Ngalate 1
1
Obigi
1Mi, Poole, ntuma wo eteendi be okanda wu. Ki abalaga asi ndi mi ka ntuma ŋi. Mi ki ka ma lengulu le mbuuru ŋi, ŋaa ma Jezu Kirisite ŋa ma Njyami Taara, eli onyusi nde ma leku. 2Bila andumu aso baali bila mi, mi ebiga Ekuga ba Ngalate. 3Ndi Njyami Taara a bizi a be, ŋa Mfumu Jezu Kirisite baampa be puga ŋa kadusu! 4Kirisite mpi nyuru nde ankulu ma kavuzuga bizi a be ma amaami maabi a bizi a be, mabuni nde kavuzuga bizi a be ma okiri woobi o lubu, mva Njyami o Taara a bizi a be ka kajii. 5Ndi lekuma leka ŋa Njyami obu-obu! Ee bwa!
Ncya Yeemve montu
6Njyami cwoli be ma puga le Kirisite, ŋa mi ekima eli be le ma mpa nde engwo ŋa asisari ma kaje mpila Ncya Yeemve nkima. 7Bwa ki ma kalyele ndi ŋa Ncya Yeemve nkima ŋi, kali! Kamaka baari ba baasa ngimiŋa mpila be ŋa eli ajii ka kaala Ncya Yeemve ye Kirisite. 8Bizi lema ampa be Ncya Yeemve. Yemiŋi, aka mbuuru, se bizi, sikali ntuma yulu, ampa be Ncya Yeemve nkima, ndi Njyami kalogo nde! 9Bizi le ma amana kalyele, ŋa mi evula lyele: aka mbuuru ampa be Ncya Yeemve nkima eli ka mva ye bagi be ŋi, ndi Njyami kalogo nde!
10Ŋaa mi ma esaga kayalaga bila baari sikali bila Njyami? Mi ma esaga ma kaka ove ŋa baari? Aka mi jii ma kaka ove ŋa baari, mi eka maaka ojanji Kirisite ŋi.
Poole buni ka kirigi ntuma
11Andumu a mi, mi elyele be, Ncya Yeemve ye lyele mi eki ye ma baari ba omwo ŋi. 12Kabila mi ki baga lo ma balaga ŋi, mbuuru ki yiziga mi lo ŋi, ŋaa Jezu Kirisite si mi kaya lo.
13Be leyugi ka awobi lemigi le kiigi ka mi ntini ye kiigi cura mi Ngiri a Moyize ŋa ma maami ma aJife. Be le yayi bila osumbu woobi mi kiigi mpa mpasi ma Okuga o Njyami ŋa ka kiigi jya kabiiza nde. 14Nca eyayi ba Ngiri bila amaami ba aJife, mi kiigi vuli baamo ba nkuugu a mi ba baari a mi. Mi kiigi vuli bo ma miizi mpari kuna ma amaami ma ankaaga a bizi a be.
15Ŋaa Njyami ma swolo mi kanca mwo nguugu a mi ŋa nde ma cwolo mi ma puga le nde. 16Ŋa ntini ye kuru nde ma ka mvyere mi Mwana nde, mini mi sa nde kaya kanca paniŋi baari baali ka aJife ŋi, mi ki je piza anjwo ŋa baari ŋi. 17Ŋa mi ki je se Jeruzaleme ŋi ma kamono antuma ba kiigi osu mi, ŋaa mi yeni ŋa asari Arabi, amana mi vurigi Damase. 18Esibi etari eyira eli mi kumi ka Jeruzaleme ma kaya Pyere, ŋa mi ki eluna jwele bila nde. 19Mi ki mono ntuma okima ŋi, ngula Jake ndumu a Mfumu. 20Ma teende mi be, mi elyele ka osu o Njyami, ka alaa ŋi.
21Amana bwa, mi yeni nca abungu ma Siri ŋa Silisi. 22Ŋaa Ekuga ba Jude ba amayalaga Kirisite kiigi aki ya mi ŋi. 23Bo kiigi ayugi kalyeli otu ndi: «Kalakala, balaga lya kiigi sa bizi mpasi. Yiga, nde ampa Ncya Yeemve ye lila eli nde sagi kabiiza.» 24Ŋa bo akiigi vuta lekuma ŋa Njyami ma mi.
Currently Selected:
Ngalate 1: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
