2 HKAWHKAM 21
21
Yuda Hkawhkam Manashe
(2Hl 33:1-20)
1Manashe gaw Yuda hkawhkam tai wa yang, asak shi lahkawng ning kaba sai rai nna Yerusalem mare hta manga shi manga ning up nga ai. Shi a kanu gaw Hepziba rai nga ai. 2Amyu masha ni rawt lung wa ma ai shaloi, dai Madu shaden kau dat ai masha amyu baw ni a matsat shabat lam hkan let Manashe gaw dai Madu hpe shut hpyit kau wu ai. #Yer 15:4. 3Shi a kawa Hezekia run jahten kau sai tara maigan masha ni a nawku shara ni hpe shi bai de da nna, Israela Hkawhkam Ahab galaw nu ai hte maren, Bala hpe nawku na tawn hkungri ni hpe shi galaw nna Ashera karai num a gawkngu sumla hpe mung galaw nu ai. Manashe gaw shagan ni hpe nawku wu ai. 4Dai Madu mahtang she nawku hkrum ang ai Nawku Htingnu shara hta tara maigan ni a tawn hkungri ni hpe gap da wu ai. #2Sa 7:13. 5Shi gaw Nawku Htingnu na wang lahkawng hta shagan ni yawng hpe nawku lu hkra nga, tawn hkungri ni hpe galaw da wu ai. 6Shi gaw shi a kasha hpe wan nat hkungga jaw jau nna shaba wawt ai hte mandan lakle amu galaw nhtawm gumhpan hpan ai ni hte nat num ni hpe ga san san let bawng yu nga ai. Shi gaw dai Madu hpe shut hpyit mara kaba galaw nna masin pawt shangun nga ai. 7Shi gaw Dawi hpe mung, shi a kasha Shawlumon hpe mung dai Madu ning ngu hkang da ai Nawku Htingnu shara e nan Ashera karai num a hkrang sumla hpe shadun da nga ai: “Ngai hpe nawku na matu ndai Yerusalem mare hpe mung, ndai Nawku Htingnu hpe mung, Israela amyu bawsang shi lahkawng hte a lamu ga yawng hta na ngai lata la ai shara rai nga li ai. 8Nye a shangun ma Mawshe jaw ai nye a hkang da ai Tara ni yawng hpe Israela amyu masha ni madat mara nna, tara ting hpe hkan shatup mu ai rai yang, shanhte a kaji kawa ni hpe ngai jaw da sai mung kaw na shanhte shaden kau ai hkrum na ahkang jaw na we ai n rai. #1Hk 9:3-5; 2Hl 7:12-18. 9Rai ti mung Yuda amyu masha ni dai Madu a ga hpe n madat nga ma ai rai nna shi a amyu masha ni rawt lung wa yang, dai Madu gaw shanhte a mung kaw nna gawt shapraw kau dat ai masha amyu baw ni shut hpyit kau ai yubak ni hta grau kaba ai yubak hpe shut hpyit na matu Manashe gaw shanhte hpe lam woi shadam kau mu ai.
10Dai Madu gaw shi a shangun ma myihtoi ni a ga hku nna, 11“Hkanan masha ni galaw ai amu hta grau sawng ai ndai matsat shabat amu ni hpe Hkawhkam Manashe galaw shut kau nu ai; shi a hpara sumla ni hte Yuda amyu masha ni hpe yubak lam de lam woi shadam mat wa nu ai. 12Dai re ai majaw, dai Madu Israela a Karai Kasang ngai gaw Yerusalem mare hte Yuda mung hta dai zawn re ai ru yak tsin-yam tsindam hpe shapraw dat na we ai, shing re ai lam hpe na wa ai ni kadai mung sai kajawng mau mat na mara ai. 13Samari hpe ngai galaw ai zawn mung Israela Hkawhkam Ahab hte shi a amyu matu ni hpe di ai zawn Yerusalem mare hpe ngai ari jaw na we ai. Hka wan hpe katsut jasan kau nna dagup da ai zawn Yerusalem mare e nga ai amyu masha ni hpe katsut jasan kau na we ai. 14Naw ngam nga ai amyu masha ni hpe mung ngai kau da nhtawm shanhte a gumlau hpyen ni a lata de ap kau na we ai; hpyen ni mung shanhte a mungdan hpe gasat dang kau nna kashun kashe rai hpya ayai kau na mara ai. 15Shanhte gaw ngai hpe shut hpyit kau nna Egutu mung na pru wa ai shanhte a kaji kawa ni a prat kaw nna dai ni du hkra ngai hpe masin pawt shangun nga ma ai majaw ndai amu nye a amyu masha ni hta ngai galaw na we ai,” ngu nna tsun wu ai.
16Manashe gaw mara n kap ai amyu masha law law hte hpe sat kau wu ai majaw Yerusalem nmaw lam hkan sai hka lwi nga ai. Yuda amyu masha ni hpe hpara sumla nawku ai lai de woi sa wa nna dai Madu hpe shut kau na lam shanhte hpe jat nna shi woi galaw nga ai.
17Manashe galaw nu ai amu magup ngu na shi shut kau ai yubak ni lawm hkra, Yuda Hkawhkam ni a Labau Laika hta ka matsing da nga ai. 18Manashe si mat sai rai nna Uza ngu ai hkawhkam wang na hkai sun hta lup makoi da nga ma ai; shi a kasha Amon hkaw galai dung nna hkawhkam tai wa sai.
Yuda Hkawhkam Amon
(2Hl 33:21-25)
19Amon gaw Yuda hkawhkam tai wa ai shaloi, shi a asak hkun lahkawng ning rai nna Yerusalem mare hta lahkawng ning tup up nga ai. Shi a kanu gaw Yotba mare na Haruza a shayi sha Meshulemet rai nga ai. 20Shi gaw shi a kawa Manashe zawn dai Madu hpe shut hpyit kau nna, 21shi kawa galaw ai arawn alai ni hta shi hkan dagraw nang nhtawm shi a kawa nawku ai hpara sumla ni hpe hkan nawku nga wu ai. 22Shi gaw dai Madu shi a kaji kawa ni a Karai Kasang hpe ningdang kau nhtawm dai Madu a hkang da ai ga ni hpe n madat n mara nga ai.
23Amon a du salang ni gaw shi hpe gumlau nna shi hpe hkawhkam htingnu kata e mayun sat kau ma ai. 24Yuda amyu masha ni chyawm gaw Amon hpe mayun sat ai gumlau ni hpe sat kau nhtawm shi a kasha Yoshia hpe hkawhkam shatai da nga ma ai.
25Amon galaw nu ai amu magup shagu a lam hpe Yuda Hkawhkam ni a Labau Laika hta ka matsing da nga ai. 26Amon hpe Uza a sun na lup hta lup makoi da ma ai; shi a kasha Yoshia gaw shi a hkang hta hkawhkam tai wa sai.
Currently Selected:
2 HKAWHKAM 21: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
