Asi Filipe 4
4
1O ŋaa baana ma anguhu a me emavʉla odya, me na njala ovuriha omono be, be omakaaha oswere bɨla ongunja o me! Be lesi mpari mo oka bɨla Nkʉmu baana ma anguhu a me a dya.
Ma ampa andwo
2Kolo kolo e we Evodi, kolo kolo e we Setise, leka jaa lemo mo Nkʉmu. 3Ŋa we ojanja a bɨla me ove, me epɨsa we mo oyamaŋa bo. Obila saa na akaasi ba lemajwana ma letooso le Ncya e Mve, bɨla ŋa Kɨlema na abuha akɨma majanjiha o Krisi ma ali na ankuumi nca osaangumu a lebihi.
4Lecaba antini aso mo osuumbu a be lema vuniŋa bɨla Nkʉmu. Me evuriha oduha: lecaba!
5Ove baari aso ajyabi ove o be. Nkʉmu oya tuha na oya. 6Be leka amonoŋo ongwo ni, ŋa antini aso be lepɨsi na Njyami kiila o be leli na kaama o co nca ovwoni ŋa lepɨsa le kolo kolo na mo ompa leve. 7Ŋaa oduusu o Njyami evʉliha oyeri oso oje okyele etima e be bɨla ecimiŋi e be o Jesu Krisi.
8Ŋa baana ma anguhu, maami a jaa jaa aso maami ma ave aso bɨla a tele, bɨla a ce ce. Maami mabuuna odya, maami mampaaha okiimbi, na eku me ave na maami majuusaha, ove eki nca ecimiŋi e be. 9Lesa maami a me eyisihi be na a be leyahi na me, na a be leyuhi me eduha, na a be lemoni me esa. Ŋa Njyami oduusu aje oka bɨla be.
Pole ampa asi Filipe leve ma apuha a bo
10Me esweri kuna o nca maami a Nkʉmu, mo obila o be ledii me. Be leki lemacwomo na dya jya, ŋa be leki lekini olaha me yo ni. 11Me ewobo vwa ka mbɨri me eli nca kaama ni, me emayiha oyalaha me eli na me. 12Me ejyabi oka nca owuha, me se ejyabi oka nca osolo. Me emayiha oka nca ove me ebiri eso na antini aso, se me emajuriha si kali me eli na njala, se o nca osolo si kali o nca kaama. 13Me obuuna eso mo Krisi ampaaha me mpari. 14Okoroho be lema asa yemiŋi mo oyamaŋa me nca ampasi a me.
15Be ma asi Filipe be anku lejyabi: o ntini mabaani otooso Ncya e Mve, ntini e me ecyehi Asidwane, okuha se omo aka yamaŋa me ni. O ngula be atu lempi me, e me ebahi na e me ekabi. 16Ŋa ntini me eki o Tesalonike, be letumi me biibi e me eki na kaama o jo antini aso. 17Ŋa ka mbɨri me esaha obaha apuha ni: ŋa me esaha mbɨri maami ma ave maa aselehe okuna o mpaniŋi e be. 18Me emabasaha biibi e be letumi me eso, emavʉla na kuna. Ŋaa Epafrodite omiya ŋa me biibi e be letumi na nde, me emi basaha biibi kuna. Apuha maa omakaaha mva ndamini e nculo ove, vwoŋi e Njyami amayalaha, yo se esa nde ove. 19Njyami a me aje ompa be biibi e be le edya, lemihi na osolo a nde ove, mo Jesu Krisi. 20Lekʉma leka na Njyami a Taara a saabe mbumbu! Amene.
Ewoosihi ma lembɨsa
21Be lewoosi epeende eso o nkuumi e Jesu Krisi. Baana ma anguhu ma ali bɨla me mawooso be. 22Epeende eso me ewooso be, vʉli vʉli e njo e Sesare.
23Mpolo e Jesu Krisi eka na oduduma a we!
Currently Selected:
Asi Filipe 4: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
