1 ปต 3

1โอว แฮะ ฮอต กาลาง ลอง เฆ หมาย อี, แตห เฆ คัม ดี โฆม ดา กาณา เฆ. ปาย ตี, บอ เบ อี มูห อีบึณ, เบ โลว คัม ดี โฆม บอ โทม โฆรห อีมาย เบ. เซ เบ โบง ปาย ตี, บอ อีมาย เบ อี ตู หณึม เฌาพรา, เบ ปี ซัะ กาลาง โฆรห มาเซ ดี เฆ มืร, อึณ ดี กาซูห น็อห เฆ, แตห เฆ วี หณึม โกบ ยึร เฆ ปี โบง เบ อีบึณ. 2ดอ ยอด เฆ นา บอด นา หมึอม ปี โบง เบ อี มูห อีบึณ เฆ, เซ เบ บอ นับ ดี โรวเซ เฆ, เฆ ดี บอ โพรม ดี หณึม โดบ เบ. 3เบ ยี ตู โลว อึณปราย ปีชีด โดว เบ, แตห อึณ ชีด มี นา เรต. เบ ตู โลว ดอน ฮึก ฆีณ เบ, บอ ฮอย มากาแวะ ครีว, บอ ชึบ ครึง ชีด อี ง็อห ตาง. 4ปี โลว เบ อึณปราย แตห อึณ ชีด แตห อึณ หมึอม, อึณ มูห น็อห เบ. อี บอด อี หมึอม แคง น็อห เบ, อึณ ตู ลึห อู เฌณ. อึณ มืร ตู นับ ดี ลึร. อี มูห น็อห อึณจูะ อึณจัม บอ น็อห หนีม, ฌึร ตี เฌาพรา มืร ต็อห, แฮะ ง็อห ตาง กาเซา. 5เฆ อีบึณ อี มึห น็อห ซีงา อี หณึม เฌาพรา บาน ดอ มึอน, เฆ แฮะ ปีชีด เฆ ปาย ตี. เฆ มืร แฮะ คัม ดี โทม โฆรห อีมาย เฆ. 6บอ นาง ซาราย ตึอน มืร แฮะ โบง ปาย ตี. อัน แฮะ คัม ดี โฆม, คัม ดี โทม โฆรห อาบราฮัม, บอ ต็อห ดี อีมาย อัน, “แม มูห ดา กาณา โอว.” ดอ ตี นี, เซ เบ วี โบง นา บอด นา หมึอม บอ ตู โยว มาเซ, เบ แฮะ แบน ปี ฆอน นาง ซาราย ตี.

7ปาย ตี, บอ เบ อี มูห อีมาย, แตห เบ กอย รึม โดบ อีบึณ เบ บอ กาพา ดาง เฆ. แตห เบ มาด เฆ ตู มึห โปลม เฆ แฮณ ปี เบ. แตห เบ บอ รีมาด เฆ. แตห เบ มาด เฆ แฮะ ปึอน อาซาก กามาย ปี เบ. เฆ มืร แฮะ ปึอน ปี เฆฌู เฌาพรา ปี เบ. เบ โลว โบง ปาย ตี, แกวะ แตห อึณ มึห มาเซ อี ดี ฆ็อง ดี แร ปี ซาคึร ปี หมาณ เบ ดี เฌาพรา.

8บาง ดี ฮอต โฆรห นี, โอว ต็อห, แตห เบ ดอน อี ลาย โพรม รึม, แบน อู น็อห. แตห เบ บอ ลาย กาพา ดาง, บอ ร็อก บีนอง เบ. แตห เบ นับ ดี ลาย กาเว บอ มึห น็อห โฆม น็อห เตียม ดอน อี. 9แกวะ วี โบง เวียะ นา ฮาย ดี อี. แกวะ แนนัะ เฆ อี แนนัะ เบ. แตห เบ วี ม็องการา ดัว นา บอด นา หมึอม ดี เฆ อี โบง นา จีจีว ดี เบ. โคว, เฌาพรา ซี แตห เบ โบง ปาย ตี. แตห บอ เบ ปึอน ปี ม็องการา ดัว เฌาพรา. 10โคว, อาเซ ซี ปึอน น็อห ดาคึย, อาเซ ซี กอย ดาคึย แบน ซีแง แบน ซีแง, แกวะ แตห อัน กาลาง โฆรห อี ตู บอด อี ตู หมึอม ดอ เหมา. แกวะ แตห อัน กาลาง โฆรห กาโลว. 11แตห อัน วัห อี ตู หมึอม, วี โบง นา หมึอม. แตห อัน บอ โฆยวฆยา ดี ลาย กาล็อะ ดี อี เฮา. 12โคว, เฌาพรา ดี บอ ยอด เฆ อี มึห น็อห ซืร น็อห หมาน. อัน ดี บอ โทม โฆรห ปี ซาคึร เฆ. เฆ อี โบง นา ตู หมึอม, เฌาพรา ยี ตู ยอด เฆ ดอ เหมา.

