Esima 28
28
Poole nca kajeneŋe ka Malete
1Ntini ye bizi ye letoyi yemiŋi yila ncye, bizi le yugi ni kajeneŋe ka okeri ba acwolo ma Malete. 2Baari ba kajeneŋe kia ayaligi bizi kanca mpanaŋa bo bila otuma woove. Bo anasi mbaa yeenini mini bizi leyoro, ma mvula wo kiigi va ŋa mpebe ye ki sa. 3Poole katolo antaga ba eti ba ekaka ma katuna nca mbaa, ntari cuugi ma nyusu a mbaa ŋa karigi ma kwogo ka nde. 4Ntini ye moni baari ba kajwa kia ntari ma karaga ma kwogo ka Poole, bo ba kalyele nca mpanaŋa bo ndi: «Balaga li ŋa asemi obuma baari, kabila opami o Njyami ki jya ni nde kavuuga ŋi, ma nde wo vuugi ma lemere.» 5Ŋaa Poole nyizigi ntari vi nca mbaa, ŋa ki mono se nkeri ŋi. 6Abuga kiigi kamono ndi nde aluula sikali ava ka kpa kancinci ŋa. Ŋaa ajila akwono, bo aki mono se mpamaŋa mon ye ciili nde ŋi. Bo yiga akaali enyua ŋa bo ndi, ni nde kiigi njyami.
7Kampaana biri yia kiigi ŋa ncye ye mfumu woonini wo kajeneŋe eli nkuumu Pubeliyuse, wua yambi bizi bila otuma nde oso ŋaa nde kyeli bizi ecugu etari. 8Taara Pubeliyuse kiigi ma anyunuŋa njo, nde kiigi ŋa kabaa bila mbula Poole yeni mono nde, bwoni, legi njiala yila nde ŋaa nde saligi nde. 9Amana bwa, abieri baamo ba kajeneŋe ayi se ŋaa bo se awuumi. 10Bo anyimi bizi ma amigi akukuna. Ŋaa ntini yeekiigi je bizi, bo ampi bizi biibi ekaama ba opinga o bizi.
Poole kato Rome
11Angondo atari ayira, bizi lekumi yila vaari omo eli si kasibi ka mpebe nca mbwu ye kajeneŋe. Nde kiigi wo Alesanderi, ŋa nde kiigi ŋa kaduduma ka «Akira» ka amapaaga ka levuzu le vaari. 12Bizi letoyi Sirakuse eli bizi le ki ecugu etari. 13Kaŋaa, bizi lepori kabari ka ncye ma kato Reziyo. Anyuzuga, pyebi ye kwogo ka okari leyubi ŋa bizi lesi ecugu jwele ma kanyunuŋa nca Puzole. 14Nca kangundu kia, bizi le bagi andumu ba acigi bizi ma kasa oluna omo bila bo. Lia lemigi leyeni bizi Rome. 15Andumu a Rome baa kiigi amabaga ancia a bizi ŋa bo ayi mono bizi ka Jandi le Apiyuse ŋa kangundu kacwoli ma aNjo a Tari ma aNjya. Ntini ye moni Poole bo, nde mpi Njyami leve ŋa nde bagi kawasi. 16Bizi lemana to Rome, anyini Poole ma ye nde njo, bila oworo wo kiigi kyele nde.
Poole ampa ncia yeemve ka Rome
17Ecugu etari eyira, Poole cigi amfumu ba ankani ba aJife a Rome mpila nde. Ntini ye vunuŋi bo, nde ŋa bo ndi: «Andumu a mi, se keebiza sa mi jaa ma baari a bizi a be se ma maami ma ankaaga a bizi a be, ami kwara mi ka Jeruzaleme ŋa ampi ŋa baari aRome. 18Amana lege mi ejugu, ba asagi pisa mi, kabila bo akimono jaa ye ba apama mi ŋi. 19Ŋaa aJife abizi ŋa mi yiga cwoli Sezar, ŋaa mi ki kana ka kata baari a mi ŋi. 20Yia biri ye kana mi be kacwolo bila kalyele bila be. Okorogo mi e bira esia ba ankozo bi ma wooli ni baari ba Ezerayele ŋa tari.» 21Bo akaali ŋa nde ndi: «Bizi lekini mono se okanda omo ye owi Zude ma nkuumu a we ŋa se omo nca andumu a bizi a be kini kawa kwa ma kalyele bizi ma ayiri sikali ma kalyele bizi maami maabi ma anjuru a we ŋi. 22Ŋaa bizi lesaga yuga maami ma acimiŋa we, kabila bizi leyaayi ni ma ebiri eso ba abiza lengulu le ma jya we li.»
23Bo aswoli cugu bila Poole, ŋa cugu lia bo ayi baari akukuna ma ka bazaga nde kabiri eli nde kiigi. Ma kabaana le ecyere tii ekinkolo, Poole legi bo enaani. Nde wobi bo ma omfumu o Njyami, ŋa sagi sa bo kayuga ma nkuumu a Jezu ka ebaani e Ngiri a Moyize ŋa ma antuma-Njyami. 24Ake ayaligi maami maakiigi lyele nde, ŋaa baamo aki yalaga ŋi. 25Ŋaa ka eyeni bo eli akibaga se ncwo ka mpaniŋi a bo ŋi, Poole dugi bo mbari yi otu ndi: «Oduduma Cece kiigi ŋa mpieme ntini yeekiigi lyele nde ŋa ankaaga a be ma onyua ntuma nde Ezayi! 26Okorogo nde kiigi dugi ndi:
“Je lyele baari baa:
Be leyuga tata, ŋaa be le kayuzuga ŋi,
be lekese tata, ŋaa be le kamono ŋi.
27Kabila baari ba yiga ŋa etuma enono,
bo amakisa acu,
bo amaduba miizi,
mabuni miizi a bo akimono ŋi,
ŋa acu a bo ma kabiza kayuga,
otuma bo ma kabiza kayuzuga
ŋa mabuni bo ba akayavuruga mpila mi mini mi salaga bo, bwa ewobi e Njyami.”»
28Ŋa Poole lusi ndi: «Ave be leyayi ni, Njyami ma atuma mbari ye vuzuga ŋa baari baali ka aJife ŋi. Bo baayuga yo, bo!»
[29Ma ewobi e Poole, aJife ayeni ma kabila bila mpari mpanaŋa bo.]#28.29 Olwo wu ba kamono nde kanca kuna le amaami ma ateendi kala ŋi.
30Poole si esibi jwele beenciina ma njo ye kiigi wura nde. Nde kayalaga aso baakiigi ya mono nde. 31Nde kampa ncia ye omfumu o Njyami ŋa nde kayiziga maami ma Mfumu Jezu Kirisite, bila tari leenini eli aki liga nde ŋi.
Currently Selected:
Esima 28: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
