Mareke 6
6
Baari a Nazarete ba kayalaga Jezu ŋi
(Lekese se Matye 13.53-58; Luke 4.16-30)
1Jezu cyegi biri lya ŋa yeni kanca kasi ka nde, alwoni a nde ba kalwono nde. 2Cugu le baawuuma nde kayiziga kanca njo ye baabwono. Bege le baari ba ayugi nde akiigi nca akimi ŋa bo ba kaduga ndi: «Nde yo kunu ye wa? Nde yi sila ncimi ye ampa nde maa ŋa ampiri maa nde bunu kasa mon? 3Nde ka mbuuru wo asa eti, mwana Mariya, ŋa ndumu Jake, Joze, Jude ŋa Simon ŋi? Ankeri a nde ka bila bizi a be baaka ŋi?» Bwa ekiigi liga baari a Nazarete ma kayalaga nde. 4Ŋaa Jezu aduga bo ndi: «Ntuma Njyami kanyima ma ebiri eso, ki kanca kangundu ka nde, nca nkwono ŋa nca njo nde ŋi.» 5Ŋa nde kiigi ki buna kasa se mpiri kaŋa ŋi, kangula kalege njyala yila abyeri ake ŋa si bo kawuuma. 6Ŋa ekoli nde ma bo ba kaami lila.
Jezu atuma alwoni a nde a kuumu ŋa bwele
(Lekese se Matye 10.5-15; Luke 9.1-6)
Jezu kiigi je ma ampugu aso ŋa ma atiniŋa ma kayiziga. 7Nde cwoli alwoni a kuumu ŋa bwele tumi bo bwele bwele. Nde mpi bo onkani yila epundu beebi. 8Nde dugi bo ndi: «Be lebizi se kiila kabira bila be ma opinga, kangula pangi, se mpembe, se mpye, se adoro kanca ondi o mfa. 9Lebira akorogo, ŋaa lebizi kabira amfa mwele.»
10Nde avura duga ndi: «Ntini ye ba yamba be kanca njo, leka tii ntini eli be lecyege biri. 11Aka baari ba kangundu kabiza be kayamba ŋa kayuga be, le cyege kaŋa ŋa lekubuga lewuzu le miili e be: kamaka oyiezi ma bo.» 12Alwoni ayeni ma kampa baari ncya ma kakaala omwo. 13Bo acuti epundu ekukuna, akili maari yila ecu e ba abyeri. Ŋa bo ba kasalaga bo.
Leku le Jan Batise
(Lekese se Matye 14.1-12; Luke 9.7-9)
14Okunji Erode yugi ka baawobo ma Jezu, kabila nkuumu a nde kiigi yiga ŋa ncya. Ake adugi ndi: «Jan Batise mi nyuzuga kanca baari ba akpa akpa! Mabwa nde asa ampiri.» 15Baamon adugi ndi: «Eli.» Akima: «Ntuma Njyami, wuana omo kanca antuma-Njyami akala.» 16Ntini ye Erode kayugi bwa, nde dugi ndi: «Kamaka Jan Batise! Mi ma tuma ma kacaga ocu nde, ŋaa nde ma nyuzuga ma leku!»
17Okorogo, kiigi Erode, kiigi ma tuma ma kakwara Jan ŋa ma kalege nde ma ongeneŋe, amakura bila lengazi. Kiigi ma Erodiyade, eli Erode bali se nde wo kiigi okari a ndumu a nde, Filipe. 18Kabila Jan kiigi duga Erode ndi: «We aka buna yaga okari ndumu a we ŋi!» 19Erodiyade beli Jan ŋa osagi ma kabuma nde, ŋaa nde ki buna ŋi. 20Okorogo, Erode kiigi ŋa bwogo o Jan, kabila nde kiigi yayi ndi nde kiigi balaga letele, wo kiigi sa ma jii Njyami ŋa nde kiigi kyele nde. Ntini ye kiigi yuga nde, nde ki ya osumbu wo kasa ŋi, kabaasa bwa, nde kiigi ŋa njala kayuga nde. 21Ŋaa cugu lemo, Erodiyade obagi mfenza ma kabuma Jan. Ovu wo akuli Erode ŋa nde osi cinda leenini. Nde cigi ankani, amfumu ba aworo ŋa amfumu baanini ba Ngalile. 22Mwana wo okaazi wo Erodiyade nyunuŋi kanca katini ka njo ŋa kini, Erode bila ba cigi nde a jii nde. Ŋaa okunji dugi ŋa onkere okaazi ndi: «Piza mi ba ejii we, ŋa mi mpa.» 23Ŋa nde si nde okezi wu ndi: «Ba eje kapiza we, mi eje kampa we, se eka kabari ka kasi ka mi.» 24Onkere okaazi kacuugi ŋa kadugi ŋa nguugu a nde ndi: «Mi piza ema?» Wua yaligi ndi: «Ocu a Jan Batise.» 25Onkere okaazi kavurigi ŋa asisari mpaana okunji ŋa kapizi nde ndi: «Mi jii ni we mpa mi parabu ocu o Jan Batise kayila kapele!» 26Nya esi okunji ŋaa nde ki buna kabiza la pizi nde ŋi, ma nde wo labi okezi ka ovuzu o baari a nde ba kacigi. 27Parabu, nde tumi oworo ndi: «Je, ŋa ya bila mi ocu o Jan.» Oworo yeni nca ongeneŋe ŋa cagi ocu a Jan. 28Amana nde biri ocu yila kapele ŋa mpi onkere okaazi, ŋa wua mpi ŋa nguugu a nde. 29Ntini ye alwoni a Jan kayugi ncya yia, bo ayi yaga kabiima ka nde asuuzi kanca muuma.
