ABhaluumi 15

Ʉgandi ahwikhondeezye wʉmwene, lyoli ʉbhe ʉhubhakhondeezya abhanjɨ

1Ɨshi, atɨ ta tijinile mu lwɨtɨho, ɨhwanziwa tijimbiilile ʉdedebhazu ʉwa bhaala ɨbho saga bhajinile mu lwɨtɨho,#15:1 ɨhwanziwa tijimbiilile ʉdedebhazu ʉwa bhaala ɨbho saga bhajinile mu lwɨtɨho Abhamanyiihanyi abhanjɨ abhi‑Ibhangili bhayiga, ɨhwanziwa tibhaavwe bhaala ɨbho saga bhajinile mu lwɨtɨho. tileshe ahwikhondeezye tɨɨtɨ. 2Shila muntu muliitɨ adandamale abhombe aminza ga gahunʼkhondeezya ʉmwoziwa ʉwamwabho huje ajendelelaje ajine mu lwɨtɨho. 3Wope ʉKilisiti yʉʉyo, saga ahwikhondezɨɨzye yʉʉyo lwene, leelo ɨgo ahabhombile gahasimbwilwe mu Nsimbo ɨMfinjile ɨzyo ziyiga,

“Ɨndigo ɨzyo bhahuliga aawe wʉNgʉlʉbhɨ,

zyahanaajile anɨ.”#Bhaazya ɨNsalifyo 69:9.

4Gonti ɨgo gahasimbwilwe ɨmandɨ mu Nsimbo ɨMfinjile, gahasimbwilwe hu nongwa ɨya hutimanyizye huje tibhe nʉ lusʉʉbhɨlo, ʉhwu tijimbiilila amayɨmba na‑ajinjiziwe ʉmwoyo hwa tihwambɨɨlɨla afume mu Nsimbo ɨMfinjile ɨzyo.

5Ɨlaabha huje, ʉNgʉlʉbhɨ ʉyo ahutaavwa ajimbiilile na hutijinjizye ʉmwoyo, abhabhombe huje mulembaje mu lwʉmvwano, pɨpo muhunʼnondolezya ʉYeesu ʉKilisiti. 6Ɨpo pa pɨɨpo amwɨ mwenti munza‑abhe muhumʼmwamiha ʉNgʉlʉbhɨ, ʉDaada ʉwa Mwɨnɨ weetu ʉYeesu ʉKilisiti hu nsɨɨbho yeeka na hwi‑izwi lyeka.

ɄNgʉlʉbhɨ ahubhɨɨtɨha aBhayahuudi na bha saga Bhayahuudi

7Ɨshi, ambɨlɨlanaji mwɨmwɨ hu mwɨmwɨ nanshi ɨsho ʉKilisiti ahabhambɨlɨɨye amwɨ, huje abhantu bhamʼmwamihaje ʉNgʉlʉbhɨ. 8Ɨhubhabhʉʉzya amwɨ huje, ʉKilisiti ahɨnzɨle abhe mʼmomvi wa Bhayahuudi huje abhonesye huje ʉNgʉlʉbhɨ wɨ lyoli. Hwi‑idala ɨlya Kilisiti, ʉNgʉlʉbhɨ asimishiziizye ɨmfingo zyonti ɨzyo ahabhalapiiye abhamaama bhaabho. 9Nantele, ahɨnzɨle huje abhantu ɨbho saga Bhayahuudi bhamʼmwamishe ʉNgʉlʉbhɨ hu nkʉmbʉ yaakwe, nanshi ɨsho ɨsimbwilwe mu Nsimbo ɨMfinjile huje,

“Ɨshi, ɨnza huteelele ɨnteelo ɨzya husalifye

pitagaalila lya bhantu ɨbho saga Bhayahuudi.”#Bhaazya 2 Samweli 22:50; ɨNsalifyo 18:49.

10ƗNsimbo ɨMfinjile nantele ziyanga huje,

“Amwɨ mubhantu mwa saga muli Bhayahuudi,

seshelaji peeka na Bhayahuudi ɨbho bhantu bha Ngʉlʉbhɨ.”#Bhaazya ɨNyiizuho 32:43.

11Nantele ziyiga,

“Amwɨ mubhantu mwa saga muli Bhayahuudi,

mʼmwamihaji ʉMwɨnɨ ʉNgʉlʉbhɨ.

