Luke 24
24
Jezu mi nyuzuga kanca baari baakpa kpa
1Ma cugu lencomi le kayinga, ka nkara encyere akaazi ayeni muuma. Bo abiri ŋa amwomi ŋa ananase maasi bo. 2Bo amoni ndi kele le adubi muuma le micyege, yiga ma katege. 3Bo anyunuŋi nca kari, ŋaa bo akimono kabiima ka Mfumu Jezu ŋi. 4Bo akinibaasaga lemigi le eyiri jaa lia, mono baari bwele, ba amalaaza amfa ma osizi akubugi ka baaya ka levuzu le bo. 5Ŋaa akaazi ba amoni bwogo leenini, bo alegi elii nca ncye. Ŋaa baari baa ŋa bo ndi: «Be mema lesaga mbuuru wooli muon nca baari baa ma akpa? 6Lemono, nde yiga kaŋa kali, ŋaa nde ma amana nyuzuga. Okorogo levura baraga maami ma nde ma kadugi be, eli nde kini ka Ngalile.» 7Nde ni dugi be ndi: «Ave akabi Mwana Mbuuru nca jyala e baari baabi, akomo nde ma lemaanji, ŋaa cugu le otari nde anyuzuga nca baari baakpa kpa.»
8Bo avuru barigi maami ma adugi Jezu bo. 9Bo aciegi muuma, ŋaa bo ayeni naana maami maaso ŋa antuma a nde ba kuumu ŋa omo, ŋa abuga baamo ba alwoni aso. 10Akaazi ba kiigi ŋa Mariya wo kasi ka Mangedala, ŋa Zaane, ŋa Mariya o ngwugu a Jake, bila akaazi akima. Bo anaani maami maa ŋa antuma a Jezu. 11Ŋaa antuma baa amoni ndi, akaazi baa akiigi naana maami ma oca, ŋaa bo akiyalaga ŋi. 12Okorogo Pyere sarigi, ŋa nde yeni muuma ma ciini, nde fumiŋi ŋa nde moni kalembe katu ka akuri kabiima. Nde kamana mono maami maa, kaama vuruga nde njo kiigi ema mana kolo nde.
Antuma abwele ba avunuŋi bila Jezu
13Ma cugu lo ankulu lia alwoni bwele nca bo ayeni mpugu mon ye baacwolo ma Emayise, ŋaa ma kaciege mpugu yia, ma kato Jeruzaleme, kasa atari mwele ma njila. 14Ŋaa bo ba kalyele maami aso ma ayiri ma Jezu maa. 15Ntini ye kiigi lyele bo abuele, mono Jezu nde-ankulu ka kaya baraga bo, ma kaje bila bo. 16Bo amoni nde, ŋaa kalogo kamo kadubi miizi a bo ma kayaa ndi wu nde. 17Jezu ŋa bo ndi: «Be yo ma lebaga ma njila ye atogo be?» Bo asugi, ŋaa bo amoni obi. 18Nca baari abuele baa, omo nkuumu Klopase, kaali ŋa Jezu ndi: «Ka nguugu ka jaa ka kava nca Jeruzaleme ki, eli baari aso ayayi, ŋa we ki ya lo ŋi?» 19Jezu kaali ŋa bo ndi: «Jo ema esa?» Bo akaali ŋa nde ndi: «Jaa le leya ma Jezu wo Nazarete, nde kiigi ntuma Njyami woonini, nde kasa ampiri maanini ka miizi a Njyami bila a baari. 20Ŋaa kimayaa jaa eli amfumu a baari ba baampa ambwoŋi bila amfumu abizi a be, le abira nde ma katege nde ka njiala ba akunji a Arome, ma kalege le nde kayila lemaanji ma kabuma le nde ŋi. 21Ŋaa bizi kiigi lema alege lila ni, nde kiigi mbuuru wo aya vuzuga baari ba Ezerayele ka jiala ba anyon. Ŋaa bila maami ma amivura ya ma lubu yiga cugu le otari. 22Ŋi akaazi ake nca oju a bizi a be, ama anaana bizi a be jaa ye osizi, nkara encyere bi, bo amaaje muuma. 23Ŋaa bo abiza kabiima kamono, bo ayi lyele lemigi lemoni bo antuma a yulu ba adugi bo ndi, Jezu li mwo. 24Ake baali nca oju a bizi ayeni tii muuma, okorogo bo amoni maami ma lemigi le lyeli akaazi ba, ŋi bo akimono Jezu ŋi.» 25Ŋaa Jezu ŋa bo ndi: «Ajie be se jaa le leyugi kali! Etuma e be ŋa onono ma kayalaga maami ma alyeli antuma-Njyami a yulu. 26Kiigi aki lyele be ndi, ave Kirisite wo ovuzigi baani mono mpasi, se nde nyunuŋi nca lekuma le nde ŋi?» 27Ŋaa Jezu yizigi bo maami maateende ma nde kanca buku le Njyami. Nde baani ma buku le Moyize amana nde yizigi bo abuku ma antuma-Njyami aso. 28Bo amato mpaana mpugu ye e baje bo, Jezu kuri ma kaje levuzu. 29Abalaga abuele baa yiga ba kaala nde ndi: «Sa aka bila bizi, ma mono cugu yiga le eyila, tari yiga leva ma kakulu.» Ŋaa nde se nyunuŋi nca njo ki bila bo. 30Ntini ye vi bo manci ma kaja, nde yagi lempeembe, nde mpi Njyami leve, ŋaa nde cagi, nde mpi bo. 31Ŋaa bo miizi naaŋi, bo amaya ndi wu Jezu. Ŋaa kancinci ŋaa nde nyoŋi. 32Ŋaa bo abwele yiga ba alyele ndi: «Ntini ye alyele nde bila bizi a we, ma njila ŋa ka ba yiziga nde bizi a we ampiri a nca buku le Njyami, kiigi ŋa mva mbaa nca etuma e bizi a we.» 33Ntini yoankulu yia bo asarigi ma kavuraga Jeruzaleme. Bo ato nca kangundu, bo ataniŋi antuma ba kwumu ŋa omo ali ma oju bila abuga baamo ba alwoni. 34Bo aso ŋa alwoni abwele ba ndi: «Jaajaa, Mfumu ma anyuzuga, Simon ma amono nde.» 35Alwoni abuele ba anaana bo maami ma ayiri ŋa bo ma njila, ŋaa bo ndi: «Bizi leyaa ni nde Jezu, ntini ye kabi nde lempeembe.»
Jezu amvyere njuru ŋa alwoni a nde
36Ntini ye kiigi lyele bo bwa, mono Jezu, nde-ankulu kaka cwuga kanca mpanaŋi a bo, nde kaka biga bo ndi: «Kadusu kaka bila be!» 37Ŋaa bo aso anjuru ayaani, bwogo osi bo, bo abaana mono ndi ŋaa, bo amimono oduduma woobi. 38Ŋaa Jezu ŋa bo ndi: «Be bo bwogo beema, Be jo ekemi ba ema? 39Aka bwa lekese jiala bila miili emi, lemono yo ni mi, le ciila mi, lekese mi ove ove. Oduduma akabi bila eyezi kali, ŋi be le kamono ni mi mbuuru omwo ŋi?» 40Nde dugi bwa, ŋaa nde mvyeri bo jiala bila miili e nde. 41Alwoni kiigi yiga nca kase keenini bila akimi, ŋi bo kiigi akini yalaga ndi wu Jezu ŋi. Ŋaa Jezu pizi bo ndi: «Kanca be ŋa, be ŋa kalogo ka kaja?» 42Bo ampi nde bugu le ncu le amakaa. 43Nde yagi ji ka miizi a bo. 44Amana nde vuru dugi ŋa bo ndi: «Ntini ye baanka mi bila be, mi dugi be ni, aso ma amaateende ma mi nca buku le Moyize, ŋa nca abuku ma antuma-Njyami bila buku le Pisome, maaje kaya.» 45Ŋaa mono nde kaka naana bo miizi ma kabaga oyeri ma kayuga ampiri ma buku le Njyami. 46Ŋaa nde ŋa bo ndi: «Mono maami maateende ndi, Kirisite amono mpasi, nde anyuzuga kanca baari baama kpa ma cugu le otari. 47Ŋaa ave alwoni a nde ampi baari aso ayila ncye, ma kabaana Jeruzaleme, ndi bo akaala etuma e bo, ŋaa bo anyina maami maabi. Mabuni Njyami kabologo bo. 48Ave be le lyeli ma ebiri eso maami ma ayi ma mi. 49Ŋaa mi etuma be mbuuru wo lyeli Taara mi ndi, nde aje katuma be nde. Leka nca Jeruzaleme tii katuma Njyami be mpari ye Oduduma Cece.»
Jezu mi je yulu
50Amana Jezu biri alwoni a nde ngula Jeruzaleme, ma kacu kaka tali mpugu ye ba acwolo ma Betani. Ŋaa nde sati jiala ka yulu ma kampa bo puga. 51Ntini ye kiigi mpa nde bo puga, nde nyini bo. Ŋaa Njyami ciezi nde, nde yeni yulu. 52Ma ntini yia alwoni a nde avi ma abwu ma kabwono nde, amana bo avurugi Jeruzaleme nca kase keenini. 53Antini aso bo kaka nca Njo Njyami, ŋaa bo ba kampa Njyami leve.
Currently Selected:
Luke 24: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
