2 อาซามูเอน 3
3
1ปัน อัน ตี ดูอี อึณกรึห อาซอลู ฆาย อึณกรึห อาดาวีด, เฆ บอ ลาย กาโฆห เหลณ กาเซา. ดูอี อาดาวีด ยี มึห โปลม แฮณ กืน. ดูอี อึณกรึห อาซอลู บอ แกร ดี ดีหลัห, แกร ดี โยม.
2อาดาวีด ยี มึห ฆอน อี ฆึอด ดี มืง เฮโบรว ตึอน. ฆอน ฆีณ อัน จืร อามานูน. มา อัน มูห นาง เอฮีนอง อี มูห ดูอี เยจาเรลัะ ตึอน.
3ฆอน อีมาย อัน วี ฮาอา, อัน จืร อาคีลาด. มา อัน มูห นาง เอพีเฆลา, อี มูห ดูอี มืง ฆาเมลัะ, อี ดึอม มูห อีบึณ อานาบาลัะ ตึอน. ฆอน อีมาย อาดาวีด วี ฮาโอย, อัน จืร อาบาซาโลม. มา อัน มูห นาง มาคา อี มูห ฆอน อาตาลาม อี มูห คูนดีคัม แคง มืง เกซูรา ตึอน.
4ฆอน อัน วี อึณ พวน อัน จืร อาตอนียา. อัน มูห ฆอน นาง ฮากีด. ฆอน อัน วี อึณพัน, อัน จืร อาเซพาดี. อัน มูห ฆอน นาง เอบีตาลัะ.
5ฆอน อีมาย วี อึณเดา, อัน จืร อาอีซาลัม. อัน มูห ฆอน นาง เอกาลา อี มูห อีบึณ อาดาวีด ตึอน. ฆอน อาดาวีด เฆ ตี, เฆ ฆึอด โตต แคง มืง เฮโบรว ตึอน.
6ดอ ลาย กาโฆห ดา ซึก อาซอลู ฆาย ดูอี อาดาวีด อี มูห อาบานา ตึอน, อัน โฆยวฆยา ดี โบง แตห อัน วี มึห ปวน แคง ดูอี อาซอลู. 7อาซอลู ยี ดึอม มึห อีบึณ เตียะ อู วี, อี จืร นาง รีฌาบา, อี มูห ฆอน อาเอยา. อู ซีแง อาอีซาโบวเซด บอ ดีหมอด อาบานา ตึอน ต็อห, “โกบ มาเซ แม แฮะ ดึห อีบึณ เตียะ ฆูณ โอว?”
8ปัน ตี อาบานา บอ รู กาเซา โกบ กาลาง อาอีซาโบวเซด โฆรห ตี. อัน วี ต็อห, “แม ทาง โอว นี มูห มาโซว อี ตัห บลาก ดูอี อายูดา? กอ ฌัม ซีแง อาตึร นี โอว แฮะ โดบ ซีคยา ฆูณ แม อาซอลู เฆ ฆึก อัน. โอว กอ ฮู อาบ เบ ดี อาดาวีด คอ อู วี. ดอ ตี นี แม ยี เหรต ดี กาย็อง โอว โกบ อีบึณ ตี. 9โคว, แตห เฌาพรา ดัม หมาบ กาเซา ดี โอว, เซ โอว ตู ฮาว จอย อาดาวีด. โอว ดี โบง แตห อึณ แบน โตต ดอน โมยว ปี ดึอม ดัว เฌาพรา กาดีก ซัดฌา ดี อาดาวีด. 10โอว ดี โบง แกวะ ฮู แตห ดูอี อาซอลู อึบ มืง อีซาเรลัะ, แตห อาดาวีด วี อึบ บอ มืง ยูดา บอ มืง อีซาเรลัะ, แตห อึณ จูห ดี มืง ดาน กอ ฌัม ดี มืง บีราเซบา.” 11อาบานา แฮะ ฮอต กาลาง โฆรห ตี, อาอีซาโบวเซด บอ วี โยว, อาว ฮู ยัะ วี กาลาง โฆรห มาเซ ดี อาบานา.
