2 SAMUELA 24
24
Dawi Yuptung Jahpan Hta Ai
(1Hl 21:1-27)
1Dai Madu gaw Israela amyu hpe kalang mi bai masin pawt bu nga ai rai nna, shanhte hpe sharu shatsang shangun na matu, dai Madu gaw Dawi hpe, “Israela hte Yuda masha ni hpe sa hti yu su,” ngu nna tsun wu ai. 2Dai re ai majaw Dawi gaw shi a hpyen luksuk hpe up hkang ai Yoab hpe ning ngu hkang dat wu ai: “Na a du salang ni hte rau mungdan a jahtum jut shara mi kaw nna kaga shara mi de du hkra nga ai Israela amyu bawsang ni yawng hpang de sa wa nhtawm amyu masha ni hpe hti yu su. Dai hkan e gade wa law nga ma ai hpe ngai chye mayu nngai.”
3Rai ti mung Yoab mahtang hkawhkam wa hpe, “Madu hkawhkam e, dai Madu na a Karai Kasang gaw Israela amyu masha ni hpe ya shanhte nga nga ai hta htam latsa n-ga hkra shalaw jahtam ya nna nang hkrung nga ai hte mu lu hkra rai u ga law. Rai ti mung, ndai amu hpe madu hkawhkam hpa majaw galaw mayu nga n ta?,” ngu nna htan wu ai. 4Rai ti mung hkawhkam wa mahtang Yoab hte shi a du salang ni shi hkang da ai ga hpe madat mara shangun wu ai rai nna shi a man kaw nna shanhte pru mat wa nhtawm, Israela amyu masha ni hpe hti yu na nga, hkawm mat wa ma ai.
5Shanhte gaw Yawdan hka rap nhtawm Gad a lamu ga, kadit ka-ang e de da ai Aroera mare a dingda maga hta dap jung nga ma ai. Dai shara kaw nna mahtang dingdung maga Yazera mare de mung, 6Gilead mung hte Hiti masha ni nga ai Kadesha mare de du hkra shanhte du hkawm ma ai. Dai hpang Dan mare de du nna Sidon sinna maga de mung du hkawm ma ai. 7Dai hpang dingda maga bunghku kum ai Turu mare, Hiwi hte Hkanani masha ni nga ai mare ni hte hpang jahtum Yuda mung a dingda maga de nga ai Berasheba mare de du hkawm nga ma ai. 8Shing rai shanhte gaw mungdan ting de hproi hkawm nna shata jahku e nhtoi hkun ya na jang, Yerusalem mare de nhtang wa ma ai. 9Shanhte gaw hkawhkam wa hpe hpyen amu gun hpai lu ai Israela mung na 800,000 hte Yuda mung na 500,000 nga nga ai lam wa tang madun ma ai.
10Rai ti mung Dawi gaw yuptung jahpan hta la ngut jang, shi a myit kangi kanga rai nna shi hpe sharu hpang wa nga ai. Shi gaw dai Madu hpe, “Ndai amu galaw let hkrit hpa yubak langai ngai galaw shut kau se ai! Chyeju hte nye a mara raw dat kau ya e; ngai wa angawk ai hku amu galaw kau se ai,” ngu nna tsun wu ai.
11-12Shaloi dai Madu gaw Dawi a myihtoi Gad hpe, “Ngai shi hpe lata la na lam masum jaw da sai lam Dawi hpe sa tsun su; shi lata la ai hpe sha ngai galaw na we ai,” ngu nna tsun wu ai. Shing rai hpang jahpawt Dawi rawt jang, 13Gad gaw shi kaw sa nna dai Madu kaning nga tsun sai lam shi hpe tsun dan let, “Hpa hpe mahtang nang lata la na wu ni? Na a mungdan hta masum ning hku hku na, shing n rai shata masum na a gumlau hpyen ni a lata kaw na hprawng hkawm na, shing n rai na a mungdan hta masum ya tup ana zinli kaba dat dat ya na ra ndai kun? Ya chyawm gaw dai Madu hpe kaning re ai mahtai la wa ya na lam, myit aru yu let, ngai hpe tsun dan e,” ngu nna hpyi tsun wu ai.
14Dawi gaw, “Ngai myit ru nga ai aten rai nga ai law! Rai ti mung masha ni ari jaw ai hku ngai n ra sharawng nngai; dai Madu shi nan mahtang anhte hpe ari jaw ai wa rai u ga, hpa majaw nga yang shi gaw matsan dum ai wa rai nga ai,” ngu nna htan wu ai. 15Dai rai nna dai Madu gaw dai jahpawt kaw nna shi masat da ai aten du hkra, Israela a ntsa e ana zinli kaba dat dat wu ai. Dai majaw mungdan jahtum shara mi kaw nna maga mi de du hkra na Israela masha mun sanit si mat ma ai. 16Dai Madu a lamu kasa gaw Yerusalem mare hpe jahten hkyen nga yang, amyu masha ni hpe ari jaw ai majaw dai Madu myit galai mat nhtawm shanhte hpe sat nga ai lamu kasa hpe, “Hkring sanu! Ram sai!,” ngu nna tsun wu ai. Shaloi dai lamu kasa gaw Yebusi masha Arauna a mam chyarang makau e nga nga ai.
17Dawi gaw amyu masha ni hpe sat ai lamu kasa hpe mu jang, dai Madu hpe, “Ngai gaw mara lu ai wa rai nga nngai. Mara galaw shut kau ai wa mung rai nga nngai. Ndai matsan mayan re ai amyu masha ni mahtang hpa baw galaw shut kau nga ma ni? Ngai hte nye a dinghku masha ni hpe mahtang nang ari jaw ang nga ndai,” ngu nna tsun wu ai.
18Gad mung dai shani jang Dawi kaw sa nhtawm shi hpe, “Arauna a chyarang pa de lung wa nna dai Madu a matu tawn hkungri langai galaw u,” ngu nna tsun wu ai. 19Dawi mung dai Madu a hkang da ai ga hpe madat wu ai rai nna shi hpe Gad tsun ai hte maren sa wa wu ai. 20Ya Arauna mada yu wu yang, hkawhkam wa hte shi a du salang ni shi hpang de sa wa nga ma ai hpe mu wu ai. Shaloi shi gaw Dawi a man e ga de gum dagup nhtawm, 21“Madu hkawhkam e, hpa majaw nang e nga nga n ta?,” ngu nna san wu ai.
Shaloi Dawi gaw, “Ana zinli kaba jasim kau na matu na a chyarang pa hpe ngai mari la nhtawm, dai yang e dai Madu a matu tawn hkungri langai galaw na nngai,” ngu nna htan wu ai.
22Arauna mung, “Madu hkawhkam e, dai hpe la u; nang ra sharawng ai hte maren dai Madu hpe hkungga nawng ya u. Tawn hkungri ntsa nat nawng na usu ni mung nang e nga nga ai; ju hpun shatai na matu mam dup ai arai ni hte nga hking ni mung nga nga ai,” ngu nna tsun dan wu ai. 23Arauna gaw arai yawng mayawng hkawhkam wa hpe ap ya nhtawm shi hpe, “Dai Madu na a Karai Kasang gaw na a hkungga hpe hkap la u ga law,” ngu nna tsun wu ai.
24Rai ti mung hkawhkam wa mahtang, “Dai hku n rai law, de a matu hkrat ang ai manu jahpu ngai nang hpe jaw na de ai. Ngai hta manu jahpu hpa mung n hkrat hkam ai gaw, dai Madu nye a Karai Kasang hpe shagu hkungga ngai n nawng na we ai,” ngu nna htan wu ai. Shing rai chyarang pa hte usu ni hpe gumhpraw manga shi hte mari la wu ai. 25Dai hpang shi gaw dai Madu a matu tawn hkungri langai galaw nhtawm wan nat hkungga ni hte mahku hkungga ni nawng ya wu ai. Dai Madu mung shi a akyu hpyi ga hpe htan ya nna Israela mung ting hta byin nga ai ana zinli kaba jasim kau nga ai.
Currently Selected:
2 SAMUELA 24: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.