Mareke 1
1
Jan Batise nca biri yeli baari kali
(Lekese se Matye 3.1-12; Luke 3.1-18; Jan 1.19-28)
1Ebaani e Ncya Yeemve e Jezu Kirisite, Mwana Njyami. 2Kanca buku le ntuma Njyami Ezayi, amaatende ndi:
«Mi kiigi etuma osizigi a mi ka levuzu le we,
ma kanana we njila.
3Kamaka jui le balaga lemo le leta nya nca biri yeli baari kali:
Leselege njila Mfumu,
Lesa nde anjila atele!#1.3 Ezayi 40.3»
4Bwa ecuugi e Jan Batise kanca biri yeli baari kali, nde kiigi ta ombila ndi: «Lekala eku, leyaga ateemi ŋa Njyami aje kabologo asumu abe.» 5Baari aso ba bungu le Jude ŋa kangundu ka Jeruzaleme ayi mpila nde, bo adugi asumu abo ka omwo o baari ŋa Jan kampa bo ateemi kanca okeri, wo Jurede.
6Jan kiigi ma laza mfa ye ekwa e nyama wo nkuumu kabala ŋa nkamba le kabaana ma nyuru a lege, nde kiigi kaja apezi bila buugu le swaga. 7Nde ampa mbari ŋa lembuuru ndi: «Wo aya amana mi ovuli mi mpari, mi ki buna kafumuŋa ma kapisa endi ba akorogo a nde ŋi. 8Mi, mi mpi be ateemi bila anja, ŋaa nde, nde aje kampa be ateemi ma Oduduma Santi.»
Ateemi bila Amiga Jezu
(Lekese se Matye 3.13–4.11; Luke 3.21-22; 4.1-13)
9Ŋaa ma antini maa Jezu wi Nazarete kangundu ka Ngalile, ŋa Jan mpi nde ateemi kanca okeri o Jurede. 10Ntini ye Jezu ka kiigi cuuga ma anja, nde moni yulu onaaŋi. Ŋa nde moni Oduduma Santi asuruga yila nde mva kuuna. 11Ŋa jui lewi yulu ndi: «We mwana mi o jya. Ma we mi ŋa kase kaso.»
12Parabu Oduduma Santi o tumi Jezu kanca biri yeli baari kali. 13Jezu ki ekuumu ba ecugu ena ŋa Sata omigi nde. Nde kiigi kaka bila anyama a swaga ŋa antuma-yulu ba kajanja ma nde.
Jezu acwolo alwoni a nde ancomi
(Lekese se Matye 4.12-22; Luke 4.14-15; 5.1-11)
14Amana kalege Jan ongeneŋe, Jezu yeni Ngalile, nde kiigi mpa Ncya Yeemve e Njyami. 15Ŋa nde ndi: «Ntini ya lejili emito, kabila Omfumu o Njyami oli paani bizi a be! Lekaala omwo ŋa leyalaga Ncya Yeemve!»
16Jezu kiigi yira ma opaani oduba o Ngalile, nde moni Simon ŋa Andere, ndumu a Simon, kiigi ba acuna kya kanca oduba kabila bo kiigi abya ancu. 17Jezu ŋa bo ndi: «Leya bila mi, ŋa mi sa be abya a baari.» 18Parabu, bo anyini akya a bo ŋa anami Jezu. 19Nde seligi ciini laa nceti ŋa moni Jake bila ndumu a nde Jan, baana a Zebede, kanca vaari ka ba selege akya a bo. 20Parabu Jezu cwoli bo. Bo anyini taara bo Zebede kanca vaari bila ajanji a nde ŋa bo anami nde.
Balaga le oduduma woobi
(Lekese se Luke 4.31-37)
21Jezu bila alwoni a nde ato kangundu ka Kapenawume. Cugu le baawuuma, Jezu nyuniŋi kanca njo ye baabwono ŋa nde kayiziga. 22Ba kiigi yuga nde kiigi kanca akimi ma lemigi leki yiziga nde. Kabila nde kiigi ka mva ayizigi angiri ŋi, ŋaa nde kiigi yiziga bo bila otori. 23Ma ntini yia, balaga eli ŋa kapundu keebi nyuniŋi kanca Njo ye baabwono. Nde kata nya ndi: 24«We ema asaga ma bizi, Jezu o Nazarete? We bizi ya biiza? Mi yayi mva eli we! We le cece le Njyami wo katumi.» 25Jezu wobi bila otori ŋa kapundu keebi, nde ŋa nde ndi: «We kapi ŋa cuuga kanca balaga li!» 26Kapundu keebi kanjizigi balaga bila mpari ŋa kacuugi ma nde ma kata nya yeenini. 27Aso ali kanca akimi ŋa bo ba kapiza kanca paniŋi a bo ndi: «Jo ema? Balaga li ayiziga ma lemigi lenyarigi bila tari. Nde awobo bila otori se ŋa epundu beebi, ŋa jo enyimi nde!» 28Parabu, ancya a nde akuniŋi kanca bungu le Ngalile leso.
Jezu asalaga oko o Simon ŋa abyeri akima
(Lekese se Matye 8.14-17; Luke 4.38-41)
29Jezu acuuga kanca Njo ye baabwono parabu amana, nde yeni mpila Simon ŋa Andere. Jake ŋa Jan ayeni bila nde. 30Oko o Simon wo okaazi kiigi yila ntari, bila kabaa ka nkala. Parabu, awobi ma nde ŋa Jezu. 31Jezu ciini paani a nde, yagi nde ma kwogo ŋa si nde kasaraga kancinci ŋa kabaa kawi. Ŋa nde yiga ajanja ma bo.
32Ka ekikolo, muyi kava, baari ayi bila abyeri aso mpila Jezu ŋa aso ba akiigi ŋa epundu beebi. 33Kangundu kaso kiigi ka ma kuga ka onywa njo. 34Jezu saligi baari kuna ba akiigi ŋa angayi aso ŋa nde cuti epundu beebi kuna. Nde kiigi ki nyina epundu beebi ma kawobo ŋi, kabila bo kiigi ayayi nde.
Jezu abwono ŋa ampa Ncya Yeemve ka Ngalile
(Lekese se Luke 4.42-44)
35Anyuzuga, vuzu lekini ŋa lempiibi, nde temiŋi ŋa cuugi ma kaje kanca biri eli baari kali, ŋa nde yiga abwono. 36Simon ŋa ba akiigi bila nde ayeni ma kasaga nde. 37Ntini ye moni bo nde, bo adugi nde ndi: «Baari aso ba asaga we.» 38Jezu ŋa bo ndi: «Lecwe kacu kakima, kanca ampugu akima maali ka opani. Mi se mpa Ncya Yeemve, kabila mabwa mi yi.» 39Ŋa nde yeni kanca Ngalile eso. Nde kampa Ncya Yeemve kanca anjo ma maabwono ŋa ma kacura epundu beebi.
Jezu asalaga nga ebila
(Lekese se Matye 8.1-4; Luke 5.12-16)
40Nga ebila oyi mpila Jezu, nde ki ma abwo ka ovuzu o nde ŋa pizi nde ndi: «Aka we jii, we abuna vuta mi cece.» 41Jezu moni nya ma balaga lya. Nde labi kwogo, ciili nde ŋa nde ndi: «Mi jii, ka cece.» 42Parabu, ebila ecyegi ma balaga lya ŋa nde yiga cece. 43Jezu vuti nde parabu, wobi bila nde ma otori ndi: 44«Sa oyeri we bizi mbuuru kaduga, ŋaa je mweze nyuru a we mpila ompi ambwoŋi, ŋa mpa mbwoŋi eli Moyize dugi ma kamweze bo ni we yiga cece.» 45Balaga yeni, ŋaa yi ma kaduga ma ebiri eso ma ayiri ma nde. Mabwa, Jezu ki ma buna kamweze nyuru kanca kangundu ŋi, nde kiigi kaka kanca ebiri eli baari kali. Ŋa ma asongo aso baari ba kaya mpila nde.
Currently Selected:
Mareke 1: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
