2 HKAWHKAM 15
15
Yuda Hkawhkam Uzia
(2Hl 26:1-23)
1Israela Hkawhkam Yeroboam II hkaw dung ai hkun sanit ning hta Amazia a kasha Uzia mung, 2shi a asak shi kru ning hta Yuda hkawhkam tai wa nhtawm Yerusalem mare hta hkaw dung let manga shi lahkawng ning tup up nga ai. Shi a kanu gaw Yerusalem mare na Yehkolia rai nga ai. 3Shi gaw shi kawa a kasi hkan let, dai Madu awng sharawng ai amu hpe galaw nga ai. 4Rai ti mung tara maigan masha ni nawku ai shara ni hpe n jahten sharun kau wu ai majaw amyu masha ni dai hkan e shagu hkungga ni hpe matut nawng ya let, manam pyaw ai baw hpe nat nga ma ai. 5Dai Madu gaw Uzia hpe manggang ana shakap ya wu ai rai nna, shi si ai shani du hkra shi hta kap nga ai. Shi gaw nta langai mi hta shi hkrai nga nna bungli lit yawng hta hkyamsa ai hku nga nga wu ai; shi a kasha Yohtam mahtang mungdan hpe up hkang nga ai.
6Uzia galaw ai amu magup ngu na lam ni hpe Yuda Hkawhkam ni a Labau Laika hta ka matsing da nga ai. 7Uzia si mat wa sai rai nna Dawi a Mare na hkawhkam lupwa hta shi hpe lup makoi da nga ma ai. Shi a kasha Yohtam mahtang shi a hkang hta hkaw galai dung nna hkawhkam tai wa sai. #Esa 6:1.
Israela Hkawhkam Zehkaria
8Yuda Hkawhkam Uzia hkaw dung ai sumshi matsat ning hta Yeroboam II a kasha Zehkaria mung Israela hkawhkam tai wa nhtawm Samari mare e hkaw dung let shata kru up hkang nga ai. 9Shi gaw shi a shawng na hpu shawng hpu ba ni zawn dai Madu hpe shut hpyit kau nga ai. Israela hpe yubak lam de woi shadam sa wa ai Nebat a kasha Yeroboam hkawhkam a n hkru n shawp ai kasi hta hkan nga ai. 10Yabesha a kasha Shalum gaw Hkawhkam Zehkaria hpe mayun maw mawn nhtawm Iblim shara e shi hpe sat kau nna shi a hkang hta hkaw galai dung let hkawhkam tai wa sai.
11Zehkaria galaw nu ai amu magup hpe Israela Hkawhkam ni a Labau Laika hta ka matsing da nga ai.
12Dai rai nna ning rai byin ai lam gaw, “Dai Madu gaw na a amyu matu mara ni prat mali du hkra Israela a hkawhkam ni tai na mara ai,” ngu nna Hkawhkam Yehu hpe jaw tawn da ai ga sadi dik wa ai lam rai nga ai. #2Hk 10:30.
Israela Hkawhkam Shalum
13Yuda Hkawhkam Uzia hkaw dung ai sumshi jahku ning hta Yabesha a kasha Shalum mung Israela hkawhkam tai wa sai rai nna Samari mare hta hkaw dung let shata mi up nga ai.
14Gadi a kasha Menahem gaw Tiza mare kaw nna Samari de lung wa nhtawm Shalum hpe gyam sat kau nga ai. Shi gaw shi a hkang hta hkaw dung let hkawhkam tai wa sai. 15Shalum galaw nu ai amu magup ngu na shi a mayun gumlau maw mawn ai lam ni hpe mung Israela Hkawhkam ni a Labau Laika hta ka matsing da nga ai. 16Menahem gaw Tiza mare kaw nna pru hkawm wa yang, Tapua mare masha ni shi hpe asum n jaw mu ai majaw dai mare, mare masha ni hte de a grup yin shara hpe atsai awai jahten shaza kau wu ai. Na-um nasin byin ai numsha ni hpe pyi shi kan ga kau ya wu ai.
Israela Hkawhkam Menahem
17Yuda Hkawhkam Uzia hkaw dung ai sumshi jahku ning hta Gadi a kasha Menahem mung Israela hkawhkam tai wa nna Samari mare e hkaw dung let shi ning tup up hkang nga ai. 18Shi mung dai Madu hpe shut hpyit kau nu ai rai nna shi si mat ai shani du hkra Israela hpe yubak lam de lam woi shadam sa wa nga ai Nebat a kasha Hkawhkam Yeroboam a n hkru n shawp ai kasi hta hkan nga ai. 19Asuri Hkawseng Tiglat Pilesa gaw Israela mung hpe shang gasat ai shaloi, Menahem mung mungdan hpe shi a daru magam n-gun hte naw ka-up da lu ai hta madi shadaw n-gun jaw la na ginjang hkam la lu hkra nga, gumhpraw tan sumshi matsat sak jaw wu ai. 20Menahem gaw Israela mung ting na sut su ai masha ni kaw na gumhpraw shagyeng la wu ai; langai hte langai kaw na gumhpraw dengga manga shi shi hpyi la wu ai. Dai rai nna Tiglat Pilesa mung mungdan de nhtang mat wa wu ai.
