Ngalate 3
3
Ngiri sikali lila
1Ojiri o Ngalate, wo logi be na? Ŋaa, mi nani be tata lemigi le kpi Jezu Kirisite yila lemaanji! 2Mi jii ni be le kaala ma ojugu wu: be le ma baga Oduduma Cece, ma be ba le nyimi Ngiri, sikali ma be ba leyaligi Ncya Yeemve? 3Ŋaa be ŋa ojiri! Keebani, be le legi tari yila mpari ye Oduduma Cece. Ŋa yiga, be lesaga kamana bila mpari be mankulu? 4Be ŋa lemoni ampasi kuna a ngori? Mon ŋa ka ma kalakali ŋi. 5Njyami ampa be Oduduma nde ŋa nde asa mpila be bege le ampiri! Nde asa bwa ma be ba lenyima Ngiri, sikali ma be ba leyuga ŋa kayalaga Ncya Yeemve?
6Bwori mva Abarayame yaligi Njyami, ŋa mabwa, Njyami yagi nde mva mbuuru o tele#3.6 lekese Jeneze 15.6 . 7Yiga leyuzuga lo: baali ŋa lila baana ajaajaa ba Abarayame. 8Mpiri elyeli kalakala ndi Njyami kiigi vuti baali ka aJife ŋi tele ma lila le bo. Ŋa mabwa jo ebaani wobo ŋa Abarayame mbari yeemve yia. Jo elyeli ndi: «Njyami aje kampa puga ma esi njwori ma ngula we.» 9Abarayame yaligi ŋa nde bagi puga. Ŋa bwa, baari aso ba ayalaga abagi puga mva kabagi nde.
10Baari ba baabaraga ma kalyele ndi Njyami ayaga bo mva baari a tele kabila ma bo ba anyimi Ngiri a Moyize, Njyami aje kalogo bo, kabila amaateende ndi: «Mbuuru ŋa mbuuru kabiza kaselege kasa aso ma maateende nca Ngiri a Moyize, kalogo ka li kayila bo.» 11Ba amono tata ni mbuuru akaya tele ka osu o Njyami ma Ngiri ŋi, kabila amaateende ndi: «Mbuuru wooli tele ma lila aje kaka mwoyi.» 12Ŋi, Ngiri ka mva lila ŋi. Mva ka amaateende ndi: «Mbuuru wo anyima Ngiri ywori, nde abaga omwo.»
13Ŋaa Kirisite ma vuzuga bizi a be ma wura leenini le kalogo le Ngiri. Nde mi yaga kalogo kayila nde, ma biri le bizi a be. Okorogo, Mpiri ye lyele ndi: «Mpini mbuuru wo akura swe ma oti ba alogo.» 14Bwa eyiri mabuni baali ka aJife ŋi abaga puga le Abarayame ma Kirisite Jezu. Ŋaa ma lila, bizi lebuna kabaga ba Njyami ba kalegi ndagi, ma kalyele ndi Oduduma Cece.
Ngiri bila ndagi
15Andumu, mi eyaga mva osumbu wo amaami a bizi a be: aka baari bwele ami kura ncuumu ma jaa le bo le awobi, ŋa akiri ampiri ma kuru bo ma, mbuuru ki buna kacyeze lo ŋi sikali ki lusa kalogo kakima ŋi. 16Ee yemiŋi, Njyami osi andagi a nde ŋa Abarayame bila mpabigi a nde. Mpiri eki lyele ŋi: «Ŋa ampabigi a nde,» mva ka ba lyele ndi bege le baari. Lo le lyele ndi: «Ŋa mpabigi a we,» ma kamvyere kaŋa ndi mbuuru omo otu, wooli Kirisite. 17Mono ma jii mi kalyele: Njyami ma amana kasa obuga bila Abarayame. Ngiri a Moyize eyi ankama ba enkuumu ba esibi ena ŋa enkuumu etari kayila ŋa (430), ba eyiri. Ŋa mabwa, Ngiri yia ki buna kacyeze obuga ŋa kadisa ndagi e Njyami ye kasi ŋi. 18Ŋaa aka wanda le Njyami le kampa kabaga ma Ngiri, ŋaa yiga ka ma sala le ndagi ŋi. Ŋi, ma ndagi ye Njyami ye kasi ma puga le nde kangulu Abarayame.
19Ŋaa, Ngiri meema? Kiigi kalogo kakuna ma kasa kaya esima ba embizi kajya Njyami, ŋa bwa tii kaaya mpabigi ye Abarayame ŋa nde eli ndagi kiigi ye asi. Kamaka antuma-yulu baasi kaya Ngiri, ŋa bo ampi lo ŋa ovusi wo acwoli ma Moyize mabuni nde kalyele ŋa baari. 20Ŋaa ovusi abaana ka mpanaŋa eju jwele, ŋaa Njyami wooli omo, ma ntini ye si nde ndagi ŋa Abarayame, nde ki kese ovusi ŋi.
Ncwo e Ngiri
21Ŋaa bwa ma kalyele ndi ema? Ndi Ngiri ka mva ndagi e Njyami ŋi? Asoke kali! Aka ngiri ye buna kampa omwo, ŋa aka baari amwo kiigi abagi ngiri yia, yemiŋi, ee, Ngiri kiigi ye buna vuta bo tele. 22Ŋaa Mpiri ye lyele ndi okiri wo onciina li nca mpari ye amaami maabi. Lemono mabwa: ndagi e Njyami kiigi ye cuuga ma ayaligi aso, ma lila le bo ma Jezu Kirisite.
23Keebani ya lila, bizi a be kiigi engeneŋe ncina e kyeli e Ngiri, ma kaliriga ndi lila lya kiigi ba amvyere. 24Ŋa bwa Ngiri kiigi mva okyeli bizi a be tii kaya Kirisite, mabuni amoni bizi a be tele ma lila. 25Yiga, ntini ye ma kayalaga Kirisite emito. Ŋaa bizi a be lemaka ncina okyeli ŋi.
26Kabila be aso yiga baana a Njyami ma lila ma Kirisite Jezu. 27Okorogo, be aso ba lebagi ateemi ma Kirisite, be le mikiriga mva nde. 28Kanca be yiga oJife bila wooli ka oJife ŋi kali, oyiga bila ovuzugi, yiga obalaga bila okaazi kali. Okorogo be yiga mbuuru omo nca Kirisite Jezu. 29Ŋa aka be leli ma Kirisite, ŋaa be ampabigi ba Abarayame, ŋa be lebaga wanda eli Njyami ampa ndagi.
Currently Selected:
Ngalate 3: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
