Esima 27
27
Poole atumi ka Rome
1Ntini ye le kuri ojugu ndi bizi leje kasi ka Itali ma vaari, bo ampi Poole ŋa engeneŋe ekima eke ma mfumu aworo wo acwoli Juliyuse. Nde kiigi nca aRome ba baacwolo ma «njiimi le mfumu woonini.» 2Ŋaa bizi lekumi yila vaari omo wo wi kangundu ka Aderamyte, ŋa wo kiigi je kacu ka ambwu ma opaani wo lemere le bungu le Azi. Ŋa bizi leyeni, Arisetareke wo wi Tesalonike nca bungu le Masedoyine, kiigi bila bizi. 3Enyuzuga, bizi letoyi Sidone. Juliyuse mvyeri otuma nde woove ŋa Poole, nde nyini nde ma kaje mpila andigi a nde ma kabaga biibi eli nde kiigi ŋa kaama. 4Amana bizi le vurugi yila lemere, bizi leyiri ma kacu ka kajeneŋe ka Cypre, ma kayiziga njuru ma pyebi le leki wula ma bizi. 5Amana bizi le buuli lemere tuga ŋa bungu le Silisi ŋa Pamfili ŋa bizi letoyi Mira, ka Lisi. 6Kaŋa, mfumu aworo bagi vaari omo ye mbuu ye Alesanderi wo aje Itali. Ŋa nde si bizi kakuma. 7Ŋaa ma ecugu ekukuna, bizi le ciini oke oke, ŋa bizi letoyi bila mpasi yeenini ka levuzu le kangundu ka Kenide. Ŋaa pyebi eligi bizi ma kanciina nca kacu kia, ŋaa ma kayira ma Salemoye, bizi le yiri ma kacu ka eyizigi ka kajeneŋe ka Kerete. 8Bizi leyiri ma opani wo kajeneŋe bila mpasi yeenini, ŋa letoyi biri mon ye ba acwolo ma aMbuu-Maave, tuga ŋa kangundu ka Lase.
9Antini kuna ayira ŋa kiigi yiga ŋa obi ma kaje opinga ma vaari. Okorogo, cugu le baampa akolokolo ma amaami maabi kiigi yiga lemi mana yira. Mabwa Poole yiezi bo: 10Ŋa nde alyele ndi: «Andigi a mi, mi emono ni opinga wu aje kaka obi. Vaari ŋa biibi beeli ka kari beebia, ŋa bizi ankulu aya le kaami se omwo.» 11Ŋaa mfumu aworo ki yuga mbari a Poole ŋi. Nde yugi balaga le lejuta, bila ngaa vaari otu. 12Biri ye sugu bizi kiigi ove ma kajila ni ntini ye mpebe eyira. Ŋaa kuna le baari ba akiigi nca vaari akani ma kacyege kaŋa. Bo kiigi kasaga ni ave bo atoyi Fenise, ka mbwu kima ye Kerete, keeli tele ma kacu ka eva muyi, ma kajila ni antini ma mpebe ayira.
Pyebi yila lemere
13Pyebi le kwogo le okari le kawula oke oke, ŋa baari ba vaari amoni ni jaa le kuri bo kiigi levye. Bo ayeni ŋa ayeligi ma kanciina opani kajeneŋe ka Kerete. 14Ŋaa yiga tuga, pyebi le nkeri, le acwoli ma «Erakilo» Le surugi ma ekuru ba kajeneŋe. 15Pyebi le jiimi vaari, bizi kiigi buna suga vaari ma pyebi ŋi ŋa bizi le nyini lo le biri bizi. 16Bizi leyiri ma kacu ka okari ka kajeneŋe ka enkyege ka cwoli Koda. Bizi le buni kayaga bila mpasi yeenini ambuugu ba ama kura ngula vaari. 17Asali a vaari asi nde kakuma, ŋa bo akuri esia ba eyamba ncina vaari ma ka kwara nde ngingi. Bo kiigi ŋa bwogo ni vaari le je va kayila okama seyi wo ma acuuga yila kakulu ka Libi. Bo atuni kalogo nca lemere. Ŋa anyini pyebi le biri bo. 18Enyuzuga, kakuru kiigi ka selege kanyiziga bizi bila nkeri, bo atuni kabari ka biibi ma lemere. 19Ŋa cugu le otari bo ancuni biibi e bo e janja ba vaari ma njiala e bo ankulu. 20Ŋaa ecugu kuna bizi leki mamono muyi, ŋa anyari ŋi. Ŋa kakuru ka seligi si se mpari. Bizi le kaami tari ni bizi leka ma buna kavuuga ŋi.
