมวแซ ดี เฆ ดูอี อีซาเรลัะ ดอ กอย เฆ แคง แปร กาฮ็อห อี กอย นา เลห ซีแง แบลง ยอดาน. โดง กอย เฆ ตี บอ จืร อาราพัะ. อึณ กอย ลาย กาซืร ดี มืง ซูพา อี กอย กาแต มืง พาราน, มืง ตอเพลัะ, มืง ลาปาน, มืง ฮาจารูด บอ มืง ดีจัะฮับ. 2จูห ดี นอน โฮวเรบ,#1:2 นอน โฮวเรบ บอ นอน ซีนาย มูห อู โมยว ฮาว โดบ อึณเตณ อี กาโลห นอน เซอี,#1:2 นอน เซอี บอ มืง เอโดม มูห อู โมยว แตห อึณ กอ วี ฌัม มืง กาเดบานา. อาคราว อึณเตณ, อึณ โต็ง ฆึร ดี อู ซีแง.
3ซีณ เลห เฆ แคง มืง แอฆึบ ดอ แฮะ โนะ พวน ฆึร ซีนัม บอ ฌัม มาเฆียน ฆึร ดี เหลห, ซีแง เหลห, อาโมวแซ แฮะ วี กาลาง ดี เฆ ดูอี อีซาเรลัะ. อัน วี แค ดี เฆ ดอน โมยว ปี ดัม อูน เฌาพรา ดี อัน ลอง เฆ ดูอี อีซาเรลัะ. 4อาคราว อัน ตี มูห วาย กาโฆห ออง เฌาพรา ดี คูนดีคัม อาซีโฮน อี มูห ดูอี อาโมวรีด อี อึบ มืง เฮซาโพน. อึณ บอ มูห วาย กาโฆห ออง เฆ ดี คูนดีคัม อาออคัะ อี อึบ มืง บาซัน บอ กอย แคง มืง อาซาตารูด บอ แคง มืง เอตารี.
5อาโมวแซ แฮะ โฮว ดารา ตี ดอ กอย เฆ นา เลห ซีแง แบลง ยอดาน อี มูห แคง กาดาย ดูอี โมวอาบ. อัน ต็อห,
6“ดอ กอย เอ ดี ดัง นอน ซีนาย ตึอน, เฌาพรา อี มูห เฌาพรา ปี กรึบ เอ, อัน แฮะ ต็อห, ‘เบ แฮะ กอย ดี นี แฮะ เหลณ กาเซา. 7แตห เบ ย็อห ทึบ บีก เบ บอ กาโทะ ฮาว ปอ โปละ. แตห เบ วี โฮะ ดี นอน โดง กอย มืง ดูอี อาโมวรีด บอ ดี มืง ดอน มืง อี กอย กาตัด ฆลัง อาราพัะ. แตห เบ ปี วี โฮะ บอ ดี นอน อี กอย นา เฆต ซีแง, ปี วี โลง ดี มืง อี กอย บลาก นา เตต, แตห เบ กอ ฌัม ดี อึม นัมมูกซารา บอ ดี มืง กานัณ. แตห เบ วี ฌัม บอ ดี นอน เลบานูน บอ ดี แบลง อึม อูพาราด. 8มืง เฆ ตี บอกาเฆลียด โอว แฮะ ฮอต ดัว ดี เบ. แตห เบ ฮาว ดึห. โอว เฌาพรา แฮะ ดึอม ดัว กาดีก ซัดฌา ดี ฆูณ ดัง เบ อี มูห อาบราฮัม, อาแซก บอ อาโกบ บอ ดี หลูกหลาน เฆ.’”
