Mareke 9
9
1Jezu vuri dugi bo ndi: «Mi eduga, asisyele: ake baali ka kuni ba ka kpa eli bo akini mono omfumu o Njyami ba bo ya bila mpari ŋi.»
Jezu amvyere lekuma le nde
(Lekese se Matye 17.1-13; Luke 9.28-36)
2Amana ecugu esyami, Jezu yagi bila nde Pyere, Jake ŋa Jan, ŋa nde biri bo katege yila kakuru keenini. Nde yiga kaligi ka ovuzu o bo. 3Amfa a nde ma kata ŋa akirigi kubugi. Mbuuru yila ncye akabuna kavuta amfa puu mva bwa ŋi. 4Alwoni atari amoni se Eli bila Moyize ba awobo bila Jezu. 5Ŋaa Pyere yagi mbari dugi ŋa Jezu ndi: «Oyizigi, kiila keeve ma bizi leka kakuni. Bizi lencwa elebe etari, omo wo we, omo wo Moyize ŋa omo wo Eli.» 6Okorogo, Pyere kiigi ki ya jaa leka lyele ŋi, kabila aso ba atari kiigi ŋa bwogo. 7Kacuyi kayi ŋa kafugi bo ma kayiini, jui lecuugi ma kacuyi ŋa ndi: «Wu Mwana mi wo jya, leyuga nde!» 8Kancinci, alwoni akesi kapaana bo, ŋaa bo aki mono mbuuru ŋi. Jezu ndemotu kiigi bila bo. 9Ntini ye surugi bo yila kakuru, Jezu ligi bo ma naana ŋa mbuuru ma moni bo, tii kayuga Mwana Mbuuru kampanaŋa baari ba amaakpa. 10Bo anyimi ngiri, ŋaa bo ba apiza bo ŋa bo ndi: «Nde ema kasaga duga ma “kayuga mpanaŋa baari ba amaakpa”?»
11Amana bo apizi Jezu ndi: «Meema ayizigi angiri ba duga ave Eli baani yi?» 12Nde kaali bo ndi: «Ave Eli baani yi ma kakozo elogo njwori. Meema Ampiri ma aduga se ndi Mwana Mbuuru aje kamono mpasi kuna ŋa baaje kabele nde? 13Ŋaa mi elyele be Eli ma amana ya, baari asi nde aso ma jii bo, mva kadugi Ampiri.»
Jezu asalaga mwana wooli ŋa kapundu keebi
(Lekese se Matye 17.14-21; Luke 9.37-43)
14Ntini ye eyi bo kampaani abuga ba alwoni, bo amoni lembuuru leenini eli lejeneŋe bo. Ayizigi angiri kiigi ba atogo bila bo. 15Parabu, bo amoni Jezu ŋa lembuuru lebagi akimi. Baari adumi ciini mpila nde ma kabiga nde. 16Jezu pizi alwoni a nde ndi: «Yila ema be letogo bila bo?» 17Mbuuru omo kanca lembuuru kaali nde ndi: «Oyizigi, mi yi bila we mwana mi wooli ŋa kapundu keebi ka keliga nde ma kawobo. 18Kapundu kya ka ebuna yaga nde mpini biri. Ŋaa nde cuni nde ma ncye, mwana ŋa awuru ma maacuuga nde ma onywa, nde aja mii, ŋa nyuru a nde esi onono. Mi pizi alwoni a we ma kacura kapundu keebi kya, ŋa bo aki buna ŋi.» 19Jezu dugi bo ndi: «Be leca le lubu, be lila kali! Mi vula ka bila be tii ntini ma? Tii ntini ma mi kyele be? Leya bila mi mwana.» 20Ayi bila nde mwana. Kapundu kamono Jezu, kancinci nde nyizigi mwana bila mpari. Nde vi ŋa obuuyi ma ncye ŋa awuru ma onywa. 21Jezu pizi taara ndi: «Antini yiga kpe eli nde li bu?» Taara kaali ndi: «Kasa baana nde obuzi. 22Ŋa kapundu ka ebaana ciniŋa nde nca mba ŋa nca anja, ndi nde ka kpa. Aka we abuna sa kiila, mono bizi nya ŋa yamba bizi.» 23Jezu kaali ndi: «Aka we abuna, we duga. Ŋaa eso ba abuna ma mbuuru wo ayalaga.» 24Kancinci, taara mwana ti osarigi ndi: «Mi eyalaga, yamba mi, kabila mi ŋa kaama le lila.»
