Mareke 10
10
Eyizigi e Jezu yila lecala le baala
(Lekese se Matye 19.1-12; Luke 16.18)
1Amana nde cyegi kaŋa, yi nca bungu le Jude ŋa lengulu le Jurede. Lembuuru levuri kugi kapaana nde, nde vuri yizigi bo, mva ka baana sa nde. 2AFarizi ayi ciina mpaana nde ma kalege nde oyeri. Bo apizi nde ndi: «Olumi abuna kavuta okari nde?» 3Jezu kaali bo ndi: «Ngiri maa Moyize kampi be?» 4Bo akaali nde ndi: «Moyize yaligi ni balaga leteende okanda ma kacala baala bila okari a nde.» 5Ŋaa Jezu kaali bo ndi: «Moyize teendi ngiri yia ma be kabila be ŋa etuma ba onono. 6Ŋaa keebani e ntini ye Njyami ka kawangi okiri, nde si balaga bila okaazi. 7Ŋa mabwa, balaga leje kacyege taara a nde bila nguugu a nde, ŋa kaka bila okari a nde. 8Ŋa bo ba abwele baaje kaka mbuuru omo, ŋaa bo yiga ki baari bwele ŋi, ŋaa mbuuru omo. 9Ŋaa yiga mbuuru ki cala ba Njyami ba kavuzigi ŋi.» 10Ntini ye yi vuruga alwoni njo, bo avuru legi Jezu ejugu ma jaa lya. 11Nde dugi bo ndi: «Ntini ye acuta mbuuru a balaga okari a nde, ŋaa nde kabala okima, nde mi sa ncuuma ka miizi ma okari wo ncomi. 12Ŋa aka okaazi mi biza olumi a nde ŋa mi bala balaga lekima, nde mi sa ncuuma.»
Jezu mpi baana puga
(Lekese se Matye 19.13-15; Luke 18.15-17)
13Baari ayi bila baana ba abuzu mpila Jezu, mabuni nde kalege njyala e nde yila bo, ŋaa alwoni yiga ba afala bila baari baayi ŋa baana ba. 14Ntini ye Jezu ye kamoni bwa, biri nkala ŋa dugi ŋa alwoni a nde ndi: «Lenyina baana aya mpila mi, lebiza bo kaliga. Okorogo omfumu o Njyami oli ŋa baari baali mva baana ba abuzu. 15Mi eduga be, jaajaa: mbuuru kabiza yalaga omfumu o Njyami mva mwana wo obuzu, nde ki buna ka nyunuŋa nca omfumu baa ŋi.» 16Ŋaa nde yagi baana kanca njyala e nde ŋa nde mpi bo puga ma kalege njyala e nde kayila bo.
Jezu bila mbuuru wo kabaga
(Lekese se Matye 19.16-30; Luke 18.18-30)
17Ntini ye Jezu ye kayeni, mbuuru yi ma nciini, vi ma abwo ka ovuzu o nde ŋa pizi ŋa Jezu ndi: «Oyizigi woove wu, mi bunu esa ma kabaga omwo ba obu-obu?» 18Jezu akaala ŋa nde ndi: «We meema acwolo mi ma mbuuru woove? Se mbuuru woove kali, kangula Njyami otu. 19We ni yayi angiri a Njyami, ŋaa mon ma aduga ndi: “We bizi mbuuru kabuma, we bizi ncuuma kasa, we bizi osara kayuba, we bizi opami ocuba kasa ma abuga, we bizi kakura abuga, nyima taara we bila nguugu a we#10.19 Lekese Ex 20.12-16; Det 5. 16-20. Biza kayaga kiila ŋa abuga ma kakura: maami ma kanca angiri akuumu kali ŋa kaami kanca etini ba ewuani Matye bila Luke..”» 20Balaga le kaali nde ndi: «Oyizigi, kaasa kula mi ma anyima angiri maa aso.» 21Jezu kesi bo bila jya ŋa dugi nde ndi: «Emi siila we kalogo kamon ma kasa: Je tege eso beeli ŋa we, ŋa mpa ŋa afuga ampara ma, ŋaa we aje kabaga osolo kanca yulu, amana ya ŋa we lwono mi.» 22Ŋaa mbuuru wua kayuga bwa, nde si nya, kabila nde kiigi ŋa lebuuga leenini.
23Jezu kesi alwoni ba kiigi jeneŋe nde ŋa dugi bo ndi: «Ma baari baali ŋa kabaga, ŋa mpasi ma kanyunuŋa nca omfumu o Njyami!» 24Alwoni abagi akimi ma mbari a nde, ŋaa Jezu vuru dugi bo ndi: «Baana a mi, jaajaa ŋa mpasi yomini ma kanyunuŋa kanca omfumu o Njyami! 25Ŋi nyama woonini ki buna kanyunuŋa nca bulu le sori ŋi, ŋaa ni evuli mpasi ma nga kabaga ma kanyunuŋa nca omfumu o Njyami.» 26Alwoni aselegi ki nca akimi, ŋa ba kaduga kanca mpanaŋa bo ndi: «Ŋaa yiga mbuuru wo abuna kavuuga na?» 27Jezu kesi bo ŋa dugi bo ndi: «Ma baari ki buna ŋi, ŋaa ma Njyami aso nde abuna.» 28Ŋaa Pyere dugi nde ndi: «Yuga, bizi lema nyina njwori ma kalwono we.» 29Jezu akaala nde ndi: «Mi ŋa jaajaa elyele be, aka mbuuru mi nyina njo nde sikali andumu a nde, ankeri a nde, nguugu a nde, taara a nde, baana a nde, anguunu a nde, ma mi ŋa ma Ncya Yeemve, 30nde yiga aje kabaga apu ma ankama kuumu, kanca okiri: anjo, andumu, ankeri, anguugu, baana, anguunu bila ampasi se, ŋa nca okiri wo aya, nde aje kabaga omwo ba obu-obu. 31Ŋaa yiga kuna le baari ba baaka ka levuzu yiga mbiza ŋa baari ba baaka kabiza yiga ka levuzu.»