ลอง อาโมวแซ แฮะ ดึอม ร็อห ดา ตาง
9อาโมวแซ วี ต็อห, “ดอ อัน ตี โอว แฮะ ต็อห ดี เบ, ‘โอว อู วี ตู แป ดี แยต ฮาว เบ. 10เฌาพรา อี มูห เฌาพรา ปี กรึบ เบ, อัน แฮะ แตห เบ แบร กืน กาเซา, แตห อึณ กอ ปี ซีมัณ แคง เบลณ. 11แตห เฌาพรา อี มูห เฌาพรา แปะ แฮะ กรึบ ฆูณ ดัง เบ ตี แว ม็องการา ดัว ดี เบ, แตห เบ แว แบร กืน กาปัว ปอ อู แหรณ บูน, แตห อึณ โดบ แปะ แฮะ กาแซณ อัน เฌา ดี เบ. 12โอว อู วี ยี ตู แป ดี ยอด แมน เบ บอกาเฆลียด บอ ซูงพยาด อามู ปี ลาย กาเอห กาแทณ เบ. 13แตห เบ ร็อห ดูอี กาแต เบ อี มึห อางยาน, อี นับ ดี กาดัวะ กาพา ครึร เหมา ครึร อัน. โอว ดี ดาง แตห เฆ วี แบน ดา ตาง อี อึบ อี แยต เบ.’
14เบ มืร แฮะ วี เวียะ โฆรห โอว ตี ต็อห, ‘แฮะ มูห แฮะ หมาน. ปี ต็อห แม ตี, อึณ แฮะ กาอาบ โบง ปาย ตี.’
15โอว มืร แฮะ ร็อห ดูอี กาแต เบ ดอน ครึร, แตห เฆ มูห ดูอี อี มึห อางยาน, มึห ซาเร, แตห เฆ แบน ดา ตาง อี อึบ เบ, แตห เฆ อึบ อู แหรณ วี, อู มาย็อห วี, พัน ฆึร วี บอ ฆึร วี, ปี วี แตห เฆ แฌด ดี ยอด ฆาน ดอน โมยว แคง ครึร เบ. 16ดอ อัน ตี โอว แฮะ กาลาง ดี ดา ตาง เฆ ตี ต็อห, ‘เซ เบ ซูงพยาด อามู อี, แตห เบ กาพา ซีคยา. อึณ บอ มูห อามู บีนอง เบ, บอ มูห ดูอี อาโมยว เฮา อี ตัห กอย โดบ เบ, แตห เบ ซูงพยาด, แตห อึณ การัม. 17เซ เบ ซูงพยาด อามู อี, แกวะ แตห เบ มึห โดง ร็อก โดง ฌ็อง. อึณ บอ มูห ดา ตาง, บอ มูห ดูอี เรา ดูอี กาง, แตห เบ ซูงพยาด ซืร ซืร หมาน หมาน. เบ มืร ตู โลว โยว อาเซ. โคว, อึณ มูห เฌาพรา อี ซูงพยาด ดารา. เซ อึณ ยี มูห อามู ปี ตู แป เบ ดี ซูงพยาด, แตห เบ ตัห โดง กอย โอว. โอว ดี ซูงพยาด อามู ตี.’ 18ลอง ปี ดี โลว โบง เบ ดอน โมยว, โอว แฮะ ฮอต กาลาง ดี เบ ดอ อัน ตี.”
ลอง ดูอี แฮะ ฮาว คยอง ดี ยอด มืง
19อาโมวแซ วี ต็อห, “เอ มืร โบง แคะ ปี กาลาง เฌาพรา ปี กรึบ เอ ดี เอ. เอ มืร แฮะ เลห ดี นอน โฮวเรบ,#1:19 นอน โฮวเรบ บอ นอน ซีนาย มูห อู โมยว วี ลัด ฮาว แคง แปร กาฮ็อห อี ตาง อี หมึอม โยว กาเซา แปะ แฮะ กาตูณ เบ. เอ ปี วี โฮะ ดี นอน โดง กอย มืง ดูอี อาโมวรีด ตึอน ดอ ตัห ฌัม เอ ดี โดง จืร กาเดบานา ตึอน. 20-21โอว มืร แฮะ ต็อห, ‘เบ แฮะ ฮอต ฌัม ดี นอน โดง กอย เฆ ดูอี อาโมวรีด. เฌาพรา ปี กรึบ เอ, อัน แฮะ ต็อห ดี ดัว มืง ตี ดี เอ. แตห เบ ยอด, เฌาพรา แฮะ ดัว ดี เอ. แตห เอ ฮาว ดึห, แตห อึณ โดบ ปี กาลาง เฌาพรา ดี เอ. เบ แกวะ โยว, แกวะ น็อห เตียะ.’
