SHINGRAN 3
3
Sardi Hpung A Matu Mungga
1“Bai Sardi mare na hpung a lamu kasa hpe ning ngu ka dat u:
“Ndai gaw, Karai Kasang a Wenyi sanit hte shagan sanit lang da ai wa kaw na mungga rai nga ai. Nang galaw ai amu hpe ngai chye nga nngai. Nang gaw asak hkrung shamu shamawt nga ai ngu nna, kajai gumhkawng nga timung, nang chyasi rai nga ndai. 2Dai rai nna su hprang maja nga u, nang hta naw ngam nga nna si magang wa nga ai hte hpe n-gun shajat ya u: hpa majaw nga yang, nang galaw sai amu nye a Karai Kasang a man e garai n hkum tsup nga lit dai hpe ngai mu ya de ai. 3Dai re ai majaw, nang hpa baw sharin hkam la lu sai hte, na la lu ai lam hpe bai dum u; dai hpe madat mara nna, na a yubak mara ni kaw na myit malai kayin wa u. Nang n maja nga taw gaw, lagu lagut zawn ngai nang kaw du na ring ngai; gara aten e ngai nang kaw du sa na ra ai hpe pyi nang n chye na ndai.#Mat 24:42-43; Luk 12:39-40; 1Ht 5:2-6; 1Tm 6:20; 2Pe 3:10. 4Rai ti mung Sardi hpung hta tinang a hpun palawng ni hpe awu asin n shakap ai ni nkau mi lawm nga lit dai. Shanhte gaw ging dan ai ni rai nga ma ai majaw, hpraw ai bu hpun let, ngai hte rau hkawm sa lu na mara ai. 5Awng padang lu ai ni gaw ning re ai hpraw ai hpun palawng bu hpun lu na mara ai; shanhte a amying ni hpe asak laika hta na ngai shaprai kau ya na n rai. Nye Wa a man e mung, shi a lamu kasa ni a man e mung, shanhte gaw ngai hte seng ai ni rai ma ai ngu nna, dan dan leng leng ngai tsun shana yin la na nngai.#Shr 19:8; 20:12; Pru 32:32-33; Shk 69:28; Mat 10:32; Luk 12:8.
6“Wenyi gaw hpung ni hpe kaning nga tsun ai gaw, na tu ai wa gaw na la u ga!
Hpiladehpi Hpung A Matu Mungga
7“Bai, Hpiladehpi mare na hpung a lamu kasa hpe ning ngu ka dat u:
“Ndai gaw, Chyoi pra ai hte tengman ai wa, Dawi a sumsaw lang ai wa, kadai n la da lu hkra hpaw da nna, kadai n hpaw lu hkra la da ai wa kaw na mungga rai nga ai.#Esa 22:22; Luk 1:32; Kas 3:14; 1Yh 5:20. 8Nang galaw nga ai amu hpe ngai chye nngai. Nang n-gun atsam loi mi sha rawng ti mung, nye a sharin shaga ai ga hpe nang hkan nang nna, nye a ntsa e sadi dung nit dai hpe ngai chye nga nngai. Na a man e kadai mung n la da lu ai chyinghka langai mi ngai hpaw malang da se ai. 9Yu u! Tinang dai Yuda masha rai ga ai nga ti mung Yuda n teng ai sha, Satan a hpung hta lawm ai dai masu ai ni hpe na a lagaw nhpang e ngai shanhte hpe sa naw dingnyawm shangun na mawe ai rai nna, ngai nang hpe tsaw ra nga ai gaw, shanhte chye lu na mara ai.#Esa 49:23; 60:14. 10Hpa majaw nga yang, nang gaw ngai hkang da ai hte maren myit galu na hte hkam sharang na lam mungga hpe nang hkan nang ndai majaw, ga ntsa e nga ai masha ni yawng hpe chyam dinglik yu na matu mungkan ga hproi hkra ru yak jam jau du ai ten hta ngai nang hpe makawp maga na de ai. 11Ngai alawan du na ring ngai; na a janmau hpe kadai mung n kashun la kau ya u ga, nang lu ai made hpe asin nga u. 12Awng padang lu ai wa hpe nye a Karai Kasang a nawku htingnu hta dawhpum dawnu langai mi ngai shatai na we ai: shi galoi mung dai kaw na shinggan de pru na n rai. Nye a Karai Kasang a mying nsang hpe mung, nye a Karai Kasang kaw na pru nna, sumsing lamu na yu hkrat wa ai Yerusalem mare ningnan ngu ai, nye a Karai Kasang a mare a mying hpe mung, ngai hkum nan a amying nnan hpe mung, dai wa a ntsa e ngai ka shakap ya na we ai. #Shr 21:1,10; 22:4; Gal 2:9; 4:26; Heb 12:22.
13“Wenyi gaw hpung ni hpe kaning nga tsun ai gaw, na tu ai wa gaw na la u ga!
Ladoki Hpung A Matu Mungga
14“Ladoki mare na hpung a lamu kasa hpe ning ngu ka dat u:
“Ndai gaw kangka ai hte teng man ai sakse wa, Karai Kasang hpan tawn da ai yawng mayawng a npawt, Amen ngu ai wa kaw na mungga rai nga ai.#Shr 19:10; 22:6; Esa 65:16; Kol 1:15. 15Nang hpa baw galaw sai lam ngai chye nngai. Nang gaw katsi ai mung n rai, kahtet ai mung n rai nga ndai, nang katsi ai shing n rai kahtet ai langai ngai rai na matu ngai ra sharawng nga nngai! 16Rai ti mung, ya gaw nang kahtet ai mung n rai, katsi ai mung n rai, lum nai rai nga ndai majaw, nye a n gup hta na ngai nang hpe nhpat kau magang sade ai! 17Nang gaw, ‘Ngai sut su nga nngai, ngai hta sut ring gan chying sali ai; ngai hta ra ai lam yawng ngai lu se ai,’ nga nna tsun nga ndai. Rai ti mung nang gaw, gade wa tsin-yam tsindam hte chyaren karen ai wa, matsan mayan myi kyaw ai hte singgu krin re ai wa nang rai nga ndai hpe nang n chye nga n hka! 18Dai re ai majaw, nang sut su n ga, wan hta jen kau sai ja jet hpe mung, na a singgu krin re ai kaya kahpa masha a man e n dawng lit ga magap ya na matu, nang lawai na hpraw ai hpun palawng ni hpe mung, na myi mu lit ga chya na matu tsi mung, ngai kaw na mari la na matu, ngai nang hpe hpaji daw ya de ai. 19Ngai gaw ngai tsaw ra ai ni yawng mayawng hpe daru sharin nna ari jaw nga nngai. Dai re ai majaw, nang myit n-gun marai shaja nga u, myit malai lu u.#Gsh 3:11-12; Heb 12:5-6; Yak 1:12. 20Yu u! Ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai ti mung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai.#Luk 12:37; Yhn 14:23. 21Ngai awng padang lu nna nye Wa a tingnyang makau e shi hte rau dung nga lu ai zawn, awng padang lu ai wa gaw nye a tingnyang makau e ngai hte rau dung nga lu na ahkang ngai jaw na we ai.
22“Wenyi gaw hpung ni hpe kaning nga tsun ai gaw, na tu ai wa gaw na la u ga!,” nga nna tsun ai.
Currently Selected:
SHINGRAN 3: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.