Mareke 2
2
Jezu asalaga balaga le kabuka
(Lekese se Matye 9.1-8; Luke 5.17-26)
1Ecugu eke eyira, Jezu yi vuruga ka Kapenawume, ŋa ayugi ndi nde kiigi ka njo. 2Baari kuna a kugi, se biri ye esiili kali, se kajii ka onywa njo. Jezu kiigi mpa bo mbari a Njyami. 3Baari ayi bila nde balaga lemo le kabuka, baari ba abiri nde ana. 4Ŋaa ma lembuuru, bo kiigi ki buna kasura nde ka ovuzu o Jezu ŋi. Ŋaa yiga bo akumi yila okaami a njo bo atubi bulu ka biri le kiigi Jezu, bo asi kasuruga kabuka kayila kakala ka nde. 5Ntini ye Jezu ye kamoni lila le baari baa, nde dugi ŋa kabuka ndi: «Mwana ami, asumu awe amibologo.» 6Ayizigi angiri ake baali mancina kanca njo ŋa bo ba kabaraga ndi: 7«Balaga li meema lewobo bwa? Nde ŋa, nde atuga Njyami. We abuna kabologo asumu na? Kangula Njyami otu!» 8Parabu ŋa, Jezu kiigi yayi ecimiŋi e bo, nde ŋa bo ndi: «Be meema lebaga bya sila ecimiŋi? 9Yo jaa le mpasi ma kalyele ŋa kabuka ndi: “Asumu awe amibologo” sikali kalyele ndi: “We temeŋe ŋa yaga kakala ka we ŋa je”? 10Ŋaa yemiŋi, ave be leyayi mini: Mwana mbuuru ŋa onkani ma kabologo asumu yila ncye.» Ŋaa Jezu aduga ŋa kabuka ndi: 11«Mi eduga we, temeŋe, yaga kakala ka we, ŋa vuruga mpila we!» 12Parabu ŋa, balaga le temiŋi, ka ovuzu o baari, nde yagi kakala ka nde ŋa cuugi. Baari aso kiigi nca akimi ŋa bo ba kaduga ndi: «Esa ka bizi lekini kamono yi sila jaa ŋi! Jaajaa Njyami ŋa onini!»
Jezu acwolo Levi
(Lekese se Matye 9.9-13; Luke 5.27-32)
13Jezu vurugi kampaani oduba o Ngalile. Lembuuru leso lekiigi ya mpila nde, ŋa nde kiigi ayiziga bo. 14Ka eyiri, Jezu moni Levi, mwana Alefe, mancina ka njo ye lempo. Jezu ŋa nde ndi: «Lwono mi!» Nde temiŋi ŋa lwoni nde. 15Amana Jezu ji kanca njo Levi. Bege le baari leji bila Jezu ŋa alwoni a nde: bo kamaka ajanji ba lempo ŋa anga asumu, kabila ba baalwono Jezu kiigi akukuna. 16AFarizi bila ayizigi angiri kiigi ba amono ni Jezu aja bila anga asumu ŋa ajanji ba lempo. Ŋaa bo adugi ŋa alwoni a Jezu ndi: «Meema Mfumu a be aja bila anga lempo ŋa anga asumu?» 17Jezu yugi bo ŋa nde ŋa bo ndi: «Baari ba kayi-kayi kaama ma nga kali, kamaka abyeri baali ŋa kaama. Mi ki ya ma kacwolo baari ba baayalaga ni bo tele ŋi, ŋaa ma baari ba ayayi ndi bo anga asumu.»
Jezu awobo ma kaka njala
(Lekese se Matye 9.14-17; Luke 5.33-39)
18Alwoni a Jan Batise ŋa aFarizi kiigi njala. Baari ayi duga ŋa Jezu ndi: «Meema alwoni a we ba abiza kaka njala, ŋaa alwoni a Jan bila alwoni ba aFarizi baaka njala?» 19Jezu kaali bo ndi: «Be lecimiŋa buni baacigi ma cinda lebaala ba buna kaka njala ntini eli olumi li bila bo? Ma antini aso eli olumi li bila bo, baacigi ki buna kabiza kaka njala ŋi. 20Ŋaa ecugu beeje kaya eli baaje kacyeze bo olumi, ŋaa ma cugu lya bo baaje kaka njala.
21«Mbuuru ki buna kacwa kabari ka mfa kenyarigi yila mfa ekala ŋi. Ncanke, kabari kenyarigi ka kazigi kabari ka mfa ka kala, ŋa bulu le mfa lekala levuli si onini. 22Ŋa mbuuru ki buna kalege mali ma anyarigi kanca ambiina akala ŋi. Ncanke, ambiina abulugi, ŋa lekaami mali bila ambiina aso. Kalege mali ma anyarigi kanca ambiina ma anyarigi#2.22 «mfa e kala» bila «maali akala» ma amvyere maami akala ma aJife, ŋa « kalembe ka enyarigi» bila «maali ma anyarigi» ma amvyere Ncya Yeemve ye Jezu. ba abuna vusa ma abwele ŋi. Ave aso aki ma anyarigi!.»
Jezu bila cugu le baawuuma
(Lekese se Matye 12.1-8; Luke 6.1-5)
23Cugu le baawuuma, Jezu kiigi buula anguunu. Alwoni a nde ba katolo mburu nke ma njila. 24AFarizi adugi ŋa Jezu ndi: «Kese, meema alwoni a we baajanja ma Cugu le baawuuma?» 25Jezu kaali ŋa bo ndi: «Be lekini katanga ma si Davide ŋi? Cugu lemo, nde bila alwoni a nde kiigi ŋa njala, ŋaa bo kiigi kiila ka kaja kali. 26Nde nyunuŋi kanca Njo Njyami yeenini. Kiigi ma ntini eli Abyatare kiigi ompi ambwoŋi woonini. Davide nyuniŋi kanca olebe Njyami, ji mpembe ye akiigi mpa Njyami, ŋa nde mpi se baakiigi bila nde. Kamaka ampi ambwoŋi atu kiigi ba abuna kaja!» 27Jezu vuri dugi bo ndi: «Cugu le baawuuma asa ma baari ŋa ka baari asa ma cugu le baawuuma ŋi. 28Ŋa mabwa se Mwana Mbuuru Mfumu a cugu le baawuuma.»
Currently Selected:
Mareke 2: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
