ƗMbombo ɨzya Bhasontwa 28

ɄPaulo hu nsi ɨyɨ Meelita

1Lwa tafyʉlwa mu nsʉmbi, tahamanya huje, tili mu nsi yɨ‑ɨli paahati yɨ nsʉmbi. Itaawa lyakwe bhahagaga ɨMeelita. 2Abhakhaaya abha pa Meelita bhahatejelɨɨye shinza tee. Bhahatipembela ʉmwoto ʉgwa hwote, pɨpo ɨmvula yahatoonyaga, nantele hwahali ni‑isasa. 3ɄPaulo ahatenya ɨnkwi nyishe, ahazibhɨɨha mu mwoto. Pɨɨpo, ɨnzoha yahafuma mu nkwi ziila hu nongwa yi‑ilyoto ɨlyɨ mwoto. Ɨnzoha yahanʼnuma na hunʼsyempeele ʉPaulo mu nyoobhe. 4Abhakhaaya abha paala lwa bhaalola huje, ɨnzoha ɨla ɨlembeela mu nyoobhe ya Paulo, bhahabhʉʉzanya bhahaga, “Bhaya! Ʉmuntu ʉnʉ, nʼgoji. Hwope nkashele afyʉlɨɨlwe mu nsʉmbi, ʉngʉlʉbhɨ weetu wa bhayiga Nʼgolosu saga amʼmwɨtɨshɨɨye huje, abhe mwʉmi.” 5Ɨpo ʉPaulo ahayisanyantila mu mwoto ɨnzoha ɨla, leelo saga ahavwalɨɨye nka pamo. 6Abhantu bhaala bhahasɨɨbhaga aje, ʉPaulo anza‑atutubhe awe agwe pa nsi lubhilo, na‑afwe. Bhahagʉʉla hu habhaazyo ahatali hashe, sha bhahwenya ha habhala humʼmwaje. Lwa bhaalola huje nahamo ha hamʼmwajile, bhahagalulanya ɨnsɨɨbho zyabho, bhahanda ayanje huje, “Ʉmuntu ʉnʉ saga nʼgoji, ali palishimo mwa bhangʉlʉbhɨ bheetu!”

ɄPaulo ahumʼponia ʉyise wa nʼnongozi ʉwa hu Meelita

7Pa tahootaga ʉmwoto, pahapalamɨɨne nʉ nʼgʉnda gwa nʼnongozi ʉwɨ nsi ɨla ɨyɨ Meelita. Itaawa lyakwe ahali yʉ Pubiliyo. Ʉnʼnongozi ʉyo ahatambɨlɨɨye shinza hu khaaya yaakwe. Ɨpo tahadɨɨla ɨnsiku zitaatu. 8Hu habhaazyo ɨho, ʉyise wa Pubiliyo ahagonile pa shitala, pɨpo ahabhinile ɨnzegema na‑ahalisye idanda. ɄPaulo ahatʉʉha muuhati muula mwa‑ahali ʉmʼminu. Ahamʼmɨɨshɨla ɨnyoobhe, ahapuuta hwa Ngʉlʉbhɨ, ahamʼponia. 9ɄPaulo lwa wamʼponia ʉmuntu ʉla, ɨpo abhabhinu abhanjɨ bhonti abha mu nsi ɨyɨ Meelita bhahamʼmwɨnzɨlaga ʉPaulo. Wope ahabhaponiaga. 10-11Abhantu bhaala bhahatitiniishe haani.

