2 อาซามูเอน 4
4
1อึณ ยี มูห ฆอน อาซอลู ตึอน, ดอ วี ยึร อัน อาบานา แฮะ ยัม ดี มืง เฮโบรว, น็อห อัน บอ ดีแตด. บอ เฆ ดูอี อีซาเรลัะ เฆ บอกาเฆลียด บอ กลึร. 2อึณ บอ มึห ดูอี อี กอย รึม โดบ ฆอน อาซอลู ตึอน. ฆาย แบน ดา ตาง อึบ พึง ดา โฌน. อู วี อัน จืร อาบาอานา. ปอ อู วี อัน จืร อาเรคาบ. ฆาย ตึอน มูห ฆอน อารีมโมน อี มูห ดูอี เบรอซี, อี มูห ดูอี แตง ครึร อาเบนยาม. โดง กอย เฆ ดูอี เบรอซี ตึอน แฮะ ลึบ แคง กาดาย ครึร อาเบนยาม. 3โคว, เฆ ดูอี เบรอซี แฮะ ดึอม เตา ฮาว ดี มืง กีดดีม. เฆ บอ กอย บึง มืง ตี กอ ฌัม อาตึร นี.
4อาโยวนาทาน อี มูห ฆอน อาซอลู ตึอน, อัน มึห ฆอน อู วี. เปลา อัน แฆะ บอ อา บลาก. ดอ ยัม อาซอลู ฆาย อาโยวนาทาน ตึอน, ดอ วี ยึร เฆ ดูอี แคง มืง เยจาเรลัะ ลอง อัน ตี, อาซาก อัน แฮะ ปึอน พัน ซีนัม. ดอ อัน ตี วี อี ยอด อี โปว อัน, บอ โจะ ดี โฆ็ง อัน, ต็อห ดี เลห เตา. วี อี ยอด อัน ตี บอ ปีโจห อัน, แตห เปลา อัน บอ แฆะ. ฆอน วี ตี, อัน จืร อาเมพีบอเซด.
5อาเรคาบ บอ อาบาอานา อี มูห ฆอน อารีมโมน แคง ดูอี อาเบนรอซี, ฆาย บอ ฮาว โดง กอย อาอีซาโบวเซด, บอ ฌัม ดอ กาฮัวะ กาเซา กาแต ซีแง. ดอ อัน ตี อาอีซาโบวเซด แฮะ อีด. 6ฆาย บอ ลึบ ฮาว แคง กาง ตึอน, ฆาย ณึงราง ดี ดึห เลห เคาคยูง. ฆาย บอ ซัด วัต อาอีซาโบวเซด. แฮะ ฮอต, อาเรคาบ ฆาย วา อัน อี จืร อาบาอานา ตึอน, ฆาย บอ วี เตา เลห อู เฌณ.
7ดอ ลึบ ฮาว ฆาย แคง กาง ตึอน อาอีซาโบวเซด แฮะ อีด แดง กาโช็ง อีด อี กอย แคง โฮง อีด อัน. ฆาย แฮะ ซัด อัน แตห อัน ยัม, ฆาย บอ แดบ ดึห ฮาว ฆีณ อัน, เตา ฮาว โดบ อึณเตณ แคง ฆลัง อาราพัะ ดอง คืน. 8ฆาย บอ ดึห ฆีณ อาอีซาโบวเซด ตึอน, วี ตัห ฌัม โดง กอย อาดาวีด ดี มืง เฮโบรว ตึอน. ฆาย บอ กาลาง ดี คูนดีคัม ต็อห, “แม ยอด, อาอีซาโบวเซด อี มูห ฆอน อาซอลู อี มูห รันซู แม, อี เหรต ดี ง็อห อาซาก แม เฌา ตึอน, ยาย แฮะ ดึห ตัห ฆีณ อัน ตึย ดี แม. อาตึร นี เฌาพรา แฮะ วี โบง เวียะ ดี อาซอลู แคะ ปี ดึอม โบง อาซอลู ดี แม.
9อาดาวีด วี กาลาง ดี อาเรคาบ ฆาย วา อัน อี จืร อาบาอานา อี มูห ฆอน อารีมโมน, อี มูห ดูอี อาโมยว อาเบรอซี ตึอน. อัน ต็อห, “แฮะ มูห แฮะ หมาน, เฌาพรา แฮะ จอย, แตห โอว ลอด ตัะ ดูก แบน โมยว แบน โมยว. 10โอว ยี ต็อห ดี แม, ดอ ยัม อาซอลู ตึอน, อึณ มึห ดูอี อู วี. ดอ ตัห อัน กาลาง ลอง อัน ตี ดี โอว, อัน ทาง น็อห โอว ดี ดาคึย. โอว ยี วี ง็อห อัน ดี มืง ฌีกาลาด, แตห อึณ แบน รูห โฆรห ปี กาลาง อัน ตึอน. 11อึณ มูห บาย, บาย แฮะ ฮาย กาเซา หลึอม ดูอี วี ตี. บาย แฮะ ฮาว แคง กาง ดูอี อี ตู มึห หมาบ. บาย แฮะ ง็อห อาซาก อัน ดอ อีด อัน แดง กาโช็ง อีด อัน. โคว, โอว ดี บอ แตห บาย คัม หมาบ ตาง ฌึร ตี, แกวะ ฮู แตห บาย กอย แดง กาดาย นี.”
12อาดาวีด แฮะ ฮอต กาลาง โฆรห ตี, อัน บอ จัร ดูอี อัน, แตห เฆ ฮาว ง็อห ยัม ฆาย. แฮะ ฮอต, เฆ วี แดบ เปลา แดบ แด ฆาย, วี ฮอย อูน โดว ฆาย โคบ อึม ดึง แคง มืง เฮโบรว ตึอน. อี มูห ฆีณ อาอีซาโบวเซด ตึอน, เฆ บอ ดึห เบลห แคง บาเรว อาบานา อี กอย ดี มืง เฮโบรว ตึอน.
Currently Selected:
2 อาซามูเอน 4: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
