Asi Filipe 1
1
Ewoosihi
1Me Pole ojanji a Jesu Krisi, me eteende epeende e Jesu Krisi
eso me eli o Filipe, bɨla ŋa ankʉmu mo okuha na ajanji a njo e Njyami. Timote ojanji a Jesu krisi se oli bɨla me: 2Mpolo bɨla oduusu o Njyami a Taara a saabe bɨla Jesu Krisi a Nkʉmu eka bɨla be!
Pole ampa Njyami leve ma akritye a Filipe
3Me empa Njyami a me leve antini aso a me ecimiŋa o be! 4Antini aso me evwonoho o be aso, me ovwonoho bɨla oswere. 5Mo obila o be lemajanja bɨla bisi mo otooso Ncya e Mve, mo obaana o cuhu e ncomi tii ngo o lobi. 6Ŋaa me eyaa mbɨri: Njyami mvuuru abaani janja e mve ji o mpaniŋi e be, nde aje oselehe oje na yo vusu, tii ngo e nde amana yo o cuhu e Jesu Krisi aya na avuriha. 7Yo omakaaha ŋaa jaa e tele mo osuumbu a me ecimiŋa o be aso, ŋa be leli o nca otima a me. Obila be se leli o nca mpolo e Njyami amampa me, se o me eli mo ongeneŋe ŋa, o ntini e me eduha me ejisya Ncya e Mve. 8Ee Njyami amono me, me na njala omono be, obila me emadya be aso o dya yo mini e ma Jesu krisi.
9Ŋa lemono maami a me epɨsa na Njyami nca ovwoni a me: dya le be leselehe onyehe bɨla leyaa na leyuha le yemihi, 10mo oyimba jaa e mve. Mo vwa be leka ce ce bɨla opeende o cuhu e Krisi aya na avuriha. 11Be leje oluula ma lebihi lemagwana ediiŋi e nde, lebihi ma amampa saabe mo Jesu Krisi, ma lekʉma na lekuusa le Njyami.
Ncya e Mve eje na vusu
12Baana ma anguhu, me esaha be lejyaba mbɨri: maami ma ayiri o me asi ndi Ncya e Mve eselehi oje na vusu. 13Ŋa se o nca njo lepatima si kali me ebiri ekɨma, baari aso amimana oya ndi me ongeneŋe a mo janja e Krisi. 14Baana ma anguhu kuna maselehe oyaasa anyuru o Nkʉmu obila mo ongeneŋe a me. Bo vwoho kali, bo maselehe osa kaa mo otooso mbari e Njyami.
15Baari ake matooso Krisi bɨla mfunwamwo ŋa yala, maamo se matooso bɨla otima ove. 16Ba masyaha bɨla dya. Bo ayaa ndi me eli kuuni ŋa mo owobo ma lengulu le Ncya e Mve. 17Maamo matoosoho Krisi bɨla odidima a yala, ecimiŋi e bo se ka ce ce ni. Bo macimiŋa ndi bo maselehe oluusa me mpasi mo ongeneŋe.
18Ŋa mpɨni esiihi! Se nca ecimiŋi me ebi se nca asisyele, amatooso Krisi. Ŋa me emono ove! me eje oselehe omono ove. 19obila me jyabi mbɨri maami maa aso ma asa bu ndi me evuuha. Obila ma evwoniŋi e be na Oduduma a Jesu Krisi se ayamaŋa. 20Mo oma maami a me edɨla bɨla a me elehe lila yemihi o mo, me miisi ma aka bye mo okʉru ni. Ŋa me ŋa lila leso se lobi se mbumbu, ma aje omono onini o Krisi o me, se me eli mwo se me emakwa. 21Obila mo me, lebihi omakaaha Krisi, leku gʉra. 22Ŋa yuhu lebihi o yula ncye le empa me lengulu mo osa jaa e mve, o ŋa me i yaa kiila o me eswolo ni. 23Ŋa me eli o mpaniŋi e maami maa mwele: me na njala oje ŋa aka bɨla Krisi, vwa evʉli ove . 24Ŋa leka le yula ncye levʉli ove obila o be. 25Me jyabi sisyele, me ejyabi mbɨri me eje osiila me eka bɨla be aso, mo yamaha be leselehe oje na vusu, na oswere mo oyalihi o be. 26Ma ekiihi e me, be leje obaha o ngula me ancwo mo oselehe oswere o Jesu Krisi.
27Okoroho be lesi lebihi le eve, mva e Ncya e Mve e Krisi eduha. Mo bu ndi yuhu me eya na amono be si kali me ŋa kali, me eje oyuha mawobo ndi be lemavuniŋa mo odidima omo, be lejwana otima omo ma oyalihi o ma Ncya e Mve. 28Be leka monoŋo vwoho ma abuha mo ombagu ni, kari omakaaha ŋa ndiimi e bo ma aminywoŋo, be lemivuuha, ŋa mo mpolo e Njyami. 29Ŋa be lemabaha mpolo mo ojanja mo Krisi. Ka mo oyalihi o be le emalehe o nde otu ni, ŋa na ampasi a be lemono o nde. 30Be lejwana ngʉru mva o be lemoni me ejwana, be lejyabi mbɨri me ekini ejwana.
Currently Selected:
Asi Filipe 1: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
