Luke 22
22
Juda mi tege Jezu
1Kiigi emi siila ecugu nceti, ma kato kiza leba aja mpeembe ye kaami anganga ma maaluula ampeembe. Kiza lya kacwolo ma Paake #22.1 Paake: Cinda le aJife ntini ye baraga bo ecwugi e baana ba Ezerayele ka kasi ka Ezipite, ntini yia, Njyami tumi ntuma nde o yulu ma kaya buma baana acomi ba abalaga kanca Ezipite. Ŋaa ntini yia baana ba Ezrayel kiigi amakila atogi lebaana ba endombo ma edubugu baa anjo. Ŋaa ntuma yulu yiri kayila anjo.. 2Amfumu a baari ba bampa ambwoŋi bila ayizigi angiri ba kasaga ncali ma kabuma Jezu. Okorogo bo kiigi ŋa bwogo ba lembuuru. 3Ŋaa mono Sata ka kanyunuŋa nca otuma Juda wo acwoli ma Izekariyote. Nde kiigi nca antuma ba kuumu ŋa bwele. 4Mono Juda ka kaje kura ncuumu bila amfumu a baari ba baampa ambwoŋi, ŋa amfumu abaari ba bakiele Njo Njyami, ma lemigi le atege nde Jezu ma oyeri eli lembuuru lekiyaaŋi. 5Amfumu baa yiga nca kase keenini, ŋaa bo akuri ndi, bo baampa Juda ampara. 6Juda yaligi, ŋaa nde yiga asaga ncali ye tele ye akaba nde Jezu, mabuni ncanke lembuuru leyaa.
Jezu atuma alwoni a nde ma kasa kiza le Paake
7Ma ntini ye kiza leba aja ampeembe ye kaami anganga yia, kamaka cugu leeli kwono ŋa kwono ye buma lyele mwana kandombo ma kaja. 8Ŋaa Jezu tumi Pyere, ŋa Jan nde ŋa bo ndi: «Leje laama bizi a be biila e Paake, mabuni bizi a be leja.» 9Bo apizi ŋa Jezu ndi: «We asaga ni bizi le laama ka kunu?» 10Nde ŋa bo ndi: «Leyuga mi, ntini ye anyunuŋa be nca kangundu be le vunuŋa bila balaga lemo le le ma abira ongele anja. Le lwono nde tii nca njo ye nyunuŋa nde.» 11Ŋaa be le lyeli ŋa ngaa njo ni, Mfumu apiza ndi, biri ye ja nde Paake bila alwoni a nde kakunu eli? 12Mfumu a njo amvyere be katini keenini ka yulu eli ko ŋa biibi eso. Yia biri ye laama be biila. 13Alwoni se ayeni, okorogo bo amoni maami ma lemigi le lyeli Jezu bo, ŋaa alaami biila e Paake.
Biila e Mfumu
14Tari le kaja leto, Jezu bila antuma a nde aki manci aji. 15Nde ŋa bo ndi: «Mi kiigi ma nkaana nca otuma mi oso ma kaja kiza le Paake li bila be, se ŋa emoni mi mpasi. 16Okorogo mi elyele be ni, mi eka ma vura ja Paake tii ŋa eyi e kiza lia kanca omfumu o Njyami ŋi.» 17Ŋaa nde yagi mbaza mali a mburu a vinye, nde bwoni ma kampa Njyami leve, ŋaa nde ndi: «Leyaga mbaza yi, be mbuuru ŋa mbuuru kanyua. 18Kabila mi elyele be ni, mi yiga eka ma vura nyua mali a mburu a vinye, tii kaaya omfumu o Njyami ŋi.» 19Amana nde yagi lempeembe, nde kamana bwono ma kampa Njyami leve, nde cagi bo lo ma abugu, ŋaa nde mpi bo, ŋaa nde ndi: «Yiŋa njuru a mi, emi ye mi mpa ma be, ŋaa lesa bu ma kabaraga mi.» 20Amana kaja, nde si lemigi loankulu lia ma mbaza mali, ŋaa nde ndi: «Mbaza mali yi kamaka Obuga ba onyarigi o Njyami bila be, kabila togi le mi le macolo ma be. 21Ŋaa lemoo mbuuru wa tege mi, oli manci kaŋa aja bila mi. 22Siele Mwana Mbuuru akpa mva lemigi le kani Njyami. Ŋaa ewuani mbuuru wo atege nde wua.» 23Ŋaa alwoni yiga ba soso ejugu ma kasaga mbuuru nca bo wo asa sila jaa mva yia.
Wo vuli abuga kanca alwoni na?
