2 HKAWHKAM 16
16
Yuda Hkawhkam Ahaza
(2Hl 28:1-27)
1Israela Hkawhkam Remalia a kasha Peka hkaw dung ai sanit ning hta Yohtam a kasha Ahaza mung Yuda hkawhkam tai wa sai rai nna, 2shi a asak hkun ning hta Yerusalem mare e hkaw dung let shi kru ning up nga ai. Shi gaw shi a kaji kawa Hkawhkam Dawi kaw na mai kaja ai kasi n hkan dagraw nang nga ai. Shing rai hkan na malai, 3dai Madu shi a Karai Kasang n ra sharawng ai amu hpe galaw nhtawm Israela hkawhkam ni a kasi hkan dagraw nang nga wu ai. Shi gaw hpara sumla ni hpe wan nat hkungga nawng jau na matu shi a kasha hpe pyi nawng jau ya wu ai; Israela masha ni rawt lung wa yang, dai Madu gawt shapraw kau ai masha amyu ni a matsat shabat re ai lam hta hkan dagraw nang nga ma ai. #Trj 12:31. 4Ahaza gaw kawng ntsa hkan na tara maigan masha ni a nawku shara ni hta mung, shingnip hpun shagu a npu hkan e mung, shagu hkungga ni hpe nawng jau nna manam pyaw ai baw hpe nat wu ai.
5Suri Hkawhkam Rezin hte Israela Hkawhkam Peka yan gaw Yerusalem mare hpe lung gasat nna dai mare hpe wang da ti mung, Ahaza hpe n dang ma ai. #Esa 7:1. 6(Dai aten hta nan Edom hkawhkam gaw Elat mare hpe bai lu la nu ai rai nna dai mare e nga ai Yuda masha ni hpe shaden kau wu ai. Dai rai nna dai yang e Edom masha ni gaw dai ni du hkra naw nga nga ma ai.) 7Ahaza gaw Asuri Hkawseng Tiglat Pilesa hpang de ndai mungga hte rau shi a masha ni hpe shangun dat wu ai: “Ngai gaw nang hpe kam ai shangun ma wa rai nga nngai. Ngai hpe gasat nga ai Suri hkawhkam hte Israela hkawhkam yan a lata kaw nna ngai hpe sa mawoi la e law.” 8Ahaza gaw Nawku Htingnu na ja gumhpraw hte hkawhkam htingnu na sut rai ni hpe la nhtawm hkawseng wa hpang de kumhpa shagun dat ya wu ai. 9Tiglat Pilesa mung Ahaza a karum hpyi ai ga hpe madat let, shi a hpyen luksuk hte rau Damasku mare de lung wa nna gasat la wu ai. Hkawhkam Rezin hpe mung sat kau nna mare masha ni hpe Kira shara de bawng masha hku woi mat wa ma ai.
10Hkawseng Tiglat Pilesa hpe sa tau la na nga, Hkawhkam Ahaza mahtang Damasku mare de sa wa wu yang, dai yang e tawn hkungri hpe shi mu wu ai rai nna, shi gaw de a kasi hte galaw da ai hkrang a kaji htum shara ni hta ahkri ahkrai rai galaw da ai sumla hpe hkinjawng Uria hpang de shagun dat wu ai. 11Dai rai nna dai hte bung ai tawn hkungri langai mi hpe galaw nna Ahaza garai n wa yang, galaw shangut da nu ai. 12Damasku mare na shi nhtang yu wa yang, shangut da sai dai tawn hkungri hpe mu wu ai rai nna, 13de a ntsa e yam nga wan nat hkungga hte shadung hkungga nawng ya wu ai; sabyi hkungga hte mahku hkungga asai hpe mung ru bun wu ai. 14Tawn hkungri nnan hte Nawku Htingnu a lapran e nga ai magri mang tawn hkungri hpe mung dai Madu hpe ap nawng ya nhtawm shi a tawn hkungri nnan a dingdung maga de Ahaza htawt sit da wu ai. #Pru 27:1-2; 2Hl 4:1. 15Dai hpang shi gaw Uria hpe ning ngu hkang dat wu ai: “Jahpawt shagu na wan nat hkungga, hte shana de na wan nat hkungga hpe mung hkawhkam wa hte amyu masha ni a matu wan nat hkungga hte shadung hkungga, amyu masha ni a sabyi hkungga ni a matu mung, ndai nye a tawn hkungri kaba hta lang u. Dai hkungri ntsa e nawng jau ya sai yam nga yawng a asai hpe ru hkaw u. Rai ti mung nye a matu ngu san da ai magri mang tawn hkungri hpe chyawm gaw shaba wawt na matu rai nga ai. 16Uria gaw hkawhkam wa hkang dat ai hte maren galaw wu ai.
17Hkawhkam Ahaza gaw Nawku Htingnu hta lang ai magri mang leng ni hpe garan kau nhtawm dai ni hta mara da ai angdung ni hpe la kau wu ai. Shi gaw magri mang hka lawng hpe mung magri mang usu shi lahkawng a shingma ntsa na shayu la nhtawm nlung pinra hta tawn da wu ai. #1Hk 7:23-39; 2Hl 4:2-6. 18Asuri hkawseng wa ra sharawng u ga, Nawku Htingnu kaw na hkawhkam tingnyang a matu galaw da ai ajan hpe mung Ahaza htawt kau ya nhtawm Nawku Htingnu de hkawhkam wa a matu san san galaw da ya ai shang wa chyinghka lam hpe mung pat kau wu ai.
19Hkawhkam Ahaza galaw nu ai amu magup ni hpe Yuda Hkawhkam ni a Labau Laika hta ka matsing da nga ma ai. 20Ahaza si mat sai rai nna Dawi a Mare na hkawhkam lupwa hta lup makoi da nga ma ai, shi a kasha Hezekia gaw shi a hkang hta hkaw dung let hkawhkam tai wa sai. #Esa 14:28.
Currently Selected:
2 HKAWHKAM 16: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
