Luke 18
18
Ngana ye nkani woobi bila okaazi okuulu
1Amana Jezu vuri ti alwoni a nde kasya kamo ma ka mvyere bo ndi, ave antini aso be lebwoni, ŋaa be lebizi mbiza kavuruga. 2Nde ŋa bo ndi: «Nca kangundu kamon, kiigi ŋa nkani omo eli nde akanyima Njyami ŋi, ŋaa nde ŋa mbele baari. 3Nca kangundu koankulu kia, kiigi se ŋa okaazi omo wo okuulu, amono akama kaje mpila nkani wua, ma kalyele ŋa nde ndi: Mi ŋa mbuuru eli akamono jiizi le mi ŋi, yamaŋa mi ma kampama jaa li. 4Ŋaa antini aso nkani wua amono abiza ma kayamaŋa okaazi wua, ŋaa nde amono akama kabiza. Amana nde ndi: Mi eka nyima Njyami ŋi, mi ŋa mbele baari. 5Ŋaa eli okaazi wu aka ma kakolo mi, ave mi mpa nde mpyeme. Ma buni nde kabiza mi kama weele antini aso.» 6Ŋaa Mfumu avura lusa ndi: «Be ŋaa leyugi yemiŋi yemiŋi lemigi lesi nkani woobi wua? 7Ee! Ŋaa Njyami akampa baana a nde, ba baacwolo nde mpiibi bila muyi mpieme ŋi? Njyami kasa abaana liriga ma kampa bo mpyeme? 8Mi jaajaa elyele be ni, nde kasa waa ayamaŋa bo. Ŋaa ka aya Mwana Mbuuru, nde avura tanaŋa baari ba alegi lila ma Njyami yila ncye?»
Ngana ofarizi bila ngaa lempo
9Jezu vuri ti ngana kima, ma baari baamo ba eli bo amono ndi bo tele ka miizi a Njyami, ŋaa bo kamono abuga baari ba oca. Nde ndi, 10«Cugu lemo balaga le ofarizi omo bila nga lempo omo ayeni ma kabwono nca Njo Njyami. 11Ofarizi ki ma otele kabwono nca otuma nde ndi: Ee Njyami a mi! Mi empa we leve kabila mi ka mva abuga baamo ŋi, bo asara, bo ka tele ŋi, bo baasa ncuuma, ŋaa mi empa we leve kabila mi ka mva nga lempo wu ŋi. 12Mi esa eyiila enjala jyele nca ecugu encaami, mi empa bugu le okuumu ma biibi eso ba ebaga mi. 13Nga lempo oki kabiza, nde kigii se njala ka tese miizi a nde ka yulu kali. Ŋaa nde amono aberege ntulu ma kampa akolokolo, ŋaa nde ndi: Njyami a mi, mono mi kerigi, mi mbuuru wo esa maami maabi.» 14Jezu alusa ndi: «Ee! Mi elyele ni nga lempo wua kaka yeni njo nde ŋaa, Njyami mi mana bologo maami a nde maabi, ŋaa ka ma ofarizi ŋi. Okorogo mbuuru wo asaga kavula abuga Njyami ampa nde biri ye mbiza. Ŋaa mbuuru wo asaga yaga biri ye mbiza, Njyami asuuza nde ka biri ye vuzu.»
Jezu ayamba baana ba buzu
15Baari ayi bila baana ba abuzu mpila Jezu, mabuni nde kalege njyala e nde, ma kabwono ma bo. Alwoni a Jezu amono bwa, bo yiga ba afala bila baari baayi ŋa baana baa. 16Ŋaa Jezu ŋa baari baa ndi bo aya nciina bila baana mpila nde. Ŋaa Jezu ndi: «Lenyina bo aya mpila mi, lebira bo kaliga. Okorogo omfumu o Njyami oli ŋa baari baali mva baana ba abuzu. 17Ee, mi ŋa jaajaa elyele be! Aka mbuuru kabiza yalaga omfumu o Njyami mva mwana wo obuzu, se evuli, nde kibuna ka nyunuŋa nca omfumu baa ŋi.»
