2 HKAWHKAM 22
22
Yuda Hkawhkam Yoshia
(2Hl 34:1-2)
1Yoshia gaw Yuda hkawhkam tai wa ai shaloi shi a asak matsat ning rai nga nna Yerusalem mare hta sumshi langai ning up hkang nga ai. Shi a kanu gaw Bozakat mare na Adaia a shayi sha Yedida rai nga ai. #Yer 3:6. 2Yoshia gaw dai Madu awng sharawng ai amu hpe galaw nna shi a kaji kawa Hkawhkam Dawi a kasi kamang hta hkan let Karai Kasang a tara ni yawng hpe ja ja madat mara nga ai.
Mu Tam La Ai Tara Laika Buk
(2Hl 34:8-28)
3Hkawhkam Yoshia gaw shi hkaw dung ai shi matsat ning hta, Meshulam a kashu, Azalia a kasha, hkawhkam wang amu madu Shahpan hpe Nawku Htingnu de ning ngu hkang dat ai ga hte shangun dat wu ai: 4“Hkinjawng Kaba Hilkia hpang de lung wa nhtawm Nawku Htingnu de shang wa ai chyinghka lam e lit la yu sin ai hkinjawng ni, amyu masha ni kaw na lahkawn la lu ai gumhpraw jahpan sa la wa rit. 5Nawku Htingnu kata gram lajang amu woi hpareng nga ai masha ni hpe jaw ya na matu shi hpe tsun su. Shanhte mung, 6lasama ni, nta galaw ai ni, wut nep ai ni hpe jaw ya nna hten za ai shara ni hpe bai gram lajang ai hta lang ra ai hpunpyen hte nlung ni mari la na rai mu ai. 7Dai bungli woi hpareng ai masha ni gaw myit malang nna ding man ai ni rai nga ma ai majaw shanhte a gumhpraw jahpan hpyi n ra nga ai.” #2Hk 12:15.
8Shahpan mung hkawhkam wa hkang dat ai ga Hilkia hpe htawn tsun shana dan wu ai rai nna, Nawku Htingnu kata hta Tara Laika buk hpe shi mu tam la nu ai lam, Hilkia mung shi hpe hkap tsun dan wu ai. Hilkia gaw shi hpe dai laika jaw wu ai rai nna Shahpan mung dai hpe hti wu ai. 9Dai hpang shi gaw hkawhkam wa hpang de nhtang wa nhtawm ning ngu nna tang shana wu ai: “Na a shangun ma ni gaw Nawku Htingnu kata na gumhpraw hpe shaw la nna hten za ai hpe bai gram lajang amu woi hpareng ai masha ni a lata de ap ya sai.” 10Dai hpang shi gaw, “Hilkia ngai hpe ap ya ai laika langai nang e ngai lu nga nngai,” ngu nna tsun wu ai. Shi gaw dai laika hpe hkawhkam wa a man e aja awa hti dan wu ai.
11Hkawhkam wa gaw dai laika hti ai hpe na la ngut ai shaloi hkrit kajawng ai hte shi a hpun palawng ni hpe gang je kau nhtawm, 12hkinjawng Hilkia hpe mung, Shahpan a kasha Ahikam hpe mung, Mihkaia a kasha Akbora hpe mung, hkawhkam wang amu madu rai nga ai Shahpan hpe mung, hkawhkam wa a ali ama rai nga ai Asaia hpe mung ning ngu nna hkang dat wu ai: 13“Ndai laika a sharin achyin ai ga ni hte seng nna, nye a matu mung, Yuda amyu masha ni yawng a matu mung, dai Madu hpe sa san ya mi. Ndai laika hta tsun da ai hte maren galaw ang ga ti mung, anhte a kaji kawa ni n hkan galaw nga ma ai majaw dai Madu anhte hpe pawt sindawng nga ai.”
14Hilkia, Ahikam, Akbora, Shahpan hte Asaia hte gaw Yerusalem nnan daw hta nga ai Hulda mying ai myihtoi numsha hpang de sa san ma ai. (Shi a madu wa Shalum ngu na, Hara a kashu, Tikwa a kasha, gaw Nawku Htingnu na palawng galu ni hpe woi hpareng ai wa rai nga ai.) Shanhte mung dai numsha hpang de byin ai lam sa tsun dan mu ai shaloi, 15dai numsha mung shanhte hpe hkawhkam wa hpang de nhtang wa nhtawm dai Madu a mungga 16ning nga nna tsun ai lam wa tsun dan na matu shanhte hpe tsun wu ai: “Laika hta ka da sai hpe hkawhkam wa hti yu nu ai hte maren, Yerusalem mare hte dai hta nga ai amyu masha ni yawng hpe ngai ari jaw na we ai. 17Shanhte ngai hpe ningdang kau nna karai shaje ni hpe shagu hkungga ni nawng ya ma ai; shing re ai amu hpe shanhte galaw let ngai hpe pawt sindawng shangun nga ma ai. Dai rai nna Yerusalem mare hpe ninghkap na matu nye a masin kahtet ai hpe jasu sharawt ya nga ai rai nna dai gaw kawp mat na ra ai n rai. 18Da ndai gaw dai Madu Israela a Karai Kasang ngai nan hkawhkam wa a matu ning ngu nna tsun nngai; nang gaw laika hta ka da sai hte maren nang madat nit dai, 19nang myit malai nna nye a man e nang hkum nan shagrit shanem ai myit hte na a hpun palawng ni hpe gang je kau nhtawm hkrap ngu hkrap ngoi nga ndai majaw Yerusalem mare hte dai hta nga ai amyu masha ni hpe ari jaw na matu ngai kaning ngu jahkrit shama ai hpe nang na nit dai. Ngai gaw dai mare hpe hkrit hpa mada mu shara shatai kau nna dai shara a mying hpe dagam dala ai hku masha ni tsun lang na mara ai, rai ti mung na a akyu hpyi ai ga hpe ngai na ya se ai majaw, 20Yerusalem mare ntsa e ngai jaw na ngu ai ari gaw nang si mat ai hpang du hkra du na ra ai n rai. Ngai nang hpe ngwi ngwi pyaw pyaw hte si wa shangun mayu nngai.” Dai masha ni mung dai mungga gun let Hkawhkam Yoshia hpang de nhtang wa ma ai.
Currently Selected:
2 HKAWHKAM 22: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
