Esima 7
7
Ewobi ba Etyene
1Ompi ambwoŋi woonini pizi Etyene ndi: «Ma maalyele ma we ma jaajaa?» 2Nde kaali ndi: «Andumu ŋa ataara, leyuga mi! Njyami wo lekuma ma mvyere njuru ma taara bizi a be Abarayame, ntini ye ekiigi nde ka Mezopotami, eli nde kiigi kini ka ka Arane ŋi, 3ŋaa nde ŋa nde ndi: “Ciege kasi ka we bila njo we, ŋaa we je kasi ke mi ka emvyere we.” 4Ŋaa Abarayame cyegi kasi ka Caledeye, ŋaa nde yiga ki ka Arane. Kaŋaa, amana leku le taara nde Njyami si nde kayira nca kasi kaali be ki. 5Njyami ki mpa se nde kabaga nca kasi kia ŋi, se biri ye kalege kuulu kali. Ŋaa nde mpi nde ndagi ndi nde ampa Abarayame kasi, ŋaa yila ampabigi a nde ba ba aya kayila nde, se ma ntini ye kiigi nde kini kula ŋi. 6Njyami wobi bwa: “Andaala a we baaje kaka nca kasi kakima, ba asuuza bo aka ma oyiga ŋaa bo baaje kampa bo mpasi ankama ba esibi ena (400). 7Ŋaa mi epama baari ba baasa bo ayiga.” Njyami dugi ndi: “Amana bwa, bo ba aje ka cuuga, ŋaa bo ba aje kabwono mi nca biri yia ŋaa.”» 8Ŋaa Njyami kuri bila ŋa Abarayame obuga eli ncazi kamaka kaliimi. Ŋaa bwa Abarayame ka makula Izake, nde keri nde cugu le ompwomo, Izake kuli ŋaa nde keri Jakobe, ŋaa Jakobe keri ankaaga ba kuumu ŋa bwele.
9Ankaaga kiigi ŋa mfunuŋa muon ma Jozefe, bo ategi nde ma kaje bila nde Ezipite. Ŋaa Njyami kiigi li bila nde, 10ŋaa nde ciezi nde nca ampasi, nde mpi nde ncimi bila sala ka ovuzu o Farawon, mfumu a Ezipite, olegi nde ma mbara ye onkunji wo Ezipite ŋa wo njo nde eso. 11Njala yeenini eyi nca kasi kaso ka Ezipite, ŋa nca kasi ka Kanaan, mpasi kiigi yeenini ŋaa ankaaga a bizi a be aki baga se kalogo ka kaja ŋi. 12Jakobe yugi ndi kiigi ŋa mburu ka Ezipite, ŋaa nde baani tumi ankaaga a bizi a be ma jaa ecomi. 13Ma nja ya oywele Jozefe mvyeri andumu a nde njuru, yia biri ye yayi Farawon kacya ka Jozefe. 14Ŋaa Jozefe tumi kayaga taara nde Jakobe bila njo nde eso, bo kiigi ekuumu e baari ncaami ŋa baari ataani. 15Jakobe surugi Ezipite, kabiri ye kpi nde, ŋaa ankaaga a bizi a be se. 16Ŋaa biri bo Siceme, ŋaa ajigi bo nca ancwo ma Abarayame ma kasuumi bila baana ba Amore ka Siceme.
17Ntini yiga tuga ye elegi Njyami Abarayame ndagi. Lembuuru le bizi a be le seligi waayi ka Ezipite. 18Tii keeyi mfumu okima eli kimono Jozefe ŋi. 19Mfumu wua kuri baari a bizi a be, ŋaa tasi ankaaga a bizi a be, tii ntini ye tumi nde bo ma kanyina baana a bo ba abuzu mabuni bo akpa.