Jezu avura wobo ma leku ŋa ma enyuzugi e nde
(Lekese se Matye 20.17-19; Luke 18.31-34)
32Bo kiigi ma njila ma kakuma Jeruzaleme. Jezu kiigi je kavuzu ba alwoni a nde ba ki baraga, ŋa baari ba aki lwono bo kiigi ŋa obwogo. Jezu vuru yagi alwoni nkuumu ŋa bwele bila nde ŋa nde baani bo kawobo kiigi ma maaya ma nde. 33Nde dugi bo ndi: «Leyuga! Bizi lekuma Jeruzaleme. Mwana Mbuuru baaje katege ŋa ampi ambwoŋi bila ayizigi angiri. Bo baaje kapama nde ma leku ŋa baaje katege nde ŋa baari baali akini kaya Njyami ŋi. 34Ba bwa baaje kasebe nde, baaje kacuta atayi yila nde, baaje kabere nde ma ekasi ŋa baaje kabuma nde. Ŋa amana ecugu etari nde aje kayuga.»
Kapiza ka Jake bila Jan
(Lekese se Matye 20.20-28)
35Ŋaa Jake bila Jan, baana a Zebede ayi kapaana Jezu. Bo adugi nde ndi: «Oyizigi, bizi lepiza we kalogo kamon, ŋa bizi lejii ni we yalaga.» 36Jezu kaali bo ndi: «Be ema lejii ni mi sa ma be?» 37Bo akaali nde ndi: «Ntini ye ka we kanca lekuma le we, mpa bizi ma kaka manci kapaana we, omo ka kwogo ka kalumu ka we ŋa okima ka kwogo ka okari.» 38Ŋaa Jezu kaali bo ndi: «Be leki ya ba apiza be ŋi. Be lebuna nywa mbaza ye ampasi eli mi anywa, sikali ateemi ma ampasi ma baga mi?» 39Ŋa bo akaali nde ndi: «Bizi lebuna.» Jezu lyeli bo ndi: «Be leeje kanywa mbaza ye aje kanywa mi, ŋa be leeje kabaga ateemi maaje kabaga mi. 40Ŋaa mi ebuna kakura wo aje kaka manci ka kwogo ka kalumu sikali ka okari ŋi. Kamaka Taara a mi wo okozi ebiri ma ake, kamaka ŋa bo nde aje kampa.»
41Ntini ye yugi alwoni a kuumu bwa, bo abiri kala bila Jake ŋa Jan. 42Ŋaa Jezu cwoli bo aso kapaana nde ŋa nde dugi bo ndi: «Be leyayi yo, baari ba baakese mva amfumu ba esi ŋa onkani kayila bo mva ayizigi. Ŋa baari ba avuli ba ayezege onkani o bo kayila abuga. 43Ŋaa ave bwa ebizi kayira kanca mpanaŋa be. Nkalave aka mbuuru wo ovuli abuga kanca be, ave yiga ojanji a be. 44Ŋa aka kanca mpanaŋa be mbuuru jii kaka osu, ave nde ki oyiga be aso. 45Kabila Mwana Mbuuru ki ya ni asala ma nde ŋi. Nde yi ma kajanja ŋa ma kampa omwo o nde mva mvunu ma kapira bege le baari.»
Jezu asa kawuuma Baretime wo abiza kamono
(Lekese se Matye 20.29-34; Luke 18.35-43)
46Jezu bila alwoni a nde atoyi Jeriko, amana bo acuugi nca kangundu bila bege le lembuuru. Mbuuru wo abiza kamono wo ba acwolo ma Baretime, mwana Time, ka manci ma ofunuŋa njila, kiigi laa ampara. 47Ntini ye yugi nde ndi Jezu o Nazarete, nde ti nya ndi: «Jezu, Mwana Davide#10.47 Mwana Davide kamaka nkuumu ye vunuŋi bila Masiya sikali Kirisite eli Njyami kiigi mpi ndagi. ! Yamaŋa mi.» 48Bege le baari ba kayuuma nde ndi: «Aa kapi ŋa!» Ŋaa wo abiza kamono seligi tesi jui ndi: «Mwana Davide, yamaŋa mi!» 49Jezu sugi, ŋa dugi ndi: «Cwolo nde.» Baari acwoli mbuuru wo abiza kamono ma kaduga nde ndi: «Sa mpari, we temeŋe, nde acwolo we.» 50Ŋaa nde cuni ngoyi a nde, temiŋi ŋa asari, ŋa yi mpila Jezu. 51Jezu pizi nde ndi: «We asaga ni mi sa we kama?» Mbuuru wo abiza kamono ŋa nde ndi: «Oyizigi, mi esaga ni mi vura mono!» 52Ŋa Jezu ŋa nde ndi: «Je, lila le we le mi sa we kawuuma.» Kancinci ŋa mbuuru wo abiza kamono, miizi a naaŋi mva ka abaaka nde kala, ŋa nde lwoni Jezu yila njila.
Currently Selected:
Mareke 10: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
