1 ปต 2
2
1โคว อัน ตี แตห เบ แวน อี ฮาย อี มืก ดอน โมยว. แกวะ แตห เบ กาโลว, แกวะ แตห เบ ณึงราง บอด บอ ลาย หลัยะ, ลาย พยาก ดอ เหมา. 2-3โกบ แฮะ คัม เบ ปี เฆฌู เฌาพรา, เบ แฮะ ปี ฆอน งัะ อี ฆึอด กามาย. โคว, แตห เบ ซี โทม โฆรห เฌาพรา อี ซีงา บอด, แตห อึณ ปี ฆอน งัะ อี กาปราณ มี อึม ปู ดีโลย. เซ เบ โบง ปาย ตี, เบ ดี บอ แกร ดี หณึม ซีคยา เฌาพรา, แตห อึณ คยอด เบ.
4แตห เบ บอ ตัห บึง อัน เฌา อี ปี มาว อี นับ ดี ดัว อาซาก กามาย ดี อี. อึณ ปี เฆ ดูอี อี ซัม กาง แฮะ แวน มาว ตี ต็อห, อาว มึห ดีโคว. มาแล, เฌาพรา ยี แฮะ ร็อห อูน, แฮะ ต็อห, ง็อห อัน แฮะ ตาง กาเซา. 5บอ เบ แฮะ ปี มาว อี แฮะ มึห อาซาก. เฌาพรา แฮะ แตห เบ กอย รึม, แตห บอ น็อห พึอม อัน กอย กาแต เบ. ปี โบง เฌาพรา ตี, อึณ ปี อัน ซัม โฮว อาดา เบ อี แฮะ ปี ดูอี อี หลู ดี เฌาพรา. ปี หลู เบ ตี ยี ตู มูห โกรวกราม. อึณ มูห ปี ดัว น็อห พึอม เฌาพรา ดี เบ. ปี ดี หลู ฌึร ตี, อึณ แฮะ ล็อะ น็อห เฌาพรา โกบ หณึม เบ ดี เฌา เยซู. 6โคว, แคง บับ เฌาพรา แฮะ แดม อูน ต็อห, “แตห เบ ยอด ดอ ตี นี, โอว แฮะ ร็อห ดูอี อู วี อี ปี มาว อี ง็อห ตาง กาเซา. โอว แฮะ เบลห อูน อัน แคง มืง ฌีโอน, แตห อัน แบน เจณ ร็อง. อาเซ หณึม อัน, อัน ตู โลว ซาย อี ดอ เหมา.” 7อี มูห เบ อี แฮะ หณึม, บอ เบ แฮะ ทาง มาว ตี แฮะ ง็อห ตาง กาเซา. อี มูห เฆ อี ตู หณึม, เฆ ยี ทาง, อึณ มูห มาว ปี แวน เฆ ดูอี อี ซัม กาง. มาแล, มาว ตี แฮะ วี แบน เจณ ร็อง. 8ปอ อู โปละ อึณ บอ ต็อห, “มาว โบ็ง ตี, อึณ ดี แตห ดูอี ตัห ดูห, ตัห กาฟัห. อึณ มูห มาว อี แตห เฆ เกห.” โคว, เฆ กาฟัห เกห โกบ ตู โทม เฆ โฆรห เฌาพรา. อัน เฌา แฮะ แตห เฆ กาดูห ปาย ตี.
9อี มูห เบ, เบ แฮะ แบน ดูอี ปี ร็อห อัน เฌา. อัน แฮะ แตห เบ แบน ดูอี อี หลู ดี เฌาพรา บอ แบน ปี คูนดีคัม. เบ แฮะ แบน ดูอี อาโมยว อี ซีงา บอด. เบ มูห ดูอี ปี อึบ เฌาพรา. อัน แตห เบ กาลาง แปะ แฮะ โบง อัน เฌา อี หมึอม อาม กาเซา. อัน แฮะ แตห เบ เลห แคง อับ ว็อง, แตห เบ วี กอย แคง บลาง อัน เฌา. บลาง ตี ยี หมึอม อาม กาเซา. 10อาต นี, เบ ตู มูห ดูอี ปี อึบ เฌาพรา. ดอ ตี นี, เบ แฮะ วี แบน ดูอี ปี อึบ เฌาพรา. อาต นี เบ มืร หณัม ปึอน ปี เฆฌู เฌาพรา. ดอ ตี นี, อัน เฌา ยี แฮะ เฆฌู เบ.
11อึย เบ บีนอง ปี ร็อก โอว, โอว ซี กาซูห เบ. โกบ มูห เบ ดูอี อี ปี แคต บอ ดูอี อี ตู มึห โดง ดี กอย เซเซ แดง กาดาย นี, แกวะ แตห เบ โดบ น็อห กาวาต เบ อี ซี ปยาต น็อห พึอม เบ. 12แตห เบ โบง นา บอด นา หมึอม กาแต เฆ ดูอี อาโมยว เฮา อี ตู หณึม เฌาพรา. เฆ ปี บอ ต็อห, เบ มูห ดูอี ฮาย ดูอี มืก มืร, เซ เฆ วี ยึร ปี โบง เบ นา บอด นา หมึอม, อึณ ดี แตห เฆ อืบ เฌาพรา ปัน ดี วี ตัห โลง เฌา เยซู.
