PRU MAT WA AI 37
37
Ga Shaka Sumpu Galaw Ai
(Pru 25:10-22)
1Bezalela gaw galu de yungnu 45, nda de yungnu 27, tsaw de yungnu 27 rai nga ai Ga Shaka Sumpu hpe shaji hpun hte galaw wu ai. 2Shi gaw dai hpe kata ntsa ja jet hte kayawp nhtawm de a grup grup yawng hpe ja hte shakau da wu ai. 3Shi gaw dai hpe hpai na ja shanghkawng mali hpe galaw nna, de a jut mali hta lagaw mali shatut nhtawm maga mi de shanghkawng lahkawng hkawng shatut da wu ai. 4Shi gaw kandang ni hpe mung shaji hpun hte galaw nna dai ni hpe ja hte sup nna 5sumpu a maga mi hte maga mi de na shanghkawng ni hta dai ni hpe dinghkrawn bang da wu ai. 6Shi gaw galu de yungnu 45, nda de yungnu 27 re ai magap langai hpe ja jet hte galaw wu ai. 7Shi gaw singkaw tu ai hkrung kanu lahkawng a sumla hpe ja hte tawk galaw nhtawm magap a maga mi hte maga mi de langai ngai tawn da wu ai. 8Shi gaw dai ni hpe galaw da wu ai majaw dai gaw magap hte de a matu lahkawng maga hta hkrang langai sha tai mat hkra galaw wu ai. 9Dai singkaw tu ai hkrung kanu lahkawng gaw magap ntsa e shada da myi man hkrum rai let, de a ntsa e singkaw ni hte kahpyan ka-up da nga ai.
Karai Kasang A Matu Nawng Jau Ai Muk Ku Galaw Ai
(Pru 25:23-30)
10Shi gaw galu de yungnu 36, nda de yungnu 18, tsaw de yungnu 27 re ai muk ku hpe shaji hpun hte galaw da wu ai. 11Dai hpe ja jet hte kayawp nna de a grup grup hpe mung ja hte shakau wu ai. 12Shi gaw dai hta e, de a matu grup grup hpe yungnu masum shakra da nna, dai shakra da ai matu grup grup hta mung ja hte shakau da wu ai. 13Shi gaw de a matu hta ja hte shanghkawng mali hpe mung galaw nhtawm dai hpe lagaw mali tu ai jut mali hta e shatut da wu ai. 14Dai ku hpe hpai na matu dai kra ai npu e shanghkawng ni hpe shatut nna, dai hta kandang dinghkrawn na shara galaw da wu ai. 15Shi gaw kandang ni hpe shaji hpun hte galaw nna dai ni hpe ja hte kayawp wu ai. 16Ku hte seng ai hka wan ni, ban ni, gawm ni, yam ni hte jarung ni hpe ja jet hte galaw nna dai hpe sabyi hkungga nawng jau ai shaloi lang nga ai.
Pyengdin Shadun Galaw Ai
(Pru 25:31-40)
17Shi gaw pyengdin shadun hpe mung galaw wu ai. Dai hpe shadun na htumpa, ja hte dup ai madung hte dai hta sumli da ai nampan ni hte hpawn gumdin majawm ni hte wan ni hpe langai sha di nna galaw wu ai. 18Madung hta na maga mi de lakying masum sum di nna lakying kru shapraw da wu ai. 19Dai lakying kru shagu hta nga ai gumdin majawm hte wan ni gaw batan nampan pu ni zawn, maga mi de lakying masum sum hta sumli da ai nampan pu ni rai nga ai. 20Dai pyengdin shadun a madung hta batan nampan pu zawn re ai pu makawp hte majawm ai nampan mali li hte sumli da nga ai. 21Lakying masum sum a npu e gumdin majawm langai ngai rai nga ai. 22Dai gumdin majawm ni, lakying ni hte pyengdin shadun ni hpe hkum langai sha di nna dup da wu ai. 23Shi gaw pyengdin shadun a matu pyengdin sanit hpe mung galaw nhtawm de a matu lakap ni hte matep bang na ban ni hpe mung ja jet hte galaw wu ai. 24Shi gaw dai pyengdin hte de a arai mahkra hte hpe ja jet joi hkun hte galaw da nga ai.
Manam Pyaw Ai Baw Nat Nawng Na Tawn Hkungri Galaw Ai
(Pru 30:1-5)
25Shi gaw manam pyaw ai baw nat nawng na matu tawn hkungri langai hpe shaji hpun hte galaw wu ai. Dai gaw man mali maga shadawn shadang maren rai nna galu de yungnu 18, nda de yungnu 18, hte tsaw de yungnu 36 rai nga ai. De a nrung ni hpe mung jut mali maga de shatut da ai rai nna, dai hte langai sha rai nga ai. 26Shi gaw de a ntsa maga de mung, man mali maga de mung, nrung ni hta mung ja jet hte kayawp nhtawm, de a matu grup grup hpe mung ja hte shakau wu ai. 27Shi gaw dai hpe hpai na matu shanghkawng lahkawng hpe mung galaw nna ja htinggawt a lawu hkawt hta maga mi hte maga mi de shatut da nna hpai na matu kandang dinghkrawn da nga ai. 28Shi gaw shaji hpun hte kandang ni hpe galaw nna ja hte kayawp da nga ai.
Chya Na Namman Sau Hte Manam Pyaw Ai Baw Hpe Galaw Ai
(Pru 30:22-38)
29Shi gaw chyoi pra ai namman sau hte jet ai manam pyaw ai baw hpe manam pyaw wa hkra mung kayau da nga ai.
Currently Selected:
PRU MAT WA AI 37: JCLB
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
