Esima 23
23
1Poole selege kesi oju wo amfumu ba ankani ŋa nde dugi ndi: «Andumu a mi, mi kiigi yemiŋi bila otuma woove ka miizi a Njyami tii lubu.» 2Ŋaa ompi ambwoŋi Ananyase dugi ŋa ba akiigi kapaana Poole ma kabere nde yila onywa. 3Ŋaa Poole ma nde ndi: «Ŋa Njyami abere we, balaga li ŋa kura! We ka manci ŋa ma kampama mi mva kadugi angiri, ŋa we aka nyima aNgiri ŋi, we alyele ni abere mi?» 4Baakiigi kapaana Poole ba alyele nde ndi: «We atuga ompi ambwoŋi woonini wo Njyami!» 5Poole kaali ndi: «Andumu a mi, mi kiigi ya ni nde ompi ambwoŋi woonini ŋi. Okorogo, amaateende ndi: “We ki lyele maami maabi ma mfumu wo kasi ka we ŋi!”»
6Poole yayi ndi Oju wo amfumu kiigi ake aSadiseye ŋa baamo aFarizi. Ŋa meema nde kata nya ka levuzu le bo ndi: «Andumu a mi, mi oFarizi, mwana aFarizi. Mi ŋa tari ma enyuzugi ba baakpakpa mabwa ba pama mi.» 7Ma ntini ye dugi Poole bwa, aFarizi bila aSadiseye lesugu levi kanca mpanaŋa bo, ŋa baari ba amaakuga abayi 8Okorogo, aSadiseye akiigi lyele ndi ŋa enyuzigi ŋa antuma a yulu ŋa epundu onyaŋa. Ŋaa aFarizi ayaligi ndi maami maa aso ali. 9Osarigi selegi kumi. Amfumu ake ba ayizigi angiri ba oju wo aFarizi atemiŋi ŋa adugi bila mpari: «Bizi lemono ni balaga li ki sa jaa leebi ŋi. Kapundu kamon sikali ntuma yulu asoke ma alyele bila nde.» 10Lesugu le seligi rumi bila mpari komanda bagi obwogo ŋini acagi Poole ma abugu. Nde dugi ŋa aworo ma kasuruga nca lembuuru ma ka cuzuga Poole kaŋa, ŋa abiri nde nca njo aworo. 11Lempiibi le cugu lia, Mfumu yi cwuga ŋa Poole ŋa dugi nde ndi: «Sa mpari! We mi mpa otemi ma mi ka Jeruzaleme, ave ka aRome se we yi mpa otemi ma mi.»
Oyeri omo wo akuri ma Poole
12Enyuzuga ka ecyere, aJife ake akugi ma ocwogo ma kalyele: bo alabi ndi bo baaka ja kalogo ŋi, bo ba aka nyua kalogo ŋi eli bo akini buma Poole ŋi. 13Baari ba akuru jaa lia kiigi amaavula enkuumu ena (40). 14Bo ayeni bazaga ampi ambwoŋi baanini ŋa ankuuru ŋa adugi bo ndi: «Bizi le maalaba, bizi lekabuna kaja biila eli bizi lekini buma Poole ŋi. 15Ŋaa yiga, be bila oju wo amfumu ba ankani le je piza komanda ma ka cuzuga Poole ka miizi a be, mva aka be le sanaŋa kaya jaa le nde tiitii. Ŋaa ma bizi, bizi le puta ma ka njila nde mabuni bizi lebuma nde ka abaana to nde kuni.»
16Ŋaa mwana nkeri a Poole wo balaga, yugi kalyele bo ma jaa le akuru. Nde ki je njo aworo, nyunuŋi ŋa yiezi Poole. 17Ŋaa Poole cwoli mfumu aworo omo ŋa dugi nde ndi: «Bira onkere balaga wu mpila komanda, kabila nde ŋa kalogo ma kalyele nde.» 18Ŋa mfumu aworo biri onkere balaga, nde yeni bila nde mpila komanda ŋa dugi ndi: «Oyiga Poole ma acwolo mi ŋa pizi mi ma ka ya bila we onkere balaga wu eli nde ŋa jaa ma kalyele we.» 19Komanda yagi onkere balaga ma kwogo, yeni bila nde katege ŋa pizi nde ndi: «We ema aŋana lyele mi?» 20Onkere balaga kaali ndi: «AJife amaakura ma ka piza we ma kaya ŋa Poole oswuga ka miizi ma oju wo amfumu ba ankani. Bo ba alyele ndi bo ba asaga kamono jaa le nde ma lemigi le tata. 21Ŋaa we mbizi bo kayuga, kabila abalaga baa ama avula enkuumu ena nca bo ba amaakura nde oyeri. Bo amaalaba ndi bo ba aja kalogo ŋi bo ba anyua kalogo ŋi eli bo akini buma Poole ŋi. Bo yiga ba anjila jaa lekuru we.» 22Ŋaa komanda dugi ŋa onkere balaga ndi: «Nyina kalyele se mbuuru ma dugi we mi maa.» Ŋa nde nyini nde yeni.
Poole ka miizi a nguverenere Felise
23Komanda cwoli amfumu ba aworo a nde bwele ŋa nde dugi bo ndi: «Lekuzuga ekuumu ba aworo ekuumu jwele (200), ŋa aworo ba baakuma yila akabela ekuumu ncaami (70) ŋa ekuumu ba aworo ekuumu jwele (200) baali ŋa aywo, ŋa leka tele ma kaje Sezare ma tari le owuua ka ekikolo. 24Lekozo se akabela ma kabira Poole tata ka miizi a nguverenere Felise.» 25Nde teendi okanda ndi:
26«Kelode Lisiyase atuma ambulu a nde ma mbuuru woonini, nguverenere Felise. 27AJife ayagi balaga le tumi mi we lia ŋa bo asagi buma nde, ŋaa mi yi bila aworo a mi ma kavuzuga nde. Okorogo mi kiigi ma ayuga ni nde mbuuru aRome. 28Mi sagi ya jaa ye akata aJife nde, ŋaa mi yeni bila nde ka miizi ma Oju wo amfumu ba ankani a bo. 29Mi moni ni bo ba akata nde ma angiri a bo, ŋaa nde ki sa jaa eli abuma nde ma lo ŋi sikali ongeneŋe. 30Ŋa ayiezi mi ni aJife ama akura nde oyeri. Mi kancinci ŋaa kuri ncwumu ma katuma we nde ŋa mi pizi ŋa baba kata nde ma ka ya soso ka miizi a we.»
31Aworo asi ma dugi komanda bo. Bo ayi yaga Poole ŋa kanca lempiibi, bo abiri nde tii Antipatirise. 32Enyuzuga, aworo ba akiigi ma ncye avurugi njo aworo, ŋa bo anyini aworo ba akiigi yila akabela ma kalwono njila bila nde. 33Ŋaa aworo ba akiigi yila akabela ato Sezare, bo ampi kasangumu ma nguverenere, ŋa ayi ŋa nde Poole. 34Nguverenere liri kasangumu ŋa pizi ŋa Poole ndi: «Bungu le we lema?» Poole kaali: « Silisi.» 35Nde dugi ŋa Poole ndi: «Mi ka piza we amaami ntini ye baari ba akati we ato kaŋaa.» Ŋa nde dugi ni bo akyele Poole nca kanini ka njo ka Erode.
Currently Selected:
Esima 23: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