ɄNgʉlʉbhɨ amwamihwaje na bhantu abhɨ vikholo vyonti ɨvya mu nsi!”#Bhaazya ɨNsalifyo 117:1.

12Wope ʉnʼkuwi ʉYesaaya ahajile,

“Ʉmuntu ʉmo mu mpaapo ɨya Yeese ahayɨnza,

wope ahayilongozya ɨvikholo vyonti,

bhope abhantu ɨbho saga Bhayahuudi bhahayihunʼsʉʉbhɨla huje ahayihubhafyʉla.”#Bhaazya Yesaaya 11:10.

13Ɨshi, ɨhubhapuutila mubhe nʉ tengaanu nɨ nseho ɨnyinji hu habhaazyo ɨho mujendeelela humʼmwɨtɨshe ʉNgʉlʉbhɨ, ʉyo tisʉʉbhɨla huje anza‑abhombe gonti ɨgo ahatilapiiye. Ɨpo pa pɨɨpo mwahayibha nʉ lusʉʉbhɨlo ʉlugoosi afumilane ni‑ikhone lya Mʼpepo ʉMʼfinjile.

ɄPaulo ayanga ɨmbombo yaakwe

14Bhooziwa bhamwetu, anɨ nɨɨnɨ ɨmɨɨnye hu lyoli huje amwɨ muli bhantu bhinza, mumɨɨnye sha muhwanziwa abhombe, nantele amwɨ mubhajiiye amanyizanye. 15Hwope ɨsho, ɨmbasimbiiye ɨnongwa zimo pa pazelu sinta wooga huje ɨmbiizusye ɨvintu ɨvyo. Ɨmbombile ɨsho alɨngaane nɨ mpyana ɨyo ʉNgʉlʉbhɨ ampiiye anɨ, 16huje ɨmbe mʼmomvi waakwe ʉYeesu ʉKilisiti hwa bhantu ɨbho saga Bhayahuudi. Hwa huje, nahabhombɨɨshe nʼsayi wa hubhalʉmbɨɨlɨle ɨNongwa ɨNyinza ɨzya Ngʉlʉbhɨ, huje bhabhe nanshi ɨnsangu zya zihunʼkhondeezya ʉNgʉlʉbhɨ, zya zisangalusiiwe nʉ Mʼpepo ʉMʼfinjile.

17Ɨshi, afumilane na‑apatiihanywe nʉ Yeesu ʉKilisiti, ɨmbajiiye ahwibaade lwɨ‑ɨhumʼmombela ʉNgʉlʉbhɨ ashilile hwa mwene. 18Nanɨ saga ɨnza‑ayanje ahantu hohonti ahanjɨ, leelo gaala lwene ɨgo ahabhombile ʉKilisiti ashilile huliinɨ hubhabhombe abhantu ɨbho saga Bhayahuudi huje bhanʼtinishe. Ahabhombile ɨsho hu mazwi gaanɨ na hu njendo zyanɨ, 19ashilile ɨvimanyishizyo na mayele#15:19 mayele Bhaazya izwi Mayele hu Ngalulanyo ɨyɨ Mazwi aMajenu hu malishilo wɨ shitaabu ɨshi. aminji ɨgo nahabhombile hwi‑ikhone ɨlya Mʼpepo ʉMʼfinjile. Ɨshi nahazyʉngʉlɨɨye shila pantu alʉmbɨɨlɨle ɨNongwa ɨNyinza ɨzya Yeesu ʉKilisiti ahwande mwi‑ibooma ɨlyɨ Yelusaleemu afishe mu mukowa ʉgwɨ Iluliiko. 20Mu gonti ɨga, ʉkʉndwe waanɨ hwa huje alʉmbɨɨlɨle amazwi ɨmbali ɨzyo abhantu saga bhalɨnjɨle alʉmbɨɨlɨle ɨNongwa ɨNyinza ɨzya Kilisiti. Ɨmbombile ɨshi, huje ɨngandi aweelele ahwanzisye shipya ɨmbombo ɨmbali ɨzyo ʉmuntu ʉwɨnjɨ ahali alʉmbɨlɨɨye. 21Ɨsho ɨmbombile huli nanshi sha yahasimbwilwe mu Nsimbo ɨMfinjile huje,

“Abhantu ɨbho saga bhahabhʉzɨɨwe ɨnongwa zyakwe, bhahayihuzilola,

nantele abhantu ɨbho saga bhahʉmvwɨzye, bhahayihuzimanya.”#Bhaazya Yesaaya 52:15.

