Ngalate 2
2
Poole bila antuma ankima
1Ŋaa esibi ba enkuumu ŋa ena eyira, mi vurigi Jeruzaleme bila Barenabase, mi yagi se Tite bila mi. 2Mi vurigi kabila Njyami kiigi ma lyele mi ma kasa lo. Ka Jeruzaleme, kanca oju o baari ba amaakuga ma ayizigi, mi mvyeri ŋa amfumu ba ayaligi Ncya Yeemve ye wobo mi ŋa baali ka aJife ŋi. Okorogo, mi ki jya ni osala o mi bo yiri bila lubu ki nywoŋo ŋi. 3Ŋaa Tite wo kiigi bila mi, ŋa nde kiigi nGereke, aki ciniŋa se nde ma mpari ma kasa ncazi ŋi. 4Bwa njwori ma andumu baabi, ba ayi kanca mpanaŋa bizi mva anywon. Bo kiigi ayi ma kamono osumbu eli bizi yiga lema avuzuga ma Kirisite Jezu. Bo kiigi asagi ma kavuta bizi ayiga. 5Ŋaa bizi le ki nyina bo ma kasa lo ŋi, se ntini mon, mabuni le kyele ma be asisyele ma Ncya Yeemve.
6Ŋaa ma amfumu ba ayaligi eki, be baaka bo, ekiwuana mi ŋi, kabila Njyami ombayi kanca mpanaŋa baari kali, bo aki lusa kalogo kayila osizigi wo ewobo mi ŋi. 7Kali, bo amoni ndi Njyami ma atuma mi ma kampa mbari ŋa baali ka aJife ŋi Ncya Yeemve, mva keetiini nde se Pyere ma kampa mbari ŋa aJife. 8Kabila Njyami kiigi osi osala ma mi wo ntuma esi e nkima, mva kasi nde Pyere ntuma wo aJife. 9Jake, Pyere bila Jan kiigi ayagi bo mva amfumu ba Okuga. Ŋa yemiŋi, bo, bo ayayi puga le Njyami le kasi ma mi. Bo apori mi bila Barenabase, ma kaliimi ka ovunuŋi. Bizi kiigi leje mpila baali ka aJife ŋi, ŋa bo, bo kiigi baje mpila aJife. 10Bo apizi bizi ma kabaraga ma afuga#2.10 Ayaligi ba afuga ba aJife ka Jeruzaleme. , emi keesi tata bila otuma omo.
Ka Antiyoce, Poole ayieze Pyere
11Ŋaa ntini ye yi Pyere ka Antiyoce, mi ki kiriga nde ka ovuzu o baari ŋi, kabila nde kiigi ncozo bi. 12Okorogo, keebani ya baari ake beetumi Jake, Pyere kiigi ja bila andumu ba kiigi ka aJife ŋi. Nde si bwa kabila nde kiigi ŋa obwogo ma baari ba kiigi selege lyele ndi ave ama sa bo ncazi. 13Andumu aso baamo baali aJife kiigi abi se mva nde, ŋa eki ebo beebi se ejiimi Barenabase! 14Ŋaa mi moni ni bo baaka je tele ma lemigi le sisyele le Ncya Yeemve ŋi. Ŋaa mi lyeli ŋa Pyere ka osu o baari aso: «We, we Jife, we kaka ma lemigi le baali ka aJife ŋi, ŋa ka ma lemigi le aJife ŋi. Meema we asaga katiina baali ka aJife ŋi ma kaka mva aJife?»
AJife bila baali ka aJife ŋi ami vuuga ma lila
15Bizi, bizi kamaka aJife ba lekula, bizi ka baari ba esi ekima ŋi eli ba acwolo ndi «Anga maami maabi». 16Ŋaa bizi le yayi ni mbuuru kaka tele ka ovuzu o Njyami otu aka nde ma ayalaga Jezu Kirisite, ŋa ka ma nde wo anyimi Ngiri a Moyize ŋi. Ma bwa, se bizi, le legi lila le bizi ma Kirisite Jezu mabuni Njyami mono bizi tele ma lila ma Kirisite ŋa ka ma enyimi e Ngiri ŋi. Kabila se mbuuru omo aje kaka tele ka ovuzu o Njyami ma kanyima njwori e Ngiri. 17Ŋaa bizi a be aJife lesaga kaka tele ka ovuzu o Njyami kabila bizi lema ayalaga Kirisite. Ma kasa bwa, bizi mva baari ba acwolo ma anga maami maabi kabila bizi ki kyele angiri ma aJife ŋi. Bwa ma kalyele ndi ema, Kirisite abira bizi a be nca maami maabi? Kali, ka jaajaa ŋi! 18Okorogo aka mi evuruga ka ngiri eli mi ma ndaga, mi epama mi mankulu. 19Ŋaa ma mi, ma Ngiri mi kpa. Ngiri yiga mpari kayila mi onyaŋa, mabuni mi ka ma Njyami. Bila Kirisite, mi ma akpa yila lemaanji. 20Mi li mwoyi, ŋaa yiga ka mi li mwoyi ŋi, Kirisite oli bila mi. Yiga, omwo o mi nca akabi, mi li mwoyi ma oyaligi o lila ma Mwana Njyami, ba kajii mi ŋa ompi omwo o nde ma mi. 21Mi mbizi ma kacuna puga le Njyami. Okorogo, aka ma osumbu o Ngiri eli ye buna kaka avuti tele ka ovuzu o Njyami, ŋaa Kirisite okpi ngori!
Currently Selected:
Ngalate 2: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
