ABhaluumi 16

Ɨndamuho zya Paulo hwa bhooziwa abha hu Luumi

1Ɨhwanza mumanye huje ʉFoyibe yɨlʉmbʉ weetu mu lwɨtɨho, muntu mwinza, nantele mʼmomvi wɨ shibhanza sha shili mwi‑ibooma ɨlyɨ Kenkeleeya. 2Ɨlaabha mumʼmwambɨɨlɨle shinza pɨpo mwoziwa wa Mwɨnɨ ʉYeesu. Abhombe ɨsho hwa huhwanziwa abhantu bha Ngʉlʉbhɨ abhombe. Nantele, ɨlaabha huje mumʼmwavwe hohonti ɨho ahwanza, pɨpo ʉmwene ahabhavwizye abhantu abhinji, peeka naanɨ ahanavwizye.

3Mubhalamushe abhabhomba mbombo abhamwetu, ʉPulisiila nʉ nʼnume waakwe ʉAkila. Ɨbho bhope bhabhomvi bhamwetu mu mbombo ya Yeesu ʉKilisiti, 4nantele bhahapalamiiye ateezye ʉwʉʉmi waabho hu nongwa yaanɨ. Saga nɨmwene ɨhubhasalifya, leelo hwope na bhantu ɨbho saga Bhayahuudi mu vibhanza vyonti, bhope bhahubhasalifya tee. 5Nantele, mubhalamushe abhooziwa ɨbho bhabhʉngaana mu nyumba ɨya Akila nʉ Pulisiila. Munʼnamuhaje ʉnʼkʉndwe waanɨ ʉEpayineeto, ʉyo ʉmwene ahali wa hwande humʼmwɨtɨshe ʉKilisiti huula hu mukowa ʉgwɨ Aasiya.

6Mundamushile ʉMaliya, ʉyo ahabhombile ɨmbombo hu dandamazu hu nongwa yeenyu. 7Munʼnamushe ʉAnduloniiko nʉ Yuniiya ɨbho bhope Bhayahuudi bhamwetu, ɨbho bhahakʉngwɨlwe peeka naanɨ mu hoobhe. Ɨbho bhahantagaliiye anɨ humʼmwɨtɨshe ʉKilisiti, nantele bhatinihwa tee muuhati ya bhasontwa.#16:7 bhatinihwa tee muuhati ya bhasontwa Abhamanyiihanyi abhanjɨ abhi‑Ibhangili bhayiga, bhamanyiishe tee muuhati ya bhasontwa.

8Mundamushile ʉAmpuliyaato, ʉnʼkʉndwe waanɨ nantele mwoziwa wa Mwɨnɨ ʉYeesu ʉKilisiti. 9Munʼnamushe ʉnʼkʉndwe waanɨ ʉSitaaku nʉ mʼmomvi ʉwamwetu ʉUlubaano wa‑ali mʼmomvi wa Kilisiti.

10Mundamushile ʉApeele, ʉyo ahashiliiye mu njelo ɨnyinji na hwɨtɨshɨlwe nʉ Kilisiti, nantele mubhalamushe abhantu abha mu nyumba ya Alisitobuulo.

11Mundamushile ʉHelodiyooni, ʉNʼnyahuudi ʉwamwetu, na bhantu abha mu nyumba ya Nalikiiso, ɨbho bhahumʼmwɨtɨha ʉMwɨnɨ ʉYeesu ʉKilisiti.

12Mundamushile ʉTilifayiina nʉ Tilifoosa. Abhashɨ ɨbho bhadandamala tee abhombe ɨmbombo ya Mwɨnɨ ʉYeesu. Nantele, munʼnamushe ʉnʼkʉndwe waanɨ ʉPelisiisi. Ʉnʉ wope nʼshɨ ya‑ahabhombile ɨmbombo ɨya Mwɨnɨ ʉYeesu hu dandamazu.

13Mundamushile ʉLuufo ʉnʼsalulwe wa Mwɨnɨ ʉYeesu, nʉ nyina waakwe ʉyo ahanavwizye tee anɨ nanshi huje nyina waanɨ.

14Nantele, mundamushile ʉAsinkiliito, ʉFulegooni, ʉHelime, ʉPatilooba, ʉHelima na bhooziwa abhanjɨ ɨbho bhali peeka nabho.

15Mundamushile ʉFiloloogo nʉ Yuliiya, ʉNeleeya nʉ yɨlʉmbʉ waakwe, ʉOlimpa na bhooziwa bhonti ɨbho bhali peeka nabho. 16Mulamuhanaje hu kʉndwa wa Yeesu ʉKilisiti. Abhooziwa bhonti abha mu vibhanza vya Kilisiti ɨbho bhali ʉhwu bhahubhalamuha.