20Ma ntini yia akuli Moyize; eli ka miizi a Njyami ŋa owali. Asi ovaligi o nde tii angondo atari nca njo taara a nde. 21Ŋaa ma bua se nguugu a nde bila taara yiga anyini nde boo, mwana Farawon wo okaazi yagi nde ma kakiele, ŋaa okuuzi nde mva mwana wo ma lekula. 22Akuusi Moyize nca ncimi ye baari ba Ezipite aso, ŋaa nde kiigi ŋa otori nca maami a nde ma kiigi lyele bila ma kiigi sa nde. 23Ŋaa ntini ye bagi nde ekuumu ba esibi ena, nde kuri ojugu ma kaje mono andumu a nde, ba Ezerayele. 24Moyize ka ma tanaŋa ba abere osi Ezerayele omo luuba, nde sunuŋi bila wo kiigi bere buga wua, nde yiri ngula wo ampi mpasi, ŋaa nde bumi osi Ezipite. 25Nde kiigi kamono ndi andumu a nde ba Ezerayele ba ayuga ndi Njyami mbuuru wo tuma Moyize ma kayamaŋa bo. Ŋaa bo aki yuga nde ŋi. 26Anyuzuga, Moyize moni baari ba Ezerayele bwele ba ajuana, nde yi mva ka kari a bo, ma kasaga vuta bo ondigi. Nde ŋaa bo ndi: «Be tii be ŋa be, be jaa le lempa abuga mpasi lema?» 27Ŋaa wooli kiigi bere buga ciniŋi Moyize ndi: «Wo mpa we omfumu bila onkani kayila bizi na? 28Wo we asaga buma mi mva ka bumi we osi Ezipite aciga?» 29Moyize kayuga bwa odumi kasi ka Mandya; ka kwa nde bagi baana bwele ba abalaga.
30Ekuumu ba esibi ena eyira, nca ncege mpaana kakuri ka Sinayi, ntuma yulu omo ocuugi ŋa Moyize nca ajajaga ma awuuma mbaa. 31Moyize kamono bwa, ekoli nde ma ecuugi e maami maa. Ŋaa nde seligi ciina ma kamono tata, ŋaa nde yugi jui le Mfumu ŋa nde ndi: 32«Mi Njyami Taara a we, Njyami Abarayame, Izake bila Jakobe.» Ŋaa Moyize aterege, yiga ki kese se kwa ŋi. 33Mfumu ŋa nde ndi: «Cieze akorogo a we ma ntaami, kabila biri yeeli we yi, biri ye cece. 34Mi ma amono mpasi ye baari baali ka Ezipite, mi maayuga ejuuya e bo, ŋaa mi mi suruga ma kacieze bo ma nya. Ŋaa yiga je, mi etuma we Ezipite.»
35Moyize wua wo bo wo abizi ndi: «Wo mpa we omfumu bila onkani na?» Kamaka nde wo Njyami wo katumi ma omfumu ŋa ovuzigi bila ntuma yulu eli nde cuugi nca ajagajaga. 36Nde mbuuru wo ocuzigi bo ka Ezipite, nde si maami ma osizi bila eliimi eluari ka kasi ka Ezipite, kanca lemere le anja ambaa bila ŋa nca ncege, enkuumu ba esibi ena. 37Moyize wua wo dugi ŋa baana ba Ezerayele ndi: «Njyami aje katuma nca andumu a be ntuma Njyami mva mi.» 38Ŋaa baari avunuŋa kanca ncege, evuri ki nde yo kiigi ka mpanaŋa ankaaga a bizi a be ŋa ntuma yulu yo kiigi lyele bila nde ka kakuri ka Sinayi. Ma Njyami bo abagi mbari ye omuon ma kampa bizi. 39Taara a bizi a be aki jya nde kanyima ŋi, bo abizi nde, ŋaa etuma ebo evurigi Ezipite. 40Bo ŋa Aron ndi: «Paga bizi eduduma ba beeje ka ovuzu o bizi, kabila Moyize wo oya bira bizi ka Ezipite wu, leki maya lemigi lemi sa nde ŋi.» 41Ŋaa ma ecugu bia bo awangi mwana ngoombi. Bo ampi kaduduma kia ambwoŋi. Ŋaa bo yiga ba aswere ma kalogo kawangi bo ma njyala e bomankulu. 42Ŋaa mono Njyami kaka bele bo, ma bo baakiigi bwono anyari, mva lemigi le ateende nca buku le antuma-Njyami ndi:
«Ma ekuumu ba esibi ena nca ncege,
be baari a Ezerayele,
ma mi be lempi anyama bila ambwoŋi?
