Asi Efese Ebaanihi
Ebaanihi
Ntini e Pole ateendihi Osaangumu ŋa asi Efese ki, ekuha ekuni nca Asi minere, ma aya macwoloho mo Tirki lobi. Jo eki me ewooso abuha. Mo opiinga a nde o tari a mo janja e Njyami, nde osi esibi etari ŋa Efese. Lemono o nca Aj 19.1 tii ngo ( Aj 20.1 ) Mo baari ake pole aki mo ongenehe o ntini e nde ateendi osaangumu ki. Kya obila maduuha ndi co osaangumu «ongenehe», bɨla ŋa osaangumu asi Filipe bɨla Filemo na asi Kolose (Ef 3.1 bɨla 4.1). Ŋaa osaangumu ki aka atuma ma asi Efese atu ni. Ŋaa co ni osaangumu mva me emo me eyirihi me ekuha. Co amatuma mpili ekuha mo osyese Asi Minere. Ekuha bya eso eki eya mpari kali, obila ma anjyami mo oco oca maduuhi ndi mpari e mve si kali e mbi eyira me esi. Osaangumu olaha maami a Njyami amayeese mo ovusuha baari. Krisi omabuuna maami ma abi aso.
Jaa e simi simi
Osaangumu ebaana ma lekasaha le Njyami (Efe 1). Ndosoho e mve etuma mvuuru aliira omono mpari e Njyami ejanjiha ma asi baanaha. Janja jya malaha yo mo Jesu Krisi. Baari a yula ncye aso mavunuha. Oduduma Santi oli bɨla baari ma amayalaha Ncya e mve e Njyami. Emana ŋaa mavwono mo Krisi, nde amikiriha nkʉmu Okuha me enyusihi e nde e nca leku.
Mabaana opasa maami (Efe 2-3). Jaa yo mini, mo maami mayiri na kala ma leku bɨla lebihi le mo Krisi le lobi! Krisi na okwa, nde omavusuha Ajife bɨla baari ma ali ka Ajife ni, mo owaanga baari mo omwo ma anyarihi. Nca Okuha janja e ntuma bɨla baari ma amayalaha, omakaaha mo ojanja o maami a Njyami alahi me evusihi.
O nca maami maa aso, osaangumu ki elaha osuumbu ali Okuha: «nyuru e Krisi» ( Efe 4-1. 6.9 ). Co se elaha osuumbu alwoni a Krisi ma aka jaa le mo lobi, na lekyele la ankwono o nca etohi e bo.
Emanihi me eduha saabe oka yemihi o ntini ampasi (Ef 6.11-13) na leyaha le biibi mo ojwana eta e Njyami ampaaha, na mo ovwono antini aso ( 6.14-20 ). Nde amana osaangumu o nde mo owooso na lempa la andosoho ( 6.21-24 ).
Ayisihi a mbari e Njyami kuna aduhi ndi Pole ka mvuuru ateendi osaanngumu ki ni. Ŋa olwoni omo o nca alwoni ma aki bɨla nde. Co ateendi mo osibi ekuumi mfwomo (80), Pole oki omakwa. Okoroho ake maduha ndi co osaangumu o Pole. Nde ateendi co leke nca ongenehe o Rome, me esibi me ekuumi esyami (60).
Osaangumu ŋa Efese kuna lekuusa le Njyami. Co empa oyalihi o saabe mpari, ma asi baanaha maami aso. Ŋaa maami aso ali o nca jyala e Krisi.
Mo oselehe oje la
Aki amalaha nca osaangumu ŋa asi Korete o ncomi, osuumbu Okuha ali «nyuru e Krisi». Okuha bɨla Krisi omakaaha mvuuru omo otu. Osaangumu ŋa asi Efese eyaha maami ake nca osaangumu asi Kolose. Emana co oluusi akɨma ma co osuumbu. Krisi oya «ocwi» Okuha, ŋa Krisi Nkʉmu. Krisi omampa lebihi le nde anku obila mo dya.
Currently Selected:
Asi Efese Ebaanihi: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES