2 SAMUELA 23
23
Dawi A Hpang Jahtum Na Numhtet Ga Ni
1Yese a kasha Dawi gaw hkawhkam tai na matu Yaku a Karai Kasang e lata da hkrum nga ai. Shi gaw Karai Kasang e galu kaba shangun ai hte Israela a matu pyaw ngawn ai mahkawn ni hpe ka jahtuk tawn ai wa rai nga ai. Ndai ni gaw Dawi a hpang jahtum ngu na ga ndat ni rai nga ai:
2Dai Madu a wenyi gaw ngai hku nna tsun nga ai;
shi a mungga nye a shinglet hta rawng nga ai.
3Israela a Karai Kasang ga tsun nu ai;
Israela hpe makawp maga ai wa gaw ngai hpe ning nga nna tsun ai:
“Teng man ai hku up hkang nna Karai Kasang a ga madat let up hkang ai hkawhkam gaw,
4sumwi n dung ai jahpawt manap na htoi tu ai jan hte
marang hpawng ai hpang tsit lali ai tsingdu hpe kabrim ala shangun ai jan hte bung nga ai.
5N hten n run mat ai myit hkrum lam, galai shai n lu ai
ga sadi ngu ai htani htana ga shaka ngai hte tawn da nu ai majaw,
Karai Kasang gaw nye a amyu matu ni hpe shaman ya na ra ai.
Dai gaw ngai ra sharawng ai lam yawng rai nna nye a awng
padang rai na ra ai,
Karai Kasang mung dai hpe teng teng shabyin dat na ra ai.
6Rai ti mung n kam n sham ai masha ni gaw kabai kau ai ju
hpun ni hte bung nga ai rai nna,
kadai e mung lata kaman hte dai ni hpe hkra lu ai n rai.
7Dai ju hpun ni hpe jum na matu hpri hte galaw ai arai
shing n rai nri langai lang ra na ndai;
dai ju hpun ni atsai awai nat kau ai hkrum na ra ai.
Dawi A Dan Hkung Ai Hpyenla Ni
(1Hl 11:10-41)
8Da ndai ni gaw Dawi a dan hkung ai hpyenla ni a mying ni rai nga ai: Tahkamoni lakung na Yosheb Bashebat gaw ningbaw “Masum” hta lawm ai ningshawng ningla rai nga ai. Shi gaw majan langai mi hta shi a nri hte masha matsat tsa hpe htim gasat nna shanhte yawng hpe sat kau ai wa rai nga ai.
9Aho lakung lama na Dodo a kasha Eleaza gaw gumhkawng ai share masum kaw na lahkawng ngu na wa rai nga ai. Lani mi na nhtoi hta shi hte Dawi yan gaw majan gasat na matu hpawng nga ai Hpilisti masha ni hpe hkap dakat ma ai. Israela masha ni htingnut mat wa tim, 10dai wa gaw shi a shara hta tsap nga let shi a lata grai ja mat ai majaw nhtu n mai kahtam mat ai aten du hkra, Hpilisti masha ni hpe gasat shamyit wu ai. Dai Madu mung dai shani e awng padang kaba jaw ya wu ai. Majan dai ngut boi mat ai shaloi, Israela masha ni gaw Eleaza nga ai shara de sa wa nhtawm si mat sai ni a hpyen hking hpun palawng ni raw la ya ma ai.
11Harari lakung kaw na Age a kasha Shama gaw gumhkawng ai share masum hta na masum ngu na share wa rai nga ai. Shapre yi nga ai Lehi shara e Hpilisti masha ni hpawng shinggyin nga ma ai. Israela masha ni gaw Hpilisti masha ni a man kaw na htaw mat wa jang, 12Shama gaw dai shapre yi yang e tsap nga let hkap manga nhtawm Hpilisti masha ni hpe sat kau wu ai. Dai Madu mung dai shani e awng padang kaba jaw ya wu ai.
13Share sumshi ngu ai hpung hta lawm ai share ningtawn masum gaw nmut ta shang wa mahka e, Dawi nga ai Adulam ginlawng hku de yu sa wa ma ai; shaloi Hpilisti masha hpung mi mung Rehpim Kadit e dap jung nga ma ai. 14Dai shaloi e, Dawi chyawm gaw kawng ntsa na hpyen dap hta nga nga ai; Hpilisti masha hpung mi mahtang Betlehem mare hpe madu la kau rau nga masai. 15Dawi gaw myit garen ai hte, “Betlehem mare chyinghka makau na hka htung ntsin htinggap mi hpe marai langai ngai e la wa ya na hpe ngai gade sha sharawng nga n hka!,” ngu nna tsun wu ai. 16Gumhkawng ai share masum hte gaw Hpilisti dap kata de hpya shang wa nhtawm hka htung ntsin ja wa let Dawi hpe wa jaw ma ai. Rai ti mung shi gaw ntsin dai n lu ai sha, dai Madu hpe hkungga nawng ya let dai hpe ru hkaw kau nhtawm, 17Madu e, ndai ntsin hpe ngai galoi mung n lu na sai! Asak dan ai masha ni a asai hpe lu ai zawn tai na ra ai!,” ngu nna tsun wu ai.
Dai rai nna shi gaw dai ntsin n lu hkraw nga ai.
Dai gaw gumhkawng ai hpyenla masum hte a share shagan sat lawat kumla ni rai nga ai.
18Yoab a kanau Abishai (shan a kanu Zeruia) gaw dai gumhkawng ai share “Sumshi” a ningbaw rai nga ai. Shi gaw masha masum tsa hpe shi a nri hte sat kau lu ai wa re majaw, “Dai Sumshi” hta mying gumhkawng ai wa tai wa sai. 19Shi gaw dai share “Sumshi” ni hta gumhkawng htum ai wa rai nna shanhte a ningbaw tai wa nga ai; rai ti mung “Share Masum” ni zawn shi gumhkawng nga ai n rai.
20Kabazela mare kaw na Yehoiada a kasha Benaia gaw kaga gumhkawng ai hpyenla langai mi rai nga ai; shi gaw magrau grang ai amu law law galaw nu ai, dai hta galu kaba ai Moba hpyenla lahkawng hpe mung sat kau wu ai. Lang mi mung hkyen htat ai shani e nhkun kata de shang nna hkanghkyi langai sat kau wu ai. 21Hkum shingyan kaba ai Egutu masha langai mi hpe mung shi sat kau wu ai; Egutu masha wa nri lang ti mung, Benaia gaw hkawn hte sha htim nna shi a nri hpe kashun la nhtawm dai hte shi hpe sat kau wu ai. 22Dai gaw share “Sumshi” hta langai lawm nga ai Benaia a share shagan ai sat lawat rai nga ai. 23Shi gaw shanhte hta alak mi rai nna gumhkawng ti mung, share “Masum” ni zawn dan hkung nga ai n rai. Dawi gaw shi hpe asak sin ya na sin langa hpareng shatai da wu ai.
24-39Dai “Share Sumshi” hta lawm ai kaga masha ni gaw:
Yoab a kanau Asahela
Betlehem mare na Dodo a kasha Elhanan
Harod amyu na Shama hte Elika
Pelet amyu na Heleza
Tekoa mare na Ikesha a kasha Ira
Anahtot mare na Abieza
Husha amyu na Mebunai
Aho amyu na Zalmon
Nehtohpa amyu na Maharai
Nehtohpa lakung na Bana a kasha Heleb
Benyamin mung, Gibea mare na Ribai a kasha Itai
Pirahton amyu na Benaia
Gasha makau kadit na Hidai
Araba amyu na Abialabon
Bahurim amyu na Azmawet
Shalabona amyu na Eliaba
Yashen a shadang sha ni
Yonahtan
Hara amyu na Shama
Hara amyu na Shara a kasha Ahiam
Mahka amyu na Ahabai a kasha Elihpelet
Gilo amyu na Ahihtohpela a kasha Eliam
Hkarmela amyu na Hezro
Arab amyu na Parai
Zoba mare na Nahtan a kasha Igala
Gad amyu na Bani
Amon masha Zelek
Yoab a hpyen hking lang ya ai Bero amyu na Naharai
Yatira amyu na Ira hte Gareb
Hiti masha Uria
Gumhkawng ai share hpyenla ni yawng marai sumshi sanit rai nga ai.
Currently Selected:
2 SAMUELA 23: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.