12วาย ตี, อาบานา บอ จัร ดาลาม อัน ฮาว โดง กอย อาดาวีด ดี มืง เฮโบรว ตึอน, แตห อัน ต็อห, “แม แฮะ นับ อาเซ มูห ดา ตาง อี อึบ มืง นี. แตห ยาย ลาย แบน อู ฆึก. แฮะ ฮอต, โอว ดี วี จอย ดูอี อีซาเรลัะ บอกาเฆลียด วี กาโทะ ตัห บลาก แม.”
13อาดาวีด มืร วี ต็อห, “แฮะ มูห, โอว ดี ลาย แบน อู ฆึก ดี แม. มาแล, โอว มึห ปี ซี หมาณ ดี แม อู โมยว. อี มูห ฆอน อาซอลู อี จืร นาง มีคาลัะ ตึอน, เซ แม ตู ตึย ตัห อัน ดี อาต, แม มืร ตู ปึอน ดี วี ตัห ยึร โอว.” 14แฮะ ฮอต, อาดาวีด บอ วี จัร ดาลาม อัน ฮาว ดี อาอีซาโบวเซด อี มูห ฆอน อาซอลู ตึอน, แตห อัน ต็อห, “ดึห นาง มีคาลัะ อี มูห อีบึณ แปะ แฮะ ดึอม จึห โอว ตา ฮูน ลัะคานา ดูอี พีลีที เฆ อู มาย็อห วี ตึอน, แตห อัน วี ตัห โดง กอย โอว.”
15อาอีซาโบวเซด ตึอน บอ จัร อีบึณ ตึอน, แตห อัน แวน อีมาย อัน อี จืร อาพาลัะ อี มูห ฆอน อาเลซา ตึอน. 16ดอ ฮาว นาง มีคาลัะ, อีมาย อัน มืร ฮาว โดบ อัน บอ ยาม บอ ฮาว โดบ ดี ปัน อัน, แตห กอ ฌัม มืง บาฮูรีม. ปัน ตี อาบานา ตึอน วี ต็อห ดี อัน, “แตห แม เวณ.” แฮะ ฮอต อัน บอ วี เวณ.
17อาบานา บอ กามวน ซังคยาง ดี เฆ อี มูห ดา ตาง ดูอี อีซาเรลัะ. อัน ต็อห, “ซีณ อาต นี เบ มึห น็อห ซี โจะ มยูก อาดาวีด, แตห อัน แบน คูนดีคัม เบ. 18ดอ ตี นี, แตห เบ โบง. เฌาพรา แฮะ ดึอม กาลาง ดี อาดาวีด, ‘อาดาวีด มูห แดเจณ โอว. โอว ดี แตห อัน แป เฆ ดูอี พีลีที บอ เฆ อี มูห รันซู ดูอี อีซาเรลัะ ดอน โมยว, แกวะ แตห เฆ ดูอี อีซาเรลัะ กาดูห อี หณาบ.’”
19ปัน ตี อาบานา บอ ฮาว กาลาง ดี ดูอี อาเบนยาม. แฮะ ฮอต, อัน บอ ฮาว มืง เฮโบรว, กาลาง ดี อาดาวีด แคะ ปี โลว เฆ ดูอี อีซาเรลัะ บอ เฆ ดูอี อาเบนยาม บอกาเฆลียด. 20อัน แฮะ แตห ดูอี อา ฆึร วี โดบ อัน, ตัห ฌัม โดง กอย อาดาวีด ดี มืง เฮโบรว ตึอน. อาดาวีด บอ โบง บลอย เฮียง อาบานา เฆ ดูอี อัน. 21อาบานา บอ ต็อห ดี อาดาวีด, “แตห โอว ฮาว อู เฌณ, จัร เฆ ดูอี อีซาเรลัะ บอกาเฆลียด ตัห กาฌูะ กาดึม โดง กอย แม คูนดีคัม อี อึบ โอว. แตห เฆ กาแซณ ดี แม, แตห แม ปึอน ดี อึบ แคะ ปี อึง แม.” อาดาวีด บอ จัร อัน ฮาว. แฮะ ฮอต อัน บอ ฮาว ดาคึย ดาคึย.