24Kanca mpanaŋi antuma a Jezu ekemi beenini eyirigi, maka yaa mbuuru wo vuli abuga. 25Ŋaa Jezu ŋa bo ndi: «Amfumu ba esi ŋa onkani yila baari ba akyele bo. Okorogo bo kasaga ndi, baari acwoli bo ma ancaleve. 26Be lebizi mva bo kasa. Ŋaa mbuuru wo ovuli abuga kanca be ave yiga mva mwana wo buzu, ŋaa nga onkani kanca be ave yiga mva ojanji. 27Kanca baari abuele baa, wo ovuli buga na? Mbuuru wo aya mpa biila sikali wo baampa biila? Ki mbuuru wooli manci wo baampa biila ŋi? Okorogo mi kanca be mi ndi mva onjanji. 28Be baari ba lesi mpana bila mi, ntini ye moni mi ampasi. 29Ma lemigi loankulu lempa Taara mi omfumu, lemigi loankulu lia le empa mi be se omfumu. 30Ŋaa ntini ye yaga mi omfumu, be leja, be lenyua bila mi, ŋaa be leka yila ambara ma kampama akaga ma Ezerayele, ma kuumu ŋa bwele.»
Jezu ndi Pyere atuna nde
31Ŋaa Jezu ŋa Simon Pyere ndi: «Ee Simon, Simon sa oyeri, kabila Sata alaa njila ŋa mi, mabuni nde kasege we mva ka ba sege mburu nca ebu. 32Ŋaa mi ma abwono ma we, mabuni lila le we kiwa ŋi. Ŋaa ntini ye yavuruga we mpila mi, we mpi andumu a we kawasi.» 33Pyere ŋa nde ndi: «Mfumu kayi biri yiga se alyele ndi, mi eje ongeneŋe sikali leku, mi eje bila we.» 34Jezu kaali ŋa nde ndi: «Pyere, mi elyele we ni, lempiibi le lubu ŋa ekwogi ecuzu, we mi mana tuna mi nja tari, mini we kiyaa mi ŋi.»
Eta baamoo antuma a Jezu
35Ŋaa Jezu vuri wobi ŋa alwoni a nde ndi: «Ntini ye nciini mi be, ampara kiigi kali, se mpye ye baje ojia kali, se akorogo kali, be le kaami se kalogo kamon?» Bo akaali ndi: «Se kalogo ka lekaami kali.» 36Nde seligi dugi ndi: «Ee yemiŋi, ŋaa yiga mbuuru wooli ŋa ampara, kayaga mon, se ngaa mpye kayaga, ŋaa mbuuru wo okaami ompaara woonini, nde tegi lengoyi leela le nde, ŋaa nde suumi ompaara woonini. 37Kabila amaateende kanca buku le Njyami ndi, baari amayaga nde ma opira. Ŋaa maami maateende antuma-Njyami ma mi, maaje kayaa.» 38Alwoni ŋa Jezu ndi: «Mfumu! Mono empara jyele ebi.» Ŋaa nde kaali ŋa bo ndi: «Lesuga!»
Jezu abwono kayila kakuru ka ba acwolo ma elivye
39Jezu cuugi ma kaje kacu ka kakuru ka ba cwolo ma elivye. Ma lemigi le abaana sa nde. Ŋaa alwoni a nde alwooni nde. 40Nde kato biri yia, nde ŋa bo ndi: «Lebwono mabuni ncanke ntini ye miga kapundu keebi be, be levi nca maami maabi.» 41Jezu ciegi nca bo, ŋaa biri ye kiigi nde ŋa bo, katini ka kiigi nde ŋa alwoni a nde mva lemigi leka laayi kaba cuna kele. Ŋaa Jezu vi ma abwu ma kabwono. 42Nde alyele ndi: «Taara, aka we jii, cieze mi mpasi yeenini yi. Ŋaa se ke bwoni mi bwa, sa maami ma lemigi lejii we, ŋaa ka ma lemigi le jii mi ŋi.» [43Ŋaa mono ntuma Njyami o yulu ka kaya mpa nde kawasi. 44Obwogo osi nde, Jezu yiga kabwono tuga tuga, ŋaa njanaŋa nde ekirigi mva enkembege e togi, ba kava ma ncye]#22.44 Olwo wo bila kanca abuku maamon onyaŋa.. 45Nde kamana bwono bwa, nde temiŋi ma kaje mpila alwoni a nde, ŋaa nde taniŋi bo ama apwo tolo, kabila etuma ebo ema abya. 46Ŋaa nde ŋa bo ndi: «Be mema leca tolo? Lenyuzuga ŋa be lebwono, mabuni be lebagi mpari ntini ye kapundu keebi ka keya miga be.»