13โกบ หณึม เบ เฌา เยซู, แตห เบ คัม ดี โทม อามีง ปี เบลห อูน ดา กาณา อี อึบ เบ. บอ มูห คูนดีคัม อี อึบ โตต, 14บอ มูห เฆ อามู อามาด อี ตาง แปะ แฮะ ดาง คูนดีคัม, เบ โลว โทม โฆรห เฆ ตี. โคว, เฆ ดี ซูงพยาด บอ ดัม หมาบ ดี ดูอี ฮาย ดูอี มืก. เฆ ดี บอ วี อืบ ดูอี อี โบง นา บอด นา หมึอม. 15โคว, เฌาพรา ซี แตห เบ โบง นา บอด นา หมึอม, แตห อึณ บอ กาบีด โมต เฆ ดูอี รึร อี ตู นับ มาเซ, อี ตู มึห อางยาน. 16แตห เบ ปี ดูอี อี แฮะ กอย ทังฮาง. มาแล, เบ แกวะ ดึห ลอง ทังฮาง เบ ตี, แตห อึณ วี ซีบลึก ปี โบง เบ อี ตู บอด ตู หมึอม. แตห ปี โบง เบ ยี ปี ปี โบง เฆ แดเจณ เฌาพรา. 17แตห เบ รีมาด ดูอี ดอน อี. แตห เบ ร็อก เฆ บีนอง อี หณึม เฌา เยซู, แตห เบ บอ โยว บอ โรวเซ เฌาพรา. แตห เบ โรวเซ บอ คูนดีคัม อี อึบ เบ.
18เบ อี มูห หมาย อี เฮา, แตห เบ คัม ดี โทม บอ โรวเซ ดา กาณา เบ ดอน โมยว. อาว มูห โทม มี ดา กาณา อี มึห น็อห ดาคึย น็อห หมึอม. แตห เบ โทม บอ ดา กาณา อี ซีมา เอห. 19โคว, เซ ดูอี อู วี โลว คัม ดูก โกบ แนนัะ อี เฮา ดี อัน, เซ อัน บอ คัม ฌึร ตี โกบ โหลห อัน เฌาพรา เซเซ, อึณ แฮะ กาอาบ อืบ ดูอี วี ตี. 20เซ เบ ยี คัม ดูก โกบ โบง เบ หมาบ, อาว แบน อาฆยึร มาเซ. เซ เบ ยี คัม ดูก โกบ โบง เบ นา บอด นา หมึอม, เฌาพรา ดี วี เฆฌู เบ. 21โคว, เฌาพรา ซี แตห เบ โบง ปาย ตี. เฌา เยซู มืร แฮะ คัม ดูก, แตห อึณ แบน อูพามา ดี เบ, แตห เบ วี โดบ วี ณึง ปี ปาย อัน ตี. 22แคง บับ เฌาพรา อึณ บอ ต็อห, “อัน เฌา มืร ตู โบง หมาบ ดอ เหมา. อาว มึห คอ อู วี อี ดึอม ยึร อัน เฌา กาลาง โฆรห ตู หมาน.”
23ดอ กาลาง เฆ โฆรห จีจีว ดี อัน, อัน ตู วี เวียะ โฆรห เฆ. ดอ คัม อัน ดูก ตาง, อัน มืร ตู กาชัวะ เฆ. อัน แตห น็อห อัน วี โหลห เฌาพรา อี นับ ดี ซูงพยาด โดบ นา มูห นา หมาน. 24อัน เฌา แฮะ คัม ดี ดึห โตต หมาบ แปะ แฮะ ลูต เอ บอกาเฆลียด, แตห อัน คัม หมาบ ตี ดอ ยัม อัน แดง ร็อง กาแวะ. อึณ ปี บอ เอ แฮะ คัม ดี ยัม. เอ อาว ฮู มึห หมาบ มาเซ. เอ แฮะ ปึอน อาซาก กามาย อี โดบ นา มูห นา หมาน. โกบ แฮะ คัม อัน เฌา ดี เซา ดี ดีม กาดาง เบ, อึณ แตห บอ เซา รอฆา เบ หราย. 25อาต นี บอ เบ แฮะ กาลึบ. เบ แฮะ ปี มาบู อี แฮะ โบยห. ดอ ตี นี, เบ ยี วี ปึอน ดี โดบ ดา อี เฮียง มาบู อี มูห อัน เฌา อี อึบ น็อห พึอม เบ.
Currently Selected:
1 ปต 2: pce
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translator, Inc. All rights reserved.