22ดอ อัน ตี อายอพัะ บอ เฆ ดา ซึก อาดาวีด แฮะ วี ตัห โดง คูงครัห เฆ รันซู ตึอน. เฆ บอ โฆ็ง โกรวกราม กืน แปะ แฮะ พาด ตัห เฆ ดี รันซู. ดอ อัน ตี อาบานา อาว ฮู กอย โดบ อาดาวีด ดี มืง เฮโบรว. โคว, อาดาวีด แฮะ ฮอต แตห อัน ฮาว ดาคึย ดาคึย. 23ดอ ตัห อายอพัะ เฆ ดา ซึก อัน, อี เฮา แฮะ กาลาง ดี อายอพัะ ต็อห, “อาบานา อี มูห ฆอน อาเนรัะ ตึอน, อัน แฮะ ฮอต ตัห โดง กอย คูนดีคัม อาดาวีด. อาดาวีด ยี วี เบลห แตห อัน ฮาว ดาคึย ดาคึย.”
24โคว, อายอพัะ วี ลึบ ตัห โดง กอย คูนดีคัม ต็อห, “แม คูนดีคัม แฮะ โบง มาเซ? แม ยอด, อาบานา ตึอน แฮะ ตัห ฌัม โดง กอย แม. โกบ อึณ ปาย เหมา แม วี แตห อัน ปึอน ดี ลอด ฮาว? 25แม นับ, อาบานา อี มูห ฆอน อาเนรัะ ตี, อัน ตัห แตห อัน ปึอน ดี กาโลว แม, แตห อัน บอ นับ โดง ลึบ โดง เลห แม, แตห อัน บอ นับ แคะ ปี คราม แม ดี โบง ดอน โมยว.”
26อายอพัะ แฮะ ฮอต ต็อห ปาย ตี, อัน บอ เลห โดง กอย อาดาวีด บอ วี จัร ดาลาม อัน ฮาว โดบ อาบานา ตึอน. เฆ บอ แดะ ตัห อัน ดี อึม คึม ซีรา ตึอน. มาแล, อาดาวีด ตู นับ ลอง อัน ตี. 27อาบานา บอ วี ตัห ฌัม ดี มืง เฮโบรว ตึอน. อายอพัะ บอ แดะ อัน ตัห ดี มาโลห มืง, ณึงราง ต็อห ดี กามวน แกวะ แตห อี โทม. แฮะ ฮอต, อัน บอ ซัด วัต อาบานา, แตห อัน กอ ยัม ดี ตี. อัน วี โบง ปาย ตี แตห อัน เวียะ ปี โบง อาบานา ดอ แฮะ ง็อห อัน อาซาเฮลัะ อี มูห วา อายอพัะ.
28วาย ตี ดอ วี นับ อาดาวีด ลอง อัน ตึอน, อัน บอ กาลาง ต็อห, “บอ โอว, บอ ดูอี แคง มาน มืง โอว ตู มึห หมาบ มาเซ ดี อาต เฌาพรา. อาว บา เย ดอ ง็อห อายอพัะ ดี อาบานา อี มูห ฆอน อาเนรัะ ตึอน. 29แตห อายอพัะ คัม โตต หมาบ อัน ตี, บอ บีนอง วอแว อัน เฆ บอกาเฆลียด, แตห อึณ มึห อี เซา เซเซ. แตห เฆ มึห ดีม, มึห เซา ดูะ, แตห เฆ บอ โลว ฮาว โฆ็ง อึณกรวน. แตห อึณ มึห อี ยัม ดี บลา เลียห บอ เอต ปี ดี โฮม.”