Jezu abunuŋa ankama kuumu ba abalaga
(Lekese se Matye 14.13-21; Luke 9.10-17; Jan 6.1-14)
30Antuma avunuŋi kampaana Jezu ŋa bo adugi nde aso a bo maasi ŋa ma ayizigi. 31Nde aduga bo ndi: «Leya bila mi nca biri eli lesugu kali, be lewuuma ntini mon, ka tege.» Okorogo, baari ba kiigi je ŋa ba baaya kiigi akukuna eli Jezu ŋa alwoni a nde aki baga se ntini ma kaja ŋi. 32Yiga bo ayeni nca vaari, ma tege ma kacu eli baari kali. 33Ŋaa bege le baari amoni bo ka baaje ŋa ayugi kacu ka eje bo. Bo awi ma engundu ba mpaani eso ŋa atoyi ma ncye kabiri yia, levuzu le Jezu ŋa alwoni a nde.
34Ntini ye cuugi Jezu nca vaari, nde moni lembuuru lya, nde moni bo nya kuna. Kabila bo amaawuana mva endombo be yele okyeli. Ŋaa nde yizigi bo bege le amaami yila Njyami. 35Atari kiigi amiyira, alwoni aciini mpaana nde ŋa adugi nde ndi: «Atari amiyira ŋa biri li anjo kali. 36Vuta baari ba ma kaje nca evula ŋa nca ampungu a mpaani ma kasuuma kiila ka kaja.» 37Jezu kaali bo ndi: «Lempa bo bemankulu biila!» Bo apizi nde ndi: «Bizi leje kacina ekuumu ena ba adoro ma ankozo ma kasuuma mpembe ŋa lempa bo ma kaja?» 38Jezu pizi bo ndi: «Be mpembe kpe? Leje mono.» Bo asagi ŋa bo adugi ndi: «Bizi ŋa mpembe taani ŋa ancu bwele.» 39Ŋaa Jezu tumi bo avi mancina ŋa bo ayezegi ma eju, yila nceri e mva pii. 40Baari aki ma eju ba nkama ŋa ma eju ba ekuumu etaani. 41Jezu yagi mpembe etaani ŋa ancu a bwele, sati miizi ka yulu ŋa osi obwoni wo puga. Nde kabi mpembe ŋa nde mpi ŋa alwoni ma kakaba baari. Nde kabi se ancu a bwele mpaana bo aso. 42Aso aji kuna va kajii bo. 43Alwoni abiri angara kuumu ŋa bwele a mpembe bila ancu. 44Baaji kiigi ankama kuumu (5.000) ba abalaga.
Jezu aje yila oduba
(Lekese se Matye 14.22-33; Jan 6.15-21)
45Parabu amana, Jezu dugi ŋa alwoni a nde ma kakuma nca vaari mabuni bo aje yila lengulu lemo, ma kacu ka kangundu ka Betezayida, ma ntini e ndemankulu ka kiigi sa lembuuru kaje. 46Nde kamana vuta bo, nde yeni yila kakuru ma kabwono. 47Ekikolo eto, vaari kiigi ka otuma oduba, ŋa Jezu kiigi ma ncye ndemotu. 48Nde moni ni alwoni a nde kiigi amakolo ma kajuga, kabila pyebi kiigi kaje kacu kakima. Ka baaciina encyere, nde yeni mpila bo, ma kaje yila anja. Nde kiigi jii bo kanyura. 49Ntini ye moni bo nde aje yila oduba, bo acimiŋi ni kiigi ofu ŋa bo ati nya. 50Okorogo, aso kiigi amoni nde ŋa abagi bwogo. Ŋaa parabu, Jezu wobi bila bo ndi: «Lesa okiini! Kamaka mi, lendaga bwogo kamono.» 51Amana nde kumi kanca vaari, mpaana bo, ŋa pyebi levi. Alwoni abagi akimi maanini, 52kabila bo kiigi aki yuga mpiri ye mpembe ŋi: Bo kiigi abizi ma kayuzuga.
Jezu asa kawuuma abyeri ka Ngenezarete
(Lekese se Matye 14.34-36)
53Bo amana kabuula, aciili ncye nca bungu le Ngenezarete. 54Bo acuugi kanca vaari ŋa parabu, baari ayayi ndi Jezu. 55Baari awi ŋa asisari nca bungu leso ŋa abaani kabira abyeri mpila nde yila ekala e bo, kaŋa eli bo akiigi yuga ka baaduga ndi: «Jezu a wu!» 56Mpini biri eli nde kiigi je, nca ampungu, engundu sikali evula, baari akiigi suuza abyeri yila ebiri e baari aso ŋa akiigi mpa nde akolokolo ma kanyina bo ma kaciila ncwo mfa nde, aso ba akiigi kwara nde awuumi.
Currently Selected:
Mareke 6: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
