Asi Efese 1
1
Ewoosihi
1Me Pole, me ntuma a Jesu Krisi a me ediiŋi e Njyami.
Me eteende asi Efese ma ali o Njyami, ma ali tele, ma ali jaa mo bɨla Jesu Krisi. 2Njyami a Taara a saabe bɨla Jesu a Nkʉmu ampa be mpolo bɨla oduusu!
Eve e Njyami amampa saabe mo Krisi
3Lekuusa Njyami a Taara a Nkʉmu a saabe Jesu Krisi! Nde omampa saabe andosoho aso a mo oduduma o yulu, me ekihi e saabe bɨla Krisi. 4Nde aki amabaana oswolo saabe mo oka o nde, aki akini owaanga ncye ni. Mo bu ndi saabe leka epeende, saabe leka tele o miisi a nde. O nca dya le nde, 5Njyami aki amabaana oduha ndi nde asa bu ndi saabe leka baana a nde a mbaha mo Jesu Krisi. Jya jaa e nde adii nca ove o nde. 6Saabe lekuusa lekʉma le Njyami mo mpolo e mve e nde amampa saabe ngori mo Mwana a nde ŋa amavʉla odya.
7Saabe lemavuuha nca maami ma abi mo tohi e Krisi ecoli, ambiini a saabe amiboloho se. O ŋaa, Njyami omalaha saabe osolo a mo mpolo e nde. 8Njyami ompi saabe eve e nde e kuna kuna. Nde ompi saabe ncimi bɨla oyeri bo mini. 9Nca ove o nde, nde omasa saabe oyaa maami a ma ajisihi a ma ediiŋi e nde, a nde aki amabaana odya osa. Nde alaha mo, mo Krisi. 10Maami maa, a Njyami aje obira tii ngo ma aje omono mo ma antini ma lembɨsa, omakaaha lekusuha le biibi eso me eli o yulu bɨla ncye o yula nkʉmu omo otu Krisi.
11Me ekihi e saabe bɨla nde, saabe lemabaaha buhu ma aki ma amalehe saabe ndayi. Obila Njyami omabaana oswolo saabe me ediiŋi e nde. Nde se osyaha maami aso, lemihi na maami a nde aduhi na a nde adii. 12Saabe lekuusa onini o Njyami, saabe baari ma levusu lelehi lila o Krisi!
13Be se, ntini e be leyuhi mbari e nde asisyele, ncya e mve evusihi be, be lelehi oyalihi o be o Krisi. Ŋa Njyami omalehe ndiimi e nde anku o yula be, ma lempa le be Oduduma Santi malehi ndayi. 14Oduduma Santi omakaaha buhu e ncomi le wanda e Njyami ayeesi mo baari a nde. Nde aduha saabe jaa jaa ndi saabe leje obaha yo o ntini evuuhi e saabe me eje oka mbumbu. Saabe lekuusa onini o Njyami!
Ovwoni a Pole
15Kya obila eli me se, me emayuha mawobo mo oyalihi o be o ma Jesu a Nkʉmu, na dya le be me epeende e Krisi eso. 16Me i kolo mo ompa Njyami leve mo be ni. Me ecimiha o be o nca evwoni e me. 17Me se epɨsa na Njyami a Nkʉmu a saabe Jesu Krisi, na Taara ali na lekʉma, mo ompa be Oduduma a ncimi aje olaha na osa be ojyaba nde yemihi. 18Nde onaana etima e be mo oyalala o nde, mo bu ndi be leyaa lila, le nde amacwolo be o lo. Be leje oyaa osolo lekʉma le nde bɨla owali o wanda e nde ampa epeende e nde. 19Be leje omono mpari yo mini eli o nde mo saabe baari lemayalaha Krisi. Mpari jya omakaaha ni yi yo e Njyami amalaha mpari e nde eso, 20o ntini e nde anyuusi Krisi o mpaniŋi akwi. Nde se onyili nde o nci o yulu mo kwoho o nde olumi. 21Krisi ovʉli onkani oso, na onkʉmu oso, na mpari bɨla eso me ekuumaha, na ankuumi aso mabuuna obuusa. Ka o ntini ji ntu ni, ŋa na o ntini eje oya se. 22Njyami omalehe biibi eso o ncina nyiili e Krisi, nde akuumaha o yula biibi eso. Krisi omakaaha nkʉmu Okuha. 23Okuha omakaaha nyuru e Krisi. Krisi oli mo okuha, nde omaluula o yulu bɨla ncye eso.
Currently Selected:
Asi Efese 1: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
