YAWHAN 14
14
Yesu gaw Kawa Kaw Du Wa Lu Ai Lam Re
1Yesu gaw, “Nanhte myit hkum ru myit; Karai Kasang hpe kam mu, ngai hpe mung kam mi. 2Nye Wa a nta e nga shara law law nga ai rai nna, nanhte a matu nga shara lajang na matu she ngai wa nngai. Dai n nga yang gaw, n nga ai, ngu nna ngai nanhte hpe n tsun ai nga na n rai. 3Shing rai ngai wa nna, nanhte a matu nga shara lajang da nhtawm, ngai nga ai shara e, nanhte mung nga lu hkra, ngai bai sa nna nanhte hpe ngai hpang de woi la na made ai. 4Ngai sa wa ai shara de du ai lam nanhte chye nga myit dai,” ngu nna tsun mu ai.
5Shaloi Htawma gaw, “Madu e, nang gade sa wa nga ai hpe pyi anhte n chye ga ai mi, dai shara de du ai lam hpe anhte kaning rai chye ga ta?,” ngu nna shi hpe tsun wu ai.
6Yesu gaw, “Lam gaw ngai rai nga nngai, teng man ai hte asak mung, ngai rai nga nngai; ngai hta nna n rai yang kadai mung, nye Wa kaw n du wa lu ai.#Yhn 1:4,17; 8:19,32; 10:9; Hos 9:8. 7Ya nanhte ngai hpe chye myit dai rai yang gaw, nye Wa hpe mung nanhte chye na manit dai; ya kaw nna nanhte shi hpe chye manit dai, mu mung mu yu manit dai,” ngu nna shi hpe tsun wu ai.
8Hpilip mung, “Madu e, Wa hpe anhte e madun dan mi, shaloi anhte myit dik na ga ai,” ngu wu ai.
9Yesu gaw, “Hpilip e, ngai nanhte hte nde nlaw na hkra nga nga sati mung, nang ngai hpe n chye n ni? Ngai hpe mu yu ai wa gaw, Wa hpe mu yu nu ai; dai re ai mi, ‘Wa hpe anhte e madun dan mi,’ nga nna hpa rai tsun n ta? 10Hpilip e, ngai gaw Wa hta nga nga nngai mung, Wa gaw ngai hta nga nga ai mung, n kam n ni? Ngai nanhte hpe tsun ai ga ni gaw, nye a myit hte ngai tsun ai n rai, ngai hta rawng ai nye Wa gaw shi a amu galaw nga ai. 11Ngai gaw Wa hta nga nna, Wa mung ngai hta nga ai ngu nna ngai tsun ai hpe kam sham nga mu. Dai n rai yang gaw, ngai galaw dan ai amu ni hpe tau yu nna pyi kam sham nga mu. 12Nanhte hpe ngai kaja wa teng teng tsun made ai gaw, ngai hpe kam sham ai wa gaw, ngai galaw ai amu lu galaw na ra ai, rai sa, dai hta grau kaba ai amu mung lu galaw na ra ai; hpa majaw nga yang, ngai gaw Wa hpang de wa na nngai. 13Shing rai Kasha a marang e Kawa a hpung shingkang dan hkung u ga matu, nye a mying gang nna, nanhte hpyi mahpyi ngai madat ya na nngai. 14Nanhte nye a amying gang nna ngai kaw lama ma hpyi myit yang, hpyi ai hte maren ngai dai hpe galaw ya na nngai.
Chyoi Pra Ai Wenyi Shangun Dat Ya Na Ga Sadi
15Nanhte ngai hpe tsaw ra myit dai rai yang gaw, nye a hkang da ai ga ni hpe madat mara hkan shatup na myit dai. 16Wa kaw ngai hpyi na we ai rai nna, shi mung, nanhte hte prat tup rau nga na ra ai; Shing rai nanhte hpe karum na wa langai mi hpe jaw ya na ra ai. 17Shi gaw Karai Kasang hte seng ai dai teng man ai lam hpe shadan dan na ra ai Wenyi rai nga ai. Mungkan ga gaw dai Wenyi hpe n mu n chye ma ai majaw, n hkap la lu ma ai. Rai ti mung nanhte chyawm gaw dai Wenyi hpe chye myit dai; hpa majaw nga yang, shi gaw nanhte hte rau rai nga ai, nanhte hta mung rawng nga ai.