21Manehem galaw nu ai amu magup shagu hpe Israela Hkawhkam ni a Labau Laika hta ka matsing da nga ai. 22Shi si mat sai rai nna lup makoi da ma ai; shi a kasha Pekahia gaw shi a hkang hta hkaw dung nna hkawhkam tai wa sai.
Israela Hkawhkam Pekahia
23Yuda Hkawhkam Uzia hkaw dung ai manga shi ning hta Menahem a kasha Pekahia mung Israela hkawhkam tai wa sai rai nna Samari mare e hkaw dung let lahkawng ning up nga ai. 24Shi mung dai Madu hpe shut hpyit kau wu ai rai nna Israela hpe yubak lam de lam woi shadam sa wa ai Nebat a kasha Yeroboam a n hkru n shawp ai kasi hta hkan nga ai. 25Shi a hpyen du, Remalia a kasha Peka gaw Gilead mung na masha manga shi hte rau shi hpe gumlau na maw mawn nhtawm Samari mare na hkawhkam htingnu kata na dap kata e Pekahia hpe gyam sat kau wu ai. Shi gaw dai wa a hkang hta hkaw galai dung nna hkawhkam tai wa sai.
26Pekahia galaw nu ai amu magup a lam hpe Israela Hkawhkam ni a Labau Laika hta ka matsing da nga ai.
Israela Hkawhkam Peka
27Yuda Hkawhkam Uzia hkaw dung ai manga shi lahkawng ning hta Remalia a kasha Peka mung Israela hkawhkam tai wa sai rai nna Samari mare e hkaw dung let hkun ning up nga ai. 28Shi mung dai Madu hpe shut hpyit kau wu ai rai nna Israela hpe yubak lam de lam woi shadam sa wa ai Nebat a kasha Yeroboam a n hkru n shawp ai kasi hta hkan nga ai.
29Peka hkawhkam galaw nga yang, Asuri Hkawseng Tiglat Pilesa sa du nna, Iyon, Abela Bet Mahka, Yanoa, Kedesha, hte Hazora mare ni hpe mung, Gilead mung Galile hte Naphtali ni hpe gasat dang la nna amyu masha ni hpe bawng masha hku Asuri mung de woi mat wa mu ai.
30Yuda Hkawhkam Uzia a kasha Yohtam hkaw dung ai hkun ning hta, Ela a kasha Hoshea gaw Hkawhkam Peka hpe gumlau rawt nna shi hpe mayun gyam sat kau nhtawm hkaw galai dung let hkawhkam tai wa sai. 31Peka galaw nu ai lam magup hte hpe Israela Hkawhkam ni a Labau Laika hta ka matsing da nga ai.
Yuda Hkawhkam Yohtam
(2Hl 27:1-9)
32Israela Hkawhkam Remalia a kasha Peka hkaw dung ai lahkawng ning hta Uzia a kasha Yohtam mung shi a asak hkun manga ning hta 33Yuda hkawhkam tai wa sai rai nna Yerusalem mare e hkaw dung let shi kru ning tup up nga ai. Shi a kanu gaw Zadok a shayi sha Yerusha rai nga ai. 34Shi a kawa Uzia a kasi hkan nga ai rai nna dai Madu awng sharawng ai amu hpe Yohtam galaw wu ai. 35Rai ti mung tara maigan masha ni a nawku shara ni hpe n jahten sharun kau ya wu ai rai nna amyu masha ni dai shara ni hkan e shagu hkungga ni hpe matut nawng jau let, manam pyaw ai baw hpe nat nga ma ai. Shi gaw Nawku Htingnu a Dingdung Chyinghka hpe galaw da wu ai.
36Yohtam galaw nu ai amu magup ni hpe Yuda Hkawhkam ni a Labau Laika hta ka matsing da nga ai. 37Shi hkawhkam naw galaw nga yang, dai Madu gaw Yuda mung hpe sa gasat na matu Suri Hkawhkam Rezin hte Israela Hkawhkam Peka yan hpe shawng shangun dat ai lam rai nga ai. 38Yohtam si mat sai rai nna Dawi a Mare na hkawhkam lupwa hta lup makoi da ma ai; Shi a kasha Ahaza gaw shi a hkang hta hkaw dung let hkawhkam tai wa sai.
Currently Selected:
2 HKAWHKAM 15: JCLB
Highlight
Share
Compare
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