30อายอพัะ ฆาย วา อัน อาพีเซ แฮะ ง็อห ยัม อาบานา ตึอน โคว, อาบานา แฮะ ง็อห ยัม วา ฆาย ดอ กาโฆห เฆ ดี มืง กีปอง ตึอน.
31อาดาวีด มืร จัร อายอพัะ บอ เฆ ดูอี อี กอย โดบ อัน. อัน ต็อห, “เบ โลว กายาต ครึง ปี ตา เบ, วี ดึห ชึบ ครึง จาน, วี ยาม ตาง, ฮาว นา อาต กาลัยะ อาบานา. อี มูห อาดาวีด, อัน บอ โดบ กาลัยะ อาบานา ตี. 32เฆ บอ ดึห โดว ยัม อาบานา บอ ดีบ อัน แคง มืง เฮโบรว ตึอน. คูนดีคัม อาดาวีด บอ ยาม ตาง โคบ บาเรว อาบานา. ดูอี เฆ ตึอน บอกาเฆลียด มืร บอ กาโพรม ดี ยาม ปาย ตี.
33คูนดีคัม บอ กลึร บอ เหงา โกบ แฮะ ยัม อาบานา. อัน ต็อห โหมว ปาย นี, “แม อาบานา นี, แม แฮะ ยัม ปี ดูอี มืก ดี ยัม. 34แด แม มืร อี ตู ดึอม ปัก, เปลา แม มืร ตู ดึอม ชึบ วัน ฮีน. โคว, อาว กาอาบ แม ยัม ดี แด ดูอี ฮาย ดูอี มืก.” ดูอี เฆ ตึอน บอ วี ยาม ปอ อึณ ปัว โกบ อัน ตึอน.
35ปัน ตี แคะ กอย ดูอี เฆ ตึอน บอ ตัห กาตัด อาดาวีด, แตห เฆ ปึอน ดี ดัว ปี ดี โฮม ดี อัน, แตห อัน โฮม อาต อับ แปร. อาดาวีด บอ ดืง ต็อห, “แตห เฌาพรา ดัม หมาบ กาเซา ดี โอว เซ โอว โฮม มาเซ อาต เฆต ซีแง. อึณ บอ มูห คามูน, บอ มูห โมยว เหมา, โอว ตู โฮม.”
36ดูอี เฆ ตึอน บอ ยึร ลอง อัน ตี, อึณ บอ ล็อะ น็อห เฆ. แคะ ปี โบง คูนดีคัม ตึอน, แฮะ ล็อะ น็อห ดูอี บอกาเฆลียด. 37ซีแง ตี, แคะ กอย ดูอี อีซาเรลัะ, เฆ บอกาเฆลียด บอ นับ, อึณ ตู มูห คูนดีคัม อี แฮะ ง็อห ยัม อาบานา อี มูห ฆอน อาเนรัะ ตึอน.
38คูนดีคัม มืร กาลาง ดี ดูอี อัน ต็อห, “แฮะ หมาน อาคาคัร, ดูอี อี มึห อาเร, อี ตาง หลึอม อี แคง ดูอี อีซาเรลัะ อัน แฮะ ชึม อาตึร นี. 39โอว แฮะ คัม ดี พ็อห นามัน แตห โอว แบน คูนดีคัม, โอว มืร ตู มึห โปลม. โอว แฮะ ฮอต ดีหลัห. เฆ อี มูห ฆอน อีมาย นาง เจรูยา ตึอน, เฆ แฮะ วี มึห โปลม หลึอม โอว. แตห เฌาพรา โบง เวียะ ดี เฆ นา ตู หมึอม ปี โบง เฆ, แตห อึณ กาดาน ดี ปี โบง เฆ.”
Currently Selected:
2 อาซามูเอน 3: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