43Kali! Be lemaaya bila omangi njyami Moloke
ŋa nyari njyami be Rayifane,
eduduma ba esa be ma kabwono jo!
Ŋaa mi se ebira be ngula Babilone.»
44Nca ncege, ankaaga a bizi a be kiigi ŋa omangi wo kiigi mvyere ndi Njyami li bila bo. Ŋaa Njyami kiigi tumi Moyize ma kacwa yo mva ka emwozi nde. 45Amana bwa, baana ba ankaaga a bizi a be abagi omangi ma ye bo ntini. Ke kiigi Joze mfumu a bo, bo abiri omangi ma kasi ke yagi bo ma baari eli Njyami curi ka miizi a bo. Ŋaa yiga omangi ki kaŋaa tii ntini ye Davide. 46Davide bagi sala ka miizi a Njyami, ŋaa nde pizi nde aka nde abuna piza biri eli andaala a Jakobe ba abuna kabwono Njyami. 47Ŋaa yiga Salomo mbuuru wo cui Njyami njo. 48Ŋaa Njyami wo nkara yulu akaka kanca anjo ma acwa njiala e baari ŋi, mva lemigi le alyele ntuma Njyami:
49«Mfumu dugi ndi: Yulu mbara mi,
ŋaa ncye biri ye esuuza mi ntaami.
Be njo ye le ecwa mi yini?
Sikali biri ye wuuma mi yini?
50Mi ka mbuuru wo wanga biibi eso ŋi?»
51«Ee baari baali anga etuma onono bila ba aduba acu! Be kiigi lebira maami ma Oduduma Cece. Be se mva ankaaga a be! 52Wua ntuma Njyami wunu wo ankaaga a be kabizi kawuele? Bo abumi baasa lyele ma eyi ba mbuuru a Tele, eli yiga be le mi kaba, ŋaa eli be kiigi yiga ambumi a baari. 53Be ba le yaligi angiri ma lemigi le elegi antuma-yulu, ŋaa ba abizi ka kyele.»
Leku le Etyene
54Oju wo amfumu kama yuga mbari yia, bo abiri nkeri eli yiga ba aja mii ma Etyene. 55Ŋaa Etyene, Oduduma Cece kiigi ma aluula nca nde, ŋaa nde tali kalii kayulu pii, nde moni lekuma le Njyami, ŋaa Jezu li ma otele ka kwogo ka Njyami ka kalumu. 56Ŋaa nde ndi: «Mono, mi emono yulu oma anaaŋa, ŋaa Mwana Mbuuru oli ma otele ka kwogo ka Njyami ka kalumu!» 57Ŋaa bo adubi acu, yiga baata nya, ŋaa bo aso akumi yila nde. 58Bo abiri nde ngula kangundu, ŋaa bo yiga atobi nde akele. Atemi asuuzi amfa a bo ka ncina mwana balaga nkuumu Soole. 59Ŋaa bo kiigi ba abuma Etyene ma akele, nde abwono ndi: «Mfumu Jezu, yaga oduduma mi.» 60Ŋaa ka mva ma abuu, nde ti osarigi nkeri nkeri ndi: «Mfumu, wo bizi bo mberi kampa ma jaa leebi lia!» Nde kamana lyele bwa, nde kpi.
Currently Selected:
Esima 7: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
