YouVersion Logo
Search Icon

YAWHAN 15

15
Yesu Gaw Teng Man Ai Sabyi Ru Re Ai Lam
1Yesu tsun ai gaw, “Ngai gaw teng man ai sabyi ru rai nga nngai, nye Wa gaw sabyi sun galaw ai wa rai nga ai. 2Ngai hta asi n si ai lakung shagu hpe gaw, shi krum kau wu ai; asi si ai lakung shagu hpe chyawm gaw asan aseng rai nna asi grau si u ga nga, tsan kau ya wu ai. 3Nanhte chyawm gaw, ngai nanhte hpe tsun dan ai mungga a majaw ya e pyi asan apra rai manit dai. 4Ngai hta noi nga mu, ngai mung nanhte hta noi nga na nngai. Sabyi lakung gaw sabyi ru madung hta n jung n noi yang gaw, shi chyu sha asi n si lu ai zawn, nanhte mung ngai hta n jung n noi yang gaw, asi n si lu na myit dai.
5“Ngai gaw sabyi ru madung rai nga nngai, nanhte gaw lakung lakying ni rai nga myit dai. Kadai rai ti mung, ngai hta noi nga nna ngai mung dai wa hta noi nga ai rai yang gaw, dai wa gaw asi law law si wa lu ai; hpa majaw nga yang, ngai hte hka jang, nanhte hpa mung n galaw lu myit dai. 6Ngai hta n jung n noi ai wa gaw shinggan de kabai kau ai hkrum nna hkraw mat wa ai lakung lakying zawn tai na ra ai. Masha ni mung shing re ai lakung lakying ni hpe magawn la nhtawm, wan hta kabai bang nna, hkru krawp mat ai kaw du wa lu ai. 7Nanhte ngai hta noi nga nna, nye ga mung nanhte hta noi nga ai rai yang gaw, nanhte hpa hpyi mayu yang hpyi mu, hpyi ai hte maren nanhte lu na myit dai. 8Nanhte asi law law si wa ai a majaw nye Wa a hpung shingkang dan hkung wa na ra ai, ndai hku nna nanhte gaw nye a sape ni tai wa myit dai. 9Wa gaw ngai hpe tsaw ra ai zawn, ngai mung nanhte hpe tsaw ra made ai; nye Wa a tsaw ra ai hta maju jung nga mu. 10Ngai gaw nye Wa a hkang da ai ga ni hpe madat mara hkan shatup nna, shi a tsaw ra ai hta maju jung nga nngai zawn, nanhte mung nye a hkang da ai ga ni hpe madat mara hkan shatup myit yang gaw, nye a tsaw ra ai hta maju jung na myit dai.
11“Nye a kabu gara ai myit nanhte hta rawng nga na hte, nanhte a kabu gara ai gaw hpring tup wa na matu ga ndai ngai nanhte hpe tsun da ngut chyalu rai sai. 12Ngai nanhte hpe tsaw ra made ai zawn, nanhte shada da tsaw ra nga mu, dai gaw nye a hkang da ai ga rai li ai. #1Ht 4:9; 1Pe 4:8; 1Yh 3:11; 4:21. 13Jinghku ni a matu tinang a asak nawng kau hkra tsaw ra ai myit hta grau kaba ai tsaw ra myit ngu ai gaw n nga sai. 14Nanhte hpe ngai hkang da ai ga hkan shatup myit yang gaw nanhte nye a jinghku ni rai nga myit dai. 15Ya kaw nna ngai nanhte hpe mayam n ngu na ni ai; hpa majaw nga yang, mayam gaw madu galaw nga ai amu hpe n chye wu ai; nanhte hpe jinghku she ngai ngu na made ai, hpa majaw nga yang, nye Wa kaw na ngai na la ai hte yawng, ngai nanhte hpe tsun dan ma sade ai. 16Nanhte ngai hpe lata la myit dai n rai, nanhte pru sa nna asi law law si na hte dai asi grin nga u ga ngu nna, ngai mahtang she nanhte hpe lata la nna san da made ai. Dai rai nna nye a mying hte nanhte Wa kaw hpyi mahpyi nanhte hpe jaw na marin dai. 17Dai rai nna, nanhte shada da tsaw ra nga mu, ngu nna ndai ga nanhte hpe ngai hkang da made ai, nga ai.
Mungkan Masha Ni A N Ju N Dawng Ai Lam
18Bai Yesu gaw, “Mungkan masha ni nanhte hpe n dawng n yawt myit yang, nanhte hpe garai n rai yang ngai hpe shawng n dawng n yawt ma ai hpe dum nga mu. 19Nanhte ndai mungkan hte seng ai ni rai myit yang gaw, mungkan masha ni gaw tinang a bawsang ni hpe zawn nanhte hpe tsaw ra na myit dai. Rai ti mung ngai gaw nanhte hpe ndai mungkan ga na lata la made ai, nanhte gaw ndai mungkan ga hte n seng myit dai; dai majaw mungkan masha ni nanhte hpe n ju n dawng ma ai. 20‘Mayam gaw madu hta grau kaba ai n rai,’ ngu nna ngai nanhte hpe tsun ai ga hpe dum nga mu; ngai hpe pyi zingri zingrat ma ai rai yang gaw, nanhte hpe mung zingri zingrat na mara ai. Shanhte nye a ga madat mara ma yang gaw, nanhte a ga hpe mung, madat mara ya na mara ai.#Yhn 13:16; Eze 3:7; Mat 10:24; Luk 6:40. 21Rai ti mung shanhte gaw ngai hpe shangun dat ai wa hpe n chye ma ai rai nna, nye a amying a majaw dai zingri zingrat ai lam yawng nanhte hpe di na mara ai. 22Ngai shanhte hpe n hkaw n tsun ai sha nga ai rai taw gaw, shanhte hta mara n nga na re ai. Ya chyawm gaw shanhte mara galaw sai lam gara hku mung mara lawt hkra tsun ndang shara n nga manu ai. 23Ngai hpe n dawng ai wa gaw, nye Wa hpe mung n dawng ai wa rai nga ai. 24Masha kadai n di lu ai amu ni hpe, ngai shanhte hta n galaw dan yu nngai rai taw gaw, shanhte mara lu na n rai ma ai; ya chyawm gaw, shanhte ngai galaw ai amu ni hpe mu lu masai rai nna, ngai hpe mung, nye Wa hpe mung n dawng n yawt rai masai. 25Rai ti mung dai gaw, ‘Mara n nga ti mung, shanhte ngai hpe n dawng n yawt ma ai,’ nga nna shanhte a Tara Laika hta ka da ai ga dik wa na matu rai nga ai.#Shk 35:19; 69:4.
26Karai Kasang hte seng ai teng man ai lam hpe shadan dan ai dai Karum Ai Wa ngu ai Wenyi gaw Wa kaw na du sa na ra ai. Shi hpe nye Wa kaw na nanhte hpang de ngai shangun dat na we ai rai nna, shi gaw nye a lam sakse hkam ya na ra ai. 27Nanhte mung, shawng nnan kaw nna ngai hte rau nga nga manit dai majaw, nye a lam sakse hkam ya na marin dai, ngu mu ai.

Currently Selected:

YAWHAN 15: JCLB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy