Luke 23
23
Jezu li ka miizi a Pilate wo okunji a bungu le Jude
1Amana bo aso asarigi ma kaje bila Jezu mpila Pilate. 2Ka yia biri, bo aso yiga baakata Jezu maami ma oca ndi: «Bizi lema amono balaga li, letuma baari a bizi a be mabuni, bo abiza amaami a bizi a be. Nde aliga bo ma kawura lempo le mfumu kasi ka Arome wo baacwolo ma Sezare. Ŋaa ndi nde Kirisite ntuma Njyami, nde mfumu.» 3Ŋaa Pilate pizi ŋa Jezu ndi: «We ŋa okunji aJife?» Jezu kaali ŋa nde ndi: «Weankulu mbuuru wo alyele bwa.» 4Pilate ŋa amfumu a baari ba baampa ambwoŋi, ŋa lembuuru le lekiigi ŋaa ndi: «Mi kunu eka mono jaa leebi lesa balaga li, le esaga be ni abuma nde ŋi.» 5Ŋaa baari bakaselege lege ocicyezi ndi: «Nde mbuuru wo acogo baari abizi a be, mabu ndi, bo abiza maami abizi a be. Nde ŋaa ka bungu le Ngalile kasa baana. Amana nde yeni nca le Jude lwori, ŋaa le kami kiriga kunu.»
Jezu ka miizi ma Erode Atipase
6Pilate kayuga bwa, pizi ŋa baari baakiigi bila nde ndi: «Bizi a be mbuuru wu njiagi osi Ngalile?» 7Ŋaa bo akaali ŋa nde ndi, Jezu ni osi Ngalile. Ŋaa ma ntini yia mfumu a bungu kiigi Erode Atipase, nde kiigi li ka Jeruzaleme. Ŋaa Pilate amatuma Jezu mpila Erode.
8Erode kiigi nca kase keenini ma kamono Jezu. Kabila nde kiigi ma yuga ba alyele ma nde. Ŋaa nde kiigi ma abiga kaka kaana ma kamono Jezu. Erode ŋa tari ndi Jezu lubu ŋaa asa nde mpiri ye lwari. 9Nde alege nde ejugu ba ekukuna, okorogo Jezu ki kaala ŋi. 10Ŋa amfumu a baari ba baampa ambwoŋi, ŋa ayizigi angiri se ayi mpila Erode, bo yiga se ba ayina Jezu maami ma ococa. 11Erode bila aworo a nde yiga ba atuga Jezu, ŋaa avurigi ŋa nde kasebe, yia biri ye legi bo nde mfa ye yiele. Amana Erode vuru vuti Jezu mpila Pilate. 12Ŋi kabaasa bwa, kancomi Erode bila Pilate kiigi ŋa kamaŋi keenini. Okorogo ma cugu lia bo kiigi yiga ondigi.
Ave Jezu kpi
13Pilate kuzigi amfumu a baari ba baampa ambwoŋi ŋa amfumu bila baari aso. 14Nde ŋa bo ndi: «Be leya bila mi mbuuru wu, be ni nde mbuuru wo acogo baari a be! Ŋaa mi kalegi nde ejugu ŋaa, kamiizi a be, mi emono ni, be lekata nde, kabila mi kimono jaa lesa nde leebi ŋa ŋi. Eli mi tuma ni abuma nde ŋi. 15Erode Atipase se kabiza jaa ma nde kamono, yia biri ye vuta nde Jezu mpila bizi a be. Balaga li jaa ye kasa eli abuma nde kali. 16Yia biri ye ciina mini abere nde, kabere katu, amana mi tuma apisa nde.» [17Antini aso kabaasa kiza le Paake, ŋaa ave apisi bo ongeneŋe omo.] 18Baari aso yiga baata nya ndi: «Lebuma mbuuru wu! Ŋaa be le pisa bizi Barabase!» 19Barabase kaje ongeneŋe kabila nde buma mbuuru ma ntini ye juani bo eta bila baari a Arome kanca kangundu. 20Pilate avura lyele bila lembuuru lya kabila nde asanaŋa pisa Jezu. 21Okorogo lembuuru lya yiga leta nya ndi: «Komo nde yila lemaanji! Komo nde yila lemaanji!» 22Ma lenja le otari, Pilate vuri dugi ŋa bo ndi: «Jaa lembuuru wu le kasa leebi lema? Mi eka mono jaa le baabuma nde ŋa ŋi. Yia biri ye tuma mi ni abere nde, kabere katu, amana mi pisa nde.» 23Ŋaa baari bu ba aselege kata nya ndi: «Komo nde ma lemaanji!» Ŋaa bo aselegi sati ajui abo nkeri nkeri. Pilate suki ŋaa nde yiga yaligi. 24Ŋaa Pilate osi ma lemigi le elyeli lembuuru lia. 25Nde pisi bo Barabase wo alaayi bo. Ŋi alegi Barabase ma ongeneŋe, ma nde wo bumi mbuuru ma ntini ye si bo eta bila baari a Arome. Ŋaa Pilate ampa Jezu ŋa lembuuru, nde alyele ŋa lembuuru lia ndi bo asa mva lemigi lejii bo.