25Jezu moni ndi lembuuru kuna lemakuga, ŋaa nde bami kapundu keebi ma nde ndi: «Kapundu ka keliga ma kawobo ŋa ma kayuga, cuuga ma mwana wu ŋa biza ka maaya ma nde.» 26Kapundu ka ti osarigi, ko kanyizigi mwana bila nkala, ŋa kacuugi ma nde. Mwana kiigi mva mbuuru wo ma akpa, ŋa bege le baari adugi ndi: «Nde ma akpa.» 27Ŋaa Jezu yagi nde ma kwogo, nde yambi nde ma katemeŋe, ŋa mwana temiŋi. 28Ntini ye Jezu ye kanyunuŋi kanca njo, alwoni ba kiigi bila nde otu, apizi nde ndi: «Meema bizi lebizi kabuna kacura kapundu kya?» 29Ŋa Jezu kaali bo ndi: «Ma ebwoni otu eli ba abuna kacuzuga yi sila epundi beebi.»
Jezu avura wobo ma leku ŋa enyuzigi e nde
(Lekese se Matye 17.22-23; Luke 9.43-45)
30Bo acyege biri lya ŋa bo abuuli Ngalile. Jezu ki jya ni aya kacu ka eli nde ŋi. 31Kabila nde kiigi yiziga alwoni a nde ŋa kiigi duga ndi: «Mwana Mbuuru amitege kanca njyala e baari. Bo baaje kabuma nde, ŋa amana ecugu etari, nde aje kanyuziga.» 32Ŋaa alwoni kiigi aki yuga ambari ma ŋi, bo kiigi ŋa bwogo ma kalege nde ejugu.
Wo vuli buga na?
(Lekese se Matye 18.1-5; Luke 9.46-48)
33Bo atoyi Kaperenawume. Ntini ye nde ka katoyi njo, nde pizi ndi: «Be kiigi ema lewobo ma njila?» 34Ŋaa alwoni aki pi. Okorogo, kayila njila, bo ba abila paniŋi bo ma kaya wo vuli buga. 35Ŋaa Jezu ki manci, kacwoli alwoni kuumu ŋa bwele ŋa dugi ndi: «Aka mbuuru asaga ka ncomi, nde baani ka lembiza le abuga ŋa ojanji abuga aso.» 36Nde yagi mwana wo okyege, legi nde ka kari abo, amana nde yagi nde kanca njyala e nde, nde aduga bo ndi: 37«Mpini mbuuru we yaga mwana ma nkuumu a mi, mva wu, mi mankulu kayagi. Ka mi otu ŋi, ŋaa mbuuru wo tumi mi.»
Mbuuru wo okaami mbele bizi a be, li bila bizi a be
(Lekese se Luke 9.49-50)
38Jan ŋa nde ndi: «Oyizigi, bizi lema amono balaga lemo wo acura epundu beebi ma nkuumu a we, ŋa bizi le sagi liga nde, kabila nde aka lwono bizi ŋi.» 39Jezu kaali ndi: «Lebiza nde kaliga, kabila mbuuru ki buna sa mpiri ma nkuumu a mi ŋi, ŋa amana parabu dugi maabi ŋa mi. 40Okorogo, mbuuru wooli kini mbele bizi a be ŋi oli bila bizi a be. 41Ŋa mpini mbuuru we ampa be mbaza anja kabila be leli bila Kirisite, mi eduga be, kamaka jaajaa: nde aje kabaga wura le nde.»
Jezu ayieze alwoni a nde
(Lekese se Matye 18.6-11; Luke 17.1-2)
42«Mbuuru wo asa kava onkere omo kanca amaami maabi eli maayalaga mi, kala tata akuri nde tagi ma nkii ŋa acuni nde kanca oduba woonini. 43Aka kwogo ka we keesa maami maabi, caga ko. Tata ma we, we nyunuŋi nca omwo o jaajaa bila kwogo kamon keeli we nyunuŋi bila njyala jwele nca mba ye obu-obu, mba ye yeebiza kaduma. [44Kaŋa, “eli ekuyi e bo ba ekakpa bila eli mbaa ye obu-obu#9.44 Olwo wu ba kamono nde kanca bege le ampiri akala ŋi.”.] 45Aka kuulu ka we keesa maami maabi, caga ko. Tata ma we wo kirigi kabuka nca omwo o we ka eli wo bagi miili jwele ŋa acuni we nca mbaa ye obu-obu. [46Kaŋa, “eli ekuyi e bo ba ekakpa bila eli mbaa ye obu-obu#9.46 Olwo wu ba kamono nde kanca bege le ampiri akala ŋi.”.] 47Aka jiizi le we lesa we kasa maami maabi, cyeze lo. Tata ma we, wo nyunuŋa nca omfumu o Njyami bila jiizi lemo, ka eli wo bagi miizi mwele ŋa acuni we nca mba ye obu-obu. 48Kaŋa, ebiga ba eka kpa ŋi, mba ye kaduma ŋi. 49Mbuuru ŋa mbuuru aje kaka ongba ka mba.
50«Ongba kalogo keeve, ŋaa aka ongba ka kaama mpye, buni be le vuta yo? Ave be lebagi ongba nca be ŋa be leki ŋa kadusu be bila ŋa abuga.»
Currently Selected:
Mareke 9: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
