Esima 26
26
Poole acuula njuru ka miizi ma Angiripa
1Angiripa dugi ŋa Poole ndi: «We abuna kalyele ma kacuula njuru a we.» Ŋaa Poole sati kwogo ma kacuula njuru a nde ndi: 2«Mfumu Angiripa, lubu mi ŋa kase ma kacuula njuru a mi ka levuzu le we ma maami ma kata aJife mi aso. 3Okorogo we yayi angiri aso yemiŋi ŋa ewobi ba aJife. Mabwa mi elyele we mini we yuga mi oke oke.
4«AJife aso ayayi omwo o mi ka kiigi mi onkere, ka ebaani e mi encomi kanca baari a mi ŋa ka Jeruzaleme. 5Kiigi emabiga bo ayayi mi, ŋa ba abuna mpa otemi ma mi aka bo ajii. Mi ki nca oju aFarizi, wo tele kanca baari a bizi. 6Ŋaa yiga ba pama mi, ma mi wo legi tari ma ndagi a Njyami ye kasi ma ankaaga a bizi a be. 7Akaga ma kuumu ŋa bwele ba baari a bizi a be ŋa tari ma ka mono eyi e ndagi yia ŋa ma kajanja ma Njyami bila mpari ma cugu ŋa lempiibi. Ŋa ma tari lia, mfumu Angiripa, ni aJife ba akata mi! 8Meema be le pama mini ŋa mpasi ni Njyami aka nyusa ba akpakpa ŋi? 9Miankulu, mi cimiŋi ni mi kiigi esa eso ma kajuana bila nkuumu a Jezu o Nazarete. 10Ŋaa mi si bwa ka Jeruzaleme. Mi legi bege le ayaligi ma ongeneŋe. Okorogo amfumu ba ampi ambwoŋi ampi nde njila. Ŋa ntini ye apami bo ma kabuma, mi yaligi. 11Nca anjo ma ba baabwono aso mi baani ma kampa ayaligi mpasi ma katuma bo ma katuga nkuumu a Jezu. Mi kiigi ŋa kala yeebi ma bo. Ŋa ma kabiniŋa bo tii nca engundu elala.»
Poole alyele ecwoli e Mfumu ma mfumu Angiripa
12«Ŋa mabwa mi yeni Damase bila njila ŋa mpari ye mpi amfumu ba ampi ambwoŋi mi. 13Mi kiigi ma njila tari lemi kalaga ngulu ocu, mfumu Angiripa, mi moni kawii kawi yulu. Kawii kia kiigi kavuli ka muyi, ŋa ko ka ekyeme ma njuru a mi, ŋa ma abuga baakiigi yila mi ma opinga. 14Bizi aso levi ma ncye, ŋa mi yugi jui le dugi mi ma jui le eberayike: “Soole, Soole, we meema ampa mi mpasi? Ŋa ngori we abiza, mva nyama ka abiza komoŋo mfumu a nde.” 15Mi pizi mini: “We na Mfumu?” Mfumu kaali ndi: “Mi Jezu, o we wo ampa mpasi. 16Ŋaa temeŋe, ka ma otele. Okorogo mabwa mi yi mueze we njuru a mi. Mi ma aswolo we ma kaka ojanji a mi ŋa otemi o mi ma kalyele lemigi le moni we mi lubu, ŋa kalyele se a mi ka e mvyere we kalakala. 17Mi e vuzuga we nca njiala ba aJife ŋa ma baali ka aJife ŋi. Kabila mi etuma we mpila bo. 18Ŋaa we anaana bo miizi, mabuni bo akalaga nca lempiibi ma kawii ŋa ma otori o Sata mpila Njyami. Aka bo ba ayalaga mi, bo ba abaga akolokolo ma maami maabi a bo ŋa bo ba abaga bugu lemo le wanda bila baari a Njyami.”»
Poole alyele ma janja le nde
19«Mfumu Angiripa, ŋaa mi ki bira kanyima ma moni mi bila maakiigi wa yulu ŋi. 20Mi baani mpi ncia yeemve ma baari ba Damase, ŋa ba Jeruzaleme, ŋa nca bungu le Zude leso, ŋa baali ka aJife ŋi. Mi cwoli bo ma ka kaala eku, ŋa ma ka kalaga mpila Njyami, ŋa ma kamvyere ekaali bia ma amaami maave. 21Ma kabila kia aJife akuari mi, ŋi mi kiigi ka Njo Njyami ŋa asagi mi kabuma. 22Ŋaa Njyami akyele mi tii lubu. Ŋa mi kini ŋaa ma kampa otemi o mi ma aso, ŋa enkere bila ankuuru. Mi e kalyele kalogo ka kima ŋi kangula antuma-Njyami bila Moyize ba adugi kiigi maaya: 23ma kalyele ni Masiya aje kamono mpasi, nde aje kayuga ncomi nca baari ba akpa kpa, nde kiigi ampa kawi ka evuzuga, ŋa baari a bizi bila baali ka aJife ŋi.»
Poole acwolo Angiripa ma kayalaga
24Ŋaa Poole amvyere lemigi le acuula njuru a nde, Fesetise tii jui: «We ŋa lari, Poole! Eyayi e we emitasa we!» 25Poole kaali ŋa nde ndi: «Mi lari kali, mbuuru a mi Fesetise. Mbari ye lyele mi ye jaajaa ŋa tele. 26Mfumu Angiripa yayi maami ma ŋa mi e buna lyele bila tari ka ovuzu o nde. Mi ecimiŋa ni nde yayi maami ma aso. Kabila mon aki yira ma ayizigi nca osugu ŋi. 27Mfumu Angiripa, we ayalaga ma dugi antuma-Njyami? Mi yayi ni we ayalaga!» 28Ŋa Angiripa dugi ŋa Poole ndi: «We yiga akaala ecimiŋi e mi mini mi kiriga okiricye ma antini nceti?» 29Poole kaali nde ndi: «Se antini nceti sikali antini kuna, mi ebwono Njyami ni ki ka we otu ŋi, ŋaa evura ka be aso ba leyuzuga mi lubu, be lekiriga mva ka eli mi, kangula esia ba ankozo ma!»
30Ŋaa mfumu Angiripa, nguverenere, Berenise ŋa aso baakiigi bila bo atemiŋi. 31Bo acuugi ŋa ba kalyele kanca mpanaŋa bo ndi: «Balaga li jaa ye kasi eli abuma nde onyaŋa sikali esia ba ankozo.» 32Ŋa Angiripa dugi ŋa Fesetise ndi: «Lebuna cuzuga nde, aka nde kiigi ma abiza kacwolo Sezar.»
Currently Selected:
Esima 26: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
