Mareke 16
16
Enyuzigi e Jezu
(Lekese se Matye 28.1-8; Luke 24.1-12; Jan 20.1-10)
1Ntini ye yiri cugu le baawuuma, Mariya wo Mangadala ŋa Mariya nguugu a Jake, ŋa Salome asuumi maari ma ananase ma kaje lege yila njuru Jezu. 2Ka okwoyo, bo ayeni muuma ka nkara encyere, ka abaana tari. 3Bo ba kalyele kanca mpanaŋa bo ndi: «Wo aje kacyeze bizi kele eli lebiinda onywa muuma na?» 4Ŋaa akaazi akesi ŋa bo amoni ndi kele amiciniŋa ma bayi, ŋaa lo kiigi ŋa onini. 5Bo anyunuŋi nca muuma, bo amoni onkere balaga, mancina ka kwogo ka kalumu, kiigi ma alaaza kalinga ka kubugi. Ŋa bo abagi bwogo. 6Ŋaa nde dugi ŋa bo ndi: «Lebiza bwogo kamono! Be lesaga Jezu wo Nazarete, wo akomi ma lemaanji, nde ma nyuzuga, nde yiga kakuni kali. Lemono biri eli anyini nde. 7Yiga leje lyele ŋa alwoni a nde bila Pyere mini: “Nde micama be ka Ngalile. Be lemono nde kakwa, mva kalyeli nde be.”» 8Akaazi acuugi kanca muuma ma aciini. Bo ba katerege ma bwogo bila akemi, ŋa bo aki ma duga jaa ŋa mbuuru ŋi, kabila bo kiigi ŋa obwogo.
Jezu amweze nyuru ŋa Mariya wo Mangadala
(Lekese se Matye 28.9-10; Jan 20.11-18)
[9#16.9 Katini ka olwo ka 16.9-20 ba kabaraga jo nca ampiri aso akala ŋi. Asoke mo kiigi ba lusa ma antini ma maaya. Amana enyuzugi e Jezu ka nkara encyere ba okwoyo, nde baani cuugi ka osu o Mariya wo Mangadala, eli nde kiigi ma acura epundu beebi ncaami. 10Nde yeni dugi ŋa baari ba kiigi bila Jezu. Bo kiigi ma ndogo bila kalili. 11Ŋaa ntini ye yugi bo ndi Jezu kiigi mwoyi ŋa Mariya omoni nde, bo aki yalaga ŋi.
Jezu amweze nyuru ŋa alwoni bwele
(Lekese se Luke 24.13-35)
12Alwoni bwele acuugi ma kaje kangundu. Jezu mwezi bo nyuru ma lemigi lekima. 13Alwoni ba abwele ayi duga abuga, ŋaa bo se aki yalaga ŋi.
Jezu amweze nyuru ŋa alwoni ba kuumu ŋa omo
(Lekese se Matye 28.16-20; Luke 24.36-49; Jan 20.19-23; Esima 1.6-8)
14Eyira, nde mwezi nyuru a nde ŋa alwoni ba kuumu ŋa omo ma ntini ye kiigi bo yila mbisa ma kaja. Nde bami bo ma kaama le lila bila etuma e bo ba onono, kabila bo aki yalaga baari ba amoni nde mwoyi ŋi. 15Ŋa nde dugi bo ndi: «Leje nca okiri oso, ma kampa Ncya Yeemve ŋa baari aso. 16Mbuuru wo aje kayalaga bila wo aje kayaga ateemi aje kavuuga, ŋaa mbuuru wo abiza kayalaga baaje kapama. 17Ŋa lemono eliimi eli ba aya mbuuru wo ayaligi: bo ba acura epundu beebi ma nkuumu a mi, bo ba awobo ajwi ma anyarigi, 18Bo ba abuna kakwara antaari kanca njyala e bo, ŋa bo ba anywa anganga ma mabuma, bwa ye sa bo kiila ŋi. Bo ba alege njyala yila ecu ba abyeri, ŋa abyeri ba awuuma.»
Jezu avuruga paana Njyami
(Lekese se Luke 24.50-53; Esima 1.9-11)
19Mfumu Jezu kamana kalyele bo bwa, abiri nde yulu, ŋa nde ki mancina ma kwogo ka kalumu ka Njyami. 20Alwoni ayeni ma ebiri eso ma kampa Ncya Yeemve. Mfumu kiigi janja bila bo ŋa nde kiigi mpa bo mpari ma kasa maami ma akimi. Ma lemigi lya nde kiigi mweze ndi mbari ye alwoni kiigi jaajaa.]
Currently Selected:
Mareke 16: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