ɄPaulo afiha hwi‑ibooma ɨlyɨ Luumi

Ɨshi lwa taamala ameezi gataatu mu nsi ɨyo, tahayaaga ɨmeeli ɨmo ya yahagʉʉlaga huje, ahabhaazyo ahi‑isasa hashile. Lwa tihwilɨngaanya asogole nɨ meeli, bhahatipeela ɨvyalye na hutipashiilile mu meeli ɨvintu ɨvyɨnjɨ vya tahabhuliliilwe mu nshʉʉla. Ɨmeeli ɨyo yahali ya mwi‑ibooma ɨlyɨ Alekizandiliya. Itaawa lyakwe bhahagaga aBhangʉlʉbhɨ aMapasa. 12Pamandɨ tahashʉʉla, tahafiha hwi‑ibooma ɨlyɨ Silakusa. Tahadɨɨla ʉhwo ɨnsiku zitaatu. 13Afume ɨpo, tahashʉʉla abhale hwi‑ibooma ɨlyɨ Legiyo. Lwa hwasha, ɨhaala ɨya ntende yahavugula. Ɨhaala ɨyo yahataavwa ashʉʉle lubhilo. Ɨndaabhɨ yaakwe tahafiha hwi‑ibooma ɨlyɨ Puteyoli. 14Ʉhwo tahakhomaana na bhooziwa abhamwetu bhamo. Bhahatilamba huje, tikhale nabho ɨnsiku pʉnga (7). Pamandɨ tahashʉʉla lwɨ manama abhale hwi‑ibooma ɨlyɨ Luumi. 15Abhooziwa abhamwetu abha hu Luumi lwa bhʉmvwa huje, tili mwi‑idala abhale humwabho hu Luumi, bhahɨnza hutambɨɨlɨle pi‑ibooma lya bhahagaga Ilembuka ɨlya Apiiyo na pi‑ibooma lya bhahagaga ɨNyumba Zitaatu ɨzya Bhajenu. ɄPaulo lwa wabhalola, ahanʼsalifya ʉNgʉlʉbhɨ. Ʉmwoyo gwa Paulo gwahagwɨla. 16Lwa taafiha hwi‑ibooma ɨlyɨ Luumi, ɨpo ʉPaulo ahɨtɨshɨlwa huje, akhalaje mwene mu nyumba. Leelo pahabha nʉ nʼnwi ʉwa hunʼnɨndɨɨlɨle.

ɄPaulo ahubhalʉmbɨɨlɨla abhantu abha hu Luumi

17Ɨshi lwa taamala ɨnsiku zitaatu paala, ʉPaulo ahabhakwizya abhagoosi bhamo bha Bhayahuudi abha paala. Lwa bhabhʉngaana, ʉPaulo ahabhabhʉʉzya ahaga, “Mwɨ bhaholo bhaanɨ Bhayahuudi, nʉʉmo ʉmuntu ʉwɨ shikholo sheetu wa nahanʼtuliiye zimo, hwope saga nahananjile poshe hu miiho geetu ga bhahatileshɨɨye abhamaama bheetu. Leelo, aBhayahuudi bhamo bhahahata hwi‑ibooma ɨlyɨ Yelusaleemu, bhahambɨɨha mu nyoobhe zya Bhaluumi. 18ABhaluumi bhaala lwa bhambʉzɨɨlɨzya shinza, bhahanzaga aje, bhanigulile. Saga bhahawulolile ʉbhiibhi wa nahabhombile ʉwa‑aje, ɨngaagogwa. 19Leelo, aBhayahuudi bhaala bhonti bhahasinta huje, ɨnigulilwe. Ɨpo nahapootwa ɨlya‑abhombe. Nahalaabha huje, ɨnongwa yaanɨ ɨbhale alongwe hwa mwɨnɨ ʉnʼgoosi ʉKayisali ʉhwu. Abhombe ɨsho saga hulolesya huje, bhasi nahanzaga hubhataake aBhayahuudi abhamwetu. 20Ɨshi ɨmbakwiziizye amwɨ aje, anɨ ɨnjanje naamwɨ ɨnongwa zya zimbɨɨshɨle huje, ɨmpinywe na manyololo ɨga. Ɨntakwilwe hu nongwa ya‑aje, anɨ ɨhumʼmwɨtɨha ʉMeesiya. Ʉmwene lusʉʉbhɨlo lwetu ʉlwo ʉNgʉlʉbhɨ lwa‑ahatilapiiye atɨ huje, ahayihunʼsonteelezya huliitɨ tiBhaizilaeeli.”

