2 อาซามูเอน 5

ลอง อาดาวีด อึบ มืง อีซาเรลัะ บอ มืง

1ปัน ตี แคะ กอย ดูอี อีซาเรลัะ, เฆ บอ กาโพรม ดี ตัห โดง กอย อาดาวีด ดี มืง เฮโบรว ตึอน. เฆ ต็อห, “เย นี มูห บีนอง วอแว แม. 2ดอ แฮะ แบน อาซอลู คูนดีคัม อี อึบ เย, แม แฮะ แยต ดา ซึก เย ดูอี อีซาเรลัะ ดอ กาโฆห เย ดี รันซู เย. เฌาพรา มืร แฮะ ต็อห ดี แม, ‘แม โลว ยอด แมน ดูอี โอว อี มูห อาโมยว ดูอี อีซาเรลัะ. แฮะ ฮอต, แม ดี แบน ดา กาณา อี อึบ เฆ.’”

3ปัน ตี แคะ กอย เฆ ดา ตาง ดูอี อีซาเรลัะ บอกาเฆลียด ตัห ฌัม โดง กอย คูนดีคัม อาดาวีด ดี มืง เฮโบรว ตึอน, อัน บอ กาแซณ ดี เฆ, แตห บอ เฌาพรา นับ. แฮะ ฮอต เฆ บอ กาโพรม ดี พ็อห นามัน ดี ฆีณ อาดาวีด, แตห อัน แบน คูนดีคัม อี อึบ ดูอี อีซาเรลัะ.

4ดอ แบน อาดาวีด คูนดีคัม, อาซาก อัน แฮะ ปึอน โอย ฆึร ซีนัม. อัน วี อึบ มืง อาดา พวน ฆึร ซีนัม. 5อัน กอย ดี มืง เฮโบรว ตึอน, วี อึบ มืง ยูดา บู ซีนัม ดี เดา มาเฆียน. อัน บอ กอย ดี มืง เยรูซาแลม, อึบ มืง ยูดา บอ มืง อีซาเรลัะ บอกาเฆลียด อาดา โอย ฆึร ดี โอย ซีนัม.

6ปัน ตี คูนดีคัม บอ ดูอี อัน, เฆ บอ แรน ซึก, ฮาว ดี มืง เยรูซาแลม, แตห เฆ กาโฆห ดี ดูอี เยบูซีด อี แฮะ กอย แคง มืง ตี. เฆ ดูอี เยบูซีด ต็อห ดี อาดาวีด, “แม ตู ปึอน ลึบ ตัห นา แคง นี. เฆ อี งาย อับ บอ เฆ อี เปลา แฆะ, เฆ ดี บอ แป ดี แร แม.” เฆ ต็อห ปาย ตี โกบ ทาง เฆ, อาดาวีด ตู ปึอน ดี ลึบ มืง เฆ ดอ เหมา. 7แฮะ ฮอต ปาย ตี อาดาวีด บอ แป เฆ ดี นอน ฌีโอน. วาย อัน ตี เฆ บอ แตห โดง ตี จืร มืง อาดาวีด.

8ดอ อัน ตี อาดาวีด ต็อห, “อาเซ ดี กาโฆห ง็อห แวน ดูอี เยบูซีด เฆ ตึอน อี มูห ดูอี เปลา แฆะ บอ งาย อับ ปี ฌ็อง โอว, อัน โลว ฮาว ลึบ โลง แคง กาเดา อึม โดบ โรง อึม อี ลึบ แคง มืง. ปาย ตี เบ ดี บอ แป รันซู เอ ตี.” โคว อัน ตี, เฆ ต็อห โฆรห มากาทัะ, “เฆ อี งาย อับ เปลา แฆะ ตู ลึบ แคง โฮว คูนดีคัม.”

9วาย ตี, อาดาวีด บอ กอย แคง มืง เยรูซาแลม. อัน บอ แตห โดง ตี จืร มืง อาดาวีด. อัน บอ โบง บอ วี อึณปราย ดี โคบ โดง กอย อัน ตึอน, แตห อึณ มึห แรง ตาง. อัน บอ อึณปราย โตต ดอน โมยว, จูห ดี แรง ดี ดัง นอน กอ โฮะ ฌัม ดี โฮว อัน. 10ปวน อัน บอ แกร ดี กืน, แกร ดี ตาง. โคว, เฌาพรา อี อึบ โตต ดอน โมยว มืร แฮะ กอย รึม โดบ อัน.

