Luke 17
17
Jezu ayieze alwoni a nde
1Jezu ŋa alwoni a nde ndi: «Amaami ma ma atuma baari makasa maami maabi maka bira kaama ŋi, ŋaa ewuani mbuuru wo aya ma katasa le abuga mabuni bo ava nca maami maabi. 2Nkala ntanta akuri nde tagi ma nkii ŋaa acuni nde nca oduba woonini, ŋaa ka ni nde tasi onkere omo nca bo, makasa amaami maabi ŋi. 3Ŋaa lesa oyeri! Aka ndumu a we mi sa we jaa leebi, lyele bila nde, ŋaa nde kaya ncozo nde, bologo nde. 4Ŋaa nde kasa we maami maabi nja ncaami ma oyiila cugu omo, ŋaa nde kayavuruga mpila we nja ncaami ma kalyele we ndi: Maami maasa mi we abi, bologo nde.»
Jezu alyele ma lila
5Antuma ŋa Mfumu ndi: «Mpa bizi lila le levuli li.» 6Ŋaa Mfumu ŋa bo ndi: «Aka be ŋa kelila mva le mburu lejulu, be lebuna kalyele ŋa oti wu ni: Cieze ekaŋa ka ŋa we je piga jo nca oduba woonini, ŋaa oti wua anyiima be.»
Lejanja bila otori
7«Ŋaa aka mbuuru omo nca be ŋa oyiga, wo akuna nde anguunu sikali nde acuga eva e nde, ŋaa aka nde mi wa anguunu, nde kasa alyele ŋa ojanji ndi, sa aja? 8Kali, nde kalyele ŋa nde ndi: Laama mi biila, ŋaa we kaala amfa, we lege mi biila mi nja, mi nyua. Ŋaa e we ntini eto, we se ja, ŋaa we nyua. 9Nde akayuuza oyiga wua, ma lemigi lesi ojanji wua maami a nde ma katumi nde kasa ŋi. 10Mva ka li be, aka be lemimana sa maami aso ma atumi Njyami be kasa. Lelyele ni bizi ayiga akali akali, bizi lemimana kasa janja le atumi bizi kasa.»
Jezu asalaga anga ebila
11Ntini ye Jezu ye ka kiigi je kacu ka Jeruzaleme, nde yiri ka avunuŋu ma bungu le Samari bila le Ngalile. 12Nde kato cwo mpugu mon, mono anga ebila kuumu ka baya mpila nde. 13Ŋaa bo aki kalala, ŋaa bo ati nya ndi: «Aaa Jezu, Mfumu! Yamaŋa bizi.» 14Jezu kamono anga ebila baa, nde ŋa bo ndi: «Leje be le mvyere anjuru a be ŋa baari ba baampa ambwoŋi kanca Njo Njyami.» Ŋa evi e bo ma njila, bo akese bu, bo amimana wuuma. 15Ŋaa omotu nca bo kamono ndi nde mi wuuma, oyi vuruga, ŋaa nde tesi jui ma kampa Njyami leve. 16Nde vi kancina miili e Jezu ŋaa nde legi kalii nca ncye. Nde mpi nde leve, ŋaa mbuuru wua kiigi osi Samari. 17Ŋaa Jezu ndi: «Mi bo ni kuumu saligi, ŋaa abuga baamo awoa e bo? 18Kangula jya li, se mbuuru okima kanca bo wo barigi makaya mpa Njyami leve kali?» 19Ŋaa Jezu ŋa mbuuru wo Samari wua ndi: «Temeŋe, we abuna je, Njyami mi salaga we kabila we ma yalaga.»
Eyi ba omfumu o Njyami kanca mpanaŋi a be
20Afarizi baapiza ŋa Jezu ndi: «Omfumu o Njyami ma ntini ma bo ya?» Ŋaa Jezu akaala ŋa bo ndi: «Omfumu o Njyami bo kaya mva kalogo kaba mono ŋi, 21ba kalyele ndi: Bo eba kaŋaa ŋi, sikali bo eba ka ku ŋi. Okorogo omfumu o Njyami o mi mana ya oli kanca mpanaŋi a be.»
22Amana Jezu ŋa alwoni a nde ndi: «Ntini ye je kaya eli be lejia kamono Mwana Mbuuru se ma cugu lemo, okorogo be le kamono nde ŋi. 23Ma ntini yia baari ba lyele be ndi: Nde li ka kunu, sikali: Nde li ka ku. Ŋaa be lebizi kaje, be lebizi se kabira nciini kali akali.» 24Kabila cugu leya Mwana Mbuuru leka mva kawaa ka keya asizigi, ŋaa kafii ka nde ke ciege ncuo ŋa ncuo yulu yeemon. 25Keeyi ejaa lya ave Mwana Mbuuru si baana mono mpasi yeenini, ŋaa leca le lubu li le ebele nde.
26Maami moankulu ma ayiri ma ntini ye kiigi Nowe kalakala, ma je kaya ma cugu le eya Mwana Mbuuru. 27Baari ba kaja, ba kanyua, ba kabala, ba kampa baana a bo ma abaala, tii ntini ye nyunuŋi Nowe nca asua. Kasi kaso kalindi ŋaa baari asiso akpi. 28Sikali ye ka mva ntini ye Lote, baari ba kaja, ba kanyua, ba kasuuma, ba katege, ba kakuna, ba kasa ocuyi. 29Ŋaa cugu le Lote leka cyegi kangundu ka Sodome, Njyami ciini akele bila ofuru wo mbaa, fi yulu mva mvula ŋaa baari baa aso akpi. 30Cugu leya mvyere Mwana Mbuuru njuru ŋa baari, ye ka osumbu nde-ankulu wua.
31«Ma cugu lya, mbuuru wo aka kayila#17.31 Mpila baari a Ezrayel, bo ba kayuga anjo a bo ŋi, ŋaa bo kacua anjo pala pala kabila baari kiigi ba buna ma kakuma yila anjo ma kamogo. njo akamavura baga oyeri ba ka suraga, ma kanyunuŋa nca njo nde ma kayaga biibi ŋi. Mbuuru wo aka kanca nguunu kimasaga kavuruga njo nde ŋi. 32Lebaraga jaa le emoni okari a Lote#17.32 Okari a Lote kesi mbiza ŋaa Njyami sisi nde. Lekese nca Genese 19.26. 33Mbuuru wo akaana ma kakiele osumbu wo ba asa nde, akpaa. Ŋaa we asaga ka kpaa ma nkii a mi, nde abaga omuon. 34Ee, mi ŋaa jaajaa elyele be ni, ma ntini yia, baari bwele ba baaka kayila ntari mon, Mwana Mbuuru ayaga omo, ŋaa omo asiila 35Ŋaa akaazi bwele ba basiga biibi, baayaga omo, ŋaa woomo asiila. [36Baari bwele ba baaka nca nguunu mon, omo baayaga ŋaa woomo baanyina#17.36 Olwo wu ba kamono nde nca bege le abuku akaala ŋi..»] 37Alwoni baapiza ŋa Jezu ndi: «Ee Mfumu, maami maa kakunu ma yira?» Ŋaa Jezu akaala ŋaa bo ndi: «Biri eka ebiima ye ekuga enkpaaga.»
Currently Selected:
Luke 17: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
