Esima 8
8
1Ŋaa Soole yaligi ndi abuma Etyene.
Soole ampa Okuga ampasi maanini
Cugu loankulu lia ampasi maanini abaani kanca Okuga wo Jeruzaleme. Ayaligi aso acalagi ayeni nca bungu le Jude bila le Samari, kangula antuma ba asiili. 2Baari a tele ma Njyami alegi Etyene nca muuma ŋaa bo alili kuna ma leku le nde. 3Ŋaa ma Soole, nde kasa mpana ma kabiiza Okuga. Nde kayira njo ŋa njo, ma kacieze ayaligi, ŋa akaazi ŋa abalaga, ŋa nde kalege bo ma ongeneŋe.
Filipe ampa Ncya Yeemve ka Samari
4Ba acazigi ayeni ma kampa Ncya Yeemve nca ebiri ŋa ebiri. 5Filipe surugi nca kangundu kamon ka bungu le Samari, ka kwa nde wobi ma Kirisite. 6Baari aso ba kaselege yuzuga kalyele Filipe, bo ayugi bila bo amoni ampiri ma kiigi sa nde. 7Kabila bege le epundu beebi ba kacuuga kanca anjuru a baari ma kata anya maanini, ŋa bege leebuka bila anga eleme awuumi. 8Ŋaa Kangundu kaso yiga nca kase keenini.
9Nca kangundu komankulu kia, kiigi ŋaa balaga lemo nkuumu Simon, nde kiigi ma apaza ampiini. Ŋaa nde legi baari ba Samari oliliŋi ma maami ma osizi ma kiigi sa nde. Nde kiigi lyele ndi nde mbuuru woonini. 10Aso ka abaani ma onkere wo obuzu ti nga mbuuru, amono ba ayuzuga nde pi. Ŋaa ba kalyele ndi: «Li balaga ŋa mpari a Njyami, yo ni ye ba acwolo “ma mpari yeenini”.» 11Bo asuuzi etuma ba kayuzuga nde, kabila nde kiigi maabiga ka kasa bo ampiini ma osizi. 12Ŋaa bo ama yalaga Ncya Yeemve ye mpi Filipe bo, ma omfumu o Njyami bila nkuumu Jezu Kirisite, abalaga bila akaazi ayagi ateemi. 13Simon ndeankulu yaligi ŋa yagi ateemi. Nde ki ma nyina Filipe ŋi, ŋaa ekoli nde ma ampiri bila ekubu emaami ba osizi ba emoni nde.
14Antuma baali ka Jeruzaleme ama yuga ndi asi Samari amiyalaga mbari a Njyami bo atumi bo Pyere bila Jan. 15Ŋaa bo ato Samari, bo abwoni ma ayaligi ba anyarigi mabuni bo abaga Oduduma Cece. 16Okorogo, Oduduma Cece kiigi kini ya se yila mbuuru omo nca bo ŋi. Bo kiigi amayaga ateemi atu ma nkuumu ye Mfumu Jezu. 17Pyere bila Jan alegi njiala yila bo ŋa bo abagi Oduduma Cece. 18Ntini ye Simon ka kamoni ndi antuma alegi njiala yila baari Oduduma Cece oyi yila bo, nde yi mpa Pyere bila Jan ampara. 19Nde apiza ŋa bo ndi: «Lempa mi se mpari yi, mabuni baari ba elege mi njiala abagi Oduduma Cece.» 20Pyere kaali ŋa nde ndi: «Adoro a we kaje ma anjila ma oca bila weankulu, kabila we amono ni baabuna suuma kalogo ka ampa Njyami bila ampara! 21We se jaa mon ye alyele nca ŋaa kali, kabila otuma we ka tele ka miizi a Njyami ŋi. 22Ŋaa jaa le esi we lebi, yalaga lo ŋa we bwono Mfumu mabuni leke nde abologo ecimiŋi ba otuma we. 23Mi emono otuma we ma aluula ma njala kabaga ŋa ma ongeneŋe ba maami maabi.» 24Ŋaa Simon alyele ŋa Pyere bila Jan ndi: «Beankulu lebwono Mfumu ma mi, mabuni ncanke maami ayi ma mi.» 25Bo amana lyele amaami maave a Jezu ŋa elyeli e mbari Mfumu, antuma abwele avurugi Jeruzaleme. Bo ato ma njila, bo ba kampa Ncya Yeemve nca kuna le engundu e Samari.