21Ɨpo abhagoosi bhaala bha Bhayahuudi bhahamʼmwamula ʉPaulo bhahaga, “Atɨ saga tambɨlɨɨye ɨkalaata yoyonti afume hu mukowa ʉgwɨ Yudeeya yɨ‑ɨyanga ɨnongwa zyaho. Nantele nʉʉmo ʉwamwetu wowonti wa‑ayɨnzɨle afume ʉhwo na‑ayanje ɨmbiibhi zyaho zimo. 22Leelo atɨ tihwanza ahwʉmvwe afume huliiwe shʉ‑ʉsɨɨbha, pɨpo ɨmpʉga ɨnɨ yʉ‑ʉlondolezya timɨɨnye huje, ɨyangwa shibhiibhi hwonti.”

23Ɨpo bhahɨtɨɨhana nʉ Paulo isiku lya bhahayikhomaana mu nyumba ɨyo ʉPaulo ahakhalaga. Isiku ɨlyo lwa lyafiha, aBhayahuudi bhaala bhahabhʉngaana hu winji ashile hwisinda. ɄPaulo ahabhabhʉʉzya ɨnongwa ɨnyinji ɨzyɨ wumwɨnɨ ʉwa Ngʉlʉbhɨ afume shampwi afishe shalyabheela. Ahabhakʉndɨlɨzyaga huje, bhope bhamʼmwɨtɨshe ʉYeesu. Ahabhalangaga na mazwi ga gahasimbwilwe mu ndajizyo zya Moose na mu vitaabu vya bhakuwi bha Ngʉlʉbhɨ abhɨ mandɨ ga gayanga ɨnongwa ɨzya Yeesu. 24Bhamo mu Bhayahuudi bhahagɨɨtɨha amazwi gaala ʉPaulo ga‑ahayangaga hu nongwa ya Yeesu huje gɨ lyoli. Leelo bhamo bhahagakhaana. 25Ɨshi hwahabha nʉ legano ʉwɨ nsɨɨbho bheene hu bheene. Ɨpo bhahanda asogole. Lwa bhasogola, ʉPaulo ahabhabhʉʉzya ahaga, “ɄMʼpepo ʉMʼfinjile ahayanjile gɨ lyoli, lwa‑ahabhabhʉzyaga abhamaama bheenyu ashilile hwa nʼkuwi wa Ngʉlʉbhɨ ʉYesaaya huje,

26‘Bhala hwa bhantu ɨbha, ʉbhabhʉʉzye ɨshi,

“Lyoli mwahayitejelezyaga,

leelo saga mwahayihuzyaganyaaga nka zimo.

Nantele, mwahayenyaaga,

leelo saga mwahayihuzilolaga nka zimo.

27Amooyo gaabho abhantu ɨbha makhome,

amakutu gaabho madinde,

nantele amaaso gaabho saga galola.

Nkashele saga zyabhanga ɨsho,

amaaso gaabho handɨ galola,

amakutu gaabho handɨ gatejeelezya,

nantele, amooyo gaabho handɨ gahuzyaganya,

bhɨnzaga hungalushile, nanɨ ɨpo nɨnzaga hubhafyʉle.” ’ ”#Bhaazya Yesaaya 6:9-10.

28ɄPaulo ahajendeelela ayanje ahaga, “Ɨshi! Mumanye shinza huje, ʉfyʉli ʉwu wa wufumile hwa Ngʉlʉbhɨ, wubhalile na hwa bhantu bha saga Bhayahuudi. Abheene bhahayʉmvwa na hwambɨɨlɨle ʉfyʉli.”

29ɄPaulo lwa waamala ayanje amazwi ɨgo, aBhayahuudi bhaala bhahasogola sha bhadaliihana tee.#28:29 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.

30Hu habhaazyo ahɨ maaha gabhɨɨlɨ, ʉPaulo ahakhalaga mu nyumba ya‑ahapanjile yʉʉyo. Hu habhaazyo ɨho honti, ahabhejelelaga mwʉmwo bha bhahamʼmwɨnzɨlaga. 31Ahabhalʉmbɨlɨlaga abhantu ɨnongwa ɨzyɨ wumwɨnɨ ʉwa Ngʉlʉbhɨ, na hubhamanyizye ɨNongwa ɨNyinza ɨzya Mwɨnɨ ʉYeesu ʉKilisiti hu dandamazu, sinta akhaanwe nʉ muntu wowonti.

Currently Selected:

ƗMbombo ɨzya Bhasontwa 28: SBK

Highlight

Copy