Ba abira Jezu ma kabuma nde
26Ŋaa ntini ye kiigi je aworo bila Jezu, bo amoni balaga lemo le lekiigi wa anguunu, nkuumu Simon. Nde kiigi mbuuru wo kangundu ka Sirene. Ŋaa aworo ba ka ba akwara Simon ma kabira lemaanji, ma kalwono Jezu bila lo. 27Bege le baari le kalwono Jezu. Ŋaa kanca bo kiigi ŋa bege le akaazi, baakiigi lila ma nya Jezu. 28Jezu kakalaga ma kacu kali akaazi baa, nde ŋa bo ndi: «Ye akaazi a Jeruzaleme ba, lebira kalila ma mi, ŋaa lelila ma be-ankulu bila baana a be.» 29Kabila ntini ye je kaya eli ba alyele ndi: «Kase ŋa akaazi ba enkuma, bila baabizi sa ovaligi.» 30Ŋaa baari yiga alyele ŋa ekuru ndi: «Leyiniŋa bizi! Ŋaa angala ndi: Lefuga bizi! 31Okorogo aka baasa bwa, ma oti wo obizi, bunu baasa oti wo okayakaya?» 32Aworo ayi bila epira ekima jyele ma kabuma jo bila Jezu.
Aworo akomi Jezu bila ancere yila lemaanji
33Bo ato biri ye baacwolo ma: «Kabwa ka ocu.» Bo akomi Jezu kayila lemaanji ŋa epira ejwele bya. Omon ma lemaanji ka kwogo ka kalumu ka Jezu, ŋaa buga lemo ma kwogo ka kabogo ka Jezu. 34Ŋaa Jezu bwoni ndi: «Taara bologo bo kabila, bo akiya maami ma maasa bo ŋi.» Aworo baa ayagi nde amfa yiga ba anjuuna, amana bo akabi mon kampaniŋi a bo. 35Baari aki ma otele bakakese maami makiigi yira maa. Ŋaa amfumu ba aJife bakasebe Jezu, ndi: «Nde ni vuzugi baari, ŋaa aka nde Kirisite wo ntuma Njyami, ŋi nde kavuzuga nde-ankulu se.» 36Ŋaa aworo se asebi nde, bo ayi ciina mpaana nde, bo amvyeri nde anganga aŋayi ma baacwolo ma vinengere. 37Ŋaa bo ndi: «Ŋaa aka wo mfumu aJife, vuzuga njuru a weankulu!» 38Kayila ocu a nde amaateende ampiri kayila kakari ndi: «Wu bu okunji aJife.» 39Opira omo nca bo wo alegi ma lemaanji katuga Jezu ndi: «We ni Kirisite ntuma Njyami ŋa ni vuzuga njuru a weankulu bila e bizi.» 40Ŋaa buga le opira lengulu yiga ayuuma nde ndi: «Aa we se! We yiga akanyima Njyami ŋi, wo eli ama sisa ma lemigi loankulu mva nde. 41Embiza we esisi yemiŋi asisa kabila bizi a we le ewura maami maasi bizi a we. Ŋaa nde jaa leebi le kasi lema?» 42Amana nde ndi: «Ee Jezu ntini ye ya we nca omfumu o we, wo barigi mi.» 43Jezu kaali nde ndi: «Mi elyele jaajaa ni, lubu bizi a we lenyunuŋa nca kasi keeve ka Njyami.» 44Tari kiigi yiga yila ocu, vuzu oyili kanca kasi kaso, ŋaa lempiibi lia lebigi tii atari atari baakolo cugu. 45Kalembe keenini kama ataana ka yulu kanca Njo Njyami kabaagi ka amvunuŋu. 46Ŋaa Jezu ti nya ma jui leenini ndi: «Ee Taara, mi evuta oduduma mi kanca jiala e we.» Nde kamana lyele ambila maa, nde kpi. 47Mfumu aworo a Arome kamono jaa le levi lya, nde mpi Njyami leve ŋaa nde ndi: «Jaajaa mbuuru wu ŋa kiigi mbuuru woove!» 48Baari aso baayi ma nkundu baa bakakese ka nkuumu kya, bo amoni jaa le lemaaya. Ŋaa bo aso ka avuruga bo anjo, yiga kanca nya. 49Andigi a Jezu aso, tii se akaazi baasa wa bila nde Ngalile, yiga kaka kalala, ma kakese maami mama sa.
Jozefe alege kabiima ka Jezu nca muuma
50Kiigi ŋaa balaga lemo nkuumu a nde Jozefe, nde kiigi ŋa katomi nca amfumu aJife. Nde kiigi kave ka mbuuru, nde kiigi tele. 51Balaga lia kiigi osi kangundu ka aJife kacwoli ma Arimate. Nde kiigi maalege lila ma eyi ba omfumu o Njyami. Nde kiigi bizi maami ma kuri abuga baamo ba amfumu aJife maasi. 52Jozefe yeni mpila Pilate ma kalaa njila ma kayaga kabiima ka Jezu. 53Amana Jozefe ciezi kabiima kakali ma njuru a lemaanji, nde kuri kanca kalembe ka mvunu. Ŋaa nde legi nca muuma wo amacuma nca kakubu ka kele. Ŋaa muuma yia kiigi akini jiiga mbuuru ŋi. 54Kiigi ka ekikolo ma ntini ye va tari ka abana cugu le baawuuma. 55Akaazi baasi wa bila Jezu Ngalile baayi bila Jozefe, bo akesi muuma ŋa lemigi le amalege kabiima ka Jezu nca kwa. 56Amana bo avurugi anjo a bo ŋa bo ayeni sa amwomi bila ananase#23.56 Ka Ezerayele aki sa amwomi bila ananase ma kakiele ebiima. Lekese nca Mareke 14.8. . Ŋaa bo ato cugu le kiza lia, bo awuumi#23.56 Lekese nca Nombere 20.10, Deterenome 5.14. .
Currently Selected:
Luke 23: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