11บอ อาฮีรัม อี มูห คูนดีคัม อี อึบ ดูอี แคง มืง ทูโรว ตึอน, อัน บอ จัร ดาลาม อัน ฮาว โดง กอย อาดาวีด. อัน แตห เฆ ดึห บอ เฮ อารีด ตัห. บอ ลักซามา เฆ อี นับ ดี โฆว มาอูด, โบง ตึก, อัน แตห เฆ โดบ, แตห เฆ ซัม โฮว ดี อาดาวีด. 12อาดาวีด บอ นับ, อึณ มูห เฌาพรา อี แฮะ แตห อัน แบน คูนดีคัม อี อึบ ดูอี อีซาเรลัะ. อึณ บอ มูห เฌาพรา อี แฮะ แตห มืง อัน แบน มืง ตาง, แตห อึณ แบน อาฆยึร ดี ดูอี อีซาเรลัะ.

13วาย เลห อาดาวีด แคง มืง เฮโบรว, วี กาโทะ ฮาว มืง เยรูซาแลม, อัน บอ ดึห อีบึณ เตียะ อีบึณ ตาง, บอ วี มึห ฆอน อีบึณ ฆอน อีมาย. 14ฆอน อาดาวีด อี ฆึอด ดี มืง เยรูซาแลม ตึอน, เฆ จืร อาซามูอา, อาซอบาบ, อานาทาน, อาซาโลวโมว, 15อาอีบารา, อาเอลีซูอา, อาเนเพก, อายาพา, 16อาเอลีซามา, อาเลตัะ บอ อาเอลีเพเลด.

17ดอ ยึร เฆ ดูอี พีลีที ลอง อาดาวีด แฮะ แบน คูนดีคัม อี อึบ ดูอี อีซาเรลัะ, เฆ บอ กาโพรม ดี แรน ซึก, ตัห เหรต อาดาวีด. อาดาวีด บอ ยึร ลอง อัน ตี, อัน บอ โลง โดง ดึอม เครียง อัน.

18ดูอี พีลีที แฮะ ตัห กอย ดอน นา ดอน โปละ ดี ดีลัยะ อี จืร เรพีม ตึอน. 19อาดาวีด บอ ดีหมอด เฌาพรา ต็อห, “อึณ ปึอน ฮาว กาโฆห ดี ดูอี พีลีที เฆ ตึอน? แม เฌา ดี อาบ ดัว เฆ ดี โอว?” แฮะ ฮอต, เฌาพรา วี ต็อห ดี อาดาวีด, “แตห แม ฮาว. โอว ดี แตห แม แป เฆ.”

20อาดาวีด บอ ฮาว ดี มืง บาลัะเบราซีม. อัน บอ กาโฆห บอ แป เฆ. อัน ต็อห, “เฌาพรา แฮะ แยต ดี อาต โอว, แฮะ ปยาต รันซู โอว, แตห อึณ ปี อึม ตาง แฮะ ตัห โบง แตห อึณโฆว ซีฆลูห.” เฆ บอ แตห โดง ตึอน จืร บาลัะเบราซีม. 21ดูอี พีลีที บอ แวน อารึบ ปี กรึบ เฆ. อาดาวีด เฆ ดูอี อัน บอ ดึห ฮาว.

22ปัน ตี ดูอี พีลีที ปี วี ตัห ปอ อู เฌณ, วี ตัห กอย โนะ โดบ ดีลัยะ เรพีม ตึอน. 23อาดาวีด บอ วี ดีหมอด เฌาพรา. เฌาพรา วี ต็อห ดี อัน, “แกวะ ฮาว ซืร โดง คยัะ เฆ. แม โลว แลบ ตัห นา ปัน เฆ. แม โลว ตัห นา กอย เฮ กาเปรียห ตึอน, ตัห ณืร เฆ. 24แม ฮี ยึร ฆรัณ ดา ซึก ดี กาแดะ เฮ กาเปรียห ตี, แตห แม ปีครัน แม. โคว, ดอ อัน ตี เฌาพรา ดี แยต ดี อาต แม, แตห แม ปึอน ดี กาโฆห ดี ดูอี พีลีที, แตห แม แป เฆ.” 25อาดาวีด บอ โบง โดบ แคะ ปี ต็อห เฌาพรา ดี อัน. อัน บอ กาโฆห บอ ปยาต ดูอี พีลีที จูห ดี มืง กีปอง กอ ฌัม มืง เกจา.

Currently Selected:

2 อาซามูเอน 5: pce

Highlight

Copy

Compare