PRU MAT WA AI 38
38
Wan Nat Hkungga Nawng Ya Na Tawn Hkungri Galaw Ai
(Pru 27:1-8)
1Shi gaw wan nat hkungga nawng ya na matu tawn hkungri langai hpe shaji hpun hte galaw wu ai. Dai gaw man mali maga maren rai nna, galu de pe 7 chyen, nda de pe 7 chyen, hte tsaw de pe 4 chyen rai nga ai. 2Shi gaw jut mali a ntsa matu ni hta nrung mali shatut wu ai; dai gaw tawn hkungri hte langai sha tai mat hkra matut da nga ai. Shi gaw dai ni yawng hpe magri mang hte kayawp da wu ai. 3Shi gaw tawn hkungri hte seng ai di ni, shingban ni, jarung ni, shan chyinghkyi ni, wan ban pa ni mahkra hpe magri mang hte kayawp wu ai. 4Shi gaw magri mang magrang langai mi hpe galaw nna dai hpe tawn hkungri a nten htinggawt npu hta tawn da wu ai; dai gaw tawn hkungri a ka-ang hkup madawn hpe dep nga ai. 5Shi gaw kandang dinghkrawn na shanghkawng mali hpe mung galaw nna dai ni hpe jut mali hta e shatut da wu ai. 6Shi gaw hpai na kandang ni hpe shaji hpun hte galaw nna dai ni hpe magri mang hte kayawp nhtawm, 7tawn hkungri a kade nde na shanghkawng ni hta dai ni hpe dinghkrawn da wu ai. Tawn hkungri hpe mung kata de kaman hpungkraw di nna hpunpyen ni hte galaw da wu ai.
Magri Mang Ntsin Htung Galaw Ai
(Pru 30:18)
8Shi gaw dai Madu a hpung shingkang shanu nga ai Sum chyinghka lam e sa daw jau jau re ai numsha ni lang ai pat jamna ni hpe la nna magri mang ntsin htung hte magri mang shadun ni mung galaw wu ai. #Pru 30:18.
Dai Madu A Hpung Shingkang Shanu Nga Ai Sum Hpe Kum Ai Wang
(Pru 27:9-19)
9Shi gaw dai Madu a hpung shingkang shanu nga ai Sum a matu mani tsawm ai lachyit sumpan nba grang langai galaw wu ai. Dingda maga de na nba grang gaw pe 150 galu nna, 10magri mang machyaw hkun hte shadaw hkun hte jung shangang da nhtawm chyinghkyi ni hte ngaugran ni hpe gumhpraw hte galaw wu ai. 11Dingdung maga de na wang grang mung dai hte maren rai nga ai. 12Sinna maga de na nba grang gaw galu de pe 75 rai nna, shadaw shi, machyaw shi bang nhtawm chyinghka ni hte ngauran ni hpe gumhpraw hte galaw da nga ai. 13Sinpraw maga na shang wa chyinghka lam nga ai maga de na wang grang gaw pe 75 dam nga ai. 14-15Wang chyinghka lam a maga mi hte maga mi de pe 22 chyen dam ai nba grang hta shadaw masum sum hte machyaw masum sum rawng nga ai. 16Dai wang grup na nba grang yawng hpe mani tsawm ai lachyit ri hte galaw da nga ai. 17Shadaw machyaw hpe magri mang hte galaw nna, chyinghkyi ni hte ngaugran ni hpe gumhpraw hte mung, shadaw matu ni hpe gumhpraw ni hte sup da nga ai. Wang grup jung da ai shadaw ni yawng hte gumhpraw ngaugran ni hpe matut da nga ai. 18Dai wang chyinghka hta grang na matu, sawm tsit ai, shaba pu nsam rawng ai hte hkyeng ai sagu ri ni hte mani tsawm ai lachyit sumpan da nna, dai hta maka ka shatsawm da ai chyinghka nba grang rai nga ai. Dai gaw galu de pe 30 rai nna tsaw de pe 7 chyen rai nga ai, dai gaw wang grang zawn rai nga ai. 19Dai hpe machyaw mali hta shadaw mali hte jung shangang da nga ai; chyinghkyi ni hpe mung, shadaw shadaw matu ni hte ngaugran ni hpe mung gumhpraw hte galaw da nga ai. 20Sum hte wang grup grup hta lang ai mailak ni yawng hpe magri mang hte galaw da nga ai.
Dai Madu A Hpung Shingkang Shanu Nga Ai Sum Hta Lang Ai Nhprang Arai Ni
21Ndai gaw tara kanu shi hpe ka tawn ai lungpa lahkawng hpe tawn da ai dai Madu a hpung shingkang shanu nga ai Sum hta lang na nhprang rai ni a jahpan rai nga ai. Dai jahpan hpe Mawshe hkang da nna, hkinjawng Arun a kasha Ihtama matsun ai hku Lewi masha ni galaw na amu rai nga ai.
22Yaku lakung hta na Uri a kasha, Hura a kashu Bezalela gaw dai Madu hkang da ai lam magup hpe hkan galaw wu ai. 23Dan a lakung na Ahisamak a kasha Aholiaba mung shi hpe karum ai wa rai nna nlung tawk ka chye ai wa, hkrang kumla chye shapraw ai wa, bai sawm tsit ai, shaba pu nsam rawng ai hte hkyeng ai sagu ri ni hte mani tsawm ai lachyit sumpan da chye ai wa rai nga ai.
24Dai chyoi pra ai Sum a matu dai Madu hpe sak jaw sai aja yawng gaw tara shang lang nga ai joi jang hte shen yu ai rai yang, pawng 2,195 rai nga ai. 25Shawa jahpan hta lawm ai ni sak jaw ai gumhpraw gaw tara shang lang nga ai joi jang hku rai yang pawng 7,550 rai nga ai. #Pru 30:11-16. 26Dai gumhpraw yawng gaw tara shang lang nga ai joi jang hte maren nga yang, amyu masha ni yawng langai hte langai jawm bang ai gumhpraw chyarang hte maren rai nga ai. Jahpan hta mying lawm ai asak hkun ning hte dai hta jan ai lasha ni yawng 603,550 rai nga ai. #Mat 17:24. 27Chyoi Pra ai Sum hte nba grang a matu machyaw latsa galaw ai hta gumhpraw pawng 7,500 lang nna machyaw langai mi hta gumhpraw pawng 75 shang nga ai. 28Bezalela gaw naw ngam ai gumhpraw pawng 50 hte ngaugran, shadaw a matu chyinghkyi ni hte de a matu ni hpe kayawp da nga ai. 29Dai Madu a matu sak jaw ai magri mang chyawm gaw pawng 5,310 rai nga ai. 30Dai Madu a hpung shingkang shanu nga ai Sum chyinghka a machyaw ni, magri mang tawn hkungri hte de a magrang, tawn hkungri hta lang ai arai ni yawng, 31wang grup grup a matu machyaw ni, wang chyinghka a matu machyaw ni hte Sum hte wang grup yin na mailak ni hpe galaw wu ai.
Currently Selected:
PRU MAT WA AI 38: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
