Mareke 7
7
Lebila yila maami ma aFarizi
(Lekese se Matye 15.1-20)
1AFarizi ŋa ayizigi angiri ake awi Jeruzaleme akugi ajeniŋi Jezu. 2Bo amoni alwoni a nde ake bayaga biila bila njyala beeli ŋa kiri, ma kaduga ni baabiza kacuka mva amaami a bo. 3Okorogo, aFarizi, mva aJife aso, bo ba anyima amaami ma anga baari: bo baaja eli bo akini cuka njyala yemiŋi ŋi. 4Ŋa kawa bo jandi, bo ba kaja eli bo akini kacasa anja ŋi. Bo ba anyima bege le amaami: lecuka le akombo, abiina, ŋa epele [ŋa antari]#7.4 Ŋa antari: ampiri ake maami ma kali..
5AFarizi ŋa ayizigi angiri apizi ŋa Jezu ndi: «Meema alwoni a we baabiza kalwono amaami ma anga baari, ŋa bo baaja biila bila njyala ŋa kiri?» 6Jezu kaali bo ndi: «Be anga ompyele! Ezayi kiigi ŋa mpyeme ntini ye wobi nde ma kiigi duga Njyami, ma be:
“Baari ba baanyima mi ma ambari atu,
ŋaa otuma bo oli lala ŋa mi.
7Kalakali eli baari ba baabwono mi,
eyizigi ba ampa bo
kamaka mva angiri a baari amwo#7.7 Ezayi 29.13.”»
8Jezu avura duga ndi: «Be lenyina ma tege angiri a Njyami, ma kanyima amaami ma omwo.»
9Nde avura duga ndi: «Be leyayi kacuna angiri Njyami mabuni be lesa maami a bemankulu! 10Okorogo, Moyize aduga ndi: “We nyimi taara we ŋa nguugu a we”#7.10 Exode 20.12, ŋa “wooli se alogo taara a nde sikali nguugu a nde, abumi nde.”#7.10 Exode 21.17 11Ŋaa be, be leduga mbuuru ndi: “We abuna duga taara a we sikali nguugu a we: Emi be saga mpa we ma kayamba we kamaka Koreban” ma kaduga “ambwoŋi ma anyini ŋa Njyami”. 12Ŋa be yiga letuma mbuuru wua ma kabiza sa kiila ma taara nde sikali ma nguugu a nde. 13Ma lemigi loankulu lya, be ledisa mbari a Njyami ma maami eli be lempa. Ŋa be lesa bege elogo ekima mva bwa.»
Maami ma maasa mbuuru omwo ma kabiza ka cece
(Lekese se Matye 15.10-20)
14Jezu vuri cwoli lembuuru ŋa nde dugi bo ndi: «Leyuga mi, be aso, ŋa leyuzuga yemiŋi: 15Ka beeli kajii ba beevuta mbuuru kiri ŋi. Ŋaa ba beecuuga ma mbuuru, bya beevuta mbuuru kiri. [16Mbuuru wooli ŋa acu ma kayuga, ni nde yugi#7.16 Olwo wu ba kamono nde kanca bege le ampiri akala ŋi.!]»
17Ntini ye Jezu kanyunuŋi nca njo, lala ŋa lembuuru, alwoni a nde apizi nde yila ngana yia. 18Ŋa nde aduga bo ndi: «Be se, be leki ya ŋi? Be le kayuga ni kiila kajii ki buna kavuta mbuuru kiri ntini eli ko ke kanyunuŋa kanca nde ŋi? 19Kabila elogo bya ki buna kanyunuŋa nca otuma nde ŋi, ŋaa nca omwo nde, amana jo ecuugi ma mwo nde.» Ma ambari ma, Jezu kiigi mweze ni ba buna kaja biila eso. 20Nde alusa ndi: «Ba be cuuga ma mbuuru beesa ni nde kaka kiri. 21Kabila kamaka nca kari, otuma o mbuuru omwo, beeya ecimiŋi beebi, jo be tuma nde ma kasa odumba, osara, kabuma, 22kasa ncuuma, kajya biibi ba abuga, ma kasa maami maabi, kakura, ma kasa maami ma okuru, ma kasa mfunuŋa mwo,katuga, kasa kamba bila ojiri. 23Obi ba oso bo cuuga kanca kari ŋa bo boosa mbuuru ma kaka kiri.»
Okaazi ojya ayalaga Jezu
(Lekese se Matye 15.21-28)
24Jezu cyegi kaŋa ŋa yeni nca bungu le Tire. Nde nyunuŋi nca njo ŋa nde kiigi njala ni mbuuru kaya kali, ŋaa nde ki buna kaka maayizigi ŋi. 25Okaazi wooli mwana kiigi kapundu keebi ka ma kata oyugi ba awobo ma Jezu, nde yi parabu ovi ka miili e nde. 26Okaazi wua kiigi o Ngereke, akuli ka Fenizi nca bungu le Siri. Nde kiigi bwono Jezu ma kacuta kapundu nca mwana wo okaazi. 27Ŋaa Jezu aduga nde ndi: «Bana nyina baana asa aja ma njala bo, kabila ove kali ma kayaga lempembe le baana ŋa atuna lo ŋa amva ba akyege.» 28Nde kaali ŋa nde ndi: «Oyizigi, amva ba akyege se, ncina mbisa, baaja mfumfuzu baana ba enkere.» 29Ŋaa Jezu aduga nde ndi: «Ma mbari yia, je: kapundu ka mi cuuga nca mwana.» 30Nde vurugi mpila nde, kaŋa, nde moni mwana okaazi ma tolo yila ntari: kapundu kiigi ka mi cuuga.
Jezu asalaga nkina bila wo abiza kayuga
31Jezu cyegi bungu le Tire. Nde yiri ma Sidon. Nde yi vuruga mpila oduba o Ngalile ma kabuula bungu le Dekapole. 32Ayi bila Jezu balaga le lebiza kayuga eli ki buna kawobo ŋi, ŋa ampi nde akolokolo ma kalege kwogo yila nde. 33Jezu biri nde katege, lala ŋa lembuuru, nde legi elyemi e nde nca acu a balaga ŋa ciili nde lempele bila atayi a nde. 34Amana nde sati miizi ka yulu, kafyemi ŋa dugi ŋa balaga ndi: «Efata!» ma kaduga ni «We naaŋa!» 35Parabu, acu a nde anaaŋi, lempele lewuumi, ŋa nde wobi taata. 36Jezu dugi ŋa baari ndi: «Lebiza kaduga ŋa mbuuru!» Ŋaa ma antini aso nde kaduga bo bwa, bo ba selege kaduga ancya. 37Baari kiigi nca akimi maanini, bo ba kaduga ndi: «Eso e nde ba kaasa eli yemiŋi! Nde asa kayuga ankina ŋa ba baabiza kayuga!»
Currently Selected:
Mareke 7: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