Ekwari ba akwari Jezu
47Jezu kiigi kini alyele, mono njiimi le baari ka leya. Juda kaya ka levuzu le bo. Juda kiigi nca antuma a kuumu ŋa bwele a Jezu, nde yi nciina tuga ŋa Jezu ma kaporo nde. 48Ŋaa Jezu pizi nde ndi: «Ee Juda! We poro Mwana Mbuuru, ma kakaba le nde?» 49Alwoni a Jezu amono lemigi lekiigi ya maami, bo apizi ŋa nde ndi: «Ee Mfumu! Bizi le ebuna kayaga empara beenini ma kajuana bila jo?» 50Ŋaa omo nca bo ocagi oyiga a mfumu baari baba ampa ambwoŋi kanca Njo Njyami cu le kwogo le kalumu. 51Ŋaa Jezu ndi: «Lesuga, lebira labilabi kaje!» Ŋaa nde ciili balaga lia cu, ŋaa nde salagi nde lo. 52Amana Jezu pizi ŋa amfumu a baari ba baampa ambwoŋi bila amfumu a baari ba bakiele Njo Njyami, ŋa amfumu ba aJife baayi kwara nde ndi: «Be kiigi yiga kaya mpila mi, bila ŋa empara beenini ŋa amfumuŋa, mva ni mi kiigi yiga opira? 53Okorogo ecugu eso mi kiigi bila be nca Njo Njyami, ŋi be leki kwara mi ŋi. Ŋaa ntini yi e be, ntini emito ye janja mfumu a amaami maabi.»
Pyere atuna Jezu ka miizi a baari
54Bo amana kwara Jezu, bo abiri nde nca njo mfumu a baari ba bampa ambwoŋi. Pyere kiigi kalala ŋaa nde kalwono bo. 55Bo avugi mbaa ka otuma lebugu ma kayoro, ŋaa Pyere yi ka manci kanca bo. 56Ojanji omo wo okaazi, kamono Pyere manci kapaana mbaa, nde seligi yimiŋi nde, ŋa okaazi wua ndi: «Balaga li se, lebaaka bila Jezu.» 57Ŋaa Pyere tuni ndi: «Kali okaazi wu, mi kiyaa nde ŋi!» 58Ebiga nceti, okima moni Pyere ndi: «Ŋaa we se ni olwoni Jezu woomo.» Ŋaa Pyere ŋa balaga lya ndi: «Kali mi ka olwoni nde ŋi!» 59Tari lemo leyira, okima se yi vuru selegi jizigi ndi: «Jaajaa, wu se baaka bila Jezu, kabila nde osi Ngalile!» 60Pyere kaali ndi: «Mi eka yuga se jaa ye esaga lyele we ŋi.» Kancinci kawobi nde ŋaa, ncuzu kwogi. 61Ŋaa mono Mfumu kaka kalaga ma kakese Pyere. Pyere ama baraga ntini ye wobi Mfumu bila nde ndi: «Lubu ŋa ekwogi ecuzu we mi tuna mi nja tari.» 62Pyere cuugi yeni njii, ŋaa nde yiga alila sigi sigi.
Aworo atugi Jezu ŋa bo aberi nde
63Baari ba akwari Jezu, ba kasebe nde, ŋaa bo ba kabere nde. 64Bo ba kaduba nde kalii, ŋaa bo ba kalege nde ejugu ndi: «Ŋaa we samaŋa bizi mbuuru wo abere we na?» 65Ŋaa bo yiga ba selege tuga nde bege le etugi ba osizi.
Jezu li ka miizi ma apami ba aJife
66Vuzu oca, oju wo amfumu ba aJife, ŋa amfumu a baari ba baampa ambwoŋi kanca Njo Njyami bila ayizigi angiri avunuŋi. Ŋaa bo atumi baari ma kaya bila Jezu ka miizi a bo. 67Ŋaa bo apizi ŋa Jezu ndi: «Ma lyele bizi aka we Kirisite ntuma Njyami.» Jezu akaala ndi: «Lubu mi elyele be, be leka yalaga ŋi 68Ŋaa mi elege be ejugu, be leka jia ka kaala ŋi. 69Ŋaa yiga ma ntini yi, mi wo Mwana Mbuuru eka manci ma kwogo ka kalumu ka Njyami a mpari.» 70Ŋaa bo aso yiga ba alyele ndi: «We ŋa njiagi Mwana Njyami?» Jezu akaala ŋa bo ndi: «Beankulu baari ba le lyeli, ŋaa jaajaa mi nde!» 71Ŋaa bo ndi: «Ŋaa bizi ŋa jaa ni mbuuru okima kalyele bizi? Kabila bizi ankulu lemimana yuga ambila ma awi ma onyua nde-ankulu.»
Currently Selected:
Luke 22: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