21Kiigi emabiga eli ba akiigi nca vaari aki ja kalogo ni. Ŋaa Poole temiŋi ka miizi a bo, ŋa nde dugi bo ndi: «Andigi a mi, be ma kayuga kadugi mi be ma kabira cyege Kerete. Biibi e bizi a be eki bya ŋi, ŋa eki nyuŋo ŋi. 22Ŋaa yiga, mi elyele be, lesa kawasi. Mbuuru kanca bizi a be aka ma kama o mwon ŋi, ŋaa wo akama vaari otu. 23Okorogo lempiibi lo ankulu li, Njyami a mi ŋa wo mi ka esala ma nde ma tuma Ntuma yulu. 24Ŋa ma alyele mi ndi: “Poole, kandaga bwogo kamono! Ave we toyi ka miizi a Sezar. Ŋa yuga! Njyami ampa we puga ma kavuzuga baari aso ba baaje opinga bila we.” 25Mabwa, andigi a mi lesa kawasi, kabila mi e yalaga ni aso ma dugi Njyami ma ayira. 26Ŋaa ave vaari le bizi a be le kezigi kayila kajeneŋe kamo.»
27Kiigi lempiibi le ekuumu ŋa ena le kakuru ka kabiri bizi yila lemere le acwoli Aderiyatike. Kanca lempiibi ba aki janja nca vaari abaga acimiŋi ni bizi a be yiga le nciini ma ncye mon. 28Bo akuri kele ma osya omo, ŋa atuni nca lemere ma kayaga onini ŋa owunu wo nde. Bo amoni ndi kari yeesa enkuumu etari ŋa ncaami ma olaa (37). Le nciini vuzu nceti, bo avuri tuni osya. Ŋaa bo amoni ndi kiigi ŋa owunu ba enkuumu jyele ŋa mpwomo ma olaa (28). 29Bo ŋa obwogo ni vaari le kezigi ma akele ka opaani lemere, mabwa, bo acuni ka lebira le vaari anjuunu ana ma olemi ni nde kasuga. Ŋa bo kiigi kasaga ni cugu oca. 30Ŋaa baari ba kiigi njuga vaari asagi kaduma. Bo asi kasuruga mbuugu nca lemere, ma kalyele ni bo kiigi ba asuza anjwunu ma olemi ka levuzu le vaari. 31Ŋaa Poole dugi ŋa mfumu aworo ŋa aworo: «Aka abalaga ba abiza kaka nca vaari, be le ka buna kavuuga ŋi.» 32Ŋaa aworo acagi esia ba ekuara mbuugu, ŋa bo anyini lo levi ma anja, ŋa le yeni.
33Ma ntini eli cugu kiigi leca, Poole cigi bo aso ma kaja, ma kalyele ni: «Lemono lubu cugu le nkuumu ŋa ena le ebigi obwogo o be ŋa be leka ja se kalogo ŋi. 34Ŋaa mi eciga be ma kaja biila, kabila be ŋa kama ma kavuuga. Ŋa se omo nca be akakama se lemfu lemo le ocu a nde ŋi.» 35Amana kalyele bwa, Poole yagi lempeembe, nde mpi Njyami leve ka miizi a baari aso, ŋa nde cagi lempeembe, ŋa nde se ji. 36Ŋaa aso avuru bagi kawasi, ŋa bo se aji. 37Bizi aso ba le kiigi nca vaari enkuumu e baari ena ŋa enkuumu ncaami (276). 38Ŋaa bo ayuruga, bo acuni mburu nca lemere mabuni vaari ki ma baga olemi ŋi.
Baari ba opinga aso avwugi
39Ntini ye cugu ka eci, baari ba akiigi juta vaari aki maya biri ye ncye ŋi. Ŋaa bo amoni biri mon eli kiigi yiga ncye ema jeneŋe anja, bila seyi kapaana anja. Ŋaa bo akuri ojugu ni, aka ba abuna, kajuta vaari ma kakuma yila seyi. 40Bo anaani esia ba anjuunu ŋa anyini nca lemere. Bo se anaani esia ba epanja jwele beenini ma kakalaga vaari ma kacu ka jii nde. Ŋa bo asati kalembe ka levuzu le vaari mabuni pyebi le ciniŋa nde, ŋa bo ayeni ma kacu seyi mpaana anja. 41Ŋaa vaari vi yila okama seyi ka akabakari ma anja, ŋa nde ki ma buna nyiga ŋi. Levuzu lenyuniŋi nca seyi ntini ye epwugi e nkeri ka ebuli lebira. 42Aworo kiigi ajii ma kabuma engeneŋe, mini nca bo se omo ki buna kabara ma oncoŋi ŋi. 43Ŋaa mfumu aworo jii kavuzuga Poole, ŋa nde ligi aworo ma kabiza kasa ma kuri bo. Nde dugi ma ba ayayi oncoŋi ma kaciga ncomi nca anja ma kato yila ncye. 44Abuga alwoni yila epanja sikali yila ba esiili ba vaari. Ma lemigi lia, bo atoyi ncye aso avuugi, ŋa se ampura kali.
Currently Selected:
Esima 27: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