Ɨnsɨɨbho ya Paulo ɨya‑abhale mwi‑ibooma ɨlyɨ Luumi

22Ɨmbombo ɨyo ya yɨɨyo hahinji yahandindizyaga ahwɨnze huliimwɨ. 23Leelo ɨshi, ɨmalile ɨmbombo yaanɨ ʉhwu hwɨ‑ɨndi, ɨshi ɨnyonywa ahwɨnze huliimwɨ nanshi ɨsho nahali ɨsɨɨbha hu maaha aminji. 24Ɨshi ɨsʉʉbhɨla hubhayaatile na‑akhale peeka naamwɨ hu habhaazyo hashe, hu habhaazyo ɨho ɨshila huliimwɨ abhale hu nsi ɨyɨ Yisipaniya. Ɨlaabha mwahanaavwe ɨsha‑afishe hu Yisipaniya.

25Leelo ɨshi, ɨmbala hu Yelusaleemu atwale ɨvya hubhaavwe abhooziwa abhamwetu abha huula. 26Abhooziwa abha hu mukowa ʉgwɨ Makedoniya na hu mukowa ʉgwɨ Akaaya bhahalolile shinza afumye ɨvintu vyabho ɨvya hubhaavwe abhooziwa abhapɨɨna bha bhali hu Yelusaleemu. 27Abhooziwa ɨbho bhahabhombile ɨsho hu luseshelo, nantele lyoli bhahwɨsɨwa hubhaavwe abhapɨɨna ɨbho. Enya, nkashele abhantu bha saga Bhayahuudi bhali peeka na Bhayahuudi mu nsayo ɨzyɨ fyʉli ashilile hwa Bhayahuudi, ɨshi bhope bhahwanziwa hubhaavwe aBhayahuudi ɨnongwa ɨzyɨ mʼbɨlɨ hu vintu vyabho ɨvyo bhali navyo. 28Lwa naamala ɨmbombo ɨya hubhapeele abhooziwa abha hu Yelusaleemu ɨvintu ɨvyo vyonti, nahayɨnza hubhashilile amwɨ hu habhaazyo hɨ‑ɨndi mwi‑idala abhale hu Yisipaniya. 29Ɨmɨɨnye huje, hu habhaazyo hɨ‑ɨndi huliimwɨ, ʉKilisiti ahayisaya tee ahabhaazyo aha‑akhale peeka, anɨ naamwɨ.

30Bhooziwa bhamwetu, alɨngaane nʉ lwɨtɨho lwetu mwa Mwɨnɨ weetu ʉYeesu ʉKilisiti, na‑alɨngaane nʉ kʉndwa ʉwo ahutipeela ʉMʼpepo ʉMʼfinjile, ɨhubhalaabha hu mwoyo gwanɨ gwonti mujendelelaje tee abhe peeka naanɨ humpuutile anɨ hwa Ngʉlʉbhɨ. 31Mumputilaje, huje bhagandi humbombele anɨ ʉbhiibhi abhantu bha saga bhamʼmwɨtɨɨshe ʉYeesu ʉKilisiti huula hu mukowa ʉgwɨ Yudeeya.#Bhaazya ɨMbombo ɨzya Bhasontwa 21:27-36. Nantele mumputilaje huje, abhooziwa bha Kilisiti huula hu Yelusaleemu bhɨɨtɨshe ahwambɨɨlɨle ɨvintu ɨvyo ɨhubhatwalila. 32Ɨshi, nkashele ʉNgʉlʉbhɨ asʉngwa, nahayɨnza huliimwɨ hu luseshelo tee, huje ɨmbe na habhaazyo aha‑atʉʉye peeka naamwɨ. 33Ɨhunʼnaabha ʉNgʉlʉbhɨ ʉyo ahubhapeela ʉtengaanu, abhe naamwɨ mwenti! Aameni.

Currently Selected:

ABhaluumi 15: SBK

Highlight

Copy