Ngana nga kabaga
18Mfumu aJife omo kayuga bwa, nde pizi ŋa Jezu ndi: «Mfumu woove wu, mi bunu esa ma kabaga omuon ba obu-obu?» 19Jezu akaala ŋa nde ndi: «We meema acwolo mi ma mbuuru woove? Se mbuuru woove kali, kangula Njyami otu. 20We ni yayi angiri a Njyami, ŋaa mo ma alyele ndi: We bizi ncuuma kasa, we bizi mbuuru kabuma, we bizi osara kayuba, we bizi opami ocuba kasa ma abuga, nyima taara we bila nguugu a we.» 21Mbuuru wua kaali ndi: «Mi kasa baana kanyima maami maa, mi kiigi kini obuzu.» 22Jezu kayuga bwa, nde kaali ndi: «Ŋaa emi siila we kalogo kamo ma kasa. Je tege kabaga ka we kaso, ŋaa we kaba afuga ampara ma, mabwa Njyami kampa we wura leenini ka yulu. We amana sa bwa, ya, we lwono mi.» 23Ŋaa mbuuru wua kayuga bwa, nde si nya, kabila nde ŋa kabaga keenini. 24Jezu kamono ndi mbuuru wua mi sa nya, nde ŋa baari baali kaŋaa ndi: «Iiin! Ma baari baali ŋa kabaga, ŋa mpasi ma kanyunuŋa nca omfumu o Njyami nda. 25Okorogo mbuuru wooli ŋa kabaga keenini vuli-vuli mpasi ma kanyunuŋa nca omfumu o Njyami, ŋi ka nyama woonini#18.25 Nyama woonini “chameau” Wo aJife. ma kanyunuŋa nca njila ye sori ŋi.» 26Baa kiigi yuga Jezu ba kalyele ndi: «Ŋaa yiga mbuuru wo abuna kavuuga na?» 27Jezu akaala ŋa bo ndi: «Maami maali ŋa mpasi ma baari omuon, ŋa Njyami mpasi kali.» 28Pyere ŋa Jezu ndi: «Ee Mfumu! Ŋaa ma bizi ba le ma nyina maami ma baasa bizi, ŋaa le ma alwono we?» 29Jezu akaala ndi: «Mi ŋa jaajaa elyele be, aka mbuuru mi nyina njo nde, okari, andumu, nguugu a nde bila taara nde, sikali baana ma omfumu o Njyami. 30Nde abaga wura leenini kanca omuon o nde yila ncye. Kayila ŋaa nde aje kabaga omuon ba obu-obu kanca omfumu o Njyami baba oya.»
Jezu alyele ma leku bila enyuzigi e nde
31Jezu yagi antuma a nde akuumu ŋa bwele, nde ŋa bo ndi: «Lemono bizi a be ŋa Jeruzaleme lekuma. Maami aso ma dugi antuma-Njyami ma mi wo Mwana Mbuuru, maaya. 32Okorogo ba akaba nde ka jiala e baari ba akini yalaga Njyami ŋi. Baa baasebe nde, bo ba atuga nde, bo ba acuta nde antayi. 33Bo ba akpala nde ekasi, bo baabuma nde. Ŋaa cugu le otari, nde anyuzuga.» 34Ŋaa alwoni akiyuga mbari yia ŋi, ma bo mbari yia kiigi ŋa mpasi ma kayuga. Bo akiyuga maami ma kiigi lyele Jezu bo ŋi.
Jezu asalaga mbuuru omo eli miizi kali
35Jezu aciina mpaana Zeriko. Kaŋaa kiigi ŋa mbuuru omo manci ma ofunuŋa njila, wo kiigi laa ampara. Ŋaa mbuuru wua kiigi miizi kali. 36Nde kayuga lembuuru leyira, nde pizi ŋa baari ndi: «Jo ema?» 37Baari ba akaali ŋa nde ndi: «Nde ni Jezu o Nazarete ayira.» 38Ŋaa nde ti nya ndi: «Ee Jezu wo mpabigi a Davide! Yamaŋa mi.» 39Baari baakiigi je ka levuzu le mbuuru eli miizi kali, ba kayuuma nde ndi: «Aa kapi ŋa!» Ŋaa mbuuru oli miizi kali wua, seligi tesi jui ndi: «Mpabigi a Davide, yamaŋa mi!» 40Ŋaa Jezu sugi, ŋaa nde ŋa baari ake baakiigi kanca lembuuru lia ndi: «Leya bila nde mpila mi. Ŋaa mbuuru wo kaami miizi wua kato mpaana Jezu.» Jezu pizi nde ndi: 41«We asaga ni mi sa we kama?» Mbuuru wua ŋa nde ndi: «Mfumu mi esaga ni mi mono.» 42Ŋaa Jezu ŋa nde ndi: «Mono, lila le we le mi vuzuga we.» 43Kancinci ŋa nga miizi kali wua, miizi a naaŋi mva ka abaaka nde kala. Nde lwono Jezu ŋa nde ndi: «Lekuma le Njyami!» Lembuuru lya lemono bwa, bo se ampi Njyami lekuma.
Currently Selected:
Luke 18: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