22มาแล, เบ บอกาเฆลียด ปี วี ตัห โดง กอย โอว, วี กาลาง ดี โอว ต็อห, ‘แตห เย จัร ดูอี มัง อี ฮาว คยอง ดี ยอด ดี อาต, แตห เฆ วี ตัห กาลาง ดี เอ ลอง เอ โลว ว็อะ อึณเตณ เหมา บอ ปี ปาย แคง มืง ปี ดี กาดูห เอ ดอน โปละ.’
23โอว แฮะ โทม โฆรห ปี กาลาง เบ ตี, อึณ แหนน แฮะ หมึอม. โอว บอ ร็อห ดูอี กาแต เบ ฆึร ดี อา วี, อู ครึร อู วี. 24ดูอี เฆ ตี บอ ฮาว แลบ ดี ยอด. เฆ บอ ฮาว มัง โปละ อี กอย ดี นอน, กอ วี ฌัม ดี ดีลัยะ อี จืร เอโคน. เฆ บอ คยอง ดี ยอด แคง มาน มืง ตี. 25เฆ บอ เบต ตัห เบล มัง โมยว ปี ซัม ดูอี แคง มืง ตี. เฆ บอ กาลาง ลอง ปี ปาย มืง ปี ดี อาบ เฌาพรา ดี เฆ ตี, อึณ มูห กาดาย บอด กาดาย หมึอม.”
ลอง ดูอี กาบัห ดี เฌาพรา
26อาโมวแซ วี ต็อห, “มาแล, เบ ยี ตู ฮาว. เบ วี โบง กาบัห ดี เฌาพรา อี มูห เฌาพรา ปี กรึบ เบ. 27เบ กอย แคง ทึบ เบ บอ ปึณ ต็อห, ‘เฌาพรา ฌ็อง เอ. อัน แฮะ แยต เลห เอ แคง มืง แอฆึบ, แตห อัน วี อาบ เอ ดี ดูอี อาโมวรีด, แตห เฆ ง็อห ยัม เอ. 28เอ ตู นับ, เอ ดี ฮาว ดี เหมา. ปี กาลาง เฆ บีนอง เอ แฮะ หมึอม โยว กาเซา. เฆ แฮะ ต็อห, ดูอี อี กอย แคง มืง ตี, เฆ บอ โปลม บอ จา หลึอม เอ. มืง เฆ ตี มืร มูห มืง ตาง, มืง อี มึห แรง จา กอ ดูห เบลณ, ดูห อึณอูะ. เฆ แฮะ ยึร บอ ดูอี ดี โต็ง ดี ตาง อี มูห หลูกหลาน อานาคีม.’
29มาแล, โอว วี ต็อห ดี เบ, ‘อาว โลว โยว, อาว โลว กย็อก ดูอี เฆ ตี. 30เฌาพรา ปี กรึบ เบ, อัน เฌา อี ดี แยต อึณเตณ เบ. อัน เฌา อี ดี จอย เบ กาโฆห, แตห อึณ ปี แปะ แฮะ จอย อัน ดี เบ ดอ กอย เบ แคง มืง แอฆึบ บอ แคง แปร กาฮ็อห. 31เบ แฮะ ยึร, อัน เฌา ปาย เหมา ดี จอย เบ, แตห เบ กอ ปึอน ดี ฌัม ซีคยา โดง กอย เบ นี. อัน แฮะ ลึมลา เบ, แฮะ ปี ฆูณ อี โจะ ดี โฆ็ง ฆอน อัน.’
32โอว ปี บอ แฮะ กาลาง ปาย ตี มืร, เบ ยี ตู หณึม เฌาพรา อี มูห เฌาพรา ปี กรึบ เบ ตี. 33อัน เฌา แฮะ แยต อึณเตณ เบ บอ เหรต บอ โดง ดี คยัะ, ดัว ดี เบ. แคง หมึร อัน แฮะ แตห อึณ มึห เงา อี ปี ร็อง, แตห เบ นับ อึณเตณ ปี โลว ฮาว เบ. กาแต ซีแง อึณ ยี มึห อึณอูะ อี ปี ร็อง.”