13เซ เบ ออน ดี โบง นา บอด นา หมึอม, อาว มึห อี ดี ปึอน ปยาต เบ. 14เซ เบ โบง นา มูห นา หมาน, เซ เบ ยี โลว คัม ดูก โกบ โบง เบ นา มูห นา หมาน, อึณ แบน อาฆยึร ดี เบ. เบ แกวะ โยว ปี โยว อี เฮา, แกวะ แตห อึณ แบน น็อห แหม, น็อห กาฮัวะ ดี เบ. 15แคง น็อห เบ, แตห เบ โรวเซ มี เฌา เยซู, แตห เบ มาด อัน มูห เฌาพรา อี อึบ เบ. เซ อี เฮา บอ ดีหมอด ลอง ปี หน็อะ อึณด็อะ เบ, แตห เบ บอ ดัน เวียะ ดอน เฌณ. 16มาแล, แตห เบ วี เวียะ โฆรห ดาคึย โฆรห อึณจัม, โฆรห อี โรวเซ เฆ. แตห เบ บอ ซาดีก ซีคยา น็อห เบ, แกวะ แตห อึณ ซี มึห ปี ดี โลว พยาก มาเซ. เซ เบ โบง ปาย ตี, เฆ อี แนนัะ เบ โกบ โดบ เบ เฌา เยซู บอ ปี โบง เบ นา บอด นา หมึอม, เฆ ดี วี ซาย เบ. เฆ ดี วี ซาย โกบ แฮะ พยาก กาลึบ เฆ ดี เบ. 17โคว, เซ เฌาพรา ยี แตห เอ คัม ดูก โกบ โบง เอ นา บอด นา หมึอม, อึณ แฮะ หมึอม หลึอม เอ คัม ดูก โกบ โบง เอ นา ฮาย นา มืก. 18เฌา เยซู ยี มูห ดูอี อี มึห น็อห ซืร น็อห หมาน, อัน แฮะ คัม ดี ยัม กาดาง ดูอี อี ตู มึห น็อห ซืร น็อห หมาน. อัน คัม ดี ยัม อู เฌณ ตี, แตห เอ ปึอน ดี กอย โดง กอย เฌาพรา. โดว โบ็ง อัน แฮะ คัม ดี ยัม, น็อห พึอม เฌาพรา ยี แฮะ แตห อัน วี ยีต วี อีม. 19น็อห พึอม เฌาพรา ตี, แตห อัน ฮาว กาลาง โฆรห เฌาพรา ดี เฆ กาเปรา อี กอย แคง กาปึม. 20กาเปรา เฆ ตี, อึณ บอ มูห กาเปรา เฆ อี ตู โทม โฆรห เฌาพรา ซีณ บาน ดอ มึอน, ดอ มูห บาน อาโนว ตึอน. ดอ โบง อาโนว รึร ซังโพว อัน ตี, อัน เฌา บอ โอด บอ ยืน กาเซา น็อห อัน. ดอ อัน ตี อึณ ยี มึห ดูอี เปรต กาเซา อี ลอด ยัม ดี อึม อี ปูน กาดาย. อึณ มึห มี เฆ ดา วี. 21อึม อี อึณปูน กาดาย ตี, แฮะ แบน อูพามา ลอง โลว จึบ แคง อึม. ฌัม บาน ดอ ตี นี เบ โลว จึบ แคง อึม, แตห อึณ คยอด เบ. จึบ แคง อึม ตี, อาว มูห แตห อึณ บาย แวน กาดีห ดี โดว โบ็ง เอ. อึณ แตห เอ นับ, เฌาพรา แฮะ ดัว น็อห ลูย, แกวะ แตห อึณ ซี มึห อี พยาก เอ แคง น็อห เอ. เฌาพรา แฮะ ปึอน ดี โบง ปาย ตี โกบ แฮะ วี ยีต วี อีม เฌา เยซู วาย แฮะ ฮอต ยัม อัน. 22อัน เฌา มืร แฮะ วี โฮะ ฆางหราว, กอย บลาก อาอัห เฌาพรา. อัน บอ อึบ เฆ อามู อามาด เฌาพรา, บอ เฆ โมยว อี มึห ปวน อี กอย แคง เบลณ, บอ โมยว อี มึห ปวน บอกาเฆลียด.

Currently Selected:

1 ปต 3: pce

Highlight

Copy

Compare