Ɨnsundo zya Paulo

17Ɨshi bhooziwa bhamwetu, ɨhubhabhʉʉzya huje mubhanje maaso na bhantu ɨbho ɨmanyizyo zyabho zihubhabhomba abhooziwa huje bhabagulane ɨmpʉga nɨ mpʉga, nantele zinangaanya ʉlwɨtɨho nɨ njendo zyabho. Khalaji hutali nabho, pɨpo ɨmanyizyo zyabho zilegana nɨ‑ɨzyo mwahamanyiziiwe. 18Lyoli, abhantu ɨbho saga bhahumʼmombela ʉMwɨnɨ weetu ʉKilisiti, leelo bhahuvibhombela ɨvyanda vyabho bhɨɨbho. Mu gobezi waabho, bhayanga amazwi aminza na ga hwikhondeezye, fwandi bhagobela amooyo ga bhooziwa bha bhali nʉ lwɨtɨho ʉludoodo. 19Bhonti bhʉmvwɨzye huje amwɨ mwɨtɨɨshe shinza izwi lya Ngʉlʉbhɨ. Ahantu ɨho ɨseshela tee anɨ. Hwope ɨsho, ɨhwanza huje mubhanje nɨ njeele mu nongwa ɨnyinza, nantele mubhanje hutali nɨ mbiibhi. 20Ɨshi, ʉNgʉlʉbhɨ wa‑aleeta ʉtengaanu anza hunʼkhanye nalinaali ʉSeetano#16:20 ʉSeetano Bhaazya izwi Seetano hu Ngalulanyo ɨyɨ Mazwi aMajenu hu malishilo wɨ shitaabu ɨshi. na hubhapeele amwɨ ikhone ɨlya humʼmene. Ɨmpyana ya Mwɨnɨ weetu ʉYeesu ʉKilisiti ɨbhanje peeka naamwɨ.

21Ahubhalamuha ʉTiimoti ʉyo mʼmomvi wamwetu. Nantele, aBhayahuudi abhamwetu ʉLukiiyo, ʉYaasoni nʉ Sosipaatulo bhahubhalamuha. 22Nanɨ nɨTetiiyo, wɨ‑ɨndi nʼsimbi wɨ nongwa ɨzyɨ kalaata ɨnɨ ɨya Paulo, ɨhubhalamuha mwi‑itaawa lya Mwɨnɨ ʉYeesu. 23ɄGaayo ahubhalamuha, ʉyo mu nyumba yaakwe mwa mwʉmwo ɨkhala anɨ nɨPaulo, nantele mwa mwʉmwo ɨshibhanza shonti ɨsha Mwɨnɨ ʉYeesu shibhʉngaana. Nantele, ʉElaasito ahubhalamuha, ʉyo mwenyeelezi wɨ mpɨɨya ɨzi‑ibooma ɨli,#16:23 Ibooma ɨlyo lumo libooma lyɨ Kolinto. wope ʉKwalito ʉmwoziwa ʉwamwetu ahubhalamuha. 24Ɨmpyana ya Mwɨnɨ weetu ʉYeesu ʉKilisiti ɨbhanje naamwɨ mwenti. Aameni.#16:24 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.

ɄPaulo ahumʼmwamiha ʉNgʉlʉbhɨ

25Ɨshi, amwamihwaje ʉNgʉlʉbhɨ! Ʉmwene ali ni‑ikhone ɨlya hubhakhamantanye amwɨ ashilile ɨNongwa ɨNyinza zya zyahalʉmbɨlɨɨlwe huliimwɨ hu nongwa ya Yeesu ʉKilisiti. Ɨnongwa ɨzyo zyahafisiilwe afume halɨ, 26leelo ɨshi zibhɨhwɨlwe pa pazelu. Ashilile mu Nsimbo ɨMfinjile ɨzya bhakuwi, ɨnongwa ɨzyo zimanyiihana hwa bhantu abhɨ vikholo vyonti mu nsi. ɄNgʉlʉbhɨ ʉwa wiila ya yʉʉyo alajiziizye ɨlyoli ɨyo ɨyangwe hwa bhantu huje, abhantu ɨbho bhamʼmwɨtɨshe ʉMwɨnɨ ʉYeesu na‑alondolezye ʉkʉndwe waakwe.

27ɄNgʉlʉbhɨ mwene wa‑ali nʉ tengulizu wonti, amwamihwaje ashilile hwa Yeesu ʉKilisiti wiila na wiila! Aameni.

Currently Selected:

ABhaluumi 16: SBK

Highlight

Copy