Mareke 15
15
Jezu cuugi ka ovuzu o Pilate
(Lekese se Matye 27.1-2,11-14; Luke 23.1-5; Jan 18.28-38)
1Ka encyere, ampi ambwoŋi akugi bila akuuru ŋa ayizigi angiri, ŋa oju wo amfumu ba aJife aso ma ka kura ncuumu. Amana kakura Jezu, bo abiri nde, ŋa ampi nde ŋa Pilate. 2Pilate pizi ŋa Jezu ndi: «We ŋa okunji aJife?» Jezu kaali ŋa nde ndi: «We mankulu mbuuru wo alyele bwa.» 3Ampi ambwoŋi akati Jezu ma bege le maami. 4Ŋaa Pilate vuri legi Jezu ejugu ba ekukuna ndi: «We aka kaala ŋi? We ayuga ma aduga bo ma we?» 5Ŋaa Jezu ki duga nde se jaa lemo ŋi, ŋa eseligi ekoli Pilate.
Jezu amipama ma leku
(Lekese se Matye 27.15-26; Luke 23.13-25; Jan 18.39–19.16)
6Antini aso kabaasa kiza le Pake, Pilate kiigi pisa ongeneŋe omo, mbuuru wo pizi lembuuru. 7Ŋi, balaga lemo kuumu a nde Barabase kiigi ka ongeneŋe bila anga kamba. Bo abumi mbuuru ntini ye bo ye asi ngimiŋa ma baari ba Rome. 8Lembuuru leyi mpila Pilate. Baari apizi nde ndi: «Sa bizi maami ma abaana sa we!» 9Pilate kaali ŋa bo ndi: «Be lejii ni mi pisa be okunji aJife?» 10Okorogo, Pilate kiigi yayi lo, ampi ambwoŋi ategi nde Jezu ma mfunuŋa mwon. 11Ŋaa ampi ambwoŋi acyezi lembuuru mabuni tata Pilate kapisa bo Barabase. 12Pilate vuri pizi bo ndi: «Ŋaa mi ema asa bila mbuuru wo acwolo be ma okunji aJife?» 13Bo akaali ma esarigi ndi: «Komo nde yila lemaanji!» 14Pilate pizi bo ndi: «Jaa le mbuuru wu le kasa leebi lema?» Ŋaa bo aselegi ti esarigi ba nkala ndi: «Komo nde yila lemaanji!» 15Pilate jii ma kasa lembuuru ove, nde pisi bo Barabase. Nde si kabere Jezu ekasi, ŋa nde pisi nde ŋa aworo mabuni bo akomo nde yila lemaanji.
Aworo ba asebe Jezu
(Lekese se Matye 27.27-31; Jan 19.2-3)
16Aworo abiri Jezu kanca kari lebugu le njo nguverenere, ŋa nde cwoli aworo aso akima ba oju o bo. 17Ma kasebe Jezu, bo alegi nde mfa yeemve yeela e baa ye maawuana puu. Bo ancwi kafugu mva ka okunji bila ataŋa ma ancyene ŋa alegi yila ocu a nde. 18Ŋa bo ba kabiga nde ma kaduga ndi: «We maajuruga, okunji aJife!» 19Bo aberi nde pangi kayila ocu, bo acuti nde atayi, ŋa bo aki ma abwo ma kafumuŋa ka ovuzu o nde. 20Amana kasebe nde, bo acyezi nde mfa yeela, ŋa bo avuti amfa a nde, amana bo abiri nde njii ma kakomo yila lemaanji.
Jezu akomi yila lemaanji
(Lekese se Matye 27.32-44; Luke 23.26-43; Jan 19.17-27)
21Balaga lemo le Sirene kuumu Simon taara Alesadere bila Rufuse, aki yira ma lya kaba wa anguunu. Aworo akwari nde ma kabira lemaanji le Jezu. 22Bo abiri Jezu kabiri ye baacwolo ma Ngolengota, bwa ma kaduga ndi: «Biri le kabwa ka ocu.» 23Bo ajii ma kampa nde mali ma avuruga bwa ekemi enkala, mire, ŋaa nde bizi. 24Bo akomi nde yila lemaanji, ŋa akabi amfa a nde, ma kasa kakuumu kamon ma kamono aka mbuuru ŋa mbuuru kiigi bagi. 25Kiigi tari le owua lencyere ntini ye komi bo nde yila lemaanji. 26Kayila kakari amaateende ampiri lejaa le apami nde ndi: «Okunji wo aJife.» 27Bo se akomi yila amaanji epira jwele kapaana Jezu, omo ma kwogo ka kalumu ŋa woomo ma kwogo ka kabogo. [ 28Mabwa maayi maateendi kanca Mpiri ndi: «Atali nde kanca ajimba#15.28 Olwo wu ba kamono nde kanca bege le ampiri akala ŋi..»]
29Baari ba kiigi yira ma biri yia ba kajiriga ecu, bo atugi Jezu ma kaduga ndi: «We! We dugi mini we acala Njo Njyami ma kavura ncwa yo ma ecugu etari, 30Vuzuga we, ma wemankulu, suruga ma lemaanji!» 31Se ampi ambwoŋi bila ayizigi angiri akiigi sebe Jezu. Ŋa kanca mpanaŋa bo adugi ndi: «Nde vuzugi baari, ŋaa nde ki buna kavuzuga ndemankulu ŋi! 32Ndi Kirisite okunji Ezerayele yiga kasuruga ma lemaanji! Aka bizi lemono bwa, ŋaa bizi leyalaga nde.» Ŋa ba akomi yila lemaanji kampaana Jezu ba katuga nde se.
Leku le Jezu
(Lekese se Matye 27.45-56; Luke 23.44-49; Jan 19.28-30)
33Tari kiigi yila ocu, vuzu oyili kanca kasi kaso, ŋaa lempiibi lya lebigi tii atari atari ba ngula ocu. 34Tari le otari, Jezu ti osarigi onkala ndi: «Eloyi, Eloyi, lema sabakatani?» Bwa ma kaduga ndi: «Njyami a mi, Njyami a mi, meema we ma anyina mi?» 35Kanca baari ake ba kiigi kaŋa ayugi nde ŋa adugi ndi: «Leyuga, nde acwolo Eli!» 36Kanca bo omo bari nciini, nde cubii katini ka atila kanca anganga aŋayi ŋa kuri ma ncwo katini ka oti, ŋa nde labi ŋa Jezu ma kanywa ŋa dugi ndi: «Lenjila, lema mono aka Eli aya pisa nde ma lemaanji.» 37Ŋaa Jezu ti osarigi woonini ŋa nde kpi.
38Kalembe keenini kaataani kayulu kanca Njo Njyami kabaagi etini jwele ma kawa yulu tii ncye. 39Mfumu aworo aRome wo kiigi ma atala Jezu moni lemigi lekpi nde ŋa nde ndi: «Jaajaa balaga li kiigi Mwana Njyami!» 40Akaazi ake ba kiigi kaŋa, bo se ba kakese kalala. Kanca bo, kiigi ŋa Mariya wo Mangadala, Mariya wo nguugu Jake wo onkere balaga bila Joze, ŋa Salome. 41Bo akiigi lwoni Jezu ŋa ajanji ma nde ntini ye kiigi nde ka Ngalile. Kiigi kaŋa ŋa bege le akaazi ba akiigi kuma bila nde Jeruzaleme.
Jezu alegi kanca muuma
(Lekese se Matye 27.57-61; Luke 23.50-56; Jan 19.38-42)
42Lempiibi kiigi lemito, kiigi cugu le ba akozo kiza, ma kaduga ndi cugu le abaana cugu le baawuuma. 43Jozefe, wo Arimate oyi, nde kiigi nkani kanca oju wo amfumu ba aJife, nde se, kiigi njila eyi ba omfumu o Njyami. Nde yeni bila kawasi mpila Pilate ŋa pizi nde njuru a Jezu. 44Ŋaa ekoli Pilate ka kayugi ndi nde kiigi ma amana kpa. nde ncwoli mfumu aworo ŋa pizi nde aka nde maabiga kaka kpi. 45Ntini ye yugi nde ma onywa mfumu aworo ndi kiigi bwa, nde dugi ŋa Jozefe ma kayaga njuru a nde. 46Jozefe suumi kalembe ka woyi-woyi, nde si kasuruga kabiima ma lemaanji, nde vubugi ko kanca kalembe. Ŋaa nde legi ko kanca muuma wo amaparaga kanca kakubu ka kele. Amana nde legi kele leenini ka onywa muuma. 47Mariya wo Mangadala bila Mariya nguugu a Joze akiigi kese biri ye baalege nde.
Currently Selected:
Mareke 15: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