ลอง เฌาพรา ดัม หมาบ ดี เฆ ดูอี อีซาเรลัะ
34อาโมวแซ วี ต็อห, “เฌาพรา บอ ยึร โฆรห ปี ปึณ ปี เอห เบ ตี, อัน บอ รู กาเซา บอ ดืง ต็อห, 35‘โจว เบ ดูอี ฮาย ดูอี มืก นี, เบ ตู ปึอน ดี ลึบ แคง มืง บอด มืง หมึอม แปะ แฮะ กาแซณ โอว ดี ดัว ดี เฆ ฆูณ เบ ตึอน. อู วี มืร ตู ปึอน ดี ลึบ. 36อึณ มึห มี อาฆาลีบ อี มูห ฆอน อาเยโพวนา อี ปึอน ดี ลึบ. อัน แฮะ โดบ ซีคยา โอว. โอว ดี อาบ กาดาย มืง แปะ แฮะ ฮาว ยอด อัน ตี ดี อัน บอ ดี เฆ หลูกหลาน อัน.’
37โกบ ปึณ เบ, เฌาพรา แฮะ วี รู บอ ดี โอว. อัน เฌา แฮะ ต็อห ดี โอว, ‘บอ แม ตู ปึอน ดี ลึบ แคง มืง ตี. 38แม โลว วี กาซูห น็อห อาโยวซูอา อี มูห ฆอน อานูน, อี แฮะ จอย แม บอ แบน แดเจณ แม. อัน ดี วี แยต เฆ ดูอี อีซาเรลัะ ฮาว ดึห มืง ตี, แตห อึณ แบน คาฆูน เฆ. 39เบ แฮะ ปึณ ต็อห, โยว อี เฮา แคง มืง ตี ดี เหมต ฮาว ฆอน เย.’ อึณ ยี มูห ฆอน ดีรอย บอ ฆอน อางัะ เฆ อี หณัม นับ อี หมึอม บอ อี ตู หมึอม ปี ต็อห เบ ตี, เฆ ดี วี ปึอน ดี ลึบ แคง มืง ตี. โอว ดี วี อาบ มืง ตี ดี เฆ. 40อี มูห เบ, แตห เบ วี วีว, วี ฮาว แคง แปร กาฮ็อห, วี โดบ อึณเตณ อี ฮาว ดี โหนง เรณ ตึอน.
41ดอ อัน ตี เบ วี เวียะ โฆรห โอว ตี ต็อห, ‘อึย อาโมวแซ, เย แฮะ ฮอต ลูต เฌาพรา. เย ดี ฮาว กาโฆห ปี กาลาง อูน เฌาพรา ดี เย.’ เบ แฮะ ฮอต ต็อห ปาย ตี เบ บอ แรน ครึง กาโฆห เบ, แตห เบ ปึอน ดี โฮะ กาโฆห แดง นอน ตี.
42มาแล, เฌาพรา วี กาลาง ดี โอว ต็อห, ‘แกวะ แตห เฆ ฮาว กาโฆห, โอว ตู กอย รึม โดบ เฆ. เฆ ดี ชึม ดี รันซู เฆ.’
43โอว ปี บอ กาลาง ดี เบ มืร, เบ ยี ตู โทม โฆรห โอว. เบ บอ แวน โฆรห เฌาพรา บอ ปีกยัะ กาเซา เบ บอ โฮะ กาโฆห แดง นอน ตี. 44ดอ อัน ตี ดูอี อาโมวรีด อี กอย แคง มืง ตี, เฆ บอ เลห ตัห กาโฆห ดี เบ แคง มืง เซอี, กอ แหนน พึง มาเพียน. เฆ บอ คูงครัห เบ กอ ฌัม ดี มืง ฮอมัะ. 45ปาย ตี เบ บอ วี ตัห ยาม ดี อาต เฌาพรา. มาแล, เฌาพรา ตู โทม โฆรห เบ, ตู ณึงราง ยึร เบ. 46เบ บอ วี กาดูห ดี กอย โดง จืร ซาเดด ราม เหลณ.”
Currently Selected:
ดารา 1: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