18Ngai wa mat ai shaloi nanhte hpe jahkrai zawn ngai kau da na n rai; nanhte hpang de ngai bai sa na ring ngai. 19Loi hkring mi rai jang, mungkan ga gaw ngai hpe n mu dat na nu ai; nanhte chyawm gaw naw mu lu na marin dai; hpa majaw nga yang, ngai ahkrung nga nngai majaw, nanhte mung ahkrung nga na marin dai. 20Ngai gaw nye Wa hta nga nga nngai mung, nanhte ngai hta nga nga myit dai mung, dai shani du ai shaloi, nanhte chye lu na myit dai.
21“Nye a hkang da ai ga ni hpe hkap la nna madat mara hkan sa ai wa gaw ngai hpe tsaw ra ai wa rai nga ai. Ngai e tsaw ra ai wa hpe nye Wa mung tsaw ra na wu ai. Ngai mung dai wa hpe tsaw ra ai hte, ngai hkum nan dai wa hpe shadan dan na we ai,” ngu nna shi hpe tsun wu ai.
22(Yuda Iskarut n re ai) kaga Yuda gaw, “Madu e, mungkan ga hpe na a hkum n shadan dan ai sha gara hku nna anhte hpe na a hkum shadan dan lu na a ta?,” ngu nna san wu ai.
23Yesu gaw, “Ngai e tsaw ra ai wa rai yang gaw, nye a sharin shaga ai ga hpe madat mara hkan sa shatup na ra ai. Nye Wa mung dai wa hpe tsaw ra na wu ai rai nna an lahkawng gaw dai wa kaw sa nna, shi hte rau shanu nga na ga ai. 24Ngai hpe n tsaw ra ai wa gaw nye a sharin shaga ai ga hpe n hkan shatup lu ai; nanhte na la lu ai mungga gaw, nye a ga n rai li ai, ngai hpe shangun dat ai nye Wa a mungga rai nga lu ai.
25“Ngai nanhte hte rau naw nga nga yang, ga ndai ngai nanhte hpe tsun dan ma sade ai. 26Nye a mying nsang hte nye a Wa shangun dat na ra ai Karum Ai Wa ngu ai Chyoi Pra Ai Wenyi gaw, nanhte hpe lam magup sharin ya nna, ngai nanhte hpe tsun da ai ga yawng mayawng nanhte hpe shadum shahprang na ra ai.
27“Ngwi pyaw sim sa ai gaw ngai nanhte hpe tawn da ya ma sade ai; Nye a ngwi pyaw simsa ai nanhte hpe ngai jaw made ai, mungkan ga na ni jaw ai zawn ngai nanhte hpe jaw made ai n rai. Nanhte myit hkum ru myit, hkrit mung hkum hkrit myit. 28‘Ngai wa nna, nanhte kaw bai sa na ring ngai,’ ngu nna ngai nanhte hpe tsun ai gaw, nanhte na manit dai, nanhte ngai hpe tsaw ra myit dai rai yang gaw, Wa hpang de ngai wa ai majaw, nanhte kabu na rai myit dai; hpa majaw nga yang, Wa gaw ngai hta grau kaba nga ai. 29Dai lam ni byin pru wa ai shaloi, nanhte kam sham lu myit ga, ngu nna garai n byin pru yang, ngai nanhte hpe tsun da made ai. 30Ya kaw nna ngai nanhte hte ga law law n tsun lu na ni ai; hpa majaw nga yang, mungkan ga a du wa gaw du magang ra ai; dai wa chyawm gaw nye a ntsa e hpa ahkang mung n lu na wu ai. 31Rai ti mung, nye a Wa hpe tsaw ra nga nngai gaw, mungkan ga chye lu na hte, nye Wa e ngai hpe matsun jaw dat ai hte maren she, ngai galaw nga nngai.
“Rawt mu, ndai yang kaw na anhte sa wa saga, ngu tsun wu ai.
Currently Selected:
YAWHAN 14: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.