Filipe bila balaga le Ecopi
26Ntuma Mfumu ŋa Filipe ndi: «Temeŋe we je ma kacu ka katali kwogo ka okari, ma njila ye ye eje suruga Jeruzaleme ma kaje Ngaza. Njila yia ema avuuma.» 27Filipe yeni ŋa asisari, ŋa ma njila, balaga le Ecopi lemo leya kiigi ojanji woonini. Nde kiigi mbuuru wo akyele kabaga ka Kandase, mfumu kasi ka Ecopi wo okaazi. Nde kiigi maaya Jeruzaleme ma kabwono Njyami, 28ŋa nde kavuruga mpila nde. Manci kayila lutu le nde, nde katanga buku le ntuma Njyami, Ezayi. 29Oduduma Cece ŋa Filipe ndi: «Je bazaga lutu wua.» 30Filipe biri nciini ma kaje nciina tuga ŋa nde, ŋa nde yugi katanga mbuuru wo Ecopi wua buku le Ezayi. Nde pizi nde ndi: «We ŋaa ayuga maami maatanga we ma?» 31Balaga lya kaali ŋa nde ndi: «Mi ka yuga lo bunu eli mbuuru ki selege lyele mi ŋi?» Ŋa nde dugi Filipe ma kaka mancina mpaana nde. 32Olwo wo atanga nde kiigi nde wu:
«Nde kiigi mva kandombo ka ba abira biri ye baabuma,
mva mwana kandombo kakali onyua pori ka miizi ma mbuuru wo acieze nde ekwa.
Nde ki lyele se jaa lemo ŋi.
33Nde moni okuru, ŋa nde kibaga mpieme ŋi.
Wo abuna lyele ma ampabigi a nde na?
Kabila ama sa nde mfuna kayila ncye.»
34Mbuuru woonini wua ŋa Filipe ndi: «Kolokolo we, ntuma Njyami cii-cii ma na kalyele bwa? Ma ndemankulu sikali ma mbuuru okima?» 35Ŋaa Filipe yagi mbari ŋa, nde baani ma oluo mbari yia, nde mpi nde Ncya Yeemve ye Jezu. 36Bo alwoni njila bo, ŋa bo ato biri mon ye eli kiigi ŋa anja. Ŋaa mfumu wua ndi: «Mono anja ema ŋaa kiigi ka kakaami eli mi kibuna yaga ateemi ŋi kama?» [37Filipe ŋa nde ndi: «We ayalaga bila otuma we oso, we abuna yaga ateemi.» Ŋaa balaga lia ŋa nde ndi: «Mi ma ayalaga ni Jezu Kirisite Mwana Njyami.»]#8.37 Olwo wo e ŋa ncaami (37) ba kamono nca kuna le maami ma ateendi kala ŋi. 38Ŋaa nde sugi kabiri mon nca lutu a nde. Filipe surugi bila nde nca anja nde mpi nde ateemi. 39Bo acuugi nca anja Oduduma Mfumu cyezi Filipe, mbuuru woonini wua yiga kimono Filipe ŋi, okorogo nde yeni je le nde nca kase. 40Filipe kiigi cuugi ka Azote ŋaa nde kayira engundu ŋa engundu ma kaje ma kampa Ncya Yeemve tii ntini ye eto nde Sezare.
Currently Selected:
Esima 8: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
