Esima 24
24
Ekati Poole ka miizi a nguverenere
1Amana ecugu etaani, ompi ambwoŋi woonini Ananyase toyi Sezare bila ankuuru ake ŋa nkani omo nkuumu Teretilise. Bo ayi mvyere njuru ka levuzu le nguverenere Felise ma kasuuza osozo o bo ma nyura Poole. 2Asi kaya Poole. Teretilise akata nde ma kalyele ŋa Felise ndi: «Bizi leka nca kadusu komini, ma puga le we ŋa ma ekaali bila ekuri, ba oyeri o we, ma ove o baari a bizi. 3Mbuuru woonini Felise ma baga bizi aso ŋa ma antini aso ŋa ma ebiri eso, bizi le mpa we leve. 4Ŋaa mi ki jya kayaga antini a we ŋi, ma ema mi ebwono we ma kayuga bizi nceti bila otuma we ye ove. 5Bizi le moni ni balaga li mbuuru woobi. Nde asa ngimiŋa mpila aJife aso baali nca okiri, ŋa nde mfumu a Nazareye ba ba atura njila ye oca. 6Nde se sagi sa maami ake ma kamvyere ndi nde aka nyima Njo Njyami ye cece ŋi, ŋa bizi lekuari nde. [Bizi le sagi pama nde ma ngiri a bizi, 7ŋaa komanda Lisiyase yagi jaa bila nkeri yeenini ŋa mpiini nde ma njiala e bizi 8ŋa ma katuma ba akati nde ma kaya ka miizi a we.]#24.8 Mbari ye ama kanga ([ ]), Ka emani ba olwo wo 6 ŋa ebaani ba olwo wo 8 ba kamono nca amaami kuna ma le eteendi kala ŋi. We abuna piza nde, we amono ma weankulu mini maami aso ma akata bizi nde jaajaa.» 9AJife ayaligi bila Teretilise ŋa bo adugi ndi kiigi jaajaa.
Poole amvyere ka ecwula nde njuru ka miizi a Felise
10Nguverenere si njiimi ma Poole ma kalyele. Ŋa wua yagi mbari ndi: «Mi yayi ni we opami wo kasi ki yiga esibi ekukuna. Mabwa mi ŋa tari leenini ma kacuula njuru a mi ka ovuzu o we. 11We abuna kese ma weankulu, yiga ecugu eki vula ekuumu ŋa jwele ŋi ni mi kumi Jeruzaleme ma kabwono Njyami. 12Mbuuru ki bazaga mi etogo bila mbuuru se omo sikali ka sa ocu onono ŋa lembuuru kali: se ka Njo Njyami, se nca njo ye baabwono, se nca kangundu. 13Baari ba aki buna mvyere we amaami ma ekata bo mi ŋi. 14Ŋaa mi ebuna yalaga ka miizi a we, mi e janja ma Njyami ankaaga a bizi ma kalwono Njila. Ma bo, Njila yia ŋa yeebi. Ŋaa mi, mi ma ayalaga aso ma ateende nca abuku ma aNgiri ŋa ba antuma-Njyami. 15Mi ŋa tari lia ma Njyami, tari leeli ŋa bo ankulu, ŋa baari amwo, baave mva baabi ba anyuzuga nca leku. 16Ŋa meema mi yeligi ma kaje tele bila otuma ocece ka levuzu le Njyami ŋa ka levuzu le abalaga.
17«Amana esibi kuna, mi yi vuruga Jeruzaleme ma kaya yamba baari a mi ma ampara ŋa ma kampa ambwoŋi ma Njyami. 18Ŋaa bo abazigi mi nca Njo Njyami. Mi kiigi mi mana sa kiza le cece. Ŋa kiigi lembuuru bila mi kali, se ngimiŋa kali. 19Ŋaa aJife ake ba bungu le Azi kiigi kaŋa. Ŋa bo kiigi baaka kaŋa ka levuzu le we ma ka kata mi, aka bo ŋa jaa ma mi. 20Sikali ŋaa, ndi baari ba, ka kunu, ba alyele aka mi ma buma mbuuru ma ntini ye kiigi mi ka miizi wo Oju wo amfumu baanini. 21Asemiŋi ma jaa le mi leti nya ka miizi a bo, ma otele: “Mi ŋa tari ma enyuzugi ba baakpakpa ni ba pama mi lubu ka miizi a be.”»
22Felise kiigi amamana yieze yemiŋi yila Njila yia. Nde si kavuruga kampama ma cugu le kima ma kadugi ŋa ba baakata ndi: «Mi e pama jaa le be ntini ye ya komanda Lisiyase.» 23Nde tumi mfumu oworo ndi: «Kyele Poole ma ongeneŋe, ŋaa we mbizi nde ka kura. We mbizi kaliga andigi a nde ma yamba nde.»
Poole ka levuzu le Felise bila Drusile
24Ecugu eke eyira, Felise yi bila onkara nde Durusile; wooli Jife. Nde tumi ma kaje saga Poole ŋa nde yugi kalyele Poole ma lila le Jezu Kirisite. 25Poole kiigi lyele lemigi le kaka le jii Njyami, lemigi le kaka mfumu a weankulu. Nde dugi se ni Njyami aje kapama baari aso. Ŋaa Felise bagi obwogo ŋa dugi ŋa Poole ndi: «Emito e lubu! Ntini mon mi cwolo we.» 26Nde ŋa tari se ndi Poole kiigi ampa nde ampara; ŋa meema nde kiigi sa nde kaya antini ake ma kalyele bila nde. 27Esibi jwele eyira bwa, Poresiyuse Fesetise yagi biri le Felise, ŋaa mva Felise sagi ni aJife amoni ove, nde nyini Poole ma ongeneŋe.
Currently Selected:
Esima